◄ Laisse DCXXXIII | Laisse DCXXXIV | Laisse DCXXXV ► |
Or sont enz le remite li dui ensanble entré ;
Rendue fu le crois e le pont sus levé.
En un petit enclostre, foilus si come pré,
A il l’ermite a lui nostre duch amené ;
Iluech deceint son brant, son hiaume a deslacé.
Le viel home s’asist, e Rolant a son lé.
Les pieus qe les ols cluit a o ses mains levé.
« Amis », dit il, « or dites, de qeil tere estes né ?
« Comant venistes ça ? Qi vos i a gïé ?
« Q’en cestu leu sovaje, .lxxx. an passé,
« Non li vi ni senti nus hon crestïené,
« Fors solement vos cors, qi jantils sanble asé.
« Espeir q’il vos amaint divine volunté
« Por qoi avant la mort me voie acontanté
« D’un Crestïen veoir, envers Deu souploié ».
E le duch respondi a ce q’il fu rové ;
Son per e son aiol e Karles a nomé
Qui rois estoit de Rome e dou François regné ;
Conte lui com il a en Rome dignité,
Car senator estoit de cil pueble clamé.
Dist li comant il sont in Espagne lojé
Li baron Cristïen, qe tut i sont croisé ;
De la prise de Noble e dou roi corocé
Con le feri dou guant i dist la verité,
E con il passa mer e com s’en est torné,
Le ensir de la nef, l’entrer dou bos ramé,
E de son compagnon qe li avoient tüé
Li Païn dou desert q’avoient encontré,
E con avoit les dous dedenz ou val laisé,
Q’ancor l’atendeient de paor engonbré.
Quant le hermite l’oï, si l’en prent grant pieté.