◄ Laisse DXCVI | Laisse DXCVII | Laisse DXCVIII ► |
Ou palés sunt montés droit en terce sonant ;
Ja donerent il l’aigue escüers e sergiant.
A disner sunt asis tut comunablemant ;
Asés unt a mangier li petit e li grant ;
Pués leverent da table quant lor vient a talant.
Quant il ont relavé e beüs ensemant,
Rolant s’en vient o roi Soldan, ou poing le prant ;
Marcel le patriarche a pris par mi le guant.
Anseïs en apelle : « Dan roi, venés avant,
« E vos, sire Sanson, et Huons ensemant. »
A une part les a trait, pués dist paisiblemant :
« Gentil syre de Perse, honor m’aveis feit grant ;
« Quant estes batiçés par vostre sauvemant,
« De reveor mon oncle sui forment desirant.
« Il a sofraite heü de moi, je sui creant ;
« Mais de vos non seroie sevrés a mon vivant
« Que je finis n’aüse mon encomencamant.
« La merci Nostre Sire, oncis est Malquidant,
« Ses grans amis destruit ; n’i a remis parant
« Que geroier vos puisse d’un diner valesant.
« Riches estes d’avoir et d’onor et de jant :
« Qui tant tient come vos, bien doit estre contant ;
« E quant contant vos voi, le congié vos demant.
« Une rien vos afi, senz plus long saigremant :
« S’il vos i acroist gere por home outrequidant
« E se je en savrai novelle ni senblant,
« A vos retornerai ; si vos di voiremant
« Que je ne venrai mie a gise de sergant,
« Mais con la flor des homes et dou batisme sant.
« Dou bien e de l’honor e de l’acointemant
« Que m’avés, sire, fait, Jesus onipotant
« Vos en rende merit e vos e vostre enfant.
« Ne vos en veul plus dir, fors sol qu’a Diey vos rant. »