Le Roman du Renart, supplément, 1835/4
Renart le Bestourné.
Renars est mors, Renars est vis ;
Renars est ors, Renars est vils,
Et Renars règne ;
Renars a moult régné el règne,
Bien i chevauche à lasche règne
Col estendu.
L’en le devoit avoir pendu,
Si com je l’avoie entendu,
Mès non à voir.
Par tens le portez bien savoir :
Il est sires de tout l’avoir
Mon seignor Noble,
Et de la Brie et du vignoble.
Renars fit en Costantinoble
Bien ses aviaus,
Et en caves[1] et en caviaus
Ne lessa vaillant deux naviaus
L’Empereor ;
Ainz en fist povre péchéor,
Par pou ne le fist peschéor
Dedenz la mer.
Ne doit l’en bien Renart amer,
Qu’en Renart n’a fors que l’amer :
C’est sa droiture.
Renars a moult grant norreture ;
Moult en avons de sa nature
En ceste terre.
Renars porra movoir tel guerre
Dont moult bien se porroit soufferre
La régions.
Mes sires Nobles li Lyons
Cuide que sa sauvacions
De Renart viegne :
Nou fet[2] voir, de Dieu li soviegne ;
Ainçois dout qu’il ne l’en aviegne
Domage et honte.
Se Nobles savoit que ce monte,
Et les paroles que l’en conte
Parmi la vile :
Dame Raimbors, dame Poufile,[3]
Qui de lui tiennent lor concile,
Çà dis, çà vint,
Et dient c’onques mès n’avint
N’onques à franc cuer ne sovint
De tel geu faire.
Bien li déust membrer de Daire[4]
Que li sien firent à mort traire
Par s’avarisce.
Quant j’oi parler de si lait visce,
Par foi, toz li peuz[5] m’en hérice
De duel et d’ire
Si fort que je ne sai que dire ;
Quar je voi roiaume et empire
Trestout ensamble.
Que dites-vous, que il vous samble,
Quant mes sires Nobles dessamble
Toutes ses bestes,
Qu’il ne puéent metre lor testes
Aus bons jors ne aus bones festes
En sa meson ;
Et se n’i set nule reson
Fors qu’il doute de la seson
Que n’enchierisse ;
Mès jà de ceste anée n’isse
Ne mès coustume n’establisse
Qui ce brassa ;
Quar trop vilain fet embrassa :
Roniaus li chiens le porchaça
Avoec Renart ;
Nobles ne set enging ne art
Ne c’uns des asnes de Senart
Qui busche porte ;
Il ne set pas de qu’est sa porte ;
Por ce fet mal qu’il li enorte
Se tout bien non.
Des bestes orrez ci le non
Qui de mal fere ont le renon
Toz jors éu ;
Moult ont grevé, moult ont néu ;
Aus seignors en est meschéu
Et il s’en passent :
Assez emblent, assez amassent ;
C’est merveilles qu’il ne se lassent.
Or entendez
Con Nobles a les iex bendez ;
Et se ces oz estoit mandez
Par mer, par terre,
Où porroit-il trover ne querre
En qui il se fiast de guerre
Se mestier iere ?
Renars porteroit la banière ;
Roniaus, qu’à toz fet laide chière,
Feroit la bataille première,
O soi nului.
Bien vous puis dire de celui
Jà nus n’aura honor de lui
De par servise.
Quar la chose seroit emprise,
Ysengrins, que chascuns desprise,
L’ost conduiroit ;
Où se devient, il s’enfuiroit.
Bernars l’Asnes les déduiroit
O sa grant croiz.
Cil quatre sont fontaine et doiz,
Cil quatre ont l’otroi et la voiz
De tout l’osté.
La chose gist sor tel costé
C’onques rois de bestes n’ot té
Le bel aroi.
Cist sont bien mesnie de roi ;
Il n’aiment noise ne desroi,
Ne grant murmure :
Quant mes sires Nobles pasture,
Chascuns s’en ist de la pasture ;[6]
Nus n’i remaint.
Par tens ne saurons où il maint :
Jà autrement ne se demaint
Por querre avoir,
Qu’il en porra assez avoir.
Et cil ont assez de savoir
Qui font son conte.
Bernars gete, Renars mesconte ;
Ne connoissent honor de honte.
Roniaus abaie,
Et Ysengrins pas ne s’esmaie :
Le seau porte troupe qu’il paie.
Ysengrins a un fils o soi
Qui toz jors de mal faire a soi ;
S’a non Primaut ;
Renars, un qui a non Grimaut ;
Poi lor est comment ma rime aut,
Mès que mal facent,
Et que tous les bons us esfacent.
Diex lor otroit ce qu’il porchacent !
S’auront la corde ;
Lor ouvraingne bien s’i acorde,
Quar il sont sanz miséricorde
Et sanz pitié,
Sanz charité, sanz amistié.
Monseignor Noble ont tot getié
De bons usages ;
Ses ostex est uns reclusages.
Assez font paier de musages
Et d’avaloingnes
A ces povres bestes lontaignes,
A cui il font de granz essoingnes.
Diex les confonde,
Qui sires est de tout le monde !
Et je r’otroi que l’en me tonde
Se maus n’en vient ;
Quar d’un proverbe me sovient
Que l’en dit : Tot pert qui tot tient ;
C’est à bon droit.
La chose gist sor tel endroit
Que chascune beste voudroit
Que venist l’Once.
Se Nobles copoit à la ronce
De mil n’est pas un qui en gronce,
C’est voirs sanz faille.
L’en seuesche guerre et bataille,
Il ne me chaut mès que bien n’aille.