Le Livre des ballades/Ne que monnoye qu’on descrie
aux filles de joie
Or y penſez belle gantière,
Qui m’eſcolière ſouliez eſtre ;
Et vous Blanche la ſavatière,
Or eſt-il temps de vous congnoiſtre ;
Prenez à dextre & à feneſtre ;
N’eſpargnez homme, je vous prie ;
Car vieilles n’ont ne cours, n’y eſtre,
Ne que monnaye qu’on deſcrie.
Et vous la gente ſaulciſſière
Qui de dancer eſtes à deſtre ;
Guillemette la tapiſſière,
Ne meſprenez vers voſtre maiſtre ;
Tous vous fauldra clorre feneſtre.
Quand deviendrez vieille, fleſtrie ;
Plus ne ſervirez qu’ung vieil prebſtre.
Ne que monnoye qu’on deſcrie.
Jehanneton la chaperonnière,
Gardez qu’amy ne vous empeſtre ;
Katherine l’eſperonnière,
N’envoyez plus les hommes paiſtre
Car qui belle n’eſt ne perpetre
Leur bonne grace, mais leur vie.
Laidde vieilleſſe amour n’impetre,
Ne que monnoye qu’on deſcrie.
Filles, veuillés vous entremettre
D’eſcouter pour quoy pleure & crie,
Pour ce que je ne me puys mettre ;
Ne que monnoye qu’on deſcrie.