◄ Laisse DCLXXVIII | Laisse DCLXXIX | Laisse DCLXXX ► |
Le duc regarde, voit li rois che venoit,
O lui duc Naime et Oger ad esploit ;
Le roi perçuit la prese ch’ entor estoit
Au fil Milon, il mesme coneoit :
« Por san Donis », dit il, « voire dissoit
« Le pro Rainier, e de rien non gaboit.
— Voir », dit Oger, « se soie beneoit. »
Le petit pas, que premier cevalcoit,
Fist il venir assez plus che de troit.
Rolant encontre son oncle s’en venoit ;
Tost che le roi descendre luy voloit,
Le duc l’enbrace la janbe et le piez droit.
Le roi desend del cival o seoit ;
De pietié e joie le cor oit si destroit,
Qu’en celu pont, par tot l’or che ce soit,
Non poüst mie ver lui parler un moit.
Davant son niés engenolé seroit
Mercé crïer de ce che feit li oit,
Més cil, che tot de bonté sormontoit,
S’engenola, si con fere devoit,
Davant celu che plus de cor amoit
D’ome del secle, e merci le crioit.