| ◄ Laisse DLXXX | Laisse DLXXXI | Laisse DLXXXII ► |
La poncele suspire char Amors la justisse ;
Mais Rolant s’estoit mis in autre convotisse.
Soudan intre in le salle, o fu l’eve requise ;
A disner tuit insanble est cele gant asise.
Et chant il ont mangé, le roi fait sa devise.
Un palais fist trover d’une salle terlise :
In cief ot une tors molt belle in strange gise,
L’invers i fait grant chaut et in istez la bise.
La fait mener le fils Bertaine la marchise
Et Sanson avec lui, que molt le ame e prise.
Soudan fait comander ch’un la masons fornise
De blee et fain et d’autres garantise.
Tiels dis detrers lor mant, cescuns la sele mise,
Que li pires vausist vint mars jusques en Frise,
Et autretant de pieces de pailles de Larise.
Li pers de le citez firent grant jentilise :
Qui fils, qui frer, qui niés li bailent in servise ;
Qui mielz li presenta, le tint grignor franquise.
Molt a bien le niés Karle icele gent aquise ;
Mais a petit de termens convint que le merise :
Por eus in ovrera proesce et maïstrise.