◄ Laisse XXVIII | Laisse XXIX | Laisse XXX ► |
Cevaucerent Feragu et cellor ;
De Laçarain ferent garnir la tor.
Quant il furent sejornez, le terç jor,
Ou qatre mille de la gent Paienor
Dans Jocerins e Norbredas de Tor
Cevaucherent vers la terre Francor
Tote une nuit, e, quant vient a l’aubor,
Vont oncians païsans et pastor ;
Molt grant domaje en font li coraor,
A mout grant proie tornerent a baudor
De boef, de vaces et de muls ambleor
Et de cheitis qi ourent mal sejor :
Plus de troi mille en rendrent lor seignor.
Reclains en vient Ogier le poigneor.
Al rois envoie, qe trop feit grant demor ;
Alor fist Carles desploier l’orieflor ;
Car et caretes et roncins torseor
Que cars et vins portent et le pains cuet en for
Avant envoie le maigne empereor.
Baxins de Lengres, cil en fu conductor,
Qe proz et saje estoit e amoit honor.
Du roi crïent par l’ost li bannior
C’a l’endemains, en nom le Creator,
Cevauceront li grant et li menor.