Le Roman du Renart - D. M. Méon — 1826/62
Si conme Renars envoie ses lettres au Roi Noblon par Wauket le ghai son mesagier.
Nous Renars, sires de Malpertuis et dou païs entour, maistres des consaus des grans signors et de lor regnes, damoisiaus prisiés, loés et honourés et amés où monde des laies gens et dou Clergiet, liquieus miens nons vole partout en essauçant ; com il soit ensi, Rois Nobles, que vous m’aiiés assis en mon castel de Malpertuis, sauf çou que garde ne m’en dounoie, sans raison ki face mie à faire si grande emprise come vous avés faite sour moi, et sans deffier, que faire ne déussiés ki vos hom estoie, et par le conseil de ceus que vous bien savés ki me héent de mort, et me mandés et conmandés que je viegne en vo mierchi sans mort recevoir, et che ne ferai-je mie, car il i a dou poil de l’ours en vostre afaire : car bien sai se je venoie à vous à mierchi, tant connois vo boin conseil, que vous me meteriés, se vous me teniés, en tenebres en cartre perpetuel, dont je m’en garderai bien se je puis ; dont puis que vous estes desloiaus viers moi, que faire ne déussiés, li homages liges et li fois que je vous devoie est nule, car vous avés premiers rompu le festu, ke autant de foi me deviiés vous com je vous devoie, dont je vous fai assavoir ke je sui Renart, et ki m’assaurra, je me deffenderai, et ki sour moi ardera, jou arderai sour lui ; mais faites le bien, je ferai un juise por mi purgier de çou de quoi vous m’arokiés, tel que je vous deviserai : c’est de porter un fier de ceval ardant en som une lance que je n’ai coupes où fait pour quoi vous m’avez chi assegiés. Se je sui dou fier ars ne escaudés, traïtres soie et en face l’en conme de traïteur ; se je n’ai garde dou fier, on me tiegne paisivle ; se ce non, Rois, je vous deffi et di fi à vous et as vos, car li drois est miens et non vostres. Ces letres furent kierkies l’an ke li mousson se conbatirent as mouskerons, sietante et set el mois que li pouchin devienent poulet.
Quant li Rois ot le letre oïe,
Oiant toute sa baronie
S’escria et lor dist ensi,
Conseil de çou c’avés oï,
Car je le tieng à grant merveille.
De grant corous les iols roelle,
Fronce dou nés et d’aïr tranle
Plus que ne fait fuelle de tranle.
De grant fierté crike les dens,
Et eskigne con hors dou sens.
Li gais Waukés tel peur en a
Ke de hides se parfoira.
Tout sans congiet s’en va volant
Dusqu’à Renart tout parfoirant.
Devant Renart à cuer esmarbre
S’assist Waukés desour un arbre.
Renart le voit, si li a dit,
Qu’as-tu, se Damel-Dieus t’aït ?
Et Waukés dist, jà tost l’orés :
Par moi fu vostre briés portés
Au Roi ; quant ot vo letre oïe,
A poi ne me toli le vie
En vo despit, et si jura
Que jà guerre ne vous faurra.
Li triuwe faut anuit, demain
Arons l’assaut, ce me dist main,
Et vous estes pourvéus mal
Por Roi Noblon livrer estal.
Tu as poi gent et mains viande,
Et sour toi est li gerre grande.
Se par force, sire, estes pris,
Et vous et nous serons ocis :
Prendons conseil de nous sauver
Entre nous, nous n’avons k’ester.
Tout s’escrient, Waukés dist voir,
Car ses cors est plains de savoir.
Quant Renart les ot si parler,
Et les plusiours de peurs tranler,
Por eaus conforter dist, oiiés,
Signors, et ne vos esmaiiés.
Je sui vo sire et vous mi home,
Par tous les Sains ki sont à Rome
De çaiens tous vous gieterai,
N’aiiés paour, si vous menrai
Là ù li Rois n’ara pooir,
Et vous donrai de mon avoir
Tant que serés rice à tous jours.
N’aiés paour, c’est deshounours
D’avoir paour, aiiés cuer fin,
Si n’arés jà mauvaise fin :
Car s’en hardement est finée
Vo vie, vo ame afinée
Iert au jugement conme or fins,
Dont ceste mors n’est mie fins ;
Mais cius ki ne muert finement,
S’ame sera sans finement
O Lucifer sans definer,
Por çou fait boin en bien finer.
Cascuns si ait pensée fine,
Si ara cascuns ame fine ;
Teus ames seront afinées,
Et c’est drois puis c’on a finées
Les vies com hardis et preus,
Qu’à l’ame en vertisse li preus.
Mi home estes et jou vo sire,
Si ne doit nus enviers moi s’ire
Moustrer se il a à souffrir :
Car on voit souvent avenir
Ke teus kiet souvent entre piés
Ki puis vient deseure tous liés.
Il ont tort et nous avons droit,
Et d’autre part s’ensi estoit
K’il éussent droit et nous tort,
Puis que je vous fai par effort,
C’est par force venir o moi,
Tos li peciés, foi que vous dois,
Seroit sour moi et vous sauvé,
Se pour moi estiiés tué.
Li drois est nostres, eaus li tors,
Or soit cascuns hardis de cors,
Car viers le mer irons anuit,
(Or escoutés, ne vous anuit)
En une nave grant et noble
Où poi douterons le Roi Noble.
Forte est, n’a garde de tormente,
Lée et longhe, séure et gente.
Warnie est por vivre douze ans,
Onques en mer n’entra si grans.
Conment l’ai faite carpenter,
Signour, vous vaurrai deviser.
Li fons est de male pensée,
Et s’est de traïson bordée,
Et clauwée de vilounie,
Et de honte très bien poïe.
De trecerie en est li mas,
Par ceste nave ert Nobles mas,
Car li sigles est de boisdie.
Li coffins dou mast est d’envie
U li galios rampera ;
De cet cofin moult lonc vera.
Et de haïne en est li cables,
A tel cofin est bien metables.
Li nave est batillie entor
De descorde et de poi d’amor.
De blades i a maint cordon
Au sigle et au mast environ :
De malisse et de foi-mentie
Est li ancres, n’en doutés mie.
En le nave a estages trois
Teus k’il n’est Dus, ne Quens, ne Rois,
Vesques, ne Rendus, ne Prelas,
Papes, Prestres, Clers ne Legas
Ki n’aiment à manoir dedens.
Plaisant sont moult à plusiors gens :
Li premiers est de couvoitise,
Et li secons est d’avarise,
Et li tiers est d’escarseté.
En liu d’or sunt estincelé
De rapine et de tote ensanle.
Dites, signor, k’il vous en sanle.
Tuit s’escrient, sire, moult bien,
Mais que nous dites d’une rien,
De quoi la santine est, biaus sire.
Jou l’avoie oublié à dire,
Ce dist Renart ; desesperance
U il n’a nient de repentance
De quoi est no santine faite ;
Et s’a en no nave une gaite
C’on apiele desloiauté,
Où il n’a point de verité ;
Et s’a no nave el bout devant
Une broce de fier trençant
Dont li fiers est de felounie,
Tous forgiés d’outrequiderie
Dedens la forge de fierté,
D’outrage et de beuban mellé :
Forgier le fis par grant mestrie
Ens en l’Ille de Satalie.
Li aciers est de cruauté
Temprés de pure fauseté.
Ceste broce desrompera
Quanques encontre nous venra :
N’est nus ne sait bien de quoi plaindre,
Se no broce le puet ataindre,
Et pour çou c’on ne sace mie
De nostre nave le boisdie,
Et que riens il n’i ait de perte,
Ert no nave très bien couverte
D’un gris dras fait d’ipocrisie,
D’accide et de mauvaise vie,
Tissu de propre volenté.
D’ireur a le nave clauwé,
Nous i serons plus asséur
Que dedens le cité de Sur.
Bien sui de maroniers porvus,
Ains mieudre n’ot Rois, Quens ne Dus,
Car de no nave ert Amiraus
Li Papes et ses Cardounaus :
Ara od lui pour gouverner
No nave parmi haute mer,
Clers et Prestres et Archevesques,
Moines, Doiiens, Abbés, Eveskes,
Jacobins c’on dist Prééceurs.
Avoec eaus les Freres Meneurs
Ara, s’irons séurement,
Et j’espoir que nous arons vent
Boin com pour nous, c’est de pecié
Dont le monde voi enlacié.
Cius dous vens nos fera sigler
Sitost com nous sarons penser
C’à no nave est propres teus vens,
A moi et à toutes mes gens.
Mais bien saciés nos Amiraus
Het moult ce vent s’il est loiaus,
Et no marounier ensement,
K’il m’ont blasmé mil fois ce vent.
Mais pour çou que je voel sigler
A infier sans plus, por parler
A Proserpine ki kierkier
Me doit son fil qu’ele a moult cier,
A cui Rois Nobles est taions.
Li enfés est biaus valetons ;
Fius est Orguel fil le Roi Noble,
Et sa mere ki moult est noble,
M’a mandé que me kierkera
Son fil, et moult bien afferra
En no nave l’enfés Orgius :
Tel non com li pere a li fius,
Et est de toute riens sanlans
Au pere, et biaus et fors et grans.
Mais n’est vens ki fesist sigler
No nave droit là, ne aler,
Fors cius vens dont jou ai parlé :
Nos Amiraus l’a en viuté
Et si marounier ensement.
Bien sai s’il parçoivent ce vent,
Que lor sigle lairont chéir
Dusqu’adont qu’il poront véir
Autre vent ; mais jes meterai
Es estages dont je dit ai
De couvoitise et d’avarise,
Que nostres Amiraus moult prise,
Et ausi font li marounier.
Et pour çou sai bien sans cuidier
Que no nave feront sigler
Partout ù je vaurrai aler,
Par les estages ù seront
Ki le vent couvenir lairont.
Anuit nos en irons viers mer,
Signor, se le volés graer,
Par un sousterrin desous terre
Jusques à le mer d’Engletiere,
U jusques au port de Brandis :
Or doutons-nous nos anemis ?
Tout s’escrient, mains que devant,
Et dient tant cum pain vaillant
Aront por vivre, k’il tenront
Le castiel et deffenderont.
De ceste nave, biau signeur,
Doivent tote gent avoir peur
Ki ont le non de crestien,
Se li nave va mal u bien.
Li nave en coi tant visces a
Est nos cors ki par le mer va
Dou monde ù a perilleus vens :
Poi i regardent mout de gens,
Car se no nave où monde fent,
Dont va no nave malement,
Car la mors n’espargne nului.
Teus est tous haitiés au jor d’ui,
Espoir ne vivera demain.
De riens ne sonmes si ciertain
Conme de le mort, ne si fi,
Pour l’amor Dieu regardons i,
Car se par le vent de pecié
Sommes en le mer perillié,
Hé ! las, mar fumes onques né :
Car se li vens fait que hurté
Ait no nave au rocier de mort,
Ançois qu’ele parviegne au port,
Fendue ert no nef et brisie,
Et nostre ame en infer bruie.
Faisons les dis des marouniers
Non les œvres, k’il n’est mestiers ;
Ausi sunt-il de car et d’os
Ke nous soumes, et divers cos
Ont souvent de temptation
Ki les fait, u voellent u non,
Estre en le nave ens en le mer,
Et au vent de pecié sigler
Avoec Renart el maistre estage
De couvoitise, qui damage
Lor fait, avarisce ensement
Damage au monde moult de gent.
S’il perissent et nous ausi,
Ne sommes nous mie gari
Pour çou ; mais nos soiiemes sage,
Faisons no preu de lor damage,
Car cascuns portera sen fais.
Se par eaus est li peciés fais,
Li paine en ert en eaus doublée,
Et en paradis corounée.
Ert teus gens doublement ausi
Proec c’aient Dieu adroit siervi,
C’est k’il soient plain de viertus,
Si qu’en eaus ne soit visces nus,
Ains soient plain de carité,
De foi vraie et d’umelité,
Et couvoiteus d’armes sauver
Par bien dire et par mieus ouvrer.
Dont veroit-on venter moult poi
Vent de pecié, mais vraie foi :
Li naves seroit de viertus,
Et Renart seroit abatus
Et caciés des cuers et Orghius,
Si k’en tous les cuers seroit Dieus.
Ce nos doiost li Fius et li Peres
Et li Sains Espirs li sauveres.
Or revenrons au Roi Noblon
Ki fu tornés à garison,
Et Hardis li lupars ausi :
Andoi sunt haitié et gari.
De çou est l’os moult estormie,
De joie en font tel crierie
C’on n’i oïst pas Dieu tounant.
Cil chevalier vont devisant
De matin ert Malpertuis pris,
Et Renart et si gent ocis.
Lors fist li Rois l’iauwe corner
Ensi conme por le souper.
Enpriès souper vont tout coucier,
Et sitost k’il virent raiier
Le soleil lendemain, armer
Se keurent tuit et adouber,
Et puis si conmencent l’assaut.
Et Renart al encontre saut,
Et cil defors lancent et traient :
Coisent li mort, li navré braient,
Et Renart moult bien se deffent.
Maint cop i doune et maint en prent,
Et si gent moult bien se deffendent,
Quariel volent quant arc destendent.
Atant es uns des fius Renart
Ki en se main tint un fausart :
Cius fait merveilles de sen cors,
Bien a des gens le Roi vint mors,
Et bien quarante eskiervelés.
Li lupars s’escrie, assalés,
Signor baron, or tost avant.
Noirons li fouant vait fouant
Au pié d’une grandisme tour ;
Et quant Renart parçoit cel tour,
Le tour contre Noiron mina
Priès toute et moult bien l’esponda
Sour estakes, et d’euwe emplir
Fist le fosse et tout quoi tenir.
Et Noirons li fouans fouoit
Ki riens garde ne s’en dounoit ;
Tant foui l’iauwe le noia
Et vint od lui. Quant ç’avisa
Li Rois, si s’est cent fois sainiés.
Lors fu l’assaus reconmenciés
Des fondeffles et des caillaus.
Li lupars s’escrie, ore à aus ;
Et Ysengrins li leus sali,
Et Tibiers li cas autresi,
Et Raous ses fius li vaillans
Que ce sanloit uns drois Rollans.
Cascuns assaut moult vistement,
Et Renart moult bien se deffent.
Tandis Nobles se regarda,
Cointeriel li singe avisa,
Dalés lui son fil Martinet
En qui avoit moult biel varlet,
Ki n’estoient mie al assaut.
Il ne lor dist pas, Dieus vous saut,
Ains les frapa et les bati,
Et de sa raison les laidi
Et dist c’andoi sunt traïteur,
Et de son conseil reporteur
A ceaus dedens, c’on li a fait
A entendre tout entresait ;
Mais jà jour ne l’éust créu,
Se ne fust çou k’il a véu
Ke Renart ne voelent grever :
De s’ost les conmande à aler
En voies, puis les fist banir.
En Cointeriel n’ot k’esmarir,
Ne en Martinet le sien gendre.
Del ost s’en vont sans plus atendre
Tout maneçant le Roi Noblon
Por ceste grande mesproison.
Et cil assalent sans ciesser
Ki Renart voloient grever.
De le piere dou mangouniel
Le plus maistre tour del castiel
Ont encontre tiere abatue.
De cel cop cascuns del ost hue,
Et Renart moult se desconforte
De se tour k’il cuidoit très forte.
Ensi conme il se desmentoit,
Il esgarde sour destre et voit
Ke li fius le Roi Leoniaus
Estoit rampés dusqu’as cretiaus
A une eskiele amont en haut.
Et Renart encontre li saut
De si haut com Lioniaus fu
L’a ens el fosé abatu,
Si k’il brisa andeus les bras.
Li Rois le voit et dist, helas !
Le mien cier fil m’a Renart mort.
Lors a conmandé c’on l’en port
Et c’on laisse l’assaut ester,
Et il si font sans arriester.
Viers lor tentes sont repairié,
De çou ot Renart le cuer lié,
Car s’al assaut éussent mis
Un poi plus, li castiaus fust pris.
Lors pense plus ne demourra
En Malpertuis, ains s’en ira
Jà de prinsoir enviers le mer
Por lui et ses homes tenser.
Ensi le fist k’il le pensa,
Si qu’il fu nuis, si s’en ala,
Od lui ses gens et se maisnie,
Mais ançois fist grant déablie.
Lui centisme es tentes feri,
Et puis cria, traï, traï !
Tentes abat et gent ocist,
Et en son retor dis en prist :
Ce fu le corbiel Tiesselin,
Et Felenesk le porc-espin :
Si prist le pourciel Wanemer,
Et od lui Bauçant li saingler ;
Si prist Frobiert le crikellon,
Od lui Espinart l’ireçon ;
Mehaut l’agache en enmena
Ki durement en esprescha ;
S’en mena le loir Soumilleus
Ki durement en fu honteus ;
Si en mena Pelé le rat
Ki moult haoit Tibiert le cat.
Pounet le fuiret prist od lui
Ki dist hahai ! par fin anui.
Ceus en mena, voellent u non,
Dedens Malpertuis en prison.
Lors fait son pont amont lever,
Et se porte moult bien fremer,
Et fait en son castiel tel noise,
Que li os defors s’en acoise,
K’il fait en son castiel tromper
Pour plus noisier et sains souner,
Por çou que nus del ost ne sace
K’il lor voelle widier la place.