La Chanson de Roland/Léon Gautier/Édition critique/Troisième partie/Texte
LE CHÂTIMENT DES SARRASINS
Morz est Rollanz, Deus en ad l’anme es cels…
— Li Emperere en Rencesvals parvient.
Il n’en i ad ne veie ne senter,
2400Ne voide terre ne alne ne plein pied
Que il n’i ait u Franceis u païen.
Carles escriet : « U estes vus, bel niés ?
« U est l’Arcevesques et li quens Olivers ?
« U est Gerins e sis cumpainz Gerers ?
2405« U est Otes e li quens Berengers,
« Ives et Yvories, que jo aveie tant chers ?
« Que est devenuz li Guascuinz Engelers,
« Sansun li dux e Anseïs li bers ?
« U est Gerarz de Russillun, li velz,
2410« Li .xii. Per que jo aveie laisset ? »
De ço qui chalt, quant nuls n’en respundiet ?
« Deus, dist li Reis, tant me puis esmaier
« Que jo ne fui à l’estur cumencer ! »
Tiret sa barbe cum hom ki est irez.
2415Plurent des oilz si barun chevaler ;
Encuntre tere se pasment .xx. miller :
Naimes li dux en ad mult grant pitet. Aoi.
Il nen i ad chevaler ne barun
Que de pitet mult durement ne plurt :
2420Plurent lur filz, lur freres, lur nevulz
E lur amis e lur liges seignurs.
Encuntre tere se pasment li plusur.
Naimes li dux d’iço ad fait que proz,
Tut premereins l’ad dit l’Empereür :
2425« Veez avant de dous liwes de nus :
« Veeir puez les granz chemins puldrus,
« Qu’ asez i ad de la gent païenur.
« Kar chevalchez : vengez ceste dulur.
« — E Deus ! dist Carles, ja sunt il là si luinz !
2430« Cunsentez mei e dreiture e honur :
« De France dulce m’unt tolue la flur. »
Li Reis cumandet Gebuin e Otun,
Tedbald de Reins e le cunte Milun :
« Guardez le camp e les vals e les munz,
2435« Laissez gesir les morz tut issi cum il sunt,
« Que n’i adeist ne beste ne leun,
« Ne n’i adeist esquiers ne garçun ;
« Jo vus defend que n’i adeist nuls hum,
« Jusque Deus voeille que en cest camp revengum. »
2440Et cil respundent dulcement par amur :
« Dreit emperere, cher sire, si ferum. »
Mil chevalers i retienent des lur. Aoi.
Li Emperere fait ses graisles suner ;
Puis, si chevalchet od sa grant ost, li bers.
2445De cels d’Espaigne unt les esclos truvez,
Tenent l’enchalz, tuit en sunt cumunel.
Quant veit li Reis le vespre decliner,
Sur l’erbe verte descent il en un pret,
Culchet sei à tere, si priet damne Deu
2450Que le soleill pur lui facet arester,
La nuit targer e le jur demurer.
As li un angle ki od lui soelt parler,
Isnelement si li ad cumandet :
« Carle, chevalche : kar tei ne faldrat clartez.
2455« La flur de France as perdut, ço set Deus ;
« Venger te poes de la gent criminel. »
A icel mot l’Emperere est muntez... Aoi.
Pur Carlemagne fist Deus vertuz mult granz :
Car li soleilz est remés en estant.
2460Païen s’en fuient, ben les enchalcent Franc ;
El’ Val-Tenebres, là les vunt ateignant ;
Vers Sarraguce les enchalcent ferant,
A colps pleners les en vunt ociant,
Tolent lur veies e les chemins plus granz.
2465L’ewe de Sebre el lur est dedevant :
Mult est parfunde, merveilluse e curanz ;
Il n’i ad barge ne drodmund ne caland.
Païen recleiment un lur deu Tervagant ;
Puis, saillent enz, mais il n’i unt guarant.
2470Li adubet en sunt li plus pesant,
Envers le fund s’en turnerent alquant,
Li altre en vunt encuntreval flotant,
Li melz guarit en ont boüt itant,
Tuit sunt neiet par merveillus ahan.
2475Franceis escrient : « Mar veïstes Rollant ! » Aoi.
Quant Carles veit que tuit sunt mort païen,
Alquant ocis e li plusur neiet
(Mult grant eschec en unt si chevaler),
Li gentilz reis descenduz est à pied,
2480Culchet sei à tere, si’n ad Deu graciet.
Quant il se drecet, li soleilz est culchez.
Dist l’Emperere : « Tens est de l’ herberger,
« En Rencesvals est tart de l’ repairer.
« Noz cheval sunt e las e ennuiet ;
2485« Tolez les seles, les freins qu’il unt es chefs,
« E par cez prez les laissez refreider. »
Respundent Franc : « Sire, vus dites ben. Aoi.
Li Emperere ad prise sa herberge ;
Franceis descendent en la tere deserte.
2490A lur chevals unt tolues les seles,
Les freins ad or lur metent jus des testes ;
Liverent lur prez : asez i ad fresche erbe ;
D’altre cunreid ne lur poent plus faire.
Ki mult est las il se dort cuntre tere ;
2495Icele noit n’unt unkes escalguaite. Aoi.
Li Emperere s’est culcet en un pret,
Sun grant espiet met à sun chef li bers ;
Icele noit ne se voelt il desarmer,
Si ad vestut sun blanc osberc safret,
2500Lacet sun helme ki est ad or gemmez,
Ceinte Joiuse, unkes ne fut sa per,
Ki cascun jur muet .xxx. clartez.
Asez savum de la lance parler
Dunt Nostre Sire fut en la cruiz naffrez :
2505Carles en ad l’amure, mercit Deu !
En l’oret punt l’ad faite manuverer.
Pur ceste honur e pur ceste bontet
Li nums Joiuse l’espée fut dunez.
Barun franceis ne l’ deivent ublier :
2510Enseigne en unt de Munjoie crier ;
Pur ço ne ’s poet nule gent cuntrester. Aoi.
Clere est la noiz e la lune luisanz.
Carles se gist, mais doel ad de Rollant
E d’ Oliver li peiset mult forment,
2515Des .xii. Pers e de la franceise gent
Qu’ en Rencesvals ad laisset morz sanglenz ;
Ne poet muer n’en plurt e ne s’ desment,
E priet Deu qu’as anmes seit guarenz.
Las est li Reis, kar la peine est mult granz ;
2520Endormiz est, ne pout mais en avant.
Par tuz les prez or se dorment li Franc ;
N’i ad cheval ki puisset estre en estant :
Ki erbe voelt il la prent en gisant.
Mult ad apris ki ben conuist ahan. Aoi.
2525Carles se dort cum hume traveillez.
Seint Gabriel li ad Deus enveiet,
L’Empereür li cumandet à guarder.
Li Angles est tute noit à sun chef.
Par avisiun li ad anunciet
2530D’une bataille ki encuntre lui ert :
Senefiance l’en demustrat mult gref.
Carles guardat amunt envers le cel,
Veit les tuneires e les venz e les giels
E les orez, les merveillus tempez ;
2535E fous e flambe i est apareillez :
Isnelement sur tute sa gent chet ;
Ardent cez hanstes de fraisne e de pumer
E cez escut jusqu’as bucles d’or mer ;
Fruissent cez hanstes de cez trenchanz espiez,
2540Cruissent osberc e cez helme d’acer.
En grant dulur i veit ses chevalers.
Urs e leupart les voelent puis manger ;
Serpent e guiveres, dragun e averser :
Grifuns i ad plus de trente millers,
2545N’en i ad cel à Franceis ne se get.
E Franceis crient : « Carlemagne, aidez ! »
Li Reis en ad e dulur e pitet,
Aler i voelt, mais il ad desturber :
Devers un gualt uns granz leün li vient,
2550Mult par ert pesmes e orguillus et fiers ;
Sun cors méisme i asalt et requert,
E prenent sei à braz ambesdous pur loiter ;
Mais ço ne set quels abat ne quels chet...
Li Emperere ne s’est mie esveillet. Aoi.
2555Apres icelle li vient altre avisiun :
Qu’il ert en France ad Ais, ad un perrun,
En dous chaeines si teneit un brohun ;
Devers Ardene veeit venir .xxx. urs,
Cascuns parolet altresi cume hum.
2560Diseient li : « Sire, rendez le nus !
« Il nen est dreiz que il seit mais od vus ;
« Nostre parent devum estre à sucurs. »
De son paleis uns bels veltres acurt,
Entre les altres asaillit le greignur
2565Sur l’erbe verte, ultre ses cumpaignuns.
Là vit li Reis si merveillus estur ;
Mais ço ne set li quels veint ne quels nun...
Li Angles Deu ço ad mustret à l’ barun.
Carles se dort tresqu’ à l’ demain à l’ cler jur. Aoi.
2570Li reis Marsilies s’en fuit en Sarraguce,
Suz un olive est descenduz en l’umbre ;
S’espée rent e sun helme e sa brunie,
Sur la verte erbe mult laidement se culchet ;
La destre main ad perdue trestute,
2575De l’ sanc qu’en ist se pasmet e anguiset.
Dedevant lui sa muiller Bramimunde
Pluret e criet, mult forment se doluset,
Ensembl’od li plus de .xx. mil humes
Ki maldient Carlun e France dulce.
2580Ad Apolin en curent en une crute,
Tencent à lui, laidement le despersunent :
« E ! malvais deus, pur quei nus fais tel hunte ?
« Cest nostre rei pur quei laissas cunfundre ?
« Ki mult te sert, malvais luer l’en dunes »
2585Puis, si li tolent sun sceptre e sa curune,
Par les mains le pendent desur une culumbe,
Entre lur piez à tere le tresturnent,
A granz bastuns le batent e defruisent.
E Tervagan tolent sun escarbuncle,
2590E Mahumet enz en un fosset butent,
E porc e chen le mordent e defulent... Aoi.
De pasmeisun en est venuz Marsilies,
Fait sei porter en sa cambre voltice ;
Plusurs culurs i ad peinz e escrites.
2595E Bramimunde le pluret, la Reïne,
Trait ses chevels, si se cleimet caitive.
A l’ altre mot, mult haltement s’escriet :
« E ! Sarraguce, cum es hoi desguarnie
« De l’ gentil rei ki t’aveit en baillie !
2600« Li nostre deu i unt fait felonie,
« Ki en bataille hoi matin le faillirent.
« Li Amiralz i ferat cuardie,
« S’il ne cumbat à cele gent hardie
« Ki si sunt fier n’unt cure de lur vies.
2605« Li Emperere od la barbe flurie
« Vasselage ad e mult grant estultie ;
« S’il ad bataille, il ne s’en fuirat mie.
« Mult est grant doel que nen est ki l’ ociet. » Aoi.
Li Emperere, par sa grant poestet,
2610.Vii. anz tuz pleins ad en Espaigne estet ;
Prend i castels e alquantes citez.
Li reis Marsilies s’en purcacet asez ;
A l’ premer an fist ses brefs seieler,
En Babilonie Baligant ad mandet :
2615(Ço est l’Amiralz, li velz d’antiquitet,
Tut survesquiet e Virgilie e Omer),
En Sarraguce l’alt succurre, li bers ;
E, s’il ne l’ fait, il guerpirat ses deus
E ses ydeles que il soelt aürer,
2620Si receverat seinte chrestientet,
A Carlemagne se vuldrat acorder.
E cil est loinz, si ad mult demuret.
Mandet sa gent de .xl. regnez ;
Ses granz drodmunz en ad fait aprester,
2625Eschiez e barges e galies e nefs.
Suz Alixandre ad un port juste mer :
Tut sun navilie i ad fait aprester…
Ço est en mai, à l’ premer jur d’estet,
Tutes ses oz ad empeintes en mer. Aoi.
2630Grant sunt les oz de cele gent averse :
Siglent à fort e nagent e guvernent.
En sum cez maz et en cez haltes vernes,
Asez i ad carbuncles e lanternes ;
Là sus amunt pargetent tel luiserne
2635Par la noit la mer en est plus bele.
E, cum il venent en Espaigne la tere,
Tuz li païs en reluist e esclairet ;
Jusqu’à Marsilie en parvunt les nuveles. Aoi.
Genz païenur ne voelent cesser unkes :
2640Issent de mer, venent as ewes dulces ;
Laissent Marbrise e si laissent Marbruse,
Par Sebre amunt tut lur navilie turnent.
Asez i ad lanternes e carbuncles :
Tute la noit mult grant clartet lur dunent.
2645A icel jur venent à Sarraguce. Aoi.
Clers est li jurz e li soleilz luisanz.
Li Amiralz est issuz de l’ caland,
Espaneliz fors le vait adestranz,
.Xvii. rei après le vunt siwant ;
2650Cuntes e dux i ad ben ne sai quanz.
Suz un lorer, ki est en mi un camp,
Sur l’erbe verte getent un palie blanc,
Un faldestoed i unt mis d’olifant ;
Desur s’asiet li païens Baliganz,
2655E tuit li altre sunt remés en estant.
Li sire d’els premers parlat avant :
« Ores oiez, franc chevaler vaillanz :
« Carles li reis, l’emperere des Francs,
« Ne deit manger, se jo ne li cumant.
2660« Par tute Espaigne m’ad fait guere mult grant ;
« En France dulce le voeill aler queranz :
« Ne finerai en trestut mun vivant,
« Jusqu’il seit morz u tut vifs recreanz. »
Sur sun genuill en fiert sun destre guant. Aoi.
2665Puis qu’il l’ad dit, mult s’en est afichet
Que ne lairat pur tut l’or desuz cel
Qu’il alt ad Ais ù Carles soelt plaider.
Si hume li lodent, si li unt cunseillet.
Puis, apelat dous de ses chevalers,
2670L’un Clarifan e l’altre Clarien :
« Vus estes fil à l’ rei Maltraïen,
« Ki mes messages suleit faire volenters.
« Jo vus cumant qu’en Sarraguce algez ;
« Marsiliun de meie part nunciez,
2675« Cuntre Franceis li sui venuz aider ;
« Se jo truis l’ ost, mult granz bataille i ert ;
« Si l’en dunez cest guant ad or pleiet,
« El’ destre puign si li faites chalcer.
« Si li portez cest bastuncel d’or mer,
2680« Et à mei venget pur reconuistre sun fieu.
« En France irai pur Carlun guerreier ;
« S’en ma mercit ne se culzt à mes piez
« Et ne guerpisset la lei de chrestiens,
« Jo li toldrai la curune de l’ chef. »
2685Païen respundent : « Sire, mult dites ben. » Aoi.
Dist Baliganz : « Kar chevalchez, baruns,
« L’uns port le guant, li altre le bastun. »
E cil respundent : « Cher sire, si ferum. »
Tant chevalcherent qu’ en Sarraguce sunt,
2690Passent .x. portes, traversent .iiii. punz,
Tutes les rues ù li burgeis estunt.
Cum il aproisment en la citet amunt,
Vers le paleis oïrent grant fremur ;
Asez i ad de la gent païenur,
2695Plurent e crient, demeinent grant dulur,
Pleignent lur deus Tervagan e Mahum
E Apollin, dunt il mie nen unt.
Dit l’uns al altre : « Caitifs ! que devendrum ?
« Sur nus est venue male confusiun,
2700« Perdut avum le rei Marsiliun,
« Li quenz Rollanz li trenchat her le destre puign ;
« Nus n’avum mie de Jurfaleu le Blunt ;
« Trestute Espaigne ert hoi en lur bandun. »
Li dui message descendent à l’ perrun. Aoi.
2705Lur chevals laissent dedesuz un olive :
Dui Sarrazin par les resnes les pristrent.
E li message par les mantels se tindrent.
Puis, sunt muntet sus el’ paleis altisme.
Cum il entrerent en la cambre voltice,
2710Par bel amur à l’ Rei gent salut firent :
« Cil Mahumet ki nus ad en baillie
« E Tervagan e Apollin nostre sire
« Salvent le Rei e guardent la Reïne ! »
Dist Bramimunde : « Or oi mult grant folie :
2715« Cist nostre deu sunt en recreantise :
« En Rencesvals malvaises vertuz firent,
« Noz chevalers i unt lesset ocire,
« Cest men seignur en bataille faillirent,
« Le destre puign ad perdut, n’en ad mie,
2720« Si li trenchat li quens Rollanz, li riches.
« Trestute Espaigne averat Carles en baillie.
« Que devendrai, duluruse, caitive ?
« E ! lasse ! que nen ai un hume ki m’ociet ! » Aoi.
Dist Clariens : « Dame, ne parlez tant
2725« Message sumes à l’ païen Baligant ;
« Marsiliun, ço dit, serat guaranz,
« Si l’en enveiet sun bastun e sun guant.
« En Sebre avum .iiii. milie calanz,
« Eschiez e barges e galies curanz ;
2730« Drodmunz i ad ne vus sai dire quanz.
« Li Amiralz est riches e puisanz,
« En France irat Carlemagne queranz,
« Rendre le quidet u mort u recreant. »
Dist Bramimunde : « Mar en irat itant !
2735« Plus près d’ici purrez truver les Francs ;
« En ceste tere ad estet ja .vii. anz.
« Li Emperere est bers e cumbatanz,
« Melz voelt murir que ja fuiet de camp ;
« Suz cel n’ad rei qu’il prist à un enfant.
2740« Carles ne creint hume ki seit vivanz. Aoi.
« — Laissez ço ester, » dist Marsilies li reis ;
Dist as messages : « Seignurs, parlez à mei.
« Ja veez vus que à mort sui destreiz.
« Jo si nen ai fil ne fille ne heir ;
2745« Un en aveie : cil fut ocis her seir.
« Mun seignur dites qu’il me venget veeir.
« Li Amiralz ad en Espaigne dreit :
« Quite li cleim, se il la voelt aveir ;
« Puis, la defendet encuntre les Franceis.
2750« Vers Carlemagne li durrai bon cunseill,
« Cunquis l’averat d’hoi cest jur en un meis.
« De Sarraguce les clefs li portereiz,
« Puis, si li dites, il n’en irat, s’il m’ creit. »
E cil respundent : « Sire, vus dites veir. » Aoi.
2755Ço dist Marsilies : « Carles li emperere
« Mort m’ad mes humes, ma tere deguastée
« E mes citez fraites e violées ;
« Il jut anuit sur cele ewe de Sebre,
« Jo ai cunté n’i ad mais que .vii. liuées.
2760« L’Amiral dites que sun ost i ameinet ;
« Par vus li mand, bataille i seit justée. »
De Sarraguce les clefs lur ad liverées.
Li messager ambedui l’enclinerent,
Prenent cungied, à cel mot s’en turnerent. Aoi.
2765Li dui message es chevals sunt muntet,
Isnelement issent de la citet,
A l’ Amiral en vunt tut esfreet,
De Sarraguce li presentent les clefs.
Dist Baliganz : « Que avez vus truvet ?
2770« U est Marsilies que jo aveie mandet ? »
Dist Clariens : « Il est à mort naffrez.
« Li Emperere fut her as porz passer,
« Si s’en vuleit en dulce France aler ;
« Par grant honur se fist rere-guarder :
2775« Li quens Rollanz i fut remés, sis niés,
« E Olivers e tuit li .xii. Per,
« De cels de France .xx. milie adubet.
« Li reis Marsilies s’i cumbatit, li bers ;
« Il e Rollanz el’ camp furent remés.
2780« De Durendal li dunat un colp tel
« Le destre puign li ad de l’ cors severet,
« Sun fil ad mort qu’il tant suleit amer,
« E les baruns qu’il i out amenet ;
« Fuianz s’en vint, qu’il n’y pout mais ester.
2785« Li Emperere l’ad enchalcet asez.
« Li Reis vus mandet que vus le succurez,
« Quite vus cleimet d’Espaigne le regnet. »
E Baliganz cumencet à penser,
Si grant doel ad pur poi qu’il n’est desvez. Aoi.
2790« Sire Amiralz, ço li dist Clariens,
« En Rencesvals une bataille out her.
« Morz est Rollanz e li quens Olivers,
« Li .xii. Per, que Carles aveit tant chers,
« De lur Franceis i ad morz .xx. millers.
2795« Li reis Marsilies le puign destre i perdiet,
« E l’Emperere asez l’ad enchalcet.
« En ceste tere n’est remés chevalers
« Ne seit ocis u en Sebre neiez.
« Desur la rive sunt Franceis herberget,
2800« En cest païs nus sunt tant aprociet,
« Se vus vulez, li repaires ert grefs. »
E Baliganz le reguart en ad fier,
En sun curage en est joüs e liez ;
De l’ faldestoed se redrecet en piez,
2805Puis, escriet : « Baruns, ne vus targez,
« Eissez des nefs, muntez, si chevalchez.
« S’or ne s’en fuit Karlemagnes li velz,
« Li reis Marsilies encoi serat vengez ;
« Pur sun puign destre l’en liverrai le chef. » Aoi.
2810Païen d’Arabe des nefs se sunt issuz,
Puis, sunt muntet es chevals e es muls,
Si chevalcherent — que fereient il plus ?
Li Amiralz, ki trestuz les esmut,
S’in apelat Gemalfin, un soen drut :
2815« Jo te cumant tutes mes oz aün. »
Puis, est muntez en un soen destrer brun,
Ensembl’od lui emmeinet .iiii. dux.
Tant chevalchet qu’en Sarraguce fut.
Ad un perrun de marbre est descenduz,
2820E quatre cunte l’estreu li unt tenut,
Par les degrez el’ paleis muntet sus :
E Bramimunde vient curanz cuntre lui,
Si li ad dit : « Dolente ! si mare fui !
« A itel hunte, sire, mun seignur ai perdut ! »
2825Chet li as piez, li Amiralz la reçut.
Suz en la cambre od doel en sunt venut. Aoi.
Li reis Marsilies, cum il veit Baligant,
Dunc apelat dous Sarrazins espans :
« Pernez m’as braz, si m’ drecez en seant. »
2830A l’ puign senestre ad pris un de ses guanz ;
Ço dist Marsilies : « Sire reis amiralz,
« Ma tere tute ici quite vus rend,
« E Sarraguce e l’honur k’i apent.
« Mei ai perdut e trestute ma gent. »
2835E cil respunt : « Tant sui jo plus dolent.
« Ne puis à vus tenir lung parlement ;
« Jo sai asez que Carles ne m’atent.
« E nepurquant de vus receif le guant. »
A l’ doel qu’il ad s’en est turnet plurant. Aoi.
2840Par les degrez jus de l’ paleis descent,
Muntet el’ cheval, vient à sa gent puignanz :
Tant chevalchat qu’il est premers devant ;
De uns ad altres si se vait escrianz :
« Venez, païen, car ja s’en fuient Franc. » Aoi.
2845A l’ matinet, quant primes pert l’albe,
Esveillez est li emperere Carles.
Seinz Gabriel, ki de par Deu le guardet,
Levet sa main, sur lui fit sun signacle.
Li Reis se drecet, si ad rendut ses armes,
2850Si se desarment par tute l’ost li altre.
Puis sunt muntet, par grant vertut chevalchent
Cez veies lunges e cez chemins mult larges :
Si vunt veeir le merveillus damage,
En Rencesvals, là ù fut la bataille. Aoi.
2855En Rencesvals en est Carles entrez :
Des morz qu’il troevet cumencet à plurer.
Dist as Franceis : « Seignurs, le pas tenez ;
« Kar mei meïsme estoet avant aler
« Pur mun nevuld que vuldreie truver.
2860« Ad Ais esteie, ad une feste anuel :
« Si se vanteient mi vaillant chevaler
« De granz batailles, de forz esturs pleners ;
« D’une raisun oï Rollant parler :
« Ja ne murreit en estrange regnet
2865« Ne trespassast ses humes e ses pers :
« Vers lur païs avereit sun chef turnet,
« Cunquerrantment si finereit li bers. »
Plus qu’om ne poet un bastuncel jeter,
Devant les altres est en un pui muntez. Aoi.
2870Quant l’Emperere vait querre son nevuld,
De tantes herbes el’ pret truvat les flurs,
Ki sunt vermeilles del’ sanc de noz baruns ;
Pitet en ad, ne poet muer n’en plurt.
Desuz dous arbres li Reis est parvenuz,
2875Les colps Rollant conut en treis perruns.
Sur l’erbe verte veit gesir sun nevuld :
Nen est merveille se Karles ad irur.
Descent à pied, alez i est plein curs,
Si prent le cunte entre ses mains ambesdous.
2880Sur lui se pasmet, tant par est anguissus. Aoi.
Li Empere de pasmeisun revint.
Naimes li dux et li quens Acelins,
Gefreiz d’Anjou e sis frere Tierris
Prenent le Rei, si l’ drecent suz un pin.
2885Guardet à tere, veit sun nevuld gesir.
Tant dulcement à regreter le prist :
« Ami Rollant, de tei ait Deus mercit !
« Unkes nuls hom tel chevaler ne vit
« Pur granz batailles juster e defenir.
2890« La meie honur est turnée en declin ! »
Carles se pasmet, ne s’en pout astenir. Aoi.
Carles li reis revint de pasmeisun,
Par les mains le tienent .iiii. de ses baruns,
Guardet à tere, veit gesir sun nevuld ;
2895Cors ad gaillard, perdue ad sa culur,
Turnez ses oilz, mult li sunt tenebrus.
Carles le pleint par feid e par amur :
« Ami Rollant, Deus metet t’anme en flurs,
« En Pareïs, entre les glorius !
2900« Cum en Espaigne venis à mal, seignur !
« Jamais n’ert jurz de tei n’aie dulur.
« Cum decarrat ma force e ma baldur !
« Nen averai ja ki sustienget m’honur ;
« Suz cel ne quid aveir ami un sul,
2905« Se jo ai parenz, n’en i ad nul si proz. »
Trait ses crignels pleines ses mains ambesdous.
Cent milie Franc en unt si grant dulur
N’en i ad cel ki durement ne plurt. Aoi.
« Ami Rollant, jo m’en irai en France ;
2910« Cum jo serai à Loün en ma cambre,
« De plusurs regnes vendrunt li hume estrange,
« Demanderunt ù est li quens cataignes.
« Jo lur dirrai qu’il est morz en Espaigne.
« A grant dulur tendrai puis mun reialme :
2915« Jamais n’ert jurz que ne plure ne n’en pleigne. Aoi.
« Ami Rollant, prozdom, juvente bele,
« Cum jo serai ad Ais en ma capele,
« Vendrunt li hume, demanderunt nuveles :
« Je ’s lur dirrai merveilluses e pesmes :
2920« Morz est mis niés, ki tant me fist cunquerre. »
« Encuntre mei revelerunt li Seisne
« E Hungre e Bugre e tante gent averse,
« Romain, Puillain e tuit cil de Palerne,
« E cil d’Affrike e cil de Califerne ;
2925« Puis, encrerrunt mes peines e mes suffraites.
« Ki guierat mes oz à tel poeste,
« Quant cil est morz ki tuz jurz nus cadelet ?
« E ! France dulce, cum remeins hoi deserte !
« Si grant doel ai que jo ne vuldreie estre. »
2930Sa barbe blanche cumencet à detraire,
Ad ambes mains les chevels de sa teste.
Cent milie Franc s’en pasment cuntre tere. Aoi.
« Ami Rollant, de tei ait Deus mercit !
« L’anme de tei seit mise en Pareïs !
2935« Ki tei ad mort, France ad mis en exill.
« Si grant doel ai que ne vuldreie vivre
« De ma maisnée ki pur mei est ocise.
« Ço duinset Deus, li filz seinte Marie,
« Einz que jo venge as maistres porz de Sizer,
2940« L’anme de l’ cors me seit hoi departie,
« Entre les lur fust aluée e mise,
« Et ma car fust delez els enfuie. »
Pluret des oilz, sa blanche barbe tiret.
E dist dux Naimes : « Or ad Carles grant ire. » Aoi.
2945« Sire emperere, ço dist Gefreiz d’Anjou,
« Ceste dulur ne demenez tant fort ;
« Par tut le camp faites querre les noz,
« Que cil d’Espaigne en la bataille unt morz ;
« En un carnel cumandez qu’ om les port. »
2950Ço dist li Reis : « Sunez en vostre corn. » Aoi.
Gefreiz d’Anjou ad sun greisle sunet ;
Franceis descendent, Carles l’ad cumandet.
Tuz lur amis qu’il i unt morz truvet
Ad un carner sempres les unt portet.
2955Asez i ad evesques e abez,
Munjes, canunjes, proveires curunez.
Si ’s unt asols e seignez de part Deu ;
Mirre e timoine i firent alumer,
Gaillardement tuz les unt encensez ;
2960 A grant honur puis les unt enterrez ;
Si ’s unt laisez : qu’en fereient il el ? Aoi.
Li Emperere fait Rollant costeïr
E Oliver e l’arcevesque Turpin ;
Dedevant sei les ad fait tuz uverir
2965E tuz les cuers en paile recueillir :
En blancs sarcous de marbre sunt enz mis ;
E puis, les cors des barons si unt pris,
En quirs de cerf les treis seignurs unt mis :
Ben sunt lavet de piment e de vin.
2970Li Reis cumandet Tedbald e Gebuin,
Milun le cunte e Otun le marchis :
« En .iii. carettes les guiez à l’ chemin ! »
Ben sunt cuvert d’un palie galazin. Aoi.
Venir s’en voelt li emperere Carles,
2975Quant des païens li surdent les enguardes ;
De cels devant i vindrent dui message,
De l’ amiral i nuncent la bataille :
« Reis orguillus, nen est fins que t’en alges.
« Veis Baligant ki après tei chevalchet :
2980« Grant sunt les oz qu’il ameinet d’Arabe ;
« Encoi verrum se tu as vasselage. » Aoi.
Carles li reis en ad prise sa barbe,
Si li remembret de l’ doel e de l’ damage.
Mult fierement tute sa gent reguardet,
2985Puis, si s’escriet à sa voiz grant e halte :
« Baruns franceis, as chevals e as armes ! » Aoi.
Li Emperere tuz premereins s’adubet,
lsnelement ad vestue sa brunie,
Lacet sun helme, si ad ceinte Joiuse,
2990Ki pur soleill sa clartet n’en muet,
Pent à sun col un escut de Girunde,
Tient sun espiet, ki fut fait à Blandune,
En Tencendur sun bon cheval puis muntet,
(ll le cunquist es guez desuz Marsune,
2995Si ’n getat mort Malpalin de Nerbune),
Laschet la resne, mult suvent l’esperunet,
Fait sun eslais veant cent milie humes.
Recleimet Deu e l’apostle de Rume. Aoi.
Par tut le camp cil de France descendent,
3000Plus de cent milie s’en adubent ensemble ;
Guarnemenz unt ki ben lur atalentent,
Chevals curanz e lur armes mult gentes ;
Cil gunfanun sur les helmes lur pendent.
S’il truvent l’ ost, bataille quident rendre.
3005Puis sunt muntet e unt si grant science.
Quant Carles veit si beles cuntenances,
Si ’n apelat Jozeran de Provence,
Naimun le duc, Antelme de Maience :
« En tels vassals deit hom aveir fiance ;
3010« Asez est fols ki entr’els se dementet.
« Si Arrabiz de venir ne se repentent,
« La mort Rollant lur quid cherement vendre. »
Respunt dux Naimes : « E Deus le nus cunsentet ! » Aoi.
Carles apelet Rabe e Guineman ;
3015Ço dist li Reis : « Seignurs, jo vus cumant ;
« Seiez es lius Oliver e Rollant :
« L’uns port l’espée e l’altre l’olifant ;
« Si chevalcez el’ premer chef devant,
« Ensembl’od vus .xv. millie de Francs.
3020« De bachelers, de noz meillurs vaillanz.
« Après icels en averat altretant.
« Si ’s guierat Gibuins e Lorans. »
Naimes li dux e li quens Jozerans
lcez eschieles ben les vunt ajustant.
3025S’il troevent l’ ost, bataille ert mult granz. Aoi.
De Franceis sunt les premeres escheles.
Après les dous establisent la terce :
En cele sunt li vassal de Baivere,
A .xx. milie chevalers la preiserent ;
3030Ja devers els bataille n’ert laissée ;
Suz cel n’ad gent que Carles ait plus chere,
Fors cels de France ki les regnes cunquerent.
Li quens Ogers li Daneis, li puinnere,
Les guierat, kar la cumpaigne est fière. Aoi.
3035Treis escheles ad li emperere Carles.
Naimes li dux puis establist la quarte
De tels baruns k’asez unt vasselage ;
Aleman sunt e si sunt d’Alemaigne,
Vint milie sunt, ço dient tuit li altre ;
3040Ben sunt guarnit e de chevals e d’armes :
Ja pur murir ne guerpirunt bataille.
Si ’s guierat Hermans, li dux de Trace :
Einz i murrat que cuardise i facet. Aoi.
Naimes li dux e li quens Jozerans
3045La quinte eschele unt faite de Normans :
.Xx. milie sunt, ço dient tuit li Franc ;
Armes unt beles e bons chevals curanz ;
Ja pur murir cil n’erent recreant ;
Suz cel n’ ad gent ki plus puissent en camp.
3050Richarz li velz les guierat el’ camp :
Il i ferrat de sun espiet trenchant. Aoi.
La siste eschele unt faite de Bretuns :
.Xxx. milie chevalers od els unt ;
Icil chevalchent en guise de baruns,
3055Dreites lur hanstes, fermez lur gunfanuns.
Li sire d’els est apelez Oedun :
Icil cumandet le cunte Nevelun,
Tedbald de Reins et le marchis Otun :
« Guiez ma gent ; jo vus en faz le dun. » Aoi.
3060Li Emperere ad .vi. escheles faites.
Naimes li dux puis establist la sedme
De Peitevins et des baruns d’Alverne :
.Xl. milie chevaler poeent estre ;
Chevals unt bons e les armes mult beles.
3065Cil sunt par els en un val suz un tertre ;
Si’s beneïst Carles de sa main destre.
Els guierat Jozerans e Godselmes. Aoi.
E l’oidme eschele ad Naimes establie :
De Flamengs est e des baruns de Frise.
3070Chevalers unt plus de .xl. milie ;
Ja devers els n’ert bataille guerpie.
Ço dist li Reis : « Cist ferunt mun servise. »
Entre Rembalt e Hamun de Galice
Les guierunt tut par chevalerie. Aoi.
3075Entre Naimun e Jozeran le cunte
La noefme eschele unt faite de prozdumes,
De Loherengs e de cels de Borguigne,
.L. milie chevalers unt par cunte,
Helmes lacez e vestues lur brunies ;
3080Espiez unt forz, e les hanstes sunt curtes ;
Si Arrabit de venir ne demurent,
Cist les ferrunt, s’ il ad els s’abandunent ;
Si’s guierat Tierris, li dux d’Argune. Aoi.
La disme eschele est des baruns de France,
3085Cent milie sunt de noz meillurs cataignes ;
Cors unt gaillarz e fieres cuntenances,
Les chefs fluriz e les barbes unt blanches,
Osbercs vestuz e lur brunies dubleines,
Ceintes espées franceises e d’Espaigne ;
3090Escuz unt genz de multes conuisances.
Puis, sunt muntet ; la bataille demandent,
Munjoie escrient. Od els est Carlemagnes.
Gefreiz d’Anjou portet l’orie flambe ;
Seint Piere fut, si aveit num Romaine,
3095Mais de Munjoie iloec out pris escange. Aoi.
Li Emperere de sun cheval descent,
Sur l’erbe verte si s’est culchet adenz,
Turnet sun vis vers le soleill levant,
Recleimet Deu mult escordusement :
3100« Veire paterne, hoi cest jur me defend,
« Ki guaresis Jonas tut veirement
« De la baleine ki en sun cors l’aveit enz,
« E esparignas le rei de Niniven,
« E Daniel de l’ merveillus turment
3105« Enz en la fosse des leuns ù fut enz,
« Les .iii. enfanz tut en un fou ardant.
« La tue amur me seit hoi en present.
« Par ta mercit, se tei plaist, me cunsent
« Que mun nevuld puisse venger Rollant. » Aoi.
3110Cum ad oret, si se drecet en estant,
Seignat sun chef de la vertut puisant.
Muntet li Reis en sun cheval curant ;
L’estreu li tindrent Naimes e Jozerans.
Prent sun escut e sun espiet trenchant.
3115Gent ad le cors, gaillart e ben seant,
Cler le visage e de bon cuntenant.
Puis, si chevalchet mult afichéement.
Sunent cil graisle e derere e devant :
Sur tuz les altres bundist li olifans.
3120Plurent Franceis pur pitet de Rollant. Aoi.
Mult gentement li Emperere chevalchet,
Desur sa brunie fors ad mise sa barbe ;
Pur sue amur altretel funt li altre,
Cent milie Franc en sunt reconoisable.
3125Passent cez puis e cez roches plus haltes,
Cez vals parfunz, cez destreiz anguisables,
Issent des porz e de la tere guaste,
Devers Espaigne sunt alet en la Marche,
En mi un plein unt prise lur estage...
3130A Baligant repairent ses enguardes ;
Uns Sulians li ad dit sun message :
« Veüt avum cest orguillus rei Carle ;
« Fier sunt si hume, n’unt talent qu’il li faillent.
« Adubez vus : sempres averez bataille. »
3135Dist Baliganz : « Or oi grant vasselage.
« Sunez voz graisles, que mi païen le sacent » Aoi.
Par tute l’ost funt lur taburs suner
E cez buisines e cez graisles mult clers.
Païen descendent pur lur cors aduber.
3140Li Amiralz ne se voelt demurer :
Vest une brunie dunt li par sunt saffret,
Lacet sun helme ki ad or est gemmez,
Puis ceint s’espée à l’ senestre costet.
Par sun orguill li ad un num truvet :
3145Par la Carlun, dunt il oït parler,
La sue fist Preciuse apeler :
Ço ert s’enseigne en bataille campel,
Ses chevalers en ad fait escrier.
Pent à sun col un soen grant escut let,
3150D’or est la bucle e de cristal listet,
La guige en est d’un bon palie roet ;
Tient sun espiet, si l’ apelet Maltet :
La hanste fut grosse cume uns tinels,
De sul le fer fust uns mulez trussez.
3155En sun destrer Baliganz est muntez,
L’estreu li tint Marcules d’ultre mer.
La furcheüre ad asez grant li bers,
Graisles es flancs e larges les costez,
Gros ad le piz, belement est mollez,
3160Lées espalles e le vis ad mult cler,
Fier le visage, le chef recercelet,
Tant par ert blancs cume flurs en estet.
De vasselage est suvent esprovez.
Deus ! quel barun, s’oüst chrestientet !
3165Le cheval brochet, li sancs en ist tuz clers,
Fait sun eslais, si tressalt un fosset,
Cinquante piez i poet hom mesurer.
Païen escrient : « Cist deit marches tenser.
« N’i ad Franceis, se à lui vient juster,
3170« Voeillet o nun, n’i perdet sun edet.
« Carles est fols que ne s’en est alet. » Aoi.
Li Amiralz ben resemblet barun,
Blanche ad la barbe ensement cume flurs,
E de sa lei mult par est saives hum,
3175E en bataille est fiers e orguillus.
Sis filz Malprimes mult est chevalerus,
Granz est e forz e trait as anceisurs.
Dist à sun pere : « Sire, kar chevalchum !
« Mult me merveill se ja verrum Carlun. »
3180Dist Baliganz : « Oïl, kar mult est proz.
« En plusurs gestes de lui sunt grant honur ;
« Il n’en ad mie de Rollant sun nevuld,
« N’averat vertut que s’ tienget cuntre nus. » Aoi.
« Bel fil Malprime, ço li dist Baliganz,
3185« Her fut ocis li bons vassals Rollanz
« E Olivers, li proz e li vaillanz,
« Li .xii. Per, qui Carles amat tant,
« De cels de France .xx. milie cumbatant.
« Trestuz les altres ne pris jo mie un guant.
3190« Li Emperere repairet veirement,
« Si l’ m’a nunciet mis més li Sulians,
« .X. escheles en ad faites mult granz ;
« Cil est mult proz ki sunet l’olifant,
« D’un graisle cler racatet ses cumpainz,
3195« E si chevalchent el’ premer chef devant,
« Ensembl’od els .xv. milie de Francs,
« De bachelers que Carles cleimet enfanz ;
« Après icels en i ad altretanz.
« Cil i ferrunt mult orguillusement. »
3200Ço dist Malprimes : « Le colp vus en demant. Aoi.
« Bel fil Malprime, Baliganz li ad dit,
« Jo vus otri quanque m’avez ci quis ;
« Cuntre Franceis sempres irez ferir :
« Si i merrez Torleu, le rei persis,
3205« E Dapamort, un altre rei Leutiz.
« Le grant orguill se ja puez matir,
« Jo vus durrai un pan de mun païs
« Dès Cheriant entresqu’en Val-Marchis. »
« E cil respunt : « Sire, vostre mercit ! »
3210Passet avant, le dun en requeillit,
Ço est de la tere ki fut à l’ rei Flurit.
A itel ure unkes puis ne la vit,
Ne il n’en fut ne vestuz ne saisiz. Aoi.
Li Amiralz chevalchet par cez oz :
3215Sis filz le siut, ki mult ad grant le cors,
Li reis Torleus e li reis Dapamors ;
.Xxx. escheles establissent mult tost,
Chevalers unt à merveillus esforz ;
En la menur .l. milie en out.
3220La premere est de cels de Butentrot,
E l’altre après de Micenes as chefs gros :
Sur les eschines qu’il unt en mi les dos
Cil sunt seiet ensement cume porc. Aoi.
E la terce est de Nubles e de Blos,
3225E la quarte est de Bruns e d’Esclavoz,
E la quinte est de Sorbres e de Sorz,
E la siste est d’Ermines e de Mors,
E la sedme est de cels de Jericho,
L’oidme est de Nigres, e la noefme de Gros,
3230E la disme est de Balide la fort :
Ço est une genz ki unkes ben ne volt. Aoi.
Li Amiralz en juret quanqu’il poet
De Mahumet les vertuz e le cors :
« Carles de France chevalchet cume fols ;
3235« Bataille i ert, se il ne s’en destolt ;
« Jamais n’averat el’ chef curune d’or. » Aoi.
Dis escheles establisent après :
La premere est des Canelius, des laiz,
De Val-Fuit sunt venut en travers ;
3240L’altre est de Turcs, e la terce de Pers,
E la quarte est de Pinceneis e de Pers,
E la quinte est de Solteras e d’Avers,
E la siste est d’Ormaleus e d’Eugiez,
E la sedme est de la gent Samuel ;
3245L’oidme est de Bruise, la noefme de Clavers,
E la disme est d’Occiant le desert.
Ço est une genz ki Damne Deu ne sert,
De plus feluns n’orrez parler jamais.
Durs unt les quirs ensement cume fer :
3250Pur ço n’unt soign de helme ne d’osberc ;
En la bataille sunt felun e engrès. Aoi.
Li Amiralz .x. escheles ajustet :
La premere est des jaianz de Malpruse,
L’altre est de Hums e la terce de Hungres,
3255Et la quarte est de Baldise-la-Lunge,
E la quinte est de cels de Val-Penuse,
E la siste est de Joi e de Maruse,
E la sedme est de Leus e d’Astrimunies,
L’oidme est d’Argoilles, la noefme de Clarbone,
3260E la disme est des barbez de Val-Funde :
Ço est une genz ki Deu n’enamat unkes.
Geste Francor .xxx. escheles i numbret.
Grant sunt les oz ù cez buisines sunent.
Païen chevalchent en guise de prozdumes. Aoi.
3265Li Amiralz mult par est riches hum :
Dedavant sei fait porter sun dragun
E l’estendart Tervagan e Mahum
E une ymagene Apolin le felun.
Dis Canelius chevalchent envirun,
3270Mult haltement escrient un sermun :
« Ki par noz deus voelt aveir guarisun,
« Si’s prit e servet par grant afflictiun. »
Païen i baissent lur chefs e lur mentuns,
Lur helmes clers i suzclinent enbrunc.
3275Dient Franceis : « Sempres murrez, glutuns ;
« De vus seit hoi male confusiun !
« Li nostre Deu, guarantisez Carlun :
« Ceste bataille seit jugée en sun num ! » Aoi.
Li Amiralz est mult de grant saveir,
3280A sei apelet sun fil e les dous reis :
« Seignurs baruns, devant chevalchereiz,
« Mes escheles tutes les guiereiz ;
« Mais des meillurs voeill-jo retenir treis :
« L’une ert de Turcs e l’altre d’Ormaleis,
3285« E la terce est des jaianz de Malpreis.
« Cil d’Ociant erent ensembl’od mei,
« Si justerunt à Carle e à Franceis.
« Li Emperere, s’ il se cumbat od mei,
« Desur le buc la teste perdre en deit :
3290« Trestut seit fiz, n’i averat altre dreit. » Aoi.
Grant sunt les oz e les escheles beles.
Entr’els nen ad ne pui ne val ne tertre,
Selve ne bois ; asconse n’i poet estre ;
Ben s’entre-veient en mi la pleine tere.
3295Dist Baliganz : « La meie genz averse,
« Kar chevalchez pur la bataille quere ! »
L’enseigne portet Amboires d’Oluferne,
Païen escrient, Preciuse l’apelent.
Dient Franceis : « De vus seit hoi granz perte ! »
3300Mult haltement Munjoie renuvelent.
Li Emperere i fait suner ses graisles
E l’olifant, ki trestuz les esclairet.
Dient païen : « La genz Carlun est bele.
Bataille averum e adurée e pesme. » Aoi.
3305Granz est la plaigne e large la cuntrée.
Luisent cil helme as perres d’or gemmées
E cez escut e cez brunies safrées
E cez espiet, cez enseignes fermées.
Sunent cez graisle, les voiz en sunt mult cleres,
3310De l’olifant haltes sunt les menées.
Li Amiralz en apelet sun frère,
Ço est Canabeus, li reis de Floredée :
Cil tint la tere en tresqu’en Val-Sevrée,
Les escheles Carlun li ad mustrées :
3315« Veez l’orguill de France la loée.
« Mult fièrement chevalchet li Emperere :
« Il est darere od cele gent barbée ;
« Desur lur brunies lur barbes unt getées
« Altresi blanches cume neifs sur gelée.
3320« Cil i ferrunt de lances e d’espées :
« Bataille averum e forte e adurée ;
« Unkes nuls hom ne vit tel ajustée. »
Plus qu’on ne lancet une verge pelée,
Baliganz ad ses cumpaignes passées.
3325Une raisun lur ad dite e mustrée :
« Venez, païen, kar jo ’n irai en l’estrée. »
De sun espiet la hanste en ad branlée,
Envers Carlun l’amure en ad turnée. Aoi.
Carles li magnes, cum il vit l’Amiral
3330E le dragun, l’enseigne e l’estandart,
(De cels d’Arabe si grant force i par ad
De la contrée unt purprises les parz,
Ne mais que tant cum l’Emperere en ad),
Li reis de France s’en escriet mult halt :
3335« Baruns franceis, vus estes bon vassal,
« Tantes batailles avez faites en camps !
« Veez païen, felun sunt e cuart,
« Tute lur leis un dener ne lur valt.
« S’il unt grant gent, d’iço, seignurs, qui calt ?
3340« Ki errer voelt, à mei venir s’en alt. »
Des esperuns puis brochet le cheval,
E Tencendur li ad fait .iiii. salz.
Dient Franceis : « Icist Reis est vassals.
« Chevalchez, bers, nul de nus ne vus falt. » Aoi.
3345Clers fut li jurz e li soleilz luisanz,
Les oz sunt beles e les cumpaignes grant.
Justées sunt les escheles devant.
Li quens Rabels e li quens Guinemans
Laschent les resnes à lur chevals curanz,
3350Brochent ad ait ; dunc laissent curre Francs,
Si vunt ferir de lur espiez trenchanz. Aoi.
Li quens Rabels est chevalers hardiz,
Le cheval brochet des esperuns d’or fin,
Si vait ferir Torleu le rei persis ;
3355N’escuz ne brunie ne pout sun colp tenir,
L’espiet ad or li ad enz el’ cors mis,
Que mort l’abat sur un buissun petit.
Dient Franceis : « Damnes Deus nus aït !
« Carles ad dreit, ne li devum faillir. » Aoi.
3360E Guinemans justet à l’ rei de Leutice,
Tute li freint la targe ki est flurie ;
Après li ad la brunie descunfite,
Tute l’enseigne li ad enz el’ cors mise,
Que mort l’abat, ki qu’en plurt u ki ’n riet.
3365A icest colp cil de France s’escrient :
« Ferez, baruns, si ne vus targez mie !
« Carles ad dreit vers la gent païenie,
« Deus nus ad mis à l’ plus verai juise. » Aoi.
Malprimes siet sur un cheval tut blanc,
3370Cunduit sun cors en la presse des Francs,
De uns à d’altres granz colps i vait feranz,
L’un mort sur l’altre suvent vait tresturnanz.
Tut premereins s’escriet Baliganz :
« Li men baruns, nurrit vus ai lung tens.
3375« Veez mun fil, ki Carlun vait queranz,
« E à ses armes tanz baruns calunjanz ;
« Meillur vassal de lui ja ne demant.
« Succurez le à voz espiez trenchanz ! »
A icest mot païen venent avant,
3380Durs colps i fièrent, mult est li caples granz.
La bataille est merveilluse e pesanz,
Ne fut si forz enceis ne puis cel tens. Aoi.
Grant sunt les oz e les cumpaignes fières,
Justées sunt trestutes les escheles,
3385E li païen merveillusement fièrent.
Deus ! tantes hanstes i ad par mi brisées,
Escuz fruisez e brunies desmailées !
Là veïsez la tere si junchée,
L’erbe de l’ camp, ki est verte e delgée,
3390De l’ sanc des cors est tute envermeillée.
Li Amiralz recleimet sa maisnée :
« Ferez, baruns, sur la gent chrestiene. »
La bataille est mult dure e afichée :
Unc einz ne puis ne fut si forz ajustée,
3395Jusqu’à la mort n’en ert fins otriée. Aoi.
Li Amiralz la sue gent apelet :
« Ferez, païen, pur el venut n’i estes.
« Jo vus durrai muillers gentes e beles,
« Si vos durrai fieus e honurs e teres. »
3400Païen respundent : « Nus le devum ben fere. »
A colps pleners de lur espiez i perdent,
Plus de cent milie espées i unt traites.
As vus le caple e dulurus e pesme.
Bataille veit cil ki entr’els voelt estre. Aoi.
3405Li Emperere recleimet ses Franceis :
« Seignurs baruns, jo vos aim, si vus crei ;
« Tantes batailles avez faites pur mei,
« Regnes cunquis e desordenet reis !
« Ben le conuis que gueredun vus en dei
3410« E de mun cors, de teres e d’aveir.
« Vengez voz fiz, voz freres e voz heirs
« K’en Rencesvals furent morz l’altre seir !
« Ja savez vus cuntre païens ai dreit. »
Respundent Franc : « Sire, vus dites veir. »
3415Itels .xx. milie en ad Carles od sei,
Cumunement l’en prametent lur feid,
Ne li faldrunt pur mort ne pur destreit.
N’en i ad cel sa lance n’i empleit,
De lur espées i fièrent demaneis.
3420La bataille est de merveillus destreit. Aoi.
Li bers Malprimes par mi le camp chevalchet,
De cels de France i fait mult grant damage.
Naimes li dux fièrement le reguardet,
Vait le ferir cum hume vertudables,
3425De sun escut li freint la pene halte,
De sun osberc les dous pans li desaffret.
El’ cors li met tute l’enseigne jalne,
Que mort l’abat entre .vii. c. des altres. Aoi.
Reis Canabeus, le frere à l’Amiral,
3430Des esperuns ben brochet sun cheval,
Trait ad l’espée, li punz est de cristal,
Si fiert Naimun en l’helme principal,
L’une meitet l’en fruisset d’une part,
A l’ brant d’acer l’en trenchet .v. des laz :
3435Li capelers un dener ne li valt ;
Trenchet la coife entresque à la char,
Jus à la tere une pièce en abat.
Granz fut li colps, li dux en estonat,
Sempres caïst, se Deus ne li aidast ;
3440De sun destrer le col en enbraçat.
Se li païens une feiz recuverast,
Sempres fust morz li nobilies vassals.
Carles de France i vient, ki l’succurrat. Aoi.
Naimes li dux tant par est anguissables,
3445E li païens de ferir mult le hastet.
Carles li dist : « Culvert, mar le baillastes ! »
Vait le ferir par sun grant vasselage,
L’escut li freint, cuntre le coer li quasset,
De sun osberc li derumpt la ventaille,
3450Que mort l’abat ; la sele en remeint guaste. Aoi.
Mult ad grant doel Carlemagnes li reis,
Quant duc Naimun veit nafret devant sei,
Sur l’erbe verte le sanc tut cler cadeir.
Li Emperere li ad dit à cunseill :
3455« Bel sire Naime, kar chevalchez od mei.
« Morz est li gluz ki en destreit vus teneit,
« El’ cors li mis mun espiet une feiz. »
Respunt li dux : « Sire, jo vus en crei.
« Se jo vif alques, mult grant prod i avereiz. »
3460Puis sunt justet par amur e par feid,
Ensembl’od els tel .xx. milie Franceis.
N’i ad celui que n’i fierget u n’i capleit. Aoi.
Li Amiralz chevalchet par le camp,
Si vait ferir le cunte Guineman,
3465Cuntre le coer li fruisset l’escut blanc.
De sun osberc li derumpit les pans,
Les dous costez li deseveret des flancs,
Que mort l’abat de sun cheval curant.
Puis ad ocis Gebuin e Lorant,
3470Richard le veill, le seignur des Normans.
Païen escrient : « Preciuse est vaillanz :
« Ferez, baruns, nus i avum guarant. » Aoi.
Ki puis veïst les chevalers d’Arabe,
Cels d’Occiant e d’Argoilles e de Bascle !
3475De lur espiez bien i fièrent e caplent ;
E li Franceis n’unt talent que s’en algent ;
Asez i moerent e des uns e des altres.
Entresqu’à l’ vespre est mult forz la bataille,
Des francs baruns i ad mult grant damage :
3480Doel averat enceis qu’ele departet. Aoi.
Mult ben i fièrent Franceis e Arrabit ;
Fruissent cez hanstes e cez espiez furbiz.
Ki dunc veïst cez escuz si malmis,
Cez blancs osbercs ki dunc oïst fremir,
3485E cez escuz sur cez helmes cruisir ;
Cez chevalers ki dunc veïst caïr,
E humes braire, cuntre tere murir,
De grant dulur li poüst suvenir.
Ceste bataille est mult forz à suffrir.
3490Li Amiralz recleimet Apollin
E Tervagan e Mahum altresi :
« Mi damne deu, jo vus ai mult servit ;
« Tutes voz ymagenes vus referai d’or fin :
« Cuntre Carlun deignez me guarantir. »
3495As li devant un soen drut, Gemalfin,
Males nuveles li aportet e dit :
« Baliganz, Sire, mal estes hoi bailliz,
« Perdut avez Malprime vostre fil,
« E Canabeus vostre frere est ocis.
3500« A dous Franceis belement en avint ;
« Li Emperere en est l’uns, ço m’est vis,
« Grant ad le cors, ben resenblet marchis,
« Blanche ad la barbe cume flurs en avril. »
Li Amiralz en ad le helme enclin,
3505E enaprès si ’n enbrunket sun vis,
Si grant doel ad sempres quiat murir :
Si ’n apelat Jangleu l’ultre-marin. Aoi.
Dist l’Amiralz : « Jangleu, venez avant.
« Vus estes proz, e vostre saveir est granz,
3510« Vostre cunseill ai otriet tuz tens.
« Que vus en semblet d’Arrabiz e de Francs,
« Se nus averum la victorie de l’ champ ? »
Et cil respunt : « Morz estes, Baliganz.
« Ja vostre deu ne vus erent guarant.
3515« Carles est fiers, e si hume vaillant :
« Unc ne vi gent ki si fust cumbatanz.
« Mais reclamez les baruns d’Occiant,
« Turcs e Enfruns, Arrabiz e Jaianz.
« Ço que estre en deit ne l’alez demuranz. » Aoi.
3520Li Amiralz ad sa barbe fors mise
Altresi blanche cume flurs en espine ;
Cument qu’il seit, ne s’i voelt celer mie,
Met à sa buche une clere buisine,
Sunet la cler, que si païen l’oïrent.
3525Par tut le camp ses cumpaignes ralient.
Cil d’Occiant i braient e hennissent,
E cil d’ Argoilles si cum chen i glatissent.
Requerent Francs par si grant estultie,
El’ plus espès si’s rumpent e partissent :
3530A icest colp en jetent morz .vii. milie. Aoi.
Li quens Ogers cuardise n’out unkes,
Meillur vassals de lui ne vestit brunie.
Quant de Franceis les escheles vit rumpre,
Si apelat Tierri le duc d’Argune,
3535Gefreid d’Anjou e Jozeran le cunte,
Mult fièrement Carlun en araisunet :
« Veez païens, cum ocient voz humes !
« Ja Deu ne placet qu’el’ chef portez curune,
« S’or n’i ferez pur venger vostre hunte ! »
3540N’i ad icel ki un sul mot respundet ;
Brochent ad ait, lur chevals laissent curre,
Vunt les ferir là ù il les encuntrent. Aoi.
Mult ben i fiert Carlemagnes li reis,
Naimes li dux e Ogers li Daneis,
3545Gefreiz d’Anjou, ki l’enseigne teneit.
Mult par est proz danz Ogers li Daneis ;
Puint le cheval, laisset curre ad espleit,
Si vait ferir celui ki le dragun teneit,
Qu’ambure cravente en la place devant sei
3550Et le dragun e l’enseigne le rei.
Baliganz veit sun gunfanun cadeir
E l’estendart Mahumet remaneir ;
Li Amiralz alques s’en aperceit
Que il ad tort e Carlemagnes dreit.
3555Païen d’Arabe s’en cuntiennent plus quei.
Li Emperere recleimet ses Franceis :
« Dites, baruns, pur Deu, si n’aidereiz. »
Respundent Franc : « Mar le demandereiz ;
« Trestut seit fels ki n’i fierget ad espleit ! » Aoi.
3560Passet li jurz, si turnet à la vesprée.
Franc e païen i fièrent des espées.
Cil sunt vassal ki les oz ajusterent,
Mais lur enseignes n’i unt mie ubliées.
Li Amiralz « Preciuse » ad criée,
3565Carles « Munjoie » l’enseigne renumée.
L’un conuist l’altre as haltes voiz e as cleres ;
En mi le camp ambdui s’entr’encuntrerent,
Si se vunt ferir, granz colps s’entre-dunerent
De lur espiez en lur targes roées ;
3570Fraites les unt desuz cez bucles lées,
De lur osbercs les pans en deseverent,
Dedenz cez cors mie ne s’adeserent ;
Rumpent ces cengles, et cez seles verserent,
Cheent li rei, à tere trabecherent,
3575Isnelement sur lur piez releverent,
Mult vassalment unt traites les espées.
Ceste bataille nen ert mais desturnée,
Seinz hume mort ne poet estre achevée. Aoi.
Mult est vassals Carles de France dulce,
3580Li Amiralz il ne l’ crent ne ne dutet.
Cez lur espées tutes nues i mustrent,
Sur cez escuz mult granz colps s’entre-dunent,
Trenchent les quirs e cez fuz ki sunt duble,
Cheent li clou, se peceient les bucles ;
3585Puis fièrent-il nud à nud sur lur brunies :
Des helmes clers li fous en escarbunet.
Ceste bataille ne poet remaneir unkes,
Jusque li uns sun tort i reconuisset. Aoi.
Dist l’Amiralz : « Carle, kar te purpense,
3590« Si pren cunseill que vers mei te repentes.
« Mort as mun fil par le men escientre,
« A mult grant tort mun païs me calenges ;
« Deven mis hom, en fieu le te voeill rendre,
« Ven mei servir d’ici qu’en Oriente. »
3595Carles respunt : « Mult grant viltez me semblet ;
« Pais ne amur de dei à païen rendre.
« Receif la lei que Deus nus apresentet.
« Chrestientet, e pui t’ amerai sempres :
« Puis serf e crei le Rei omnipotente. »
3600Dist Baliganz : « Malvais sermun cumences. »
Puis vunt ferir des espées qu’unt ceintes. Aoi.
Li Amiralz est mult de grant vertut,
Fiert Carlemagne sur l’helme d’acer brun,
Desur la teste li ad frait e fendut,
3605Met li l’espée sur les chevels menuz,
Prent de la carn grant pleine palme e plus,
Iloec endreit remeint li os tut nuz.
Carles cancelet, pur poi qu’il n’est caüz,
Mais Deus ne voelt qu’il seit morz ne vencuz ;
3610Seinz Gabriel est repairez à lui,
Si li demandet : « Reis magne, que fais-tu ? » Aoi.
Quant Carles oit la sainte voiz de l’angle,
Nen ad poür ne de murir dutance,
Repairet lui vigur e remembrance.
3615Fiert l’Amiral de l’espée de France,
L’helme li freint, ù les gemmes reflambent,
Trenchet la teste pur la cervele espandre,
E tut le vis tresqu’en la barbe blanche,
Que mort l’abat seinz nule recuvrance ;
3620Munjoie escriet pur la reconuisance.
A icest mot venuz i est dux Naimes,
Prent Tencendur, muntet i li reis magnes.
Païen s’en turnent, ne voelt Deus qu’il i remainent.
Or unt Franceis iço que il demandent. Aoi.
3625Païen s’en fuient, cum Damnes Deus le voelt,
Enchalcent Franc e l’Emperere avoec.
Ço dist li Reis : « Seignurs, vengez voz doels,
« Si esclargiez voz talenz e voz coers ;
« Kar hoi matin vus vi plurer des oilz. »
3630Respundent Franc : « Sire, ço nus estoet. »
Cascuns i fiert tant granz colps cum il poet,
Poi s’en estoerstrent d’icels ki sunt iloec. Aoi.
Granz est li chalz, si se levet la puldre.
Païen s’en fuient, e Franceis les anguissent ;
3635Li enchalz duret d’ici qu’en Sarraguce.
En sum sa tur muntée est Bramimunde,
Ensembl’od li si clerc e si canunje
De false lei, que Deus n’enamat unkes ;
Ordres nen unt ne en lur chefs curunes.
3640Quant ele vit Arrabiz si cunfundre,
A halte voiz s’escrie : « Aïez nus, Mahume !
« E ! gentilz reis, ja sunt vencut noz hume,
« Li Amiralz ocis à si grant hunte ! »
Quant l’ot Marsilies, vers sa pareit se turnet,
3645Pluret des oilz, tute sa chere enbrunket,
Morz est de doel. Si cum pecchet l’encumbret,
L’anme de lui as vifs diables dunet. Aoi.
Païen sunt mort, alquant turnet en fuie,
E Carles ad sa bataille vencue.
3650De Sarraguce ad la porte abatue,
Or set il ben que n’est mais defendue ;
Prent la citet, sa genz i est venue.
Par poëstet icele noit i jurent.
Fiers est li Reis à la barbe canue,
3655E Bramimunde les turs li ad rendues ;
Les dis sunt grant, les cinquante menues.
Mult ben espleitet qui damnes Deus aïuet ! Aoi.
Passet li jurz, la noiz est aserie,
Clere est la lune e les esteiles flambient.
3660Li Emperere ad Sarraguce prise.
A mil Franceis fait ben cercer la vile,
Les sinagoges e les mahumeries ;
A mailz de fer e à cuignées qu’il tindrent,
Fruissent les ymagenes e trestutes les ydeles ;
3665N’i remeindrat ne sorz ne falserie.
Li Reis creit en Deu, faire voelt sun servise,
E si evesque les ewes beneïssent,
Meinent païens entresqu’ à l’ baptisterie.
S’or i ad cel ki Carlun cuntrediet,
3670Il le fait pendre u ardeir u ocire.
Baptizet sunt asez plus de .c. milie
Veir chrestien, ne mais sul la Reïne ;
En France dulce ert menée caitive :
Ço voelt li Reis par amur cunvertisset. Aoi.
3675Passet la noiz, si apert li clers jurz.
De Sarraguce Carles guarnist les turs,
Mil chevalers i laissat puigneürs ;
Guardent la vile ad oes l’Empereür.
Muntet li Reis e si hume trestuit,
3680E Bramimunde, qu’il meinet en sa prisun ;
Mais n’ad talent que li facet se ben nun.
Repairet sunt à joie e à baldur,
Passent Nerbone par force e par vigur...
Vint à Burdele la citet de valur ;
3685Desur l’alter seint Severin le barun
Met l’olifant plein d’or e de manguns ;
Li pelerin le veient ki là vunt.
Passet Girunde à mult granz nefs k’i sunt,
Entresqu’ à Blaive ad cunduit sun nevuld
3690E Oliver sun nobilie cumpaignun
E l’Arcevesque, ki fut sages e proz ;
En blancs sarcous fait metre les seignurs,
A Seint-Romain : là gisent li barun.
Franc les cumandent à Deu e à ses nuns.
3695Carles chevalchet e les vals e les munz,
Entresqu’à Ais ne voelt prendre sujurn ;
Tant chevalchat qu’il descent à l’ perrun.
Cume il est en sun paleis haltur,
Par ses messages mandet ses jugeürs,
3700Baivers e Saisnes, Loherencs e Frisuns ;
Alemans mandet, si mandet Borguignuns
E Peitevins e Normans e Bretuns,
De cels de France les plus saives k’i sunt.
Dès or cumencet li plaiz de Guenelun. Aoi.
LE CHÂTIMENT DE GANELON
3705Li Emperere est repairez d’Espaigne
E vient ad Ais, à l’ meillur sied de France ;
Muntet el’ palais, est venuz en la sale.
As li Alde venue, une bele damisele ;
Ço dist à l’ Rei : « U est Rollanz li cataines.
3710« Ki me jurat cume sa per à prendre ? »
Carles en ad e dulur et pesance,
Pluret des oilz, tiret sa barbe blanche :
« Soer, chere amie, d’ hume mort me demandes.
« Jo t’en durrai mult esforcet escange,
3715« Ço est Loewis, melz ne sai à parler :
« Il est mis fils e si tendrat mes marches. »
Alde respunt : « Cist mot mei est estrange.
« Ne placet Deu ne ses seinz ne ses angles
« Après Rollant que jo vive remaigne ! »
3720Pert la culur, chet as piez Carlemagne,
Sempres est morte. Deus ait mercit de l’anme !
Franceis barun en plurent e si la pleignent. Aoi.
Alde la bele est à sa fin alée.
Cuidet li Reis qu’ele se seit pasmée,
3725Pitet en ad, si ’n pluret l’Emperere :
Prent la as mains, si l’ en ad relevée ;
Sur les espalles ad la teste clinée.
Quant Carles veit que morte l’ad truvée,
Quatre cuntesses sempres i ad mandées ;
3730Ad un muster de nuneins est portée :
La noit la guaitent entresqu’à l’ajurnée.
Lunc un alter belement l’enterrerent ;
Mult grant honur i ad li Reis dunée. Aoi.
Li Emperere est repairez ad Ais.
3735Guenes li fels en caeines de fer
En la citet est devant le paleis ;
A une estache l’unt atachet cil serf,
Les mains li lient à curreies de cerf,
Tres ben le batent à fuz e à jamelz :
3740N’ad deservit que altre ben i ait ;
A grant dulur iloec atent sun plait. Aoi.
Il est escrit en l’anciene Geste
Que Carles mandet humes de plusurs teres.
Asemblet sunt ad Ais à la capele.
3745Halz est li jurz, mult par est granz la feste,
Dient alquant de l’ barun seint Silvestre.
Dès or cumencet li plaiz et les nuveles
De Guenelun, ki traïsun ad faite.
Li Emperere devant sei l’ad fait traire. Aoi.
3750« Seignurs baruns, dist Carlemagnes li reis,
« De Guenelun kar me jugez le dreit.
« Il fut en l’ost tresque en Espaigne od mei,
« Si me tolit .xx. milie de mes Franceis,
« E mun nevuld, que jamais ne verreiz,
3755« E Oliver, le proz e le curteis :
« Les .xii. Pers ad traït pur aveir. »
Guenes respunt : « Fels seie, se jo l’ ceil !
« Rollanz me forfist en or e en aveir,
« Pur que jo quis sa mort e sun destreit ;
3760« Mais traïsun nule n’en i otrei. »
Respundent Franc : « Ore en tendrum cunseill. » Aoi.
Devant le Rei là s’estut Guenelun ;
Cors ad gaillard, el’ vis gente culur ;
S’il fust leials, ben resemblast barun.
3765Veit cels de France e tuz les jugeürs,
De ses parenz .xxx. ki od lui sunt,
Puis s’escriat haltement à grant sun :
« Pur amur Deu, kar m’entendez, baruns !
« Seignurs, jo fui en l’ost avoec l’Empereür,
3770« Serveie le par feid e par amur.
« Rollanz sis niés me coillit en haür,
« Si me jugat à mort e à dulur.
« Messages fui à l’ rei Marsiliun :
« Par mun saveir vinc jo à guarisun.
3775« Jo desfiai Rollant le puigneür
« E Oliver e tuz lur cumpaignuns ;
« Carles l’oït e si nobilie barun.
« Venget m’en sui, mais n’i ad traïsun. »
Respundent Franc : « A cunseill en irum. » Aoi.
3780Quant Guenes veit que sis granz plaiz cumencet,
De ses parenz ensemble i out trente.
Un en i ad à qui li altre entendent,
Ço est Pinabels de l’ castel de Sorence,
Ben set parler e dreite raisun rendre,
3785Vassals est bons pur ses armes defendre. Aoi.
« En vus, ami, me fie, ço dist Guenes.
« Getez mei hoi de mort e de calenge. »
Dist Pinabels : « Vus serez guarit sempres.
« N’i ad Franceis ki vus juget à pendre,
3790« U l’Emperere noz dous cors en asemblet,
« A l’ brant d’acer que jo ne l’ en desmente. »
Guenes li quens à ses piez se presente. Aoi.
Bavier e Saisne sunt alet à cunseill,
E Peitevin e Norman e Françeis ;
3795Asez i ad Alemans e Tiedeis.
Icil d’Alverne i sunt li plus curteis,
Pur Pinabel se cuntienent plus quei.
Dist l’uns à l’ altre : « Ben fait à remaneir.
« Laisum le plait, e si preium le Rei
3800« Que Guenelun cleimt quite ceste feiz,
« Puis si li servet par amur e par feid.
« Morz est Rollanz, jamais ne l’ reverreiz,
« N’ert recuverez pur or ne pur aveir.
« Mult sereit fols ki là se cumbatreit. »
3805N’en i ad cel ne l’ graant e otreit,
Fors sul Tierri, le frère dam Gefreid. Aoi.
A Carlemagne repairent si barun,
Dient à l’ Rei : « Sire, nus vus prium
« Que clamez quite le cunte Guenelun,
3810« Puis si vus servet par feid e par amur ;
« Vivre le laissez, kar mult est gentilz hum.
« Morz est Rollanz, n’en ert veüz gerun,
« Ne pur aveir ja ne l’ recuverrum. »
Ço dist li Reis : « Vus estes roi felun ! » Aoi.
3815Quant Carles veit que tuit li sunt faillit,
Mult l’enbrunchit e la chere e le vis.
A l’ doel qu’il ad si se cleimet caitif.
As li devant uns chevalers, Tierris,
Frere Gefreid, à un duc angevin ;
3820Heingre out le cors e graisle e eschewit,
Neirs les chevels e alques brun le vis,
N’est gueres granz ne trop nen est petiz ;
Curteisement à l’ Emperere ad dit :
« Bel sire Reis, ne vus dementez si.
3825« Ja savez vus que mult vus ai servit ;
« Par anceisurs dei jo tel plait tenir.
Puis fait porter .iiii. bancs en la place ;
Là vunt sedeir cil ki s’ deivent cumbatre.
3855Ben sunt malet par jugement des altres ;
Si l’ purparlat Ogers de Danemarche,
E puis demandent lur chevals e lur armes. Aoi.
Puis que il sunt à bataille justet,
Ben sunt cunfès e asolt e seignet,
3860Oent lur messes e sunt acuminiet,
Mult granz offrendes metent pur cez musters.
Devant Carlun ambdui sunt repairet,
Lur esperuns unt en lur piez chalcez,
Vestent osbercs blancs e forz e legers,
3865Lur helmes clers unt fermez en lur chefs,
Ceinent espées enheldées d’or mer,
En lur cols pendent lur escuz de quarters,
En lur puignz destres unt lur trenchanz espiez,
Puis sunt muntet en lur curanz destrers.
3870Idunc plurerent .c. milie chevaler,
Ki pur Rollant de Tierri unt pitet.
Deus set asez cument la fins en ert. Aoi.
Dedesuz Ais est la prée mult large.
Des dous baruns justée est la bataille ;
3875Cil sunt produme e de grant vasselage,
E lur cheval sunt curant e aate ;
Brochent les ben, tutes les resnes laschent.
Par grant vertut vait ferir li uns l’altre,