◄ Laisse LXIV | Laisse LXV | Laisse LXVI ► |
A ses Paiens s’en retorne l’Esclé.
« Sor toz les autres cestui bien me gardé.
« Por Mahomet, bien avons començé :
« Hoi avons prise flors de Cristenté,
« Ce est Oliver, li segont plus loé.
Lors fu, le duc mantenant desarmé
D’obers, d’escu, de verd hiaume jemé.
Dedans la ville, o sont enpresoné
Li autre per, l’en ont Paiens mené.
L’escu eu col, tot le fust entesé,
Vers le pont est Feragu retorné.
Le duc de Lengres l’a ferement gardé,
Por Oliver a grant duel domené.
« E Diex ! dist il, « par la vostre pieté,
« Si voiremant com par le Adam peché
« Venis o monde et in fluns batiçé,
« E par juïf en cros mort pené,
« Si com je sui creant par virité
« Che susitastes dou sepulcre, gardé
« Mon cors de mort, e grace moi doné
« Che je conquere cist hom desmesuré
« Chi mi compaing a pris et enseré :
« Anz qe Rollant soie ci arivé,
« O mort o pris l’aie ; si ferai jé
« En vos espoir. » Lor a son vis segné,
Par les enarmes a son eschu cobré,
Paumoie l’aste dou fort trençant esplé,
A core mist le destrier sejorné,
Vers l’Arabis s’an vient tot abrievé.