◄ Laisse DCXXX | Laisse DCXXXI | Laisse DCXXXII ► |
Rolant voit de l’hermite le ancïen visaire
Qi senbloit de la barbe Abraant o Machaire ;
Entant q’il le manaçe s’il li demoroit gaire.
« Ermite », dist le dux, « je soi de meilor aire
« En amer Jesu Crist qe le cors non te naire :
« Se tu crois Trinité, je ne sui son contraire.
« Proier en remembrance te veul de cil sudaire
« Que gari de ladrie le Roman enperaire
« E por l’amor la Vergne qe tot le monde sclaire
« Que tu ovres la enç le neveu d’un Cesaire.
« Cil puei parler te veut avant q’il s’en repaire ;
« Le uns poroit de l’autre aucune profit traire.
« Je ai dui compaignons, qe je aim come fraire,
« Leisiés en mié cil val o nule erbe ni flaire :
« Si somes arajés ja ne savons qe faire.
« Je ne te puis parler, que il me convient a braire ;
« Mais devale cil pont qi cluit ton abitaire,
« Por amor de cil Sire qi dona en dohaire
« Les cliés dou Paradis saint Piere, son vichaire.
« Non doter plus mes armes cun se fosent une aire,
« Qel garnimant ne l’ome n’avras por aversaire. »