Le Livre des sonnets/Assis sur un fagot, une pipe à la main
Sonnet
Aſſis ſur vn fagot, vne pipe à la main,
Triplement accoudé contre vne cheminée,
Les yeux fixes vers terre, & l’ame mutinée,
Ie ſonge aux cruautez de mon ſort inhumain.
L’eſpoir qui me remet du iour au lendemain
Eſſaye à gaigner temps ſur ma peine obſtinée,
Et me venant promettre vne autre deſtinée
Me fait monter plus haut qu’vn Empereur Romain.
Mais à peine celle herbe eſt-elle miſe en cendre,
Qu’en mon premier eſtat il me conuient deſcendre,
Et paſſer mes ennuis à redire ſouuent :
Non, ie ne trouue point beaucoup de difference,
De prendre du tabac, à viure d’eſperance,
Car l’vn n’eſt que fumée, & l’autre n’eſt que vent.
Saint-Amant (de).