Le Livre des oraisons/XXI
XXI
Sire vray Dieu tout puissant perpetuelement senz fin et senz commencement, un en trinité et trois en unité ie croy tu seul dieu, ie taour et te loe, et te beneis et te glorifie, et a toy ren grâces et a toy de tout mon cuer ie me recommans, enten sire a ma voix et a ma oroison pere des cielx, mon roy et mon dieu filz redempteur du monde dieu ayes mercy de moy, ne me decoy mie avec mes iniquitez, ne a moy ne te courrouces, ne en la fin ne gardes a mes pechiez. Saint esperit benigne dieu remplis moy de lesperit de ta grace et madresce en voye de salut durable, et menseigne faire ta voulente, oste de mon cuer tout quant que il te desplaist, dieu tout puissant piteus et misericors sires regarde ma tribulation et la retourne en ioye et ne te plaise treshault sire donner ton heritage en perdicion. Regent de touz et protecteur de ceulz qui ont esperance en toy recois mes prières et par les intercessions de la glorieuse vierge Marie oste ta yre de sur moy. Sires dieu omnipotent et mon salut ne te plaise recevoir marme iusques a tant que mes pechiez me soyent pardonnez. Ô glorieuse mère de Dieu mère de misericorde, tousiours vierge Marie qui portas le seigneur de tout le monde et le roy des angelz, et seule vierge ayde moy ou iour de ma tribulation, afin que par tes prières et par tes mérites ie puisse aler au règne des cieulx. Ô saint Michel archangel dieux prevost de paradis ayde moy et me deffent du maligne esperit a leure de ma mort et meine marme en paradis ; tous les sains angels et archangelz dieu, toutes les vertuz des cieulx et tous les sains ordres des beneures esperis, force de la seigneurie contraire, reprenes et empugnes ceulz qui me impugnent ; de la cruaulté du rongant ennemy puissamment me deffendes, et en voye de vérité fiablement toutes heures iour et nuyt me gardes et en leure de ma mort marme en paix avec vous recevez.
Saint Iehan Baptiste et touz les sains patriarches et prophètes ie vous suppli et pri humblement que vous tendes voz mains vers moy et ne donnes ayde en toutes mes neccessités et enfermetés, demandez pour moy a notre Seigneur pardon, pacience, constance, iustice, obeissance, continence et sainte perseveration. Saint Pierre tresbeneure prince des apostres et tous les sains apostres euvangelistes et martyrs, donnez moy honnourable acroissance de vertuz, fin louable, pardurable benediction ; tres nobles docteurs et touz sains confesseurs, ie vous pri que vous vueilles estre advocas comment ie aye indulgence de mes pechiez devers Dieu et habondance de tous biens, vouloir bonnes coustumes, reverence des commandemens notre seigneur, observer et garder. Toutes les saintes vierges, et les veuves qui sont en la grace de Dieu empetres a moy pecheur don de pardurable grace, continence de vie, netteté de corps, innocence de cuer, fermeté de foy, charité fraternele ; supplies pour moy touz les sains et toutes les sainctes qui avez pleu à notre Seigneur du commencement du siècle, ordenez moy a acomplir la voulenté de Dieu en bonnes euvres afin que ie vive senz pechié et que ie puisse parvenir à la gloire de paradis. Amen.