Le Roman du Renart - D. M. Méon — 1826/41
Einsi comme li fil Renart et li fil Ysengrin jousterent à la quintaine.
Li fil Renart bien i jousterent
Si que li plusiour les loerent.
Andoi li enfant Ysengrin
I jousterent, maint grant tatin
Ot le jour por eaus la quintaine.
Cascuns des fius Timer se paine
C’on parolt d’eaus. Li fil Tybiert
Le cat i sont si très apiert,
Et li fil Belin le mouton,
Cascuns i broce le Gascon.
Martinés li fius Cointeriel
Se maintint cel jour bien et biel,
K’il faisoit la bouce et le moe
A tous. Une lance en sa poe
Tint Bruniaus fius Brun, et jouster
Ala pour son cors deporter.
Cascuns jousta au miex qu’il pot,
Mais Lioniaus le pris en ot,
Li fius le Roi et li mainsnés :
De tous l’en est li pris donnés,
Car ce fu tous li mius faisans.
Cascuns s’i prouva com vaillans.
Li fil Ysengrin s’i prouverent
Si qu’à poi qu’il ne conquesterent
Le pris. Orghius moult enflama,
Mais nul sanlant là n’en moustra.
Atant est li jouste remese ;
Orghius s’en va ardans con brese
De doel ; li chevalier nouviel
Le suivent. Le Roi fu moult biel
De çou que Lioniaus ses fis
Ot de la quintaine le pris.
Désarmé se sont en la sale,
Cascuns contre eus rit, danse et bale.
Li Rois a fait l’iaue corner,
Tuit s’en vont que mius mius laver.
Li Rois s’assist au plus haut dois
A une table, car c’iert drois.
Sisent li nouviel chevalier,
A boire orent et à mengier
Autretant que dont s’il soursist.
Orghilleus ens où cief ce sist
De la table ; à son doit achaine
Renart, et il ne li fu paine
K’il n’i venist, si li demande
K’il li plaist. Orghius li conmande
K’il se sieche et il li dira.