◄ Laisse LVII | Laisse LVIII | Laisse LIX ► |
« Dame sante Marie », feit li quens Anseïs,
« Con des or nos sera chier vendu cist peïs,
« Quant des miaudres de nos sunt li troi ore pris !
« Rollant, quant le savrais, mout en serais pensis.
« Mais, foi qe je dol Diex, je ne verai tes vis
« Si rescorai li conte, o li tes enemis
« Me meneront a lor en la ville chetis. »
Lors leve sa mans destre, la cros se fist el vis ;
Pués prend congé des autres, si les a beneïs.
Son esplié paumoiant veit ferir l’Arabis
Par desor son escuz ; ne l’a freit ne maumis ;
L’aste par fu tant grosse, ne la puet le marchis
Pecoier ni briser, dont mout an fu depis.
Son ceval cheit ariere an mé le camp floris ;
Le vasal veult lever a loi de manoïs,
Quant le neveu Marsille lui cort sovre ademis :
Sotemant de son poing li fiert si sor le pis
C’une autre foiz a terre l’abat tot estordis ;
Pués a trete l’espee ; illoc l’eüst oncis,
Mais le barons se rend ; n’en doit estre repris.
Aprés ses compeignons l’a Feragu tremis.
Merveilos duel an font e mout grant ploreïs.