Le Livre des ballades/Il n’est que d’estre bien couché
pour estre couché en son Estat
Princeſſe au cueur noble & raſſis,
La fortune que j’ay ſuivie
Par force m’a ſouvent aſſis
Au froid giron de triſte vie ;
De m’y ſeoir encor me convie,
Mais je reſpons (comme faſché) ;
« D’eſtre aſſis je n’ay plus d’envie ;
Il n’eſt que d’eſtre bien couché. »
Je ne ſuis point des exceſſiſz
Importuns, car j’ay la pepie,
Dont ſuis au vent comme un chaſſis,
Et debout ainſi qu’une eſpie ;
Mais s’une fois en la copie
De voſtre eſtat je ſuis merché,
Je criray plus hault qu’une pie :
« Il n’eſt que d’eſtre bien couché. »
L’un ſouſtient contre cinq ou ſix
Qu’eſtre accouldé, c’eſt muſardie,
L’autre, qu’il n’eſt que d’eſtre aſſis
Pour bien tenir chere hardie ;
L’autre dit que c’eſt melodie
D’un homme debout bien fiché ;
Mais quelque choſe que l’on die,
Il n’eſt que d’eſtre bien couché.
Princeſſe de vertu remplie
Dire puis (comme j’ay touché).
Si promeſſe m’eſt accomplie :
« Il n’eſt que d’eſtre bien couché. »