◄ Laisse DXXXVII | Laisse DXXXVIII | Laisse DXXXIX ► |
De ces parolles Pelias se gaba ;
Prist a froncher, et les oil roela ;
Son brant domande, et Gabor li aporta :
Ce fu la spie dun Açilés tua
Le bon Troillus, que Prian engendra ;
Villainemant l’oucist et asauta :
Paris, son frere, puis aprés le venja
Qant il li darç au tenple li lança
A celui jor que il parlamenta ;
Pollisinan a fame avor cuda :
Daire le conte, qui ce autoriça.
Cil cinst la spie, que plus non demora.
Li roi, son oncle, un eume li laça :
Le buens Hetor en beson le porta,
Protesillas oncist et devia
Q’al port de Troie primerement entra ;
De celle mort sa fame devina,
Al departir assés le castoia ;
Non l’en veust croire, dun mal in acheva ;
Hetor l’oucist et l’eume gaagna.
Cist Pellias en son chief le ferma ;
Qant oit ce feit, son ceval demanda.