| ◄ Laisse CXLV | Laisse CXLVI | Laisse CXLVII ► |
Dist Feragu, que comance a sorir :
« Diva, Rollant, que vient dunc ce a dir ?
« Et chi me doit de moi plus chier tenir ? »
Respont Rollant : « Cil que se voit morir
« E ne se volt, quant il poit, guarentir,
« Par ignorance se leise a mort venir,
« Cil n’ame soi, par voir le pois je dir ;
« Mais cil qe seit d’un grant pericle ensir
« O d’un domaje qe li puse avenir,
« Celui doit home honorer e servir.
« Vos quatre Diex sunt feit par vos traïr,
« Par vos gaber et par vos eschirnir ;
« Cels font vos armes as Diable tolir.
« Mais stu voloies ces faus ydles guerpir
« E croire Diex par ta arme garir,
« Tu me veroies aprestez d’obeïr
« En totes coses qe te fus a pleisir. »
Dist Feragu : « Ja cro je Alakibir
« Che fist le munde e le puet difinir.
« Stu me savoies autre cose gehir
« Che je poüs conostre et asentir
« Qué chose est Diex, mout seroit da graïr.
« Se tu me sais dou toz bien esclarir,
« A ce qe puse le feu d’enfer fuïr,
« Aparilez me sui de convertir. »