La description géographique des provinces/Advertissement
e ne me puis persuader (amy lecteur) que M. Paule (qui si curieusement a descript ce que dessus) se soit arresté en si beau chemin, sans passer oultre a continuer le surplus : qui me faict a croire que son œuvre est demeuré imparfaict, comme je te laisse a conjecturer : mesmement en ce dernier traicté, chap. 47. il demonstre avoir affection de descripre les parties Septentrionales, qui sont voysines des Tartares, lesquelles il avoit cy devant obmises au premier livre, auquel il ne touche rien des regions & provinces, que tant son pere Nicolas Paule en son premier voyage & retour, que luy au second, ont passées & traversees, depuis Armenie jusques a Clemenfu, ville royalle de la province de Cathay, sinon qu’il dict que leur chemin fut grandement retardé, à cause des neiges & grandes inondations d’eaues, ce qui est facile a croire que ce fut en passant les regions Septentrionales. Mais pour le present je n’en trouve autre chose de luy, que je te puisse communiquer. Toutefois si tu as affection de congnoistre ces regions Septentrionales, tu en trouveras a suffire pour rassasier ton esprit en la grande Cosmographie de Munsterus, & particulierement au livre de Mathias Amichou, docteur en Medicine, & chanoine de Cracovie, lequel j’ay deliberé de brief te rendre Francois, avec le voyage de Loys Vartoman, que je tiens present pour seconder le present autheur, attendant toutesfois de quelle grace & saveur il sera par toy recu. Cependant auras fruition de mon labeur, s’il t’est agreable.