Lancan vei per mei la landa

La bibliothèque libre.
Aller à : navigation, rechercher
Bernard de VentadourLancan vei per mei la landa

 




Lancan vei per mei la landa
dels arbres chazer la fòlha,
ans que.lh frejura s’espanda
ni.l gens termini s’esconda,
m’es bel que si’ auzitz mos chans,
qu’estat n’ aurai mais de dos ans,
e cové que.n fass’ esmenda.

Mout m’es greu que ja reblanda
celeis que vas me s’orgòlha
car si mos cors re.lh demanda,
no.lh platz que mot m’i responda.
Be m’auci mos nescis talans,
car sec d’ amor los bels semblans
e no ve c’ amors lh’ atenda.

Deus, que tot lo mon garanda,
li met’ en cor que m’acòlha,
c’ a me no te pro vianda
ni negus bes no.m aonda.
Tan sui vas la bela doptans,
per qu’ e.m ren a leis merceyans:
si.lh platz, que.m don o que.m venda!

Mal o fara, si no.m manda
venir lai on se despòlha,
qu’eu sia per sa comanda
pres del leih, josta l’esponda,
e.lh traya.ls sotlars be chaussans,
a genolhs e umilians,
si.lh platz que sos pes me tenda.

Faihz es lo vers tot a randa,
si que motz no.i deschapdòlha,
outra la terra normanda,
part la fera mar prionda;
e si.m sui de midons lonhans,
vas se.m tira com azimans
la bela cui Deus defenda.

Si.l reis engles e.l ducs normans
o vol, eu la veira abans
que l’iverns nos sobreprenda.

(parlé)Pel rei sui engles e normans,
e si no fos Mos Azimans,
restera tro part calenda.