| ◄ Laisse XXI | Laisse XXII | Laisse XXIII ► |
Le cierge leit la carte a lor
Et dist ce qe contient desor :
« Nos Marsille por la Dex grace
« Rois d’Espaigne e de Dalmace,
« De mie Navarre e de Ragons,
« Ne tenans pas feu de nus hons,
« A vos gentis rois Carlemaigne,
« Sire de France et d’Alemaigne,
« Enpereor de Rome e roi,
« Gregnor de vos non sai ne croi :
« Cun grant amor e bone entance,
« Senz malvaistez aiez creançe
« Q’en vestre loi mandons salu.
« Oïz avons et entendu
« Qe une partie de vostre gent
« A grant esfors de garniment
« Noz sunt venus dedanz Navaire,
« E ne sevons qe il veulent faire.
« Aprés savomes d’autre part
« Q’avois mandés et breus et cart
« Par tot les gient de vostre terre :
« Ce nos resanble huevre de gerre,
« E par itan avons dotance,
« Que non savomes vostre entance.
« Se vos dotomes n’est merveille,
« Quant nos avons joste l’oreille
« Un tant puisanz rois com vos estes.
« Car, si com est sor toz les bestes
« Le lions rois et soverans,
« Tot ensi estes sor li terrans.
« Por tant mandons cartes e breu,
« Que nos mandez dir en qeil leu
« Vos plait aler e en qeil part,
« Car gent a lances et a dart
« Vos manderons en gran partie,
« Nun por autre qe cortesie,
« Car penser vos porïez riens
« Qe nun seroit ni sains ni biens.
« Se ne nos faites asavoir
« En quel part est vostre voloir,
« Ne nos tenez par ice fol,
« Qe ja n’avons le cuer si mol
« Qe ne gardons nostre peïs.
« Tant tost ferons les nos amis
« Tretut somondre et envoier ;
« Plus en avrons de .c. miler,
« Des qu’avrons feite l’asemblaille.
« Un autre riens sacés sans faille,
« C’aler voudriés en tel partie
« Que ja nel vous sofrirons mie.
« Mais le meillors vos rovons feire,
« Por nos et vos de mal retraire :
« Mandez noz dir se regarder
« Doit l’on de vos, o quoi ester,
« Car nos crerons le vostre mant
« Plus que de nus home vivant.
« S’adonc le feites, v’ert honor,
« Com s’aconvient a enpereor
« Et a loial roi com vos estes.
« S’a desfiaille nos mesfetes,
« Blasmer ne vos an puet nus hon.
« Or nos mandez o si o non
« Que devons feir. » Et ci finist
Le breus, el clerge plus non dist.