◄ Laisse DXXIV | Laisse DXXV | Laisse DXXVI ► |
Le roi de Perse mout regarde Rolant ;
Il en apelle Sansonet, son enfant.
« Bel fil », dit il, « je le vos recomant
« Tant qe seromes a fins dou jujemant. »
Li damoissel, qu’il amoit fortemant,
Rolant garda, son cors e son senblant ;
Mout i pleisot. Tost se drece en estant ;
Dejoste lui le asis maintenant ;
Encor n’avoit ostei son garnimant.
Soldan comance : « Sire roi Malqidant,
« Ohi avés le doumaje pesant
« Qe avient e acidist en Espaigne la grant :
« Oncis vos a Rolant vostre parant,
« C’est Feragu, qi tant fu fort e grant.
« Or sunt les host de le Françoise çant
« A Pampellune, e croi que plus avant
« Iront por force les terres conquerant.
« Aiez pieté, je vos pri dousemant,
« Des fils Galafres que vos par ament tant :
« Vos cuisins sunt, et je lor bienvoilant.
« Ne gardez, sire, a la faute ma enfant,
« Mais prenez la par iteil convenant
« De mes citei vos outroi la plus grant
« E treis des autres en doaire vos rant ;
« Pués pasons mer trestuit ensemblemant.
« Mout par est fous Carles, s’il nos atant :
« Vengerons nos de son neveu Rolant
« Qi tant nos veit nostre loi domajant ;
« Ja les François ne s’an iront gabant ;
« Jamais en France n’en ert uns repeirant. »