◄ Laisse XLVII | Laisse XLVIII | Laisse XLIX ► |
« Mesajer frere, dirais nos Feragu,
« Se tant est proz cum avons entendu,
« Qe maint prodomes sunt de lor terre ensu
« Qe por honor conquere jusqe ci sont venu.
« Volonter mostreroient cescuns d’els sa vertu
« A cors a cors, uns a uns, dui a du ;
« Alors seroit son valors coneü.
— Par Diex », ce a Norbredas respondu,
« Par ce venimes, non por autre salu.
« Plus joianz home de mon seignor ne fu
« De trover jostre de vasal perceü.
« Jentil roi sire, quant je parti de lu,
« Par moi vos mande qe Rollant vostre dru
« Li envoiez en mié cil prez erbu :
« Se tant puet fere qe Rollant soit vencu,
« Tornez vos en el reing ond Pepins fu ;
« E se mes sire se tient por recreü,
« Dir puet Marsilles q’el a dou tot perdu ;
« Plus ne vos ert le chemins defendu.
« Se envoier ne li voroiz çelu,
« Mandez li cil qe Rollant ame plu ;
« Ce est Oliver, le niés Girard le du ;
« Conbatront soi an mié cil prez erbu,
« L’uns por Machon et l’autre por Jesu :
« Se mon seignors se clame recreü,
« L’entrer d’Espaigne ne vos iert detendu.
« Seguremant, se il sera vencu,
« Petit poroiz doter home nascu
« Qu’a vos se taigne, tresqu’as bones Arcu.