Le Livre des ballades/Les médisans qui veulent tout sçavoir
Mon doulx ami, n’ayez melancolie
Se j’ai en moi ſi joyeuſe maniere
Et ſe je fais en tous lieux chiere lie,
Et de parler à maint ſuis coutumiere ;
Ne croyez pas pour ce, que plus legiere
Soye envers vous. Car c’eſt pour depceuoir
Les médiſans qui veulent tout ſçavoir.
Car ſe je ſuis gaye, cointe & jolie,
C’eſt tout pour vous qu’aime d’amour entiere
Se ne prenez nulz ſoin qui contralie
Votre bon cuer. Car pour nulle priere,
Je n’ameray autre qui m’en requerre
Mais on doit moult douter, à dire voir,
Les médiſans qui veulent tout ſçavoir.
Sachiez devoir qu’amours ſi fort me lie,
Que votre amour que n’ay choſe tant chiere.
Mais ce ſeroit à moi trop grand folie
De ne faire, fors à vous bonne chiere,
Ce n’eſt pas droit, ne chose qui affiere,
Devant les gens pour faire appercevoir
Les mediſans qui veulent tout ſçavoir.