Le Roman du Renart - D. M. Méon — 1826/47
Einsi comme Renart vint devant le Roi en abit de frere Meneur.
Quant voit Renart, s’a demandé,
Qui est cil freres Cordelois ?
Chaiens n’en vi nul mais des mois.
Cil esraument le Roi conterent
Çou qu’il leur dist quant le trouverent,
Et qu’il fust où fossé noiiés
S’il ne fuissent. Li Rois sainiés
S’est cent fois de sa destre poe.
Renart en desriere le moe
L’en fait, son caperon osta,
A genous le Roi salua.
Li Rois l’en drece et si l’assist
Lés lui, et puis si li enquist
Conment a à non, de quel ville
Il ert. Renart ki sot de ghille
Plus que nus, li dist de Digon
Sui, frere Jonas me nomme-on.
Tel privilege ai, sire Rois,
Que je puis préeschier des crois,
S’ai tel pooir conme uns legaus
Tout là ù n’est li Cardounaus,
Et volrai demain préecier
Et la parole Dieu noncier.
Li Rois l’otroie volentiers
Et la Roïne. Endementiers
Vint au Roi Grimbers li taissons,
Od lui son fil agenillons
Se sont mis par devant le Roi.
Sire, dist Grimbiers, je vous proi
Mierci pour Rousiel mon neveu,
Sauves vo raison et vo veu,
C’anuit le laissiés confiesser
Et à cest preudome parler.
S’il piert le cors sauvés li l’ame ;
Que la très glorieuse Dame
Vos pardoinst, sire, vos meffais,
C’on me dist de matin deffais
Doit estre et cil ki furent pris
Od lui. Sire, petit vos pris
En croisteroit se desconfiés
Moroit, et si seroit grans piés.
Li Rois respont, ma volentés
Est que cascuns soit confiessés.
Li Rois le mastin Rooniel
Conmande qu’il amaint Rousiel
Et tous les prisons, si seront
Confiessé, car demain morront.
Roeniaus respont volentiers,
Car au Roi estoit carteriers.
Lendemain les a tous trais hors
Pales de vis, maigres de cors ;
Les maine devant Roi Noblon
Enmi le maistre paveillon :
De cierges i ot grant plenté.
Li Rois a Rousiel apelé
Et li dist : Rousiel, se tu mi
Tenoies si con je fas ti,
Qu’en feroies, nel’ choile pas ?
Rousiel respont, par Saint Thoumas,
Vous seriiés demain pendus,
Que respit n’i ariiés plus.
Li Rois respont, ausi seras
Plus c’anuit mais respit n’aras
Ne ti conpaignon ensement ;
Tu m’as chi fait ton jugement.
Roussiaus respont, gentis Rois sire,
Point ne devés moustrer vostre ire
Pour çou viers moi ne tant ne quant,
Sour men cors seroit deffendant,
S’aroie plus grant droit assés
De faire rois que vous n’avés.
Li Roist s’enbronce et puis rougist,
Et à Rousiel esranment dist :
Le fait des pourcelés compere
Li truie : de Renart son pere
N’oï n’en fable n’en cançon
Dire bien. Mainte mesprison
M’a faite et ocist-il Coupée,
Et fist que Bruns ot reversée
Le piel dou cief sour le musiel,
K’entendre li fist miel nouviel
Avoit dedens le caisne enclos :
Il le créi, si fist ke fos.
Ausi fist-il batre Tybiert
Le cat, et l’escoufle Hubiert
Cuida en traïson mourdrir,
Et ne me cuida-il hounir
De ma feme, et ne fist li lere
A Ysengrin son boin compere
Dedens le puc adevaler,
Tantost le fist-il escourter
Et puis Wihot, et compissa
Ses loviaus et puis les clama
Avoustres, et Primaut ocist
A ung tournoi et avoec mist
En peril de mort Ysengrin,
Mais garis est, et Tiesselin
Le corbel toli le fourmage.
Où monde n’a beste sauvage
Qu’il n’ait decéu, tant set mal.
Et ne fist-il céoir aval
Dou mur Pincart, mais bien garis
En est. Adonc i ot ocis
Deus cens des miens à cui coper
Fist les tiestes et puis geter
Là hors en m’ost au mangouniel,
Et s’en mena en son castiel
Par nuit en traïson Orguel
Mon ainsné fil dont plus me doel ;
Et si me dist une espie ier
Que je i tramis espier
En Malpertruis, piesme noviele
Ke Renart a à se courdiele
Atrait mon fil, et encor plus,
Ke par son conseil est issus
De Malpertuis Orgius mes fis,
Et si s’en va par le païs
Là où jamais ne le verai,
Mais point d’aïe n’en aurai
A ma grant gerre traire à fin.
Par celui qui fist d’aighe vin,
Le fait ton pere conperras
Et demain en proisme morras,
Et ti conpaignon avoec ti.
Rousiaus por çou ne s’abaubi,
Mais au Roi respont à bandon :
Rois, par le Sainte Passion
Que Jhesu-cris souffri en Crois
Au jour k’il fu de mort destrois,
Se je muir, tel mil en morront
Ki encores à naistre sont.
Rois, ne counissiés-vous men pere ?
Foi que je doi l’ame me mere,
Ançois iroit des hakesins
Querre outre mer as Sarrasins,
Rois, que je ne fuisse vengiés.
De ce s’est li Rois aïriés
Si aigrement que de sa poe
Li douna tel cop en le joe
K’il l’abati, et estranglé
L’euist, s’on ne l’éust osté.
Tuit en blament le Roi moult fort,
Et Grimbiers li taissons detort
Ses poes et court cele part
U véu a séoir Renart ;
Mais encore point ne savoit
Il ne nus del ost que ce soit
Renars : cascuns quide Jonas
Ait à non, mais plus que le pas
Vient à lui, et puis si li prie
Que por l’amor Sainte Marie
Viegne tost en la maistre tente
Confiesser gens c’on, sans atente,
Doit metre à mort al ajournée.
Renars i vient de randounée,
Contre lui se lieve li Rois,
Et Renart l’enclina trois fois,
Et puis s’est jouste lui assis,
Et si li a por Diu requis
Qu’à ces prisons laissast douner
Le Crois et aler outre mer
Sans revenir, si ert aumosne.
Li Rois lors respont, par le trosne,
Par le ciel et le fiermament
Ki me donroit lor pois d’argent
Ne les lairoie aler delivres :
Ne cuidiés, je ne sui pas ivres,
K’il me doient escaper point,
Demain les meterai à point.
En ont lor gent no conpaignon
Maisement et en traïson
Ocis et vous misme reubé,
Et si vous euissent tué
Se ne fust çou que vous venistes
Çà à warant et à fuistes.
Ausi ait Dieus en m’ame part,
Je volroie tenir Renart
Ausi bien que je fac Rousiel,
Si m’euist Orghilleus castiel
Cousté que mes peres fist faire,
Que par le saintisme suaire
Dont Jhesu-cris envolepés
Fu, que il seroit traïnés
Lonc mon roiaume dusqu’au cor.
Jou n’en prendroie argent ne or
C’avoec tout çou ne fust pendus.
Tant set de mal que nus hom plus,
Et Roussiaus ses fius bien l’ensiut
Et c’est drois, car on dire siut
Tout surke quanque de cat ist
Dont on par maintes fies dist,
Car qui des boins est, soef flaire.
Et vraiement ne me puis taire,
Che dist Renart, k’un cort sermon
Ne vous face : et ne fist pardon
Jhesus Longin ki le feri ?
Et ne pardona-il ausi
La Magdelaine ses peciés,
Et ciaus par qui crucefiés
Fu repardouna-il sa mort.
Dur cuer a ki de tel recort
N’est adoucis en pieté.
Rois, pour le Sainte Trinité,
Orguel et felounie ostés
De vo cuer, et si vous souffrés
De ceste gent ci metre à fin :
Rois Nobles, on vous tient à fin ;
Mais de plusiours est li recors
Que ce n’est mie trestous ors
Quanqui luist, et bien le moustrés ;
En çou que si grans cruauté
Est en vous. Et li Rois respont
Que c’est por nient, demain morront.
Lors dist Renart au Roi Noblon,
Au mains aront confiession.
Bien le voel, ce respont Rois Nobles
Qui moult par ert cointes et nobles.
Renart dou Roi se part atant
A cuer pensiu, tristre et dolant ;
Vient à sa gent et à son fil
Ke li Rois violt metre à escil.
Lors traist son fil à une part
Con pour confiesser, lui est tart
Que il peuist à lui parler.
Lors Roussiaus conmence aconter
Ses peciés à Renart son pere.
Taisiés or, dist Renart, biaus frere,
Je sui tes pere et tu mes fius,
N’en moustre sanlant, que de cius
Ne soions jà : à mienuit
Te metrai fors cui qu’il anuit,
Et tous tes conpaignons od ti.
Roussiaus li dist, sire mierchi,
Dites le no cousin Grimbiert
Ki nous aime si qu’il se piert.
Renart li respont à briés mos,
Volentiers, et puis l’a assos
Ausi que dont s’il fust confiès.
Tuit li autre vinrent apriès
A Renart ki les asséure
De metre anuit fors et s’en jure
La saintisme cierviele Dé.
Quant tuit se furent confiessé,
Renart en apiela Grinbiert,
Si li a trestout descouviert
Qui il est ; et quant il l’entent,
De la joie ses poes tent
Viers le ciel et Dieu en mercie,
Et Renart doucement li prie
K’il li aït à mienuit.
Grimbiers respont, cui qu’il anuit,
Serai od vous, jou et li mien,
N’en soigniés plus, sire, moult bien
Venrons à cief de cest afaire.
Atant li cambrelenc à faire
Prendent les lis, tuit vont couchier
Fors cil qui l’ost escargaitier
Doivent. Les prisons ont remis
En le fosse ù il furent pris,
En buies et en grans carcans.
Un peu devant les cos cantans
Se lieve Renars et Grinbiers,
Il doi sans plus et vont enviers Le fosse ù li prisonnier sunt.
Roenel trouvé dormant ont,
A son kevec prendent le clef,
Et puis deffrement tout soef
L’uis et les prisons deffiererent
Si ç’au deffierer ne sounerent
Li fier se moult poi non ; tantost
Les maine Grimbiers parmi l’ost
Si coiement que piercéu
N’en furent. Moult bien avenu
Lor en est : au tré Grimbiert sunt
Venu, et lor cors armés ont
De pourpoins et de haubregons,
De plates et de gambisons.
Parmi l’ost s’en vont à laron
Devant eaus Grimbiert le taisson
Ki les conduit et ki les maine
Il et se maisnie demaine,
A piet sans lances, bien armé
Dusqu’à Malpertuis n’ont cessé.
Ens entrent par la maistre porte
Ki à merveilles estoit forte,
Et Roussiaus cante à haute alaine :
En la porte entrent tuit cantant,
Contre eaus vienent petit et grant,
Tuit font joie par le castiel
De çou que tout sain r’ont Roussiel.
Contre son fil od ses pucieles
Vint Dame Emme, car les novieles
Li ot dit une cambouriere.
Devant vint, ne mie desriere,
Cantant clerement à haus cris :
U que voit son fil, si l’acole,
Tel joie en eut ç’à se parole
Ne pot venir dedens grant tans.
Contre Roussiel li joie grans
Fu, c’à Troies n’ot por Elaine
Si grant. Son fil Rousiel en maine
Dame Emme en cambres reposer,
Et Renars fait ses gens canter
Et tous ses estrumens tentir
Et tromper por lui esbaudir ;
Et as cretiaus cierges ardans
Metre, k’en l’ost li clartés grans
En reluist. Li os s’en esveille,
En esveillant ont grant merveille
Dont tés clartés vient, ne por quoi
Renars le fait, mais dusqu’à poi
Le saront, car lors à urler
Prist Roéniaus et à crier :
J’ai tout perdu, traï, traï !
Mi prisounier s’en sont fui.
Li Rois Nobles au crit s’esveille
Et toute li os s’apareille
D’armes, qu’il cuident assali
Soient. Non sont, plusior au cri
En sont venu, mismes li Rois
I est venus ; à haute vois
Demande dont ce vient k’il font
Tel noise, et Roieniaus respont :
Nos prisounier sont escapé.
Quant l’ot li Rois, s’a souspiré ;
Del doel c’ot, feri Roeniel
De se poe si que le piel
Li a dou dos jus reversée,
Et dist qu’il en ara pendée.
De la paor que il en ot
S’en fuist del ost sans dire mot ;
Mais Malegrape l’encontra
Li grifons ki le ramena
Par si qu’il li fera au Roi
Sa pais, et il s’en va od soi.
Sour çou li grifons l’amena
Au Roi qui tout li pardouna.
Li Rois plains d’ire et forsenés
De la fosse tous deffremés
Les boukius trueve et les clés ens.
Dusqu’à sis a fait de ses gens
Entrer ens, les fiers raporterent
Des prisons et avoec trouverent
Les soumieles dou Cordelois.
Quant le voit Nobles, si destrois
Fu, qu’il ne parlast por mil mars.
Quant pot parler, dist, que Renars
L’a deçut. Sire, dist Tybiers,
Aidié l’en a sire Grinbiers
Li taissons ses cousins ; alés
Est od Renart, si m’aït Dés :
Car dedens son tré n’a nului.
Quant l’ot li Rois, de fin anui
Cria plus de cent fois, hahai !
Traï m’a Grimbiers, bien le sai :
Moult me fioie dou taison,
Mais on dist de privé laron
Se puet nus à paines gaitier.
- ↑ 7515 J’aim loyaument et amerai tous jours.