| ◄ Laisse DC | Laisse DCI | Laisse DCII ► |
Hue prant le convers Aquilant por la man ;
Snellemant desendirent dou palés ançean,
Les armes e le hernois au senator Roman
Vunt en grant males metre forees de bougueran ;
Les cevaus coreer funt d’avaine e de fan ;
Ne seront ma qe trois e le niés Carleman.
Tot le jor jusqu’au vespre tient son conseil Soldan.
Rolant a les barons dou païs Sirian
Mout lor lohe Anseïs de proeche e de san
E de jantil lignaje, tot jor de valor plan.
« Segnor », ce dit le dus, « a non parler en van,
« Vos avés a segnor un noble Cristian :
« Il n’ert pais entre vos a guise de tyran,
« Mais fier e jostisable e dous e onble e plan.
« En vos ai grant fiance, s’en croi estre certan,
« Que vos l’amerois mieus qe ore a chief de l’an.
« A Diés e vos le rant e al roi Persian,
« Ctr départir m’estuet de vos a l’endoman. »