Le Roman du Renart - D. M. Méon - 1826/3
Si coume Renart fist Ysengrin moine.
Or est Renart dedens sa tor,
Si filz li font moult grant ator ;
Bien li ont les genbes torchies,
Et les anguilles escorchies,
Puis les couperent par tronçons,
Deus hastiers firent de plançons
De codre, et enz les ont boutez,
Et li feus fu tost alumez,
Qu’il orent buche à grant planté,
Puis l’ont de totes parz venté.
Lors les ont mises sor la brese
Qui des tisons lor fu remese.
Endementiers que il cuisoient
Les anguilles et rostissoient,
Es-vos mon seignor Ysengrin
Qui erré ot dès le matin
Jusqu’à cele heure en mainte terre,
Et onques n’i pot riens conquerre.
Lors s’en torna en un essart
Droit devant le chastel Renart,
Et vit la cuisine fumer
Où il ot fait feu alumer,
Où les anguilles rostissoient
Que si fil es hastes tornoient.
Ysengrin en sent la fumée
Qu’il n’avoit mie acostumée.
Adonc conmença à fronchier
Et ses guernons à deléchier :
Volentiers les alast saisir
Se li vosissent l’uis ovrir.
Il se tret vers une fenestre
Por esgarder que ce puet estre ;
Il se conmence à porpenser
Conment porra laiens entrer,
Ou par priere ou par menace,
Mès il ne set lequel il face,
Car Renart est de tel maniere
Qu’il ne fera riens par proiere.
Acroupiz s’est sor une couche,
De baaillier li delt la bouche :
Court et recort, garde et regarde,
Mès tant ne se set doner garde
Que dedenz puisse le pié metre
Ne por doner ne por prometre.
A la parfin se porpensa
Que son conpere proiera
Que por Dieu li doint, s’il conmande,
Ou poi ou grant de sa viande.
Lors apele par un pertuis,
Conpere sire, ovrez me l’uis,
Je vos aporte bones noveles,
Je quit que moult vos seront beles.
Renart l’oï, sel’ connut bien,
Mès de tot ce ne li fu rien,
Ançois li a fet sorde oreille,
Et Ysengrin moult s’en merveille
Qui defors fu moult angoisseus
Et des anguilles covoiteus.
Si li a dit, ovrez, biau sire,
Et Renart conmença à rire,
Si demande, qui estes-vos ?
Et cil respont, ce somes nos.
Qui vos ? ce est vostre compere.
Nos cuidions ce fust un lerre.
Mors sui, dist Ysengrin, ovrez.
Renart respont, or vous soufrez
Tant que li moine aient mengié
Qui as tables sont arengié.
Conment, fet-il, sont-ce dont moine ?
Renart respont, ainz sont chanoine
Et sont de l’ordre de Tiron,
Jà, se Dieu plet, n’en mentiron,
Et je me sui rendu à eulz.
Nomini dame, dist li Leus,
Avez me vos dit verité ?
Oïl, par sainte charité.
Donques me fetes herbergier.
Jà n’ariez-vos que mengier.
Dites moi donc, n’avez-vos qoi ?
Renart respont, oïl par foi.
Or me lessiez dont demander,
Venistes-vos por truander ?
Naie, ainz ving véoir vostre estre.
Renart respont, ce ne puet estre.
Et porqoi dont, ce dist li Leus ?
Et dist Renart, n’est ore leus.
Or me dites, mengiez-vos char ?
Et dist Renart, ce est eschar
Que vos me dites, biau comperes ;
Qant nos recevrons à confreres,
Premierement otriera
Que jamais char ne mengera.
Que menguent donc vostre moine ?
Jel’ vos diré sanz nul essoine.
Ne menjuent fromages mos,
Mès poisson qui est cras et gros,
Saint Benéoist le nos conmande
Que nos n’aion péor viande.
Dist Ysengrin, ne m’en gardoie,
Ne de tot ce mot n’en savoie ;
Mès car me fetes osteler,
Huimès ne saroie où aler.
Renart respont, mès ne le dites,
Nus, s’il n’est moines ou hermites,
Ne puet céenz avoir ostel,
Mès alez outre, il n’i a el.
Ysengrin ot et entent bien
Qu’en la meson Renart por rien
Qu’il puisse dire, n’enterra,
Et que volez ? si souferra,
Et neporqant il li demande
Un seul morsel de sa viande,
Car m’en donez un sol tronçon,
Nel’ di se por essaier non,
Mès bon fussent-eles peschies
Les anguilles et escorchies,
Se vos en daingniez mengier.
Renart qui bien sot losengier,
Prist d’une anguille deus tronçons
Qui rostissent sor les charbons.
Tant fu cuite que toute esmie,
Et dessoivre toute la mie.
L’un en manja, l’autre en aporte
A celui qui est à la porte :
Lors dist, compere, ça venez
Un poi avant, et si tenez
Par charité de la pitance
A ceux qui bien sont à fiance
Que vos serez moines encore.
Dist Ysengrin, je ne sai ore
Qu’il me sera, bien porra estre ;
Mès la pitance, biau doz mestre,
Car me bailliez isnelement.
Renart li baille, et il la prent
Qui moult tost s’en fu delivrez,
Encor en menjast-il assez.
Ce dist Renart, que vos en semble ?
Li lechierres fremist et tranble,
De lecherie esprent et art :
Certes, fet-il, sire Renart,
Cist vos ert bien guerredonez,
Encore un seul car m’en donez,
Biau doz conpere, por amordre
Tant que je fusse de vostre Ordre.
Par vos botes, ce dist Renart
Qui moult fu plains de males ars,
Se vos voliez moines estre,
Je feroie de vos mon mestre,
Que je sai bien que li seignor
Vos esliroient à Prior
Ainz Pentecoste, ou à Abé.
Avez me vos ore gabé ?
Renart respont, naie, biau sire,
Par mon chief je vos os bien dire
En vos aroit bele persone
Qant auriez vestu la gone
Par desus la pelice grise :
N’auroit si biau moine en l’Iglise.
Auroie-ge poisson assez
Tant que je fusse respassez
De cest mal qui m’a confondu ?
Et Renart li a respondu,
Mès tant con vos porrez mengier.
Donques me faites rooignier.
Et Renart dit, mès rere et tondre.
Ysengrin conmença à grondre
Qant il oï parler de rere :
Or n’i a plus, fet-il, compere,
Mès réez moi isnelement.
Renart respont hastivement,
Aurez corone grant et lée
Ne mès que l’eve soit chaufée.
Oïr poez ici biau gieu ;
Renart mist l’iave sor le feu,
Et la fist trestote boillant,
Puis li est revenuz devant,
Et sa teste encoste de l’uis
Li fet bouter par un pertuis,
Et Ysengrin estent le col.
Renart qui bien le tint por fol,
L’eve boillant li a gitée
Desus la teste et reversée :
Moult par a fet que male beste.
Et Ysengrin escout la teste
Et rechine et fet lede chiere,
A reculons se tret ariere,
Si s’escria, Renart, mort sui,
Male aventure aiez-vos hui !
Trop grant corone m’avez faite.
Renart li a la langue traite
Bien demi-pié fors de la geule,
Sire, ne l’avez mie seule,
Que autresi l’a li Covenz.
Dist Ysengrin, je cuit que menz.
Non faz, sire, ne vos anuit,
Mès iceste première nuit
Vos covient-il metre en esprove,
Que la sainte Ordre le vos rove.
Dist Ysengrin moult bonement,
Ferè ce que à l’Ordre apent,
Jà mar en serez en doutance.
Renart en a pris la fiance
Que par lui mal ne lor vendra,
Et à son los se maintendra.
Tant a fet et tant a ovré
Renart, que bien l’a asoté,
Et vint à Ysengrin tot droit
Qui durement se conplaingnoit
De ce qu’il estoit si près rès
Que cuir ne poil n’i est remès.
N’i ot plus dit ne sejorné,
Andui se sont d’ilec torné
Renart devant et il après,
Tant qu’il vindrent d’un vivier près.