◄ Laisse DXLIX | Laisse DL | Laisse DLI ► |
Soz la cités, la o la giant Paiaine
Orent Mahon, que a morir les amaine,
La soi cunbait le neveu Charlemaine
Vers Pelliais, le ardis zavetaine.
Fors Feragus et Claires souz Viaine,
Non trovoit home de si tres fiere alaine.
Chant l’une spee fu de l’autre prozainne,
Le duc Roulant lieve le souveraine,
Pelliais fiert ausi com en quintainne,
La targe fause cun se elle fust de laine ;
Fort fu l’aubers, chant tel brant non le daine.
Cyl refiert lui cum aÿrouse vaine
Amont en l’eume Agoulant li soldaine :
Le duc Roulant le cunquis la semaine
Qu’il fist Clairon l’arme del cors lontaine ;
Non l’inpiroit li Païns une chaine.
Adunques double une bataille straine :
De cleires mailes firent covrir l’araine ;
En pué de termen entr’aus n’ot targe saine.
Qui donc veïst la belle Persiaynne
(Ce est Dionés) coment grant duel demaine ;
Les oil sordent de li coume fontaine ;
A une part s’an vint en mi la plainne,
En jeneillon s’est mise paille et vaine,
Une oraisons en la lois Aufricaine
Encomença, c’unques la Madelaine
Davant Yesu non la fist plus humaine.