Le Roman du Renart - D. M. Méon — 1826/51
C’est li secons Livres.[1]
Amors et Karités et Dieus
Est une cose, s’est grans diels
Quant entre nous falons à mours,
Que n’avons parfaites amours :
Par lui Dieu carité avoir
Poons, mais au jour d’ui avoir
Amons miex et or et argent
Dont avarisses trop art gent.
Priès que tous ciaus ki sunt où monde,
Cil k’iestre en déussent plus monde,
En sunt plus au monde enmondé :
C’est li Clergiés par cui mondé
Devriens estre par lor boine œvre ;
Mais teus au prééchier nos œvre
La bouce et nos ensegne à faire
Le bien, ki est tout d’autre afaire,
Pour çou ne se convertist nus,
Et est mais li mondes si nus
De viertus, et de visces plains.
Se Dieus nel’ fai, mains divers plains
En ert od les Sathenas fais.
Dieus nous deffende de tel fais,
Et la douce Virge Marie,
Que nous n’aions voie marie :
Se les œvres de Dieu adroit
Regardons, od lui irons droit.
Ce qu’il dist, il fist et si Saint
Apostle, si lo cascun c’aint
Autant k’il fisent, et confort
Arons de Dieu : soions com fort,
Car li sires nos iert confors,
Qu’en crois se conbati com fors.
Mais poi regardons à sa mort,
Car couvoitise si nos mort
Les cuers, orgius, haïne, envie ;
Et Renart ki où monde en vie
Est, dont c’est dolors qu’il tant regne.
Mais pour lui encacier dou regne,
C’est fors des cuers, vous en dirai
Une branke, car trop d’ire ai
Sour lui, et pour çou faite l’ai.
Pluiseur, ne sai u cler u lai,
Se Dieu plaist, en amenderont
Et Renart d’iaus encaceront.
- ↑ On lit dans d’autres manuscrits : Li secons Renart ; et dans un, il y a écrit dans la miniature : Renart qui rennans aujourd’hui par tout.