| ◄ Laisse DCI | Laisse DCII | Laisse DCIII ► |
Doulant sunt les barons qant le congié fu pris.
Dou remanoir formant proierent le marchis,
Car tut seront si homes e jurés e plevis,
Aiderunt li conquere li estranjes païs,
Babilone e Chaldee, les bos e les laris,
La tor ou des langajes fist Nembrot les divis,
Tote tere d’Egit e Sidonie neïs.
Formant les en mercie le dus pouesteris :
« Barons, je m’an irai ou roi de San Donis
« Por achever ce q’ai en Espagne promis ;
« Quant avrons le chemin de Sant Jaqes conqis,
« A vos retornerai, se je suis sans e vis.
« En leu de moi vos lés le bon rois Anseïs,
« Si por amor de lui, s’il vos ert bons e pis,
« E por amor de moi le regardés tot dis. »
Li baron jurerent le non de Jesu Cris
Que mais ne li faudront le grans ne le petis.
Pués proierent le duch por Diey de Paradis
Qu’il amaint avec lui lor freres e lor fis
Qi seront en Espagne tot jor a son servis ;
Mais ja n’en amenra ni joune ome ni gris,
For solemant Huon et les dos convertis.