Le Roman du Renart - D. M. Méon — 1826/24
Ci conmence le Pelerinage Renart, si con il ala à Rome.
Jadis estoit Renart en pès
A Malpertuis son fort palès ;
Lessié avoit le guerroier,
Ne voloit mès de tel mestier
Vivre con il avoit vescu :
Tant avoit de l’autrui éu
Par male reson et à tort,
Que bien le haoient de mort
Plus d’omes qu’il n’a en l’an festes,
Et autretant, ce cuit, de bestes.
Or avint-il jadis issi
Par un matin d’un vendredi
lssi Renart de sa tesniere,
Si s’eslessa par la bruiere :
Ne coroit pas si tost d’assez
Con il soloit, moult fu lassez.
Ha ! las, dist-il, n’ai mès mestier
De mal fere ne de pechier :
Par la fiance de mes piez
Ai-ge fet de moult granz pechiez.
Je soloie corre si tost
Que trestuit li cheval d’un ost
Ne m’atainsissent en un jor
Por que vosisse fere un tor ;
En ceste terre n’a mastin
Qui me rescossist un pocin
Por que je l’éusse engolé.
Hé ! Dex, tant bon en ai emblé,
Tant chapon et tante geline !
Onc n’i ot savor de cuisine,
Ne vert sauce, ne ail ne poivre,
Ne cervoise ne vin por boivre :
Toz jors ai esté pautoniers
Et aloie moult volentiers
Là où je savoie hantins
De gelines et de pocins :
Il me venoient pooillier
Et entre les jambes bechier.
Qant une en pooie tenir
O moi la covenoit venir ;
Ne li avoit crier mestier,
A la mort l’estovoit luitier.
Mainte en ocis en tel maniere,
Une en fis-ge porter en biere
Devant Dant Noble le Lion
Que je ocis en traïson ;
Mès icele me fu tolue,
S’en dut ma gole estre pendue.
Onc vaillant l’éle d’un pinçon
N’oi-je voir se de l’autrui non :
Ce poise moi, or m’en repent,
Biax sire Diex omnipotent,
Aiez merci de cest chaitif,
Ce poise moi que je tant vif.
Si con Renart se dementoit
Es-vos un Vilain qui venoit
Par mi la lande tot à pié,
En son chaperon enbrunchié.
Renart le voit tot sol venir,
Encontre vet, ne volt foïr :
Vilain, ce dist Renart, çà vien,
Meines-tu aves toi nul chien ?
Nenil, ne t’estuet à doter :
Renart que as-tu à plorer ?
Que j’ai ? fet Renart, ne sez-tu
Jà n’a-il jone ne chanu
En ceste terre que l’en sache,
C’onques ne fui en tele place
Où je poïsse nul mal fere,
C’onques m’en vosisse retrere ;
Mès or le veil enfin lessier,
Que j’oï dire un sermonier
Que par vraie confession
Qui merci crie aura pardon.
Renart, viaus-tu te confesser ?
Oïl, se péusse trover
Qui la penitance me doingne.
Dist li Vilein, Renart, ne hoingne,
Tu sez tant de guile et de fart,
Bien sai tu me tiens por musart.
Non faz, dist Renart, tien ma foi
Que je n’ai mal penser vers toi,
Mès je te pri por Deu et quier
Que me meines à un mostier
Où je puisse prestre trover,
Car enfin me voil confesser.
Dist li Vileins, çà en cest bois
En a un, vien i, qar g’i vois :
Et li Vileins moult bien savoit
C’uns bons crestiens i avoit.
Tant ont erré par le boschage
Qu’il sont venu à l’ermitage.
A la porte par de devant
Le maillet i truevent pendant :
Li Vilains hurta durement
Et l’Ermite vint erraument ;
Le fermal[1] oste de la reille,
Qant vit Renart, moult se merveille.
Nomini Dame, dist li Prestre,
Renart, que quiers-tu en cest estre ?
Dex le set que puis n’i fus-tu
A cest porpris de mieuz en fu.
Ha ! sire, dist Renart, merci,
Que que j’aie fet or sui ci :
De quanque j’ai vers vos mespris
Et vers mes autres anemis
Vos cri-ge merci et pardon.
As piez li chiet à oroison,
Et l’Ermite l’a redrecié,
Puis li dist, Renart, or te sié
Ci devant moi, si me descuevre
Tot de chief en chief ta male œvre.
Sire, dist Renart, volentiers.
Qant iere bachelers legiers
Volentiers gelines menjoie,
En ces haies où ges trovoie
Je les tuoie en traïson
S’es menjoie conme gloton.
A Ysengrin pris conpaignie
Qant je li oi ma foi plevie
De léaument vers lui ovrer.
Par amor li fis esposer
Hersent la bele ma seror,
Mès ançois que passast tiers jor
Li rendi-je maveis loier,
Qar gel’ fi moine en un mostier,
Et si le fis devenir prestre,
Mès au partir n’i vousist estre
Por une teste de sengler,
Qar je li fis les sainz soner,
Si vint li prestres de la vile
Et de vileins plus de deus mile
Qui le batirent et fusterent,
A bien petit que nel’ tuerent.
Et puis li fis-je en un vivier
Tote une nuit poissons pechier
Dusq’au matin que un vilain,
I vint sa coingnie en sa main,
Si li refist mal peliçon,
Qar avec lui ot un gaingnon
Qui li repeliça la pel :
Sachiez de voir moult m’en fu bel.
Puis le refis prendre à un piege
Où il garda trois jors le siege ;
Au partir i lessa le pié,
Dex moie cope del pechié.
Puis liai ma Dame Hersent
A la coue d’une jument,
Si l’amors et fis reparier
Tant qu’à honte la fis livrer.[2]
Moult ai fet autres felonies,
De larecins, de roberies ;
Bien sai qu’escomeniez sui,
Certes je ne vos auroie hui
Dit la moitié de mes pechiez,
Ce que vodroiz si m’en cargiez,
Qar je vos ai dite la some.
Renart, aler t’estuet à Rome,
Si parleras à l’Apostoile
Et li conteras ceste estoire
Et te feras à lui confés.
Par foi, dist Renart, c’est grant fés.
Dist l’Ermites, mal estuet trere
A qui penitance veut fere :
Or voit Renart fere l’estuet,
Escrepe et bordon prent, si muet,
Si est entrez en son chemin,
Moult resemble bien pelerin,
Et bien li sist l’escrepe au col ;
Mès de ce se tint-il por fol
Qu’il est méuz sanz conpaignie.
Le grant chemin n’ira-il mie,
Qar il se crient moult de sa pel :
Tost passeroit par tel chastel
Où li covendroit herbergier
Et de sa pel gage lessier.
Le grant chemin lessa à destre,
Une sente prist à senestre,
Garda aval en la champaigne
Et vit une moult grant conpaigne
De berbiz qui pessent gaïn
Et entre le fou Dan Belin
Le Moton qui se reposoit,
Tant ot mengié que las estoit.
Belin, dist Renart, que fez-tu ?
Ci me repos tot recréu.
Par foi cist repos est mavès.
Et dist Belins, je n’en puis mès,
Je serf à un vilein felon
Qui onc ne me fist se mal non :
Einz puis que soi beler ne muire
Ne finai de ses berbis luire.
Ces berbis li ai-je enjendrées
Que tu vois ici aünées ;
Mal ai mon service emploié,
Qar li vileins m’a otroié
A ses soieors à lor prise,
Et si a-il ma pel promise
A housiaus fere à un prodome
Qui les en doit porter à Rome.
A Rome ! Par Dieu, dist Renart,
Jà en la voie n’auras part :
Miex là te vendroit-il porter
Ta pel que toi fere tuer,
Et se iceste mort t’alasche,
Si revendras après la pasque
Le joedi de rovoisons
Que l’en menjue les motons.
Or es à la mort, bien le voi,
Se tu n’en prens hastif conroi,
Se tu n’en tornes d’autre part.
Por amor Deu, sire Renart,
Pelerins estes, bien le voi,
Conseilliez moi en bone foi.
Pelerins sui-je voirement,
Mès tu n’en crois ore noient
Por le mal cri que j’ai éu ;
Mès je m’en sui or repentu.
J’ai esté à un home féel
Qui m’a doné moult bon conseil
Par cui serai saus, se Dex plest.
Dex a conmandé que l’en lest
Pere et mere, frere et seror,
Et terre et herbe por s’amor :
Cist siecles n’est fors un trespas,
Moult par est cil chaitis et las
Qui aucune foiz ne méure.
Jà trovons-nos en l’Escriture
Que Diex est plus liez d’un felon,
Qant il vient à repentison,
Que de justes nonante neuf.
Cist siecles ne vaut pas un œf ;
A l’Apostoile voil aler
Por conseil querre et demander
Conment je me doi meintenir :
S’avec moi voloies venir,
L’en ne feroit ouan usel
Ne chaucemente de ta pel,
Ne ne tondroit-on ta toison,
Ainz aroies à grant foison
Herbes et de bois et de prés,
Et ne seroies pas tués.
L’en ne deçoit pas pelerin,
Je vois o toi, ce dist Belin.
En lor chemin en sont entré,
Mès il n’orent gueres erré
Qant trovent Bernart l’Arche-prestre
En un fossé les chardons pestre.
Bernart, dist Renart, Dex te saut !
Et cil lieve la teste en haut :
Dex te benéie, dist-il !
Ies-tu ce Renart le Gorpil ?
Oïl, ce sui-ge voirement.
Por le cuer bé quex mautalent
T’a fet devenir pelerin
Entre toi et sire Belin ?
Ce ne fu mautalent ne ire,
Ençois volons soffrir martire
Et travail por nos amender
Et por Dame Deu achater ;
Mès de ce n’as-tu or corage,
Ne d’aler en pelerinage ?
Ainçois aimes miex ouan mès
De la busche porter grant fès
Et granz sachies de charbon,
Et si auras de l’aguillon
Tot le crepon desus pelé ;
Et qant ce vendra en esté,
Que de moches sera grant nombre,
Lors n’i garras néis en l’ombre.
Fai le bien, si vien avec nos,
Tu ne seras jà sofretos
De rien dont te puisson aidier,
Tu auras assez à mengier.
Dist l’asne, volentiers iroie
Se assez à mengier avoie.
Si auras, ce t’afi par foi.
Or en vont ensemble tuit troi,
En un grant bois en sont entré
Où il troverent grant plenté
De Cers, de Bisses et de Deins,
Mès de ceus pristrent-il le meins :
Tote jor ajornée errerent.
Par la forest, ainc n’i troverent
Recet ne vile ne meson.
Seignor, dist Belin, que feron ?
De herbergier est assez tart.
Voirs est, ce dist sire Bernart.
Renart respont, biau conpaignon,
Et nos quel ostel querrion
Fors la fresche herbe soz cest arbre ?
Miex l’aim que un palès de marbre.
Par foi, dist Belin li Moton,
J’aim trop miex gesir en meson :
Tost se vendroient ci enbatre
Ci entre nos trois leu ou qatre
Dont il a assez en cest bois,
Si seron honiz demanois.
Renart lor respont sans orgoil,
Seignor, ce que volez je voil ;
Ci delez est l’ostel Primaut
Mon conpere qui ne nos faut :
Alons i, nos i serons jà,
Bien sai qu’il nos herbergera.
Tant ont fet que là sont venu,
Mès il seront moult irascu
Ainz qu’il s’en partent, se Renart
Ne les en giete par son art.
Li Leus ert alez en la lande
Et Hersent por querre viande.
Li pelerin pristrent l’ostel,
Assez troverent un et el,
Char salée, formache et oés,
Et quanqu’à pelerin est oés.
Et si trovent bonne cervoise.
Tant but Belins que il s’envoise,
Si a comnencié à chanter
Et l’Arche-prestre à orguener,
Et Dant Renart chante en fauset.
Jà féissent bien lor feret
Se il fussent lessié en pès ;
Mès li Leus vint à tot son fès
Qu’il aportoit dedenz sa gole,
Et Hersent qui n’ert pas saole,
Dont ele estoit tote desvée.
Qant il oïrent la criée
Des pelerins qui léenz erent,
Un petitet s’en aresterent,
Et dist li Leus, j’oi léenz gent.
G’irai véoir, ce dist Hersent :
Tantost a gelé son fez jus,
Lors esgarda par le pertuis
Si vit les pelerins au feu,
Et puis s’en revint à son Leu.
Sire Ysengrin, dont ne sez-tu
Con il nos est bien avenu :
Ce est Renart, Belins et l’Asne,
Cez avons-nos en nostre glane,
Or te puès vengier de ton pié ;
Dist Ysengrins, si ferai-gié.
Par grant aïr a l’uis hurté,
Mès il le trovent bien fermé ;
Ovrez, dist-il, ovrez, ovrez.
Tesiez, dist Renart, ne genglez.
Renart, n’i a mestier tesir,
Il vos estuet cest huis ovrir,
Fel traïtres, fel renoié,
Par vos ai-ge perdu le pié :
Vos estes tuit livré à mort,
Mar arrivastes à cest port,
Vos et Bernars et li Moton.
Ha ! las, dist Belin, que feron ?
Tuit somes pris sanz nul retor.
Et dist Renart, n’aiez paor,
Qar bien istrons de cest trepeil
Se volez croire mon conseil.
Si ferons-nos, dist l’Arche-prestre,
Renart[3], jà es-tu nostre mestre
Qui en cest leu nos amenas.
Or dont, Bernart, qui fors rains as,
Va, si t’acule à cel huiset
Et si l’entr’ovre un petitet
Tant que li Leus i puisse entrer,
Si li lai la teste boter,
Puis reclo l’uis par grant vertu,
A lui jostera cest cornu.
L’Asne s’est à l’uis aculé,
Un petitet l’a esbaé :
Li Leus bota la teste avant,
Et cil clot l’uis de meintenant,
Assez fu pis que en prison.
Qui donques véist le Moton
Con il ruoit les cops d’aïr
Et reculoit por miex ferir.
Renart le semont et apele,
Belin, espan li la cervele,
Garde que vis ne s’en estorde.
Onques encore à nule porte
Ne véistes si fier asaut
Conme Belin fet à Primaut.
Tant a feru et chapelé
Que le Leu a escervelé.
Hersent qui par dehors estoit,
Et qui aidier ne li pooit,
Parmi le bois s’en vet hulant
Et les autres Leus amassant.
En poi d’ore en i asambla
Plus de cent que o lui mena
A l’ostel por Primaut vengier ;
Mès cil se sont mis au frapier,
Et les Leus les suéent par trace,
Hersent devant moult les manace,
Et jurent qu’il les mengeront,
Jà en cel leu nes troveront.
Renart oï les Leus uler,
Ses compaignons prist à haster :
Seignor, dist-il, venez grant oire.
L’Arche-preste conmence à poire,
Qu’il n’avoit pas apris à corre.
Renart voit qu’il nes puet rescorre
Ne garder se par engin non,
Seignor, dist Renart, que feron ?
Tuit somes mort et confondu,
Montons en cest arbre ramu,
S’auront nostre trace perdue :
Hersent est forment irascue
Por son seignor que mort avon.
Par foi, dist Belin le Moton,
Je n’apris oncques à ramper.
Dist Bernars, je ne sai monter.
Seignor, besoing fet moult aprendre
Et tel chose sovent emprendre
Dont l’en jà ne s’entremetroit
Se li besoing si grant n’estoit.
Fetes, Seignor, montez, montez,
Se vos volez, de vos pensez.
Renart monta en l’arbre sus,
Qant il virent qu’il n’i a plus,
A quelque paine sus monterent,
Desus les branches s’encroerent.
Es-vos poignant des esperons
Hersent o toz ses conpaignons :
Qant il sont venu en la place,
Si en orent perdu la trace.
Ne sevent mès où aler querre,
Et dient qu’entré sont en terre :
Lassé furent et traveillié,
Desoz l’arbre se sont cochié.
Belins qui les Leus esgarda,
N’est merveille s’il s’esmaia :
Ha ! las, dist-il, con sui chaitis !
Or vousisse estre o mes berbis.
Par foi, dist Bernart, je me doil,
Tel ostel pas avoir ne soil :
Je me voil d’autre part torner.
Renart le conmence à blasmer,
Vos porrez encui tel tor fere
Qui vos tornera à contrere.
Dist Bernart, je me torneraï.
Dist Belins, et je si feraï.
Or tornés dont, qar je vos lès.
Cil se tornent tuit à un fès,
Qu’il ne se sorent sostenir,
A terre les estuet venir.
Bernart esquacha qatre Leus,
Et Belins en retua deus,
Et li autre Leu moult s’esmaient
Por les conpaignons que mort voient,
Fuit s’en l’un chà et l’autre là,
Et Renart qui les esgarda,
Si s’escria, la hart ! la hart !
Tien les Belin, pren les, Bernart,
Pren les, Bernart l’Arche-provoire.
Lors s’en tornent li Leu grant oire,
Que por cinqante mars d’argent
N’en retornast un por Hersent.
Renart qui fu en l’arbre sus,
A ses conpaignons descent jus :
Seignor, dist-il, que fetes-vos ?
Ai vos bien de la mort rescos,
I a-il nul de vos blecié ?
Dist Bernart, ge sui mehaingnié,
Je ne puis mès avant aler,
Ariere m’estuet retorner.
Dist Belins, et ge si ferai,
Jamès pelerins ne serai.
Seignor, dist Renart, par mon chief,
Cest errer est pesant et grief ;
Il a el siecle meint prodome
Qui onques ne furent à Rome :
Tiex est revenuz des sept sainz
Qui est pires qu’il ne fu ainz.
Je me voil metre en mon retor,
Et si vivrai de mon labor
Et gaaignerai léelment,
Si ferai bien à povre gent.
Lors ont crié : outrée, outrée !
Si ont fete la retornée.