Le Roman du Renart - D. M. Méon - 1826/5
Si coume Renart prist Chantecler le Coc.
Il avint chose que Renart
Qui tant est plain d’engin et d’art,
Et qui moult set de mainte guile,
S’en vint corant à une vile.
La vile séoit en un bos,
Moult i ot gelines et cos,
Anes, malarz et jars et oes ;
Et mesire Costant Desnoes,
Uns vilains qui moult ert garniz,
Manoit moult près du plaiséiz.
Plentéive estoit sa mesons
De gelines et de chapons :
Bien avoit garni son ostel,
Assez i avoit un et el,
Char salée, bacons et fliches,
De ce estoit li vilains riches ;
Moult par estoit bien herbergiez,
Tout entor estoit li plaissiez.
Moult i ot de bones cerises,
Et plusors fruiz de maintes guises,
Pomes i ot et autre fruit :
Renart i va por son déduit.
Cest cortil fut moult très bien clos
De piez de chesne aguz et gros :
Hordez estoit d’aubes espines.
Dedens avoit mis ses gelines
Dant Costant por la forteresce,
Et Renart cele part s’adresce :
Tout coiement, le col bessié
S’en va tot droit vers le plessié.
Moult fu Renart en grant porchaz,
Mès la force des espinaz
Li destorbe de son afere
Si qu’il n’en set à quel chief trere ;
Ne por luitier ne por saillir
As gelines ne puet venir.
Acroupiz s’est enmi la voie,
Moult se doute que l’en nel’ voie.
Porpense soi que se il saut
As gelines et il i faut,
Il ert véuz, et les gelines
Se repondront soz les espines,
Si porroit estre tost sorpris
Ainz qu’il éust gueres conquis.
Moult par estoit en grant effroi,
Des gelines velt trere o soi
Qui devant lui vont pasturant,
Et Renart va le col baissant :
El retor del paliz choisist
Un pel froissié, dedenz se mist ;
Là où li palis fu desclos
Avoit li vilain planté chos.
Renart i vint, outre s’en passe,
Chaoir se laisse à une masse
Por ce que la gent ne le voient,
Mès les gelines s’en effroient
Qui l’ont oï à sa chéoite,
Chascune de foïr s’esploite.
Qant sire Chantecler li cos
En une sente lez le bos,
Entre deus piex en la raiere
Estoit alé en la poudriere.
Moult fierement lor vint devant,
La plume el pié, le col tendant,
Si demande par quel reson
Eles s’en fuient en meson.
Pinte parla qui plus savoit,
Cele qui les gros oés ponnoit ;
Et près du Coc juchant à destre,
Si li a conté tout son estre
Et dist paor avons éue.
De quoi ? avez chose véue ?
Oïl. Et quoi ? Beste sauvage
Qui tost nos puet fere domage
Se ne vidions le porpris.
Ce est naienz, jel’ vos plevis,
Ce dist li Cos, n’aiez péur,
Mès soiez trestoute aséur.
Dist Pinte, par ma foi jel’ vi,
Et loiaument le vos afi
Que je le vi tout à estrous.
Et conment le véistes-vous ?
Conment ? Je vi la soif branler
Et la fueille du chol trembler
Où cil se gist qui est repost,
Qui tout domageroit les noz.
Tais, sote, ce respont li Cos,
Jà Renart n’aura si dur os
Que céens s’ost mucier ne metre,
Ne s’en oseroit entremetre :
Nostre paliz n’est pas si viez
Jà par Renart soit despeciez.
Treves avez, jel’ vos otroi,
Que par la foi que je vos doi
Je ne sai Putois ne Gorpil
C’osast entrer en cest cortil,
N’est se gas non, tornez ariere.
Atant se trait en sa poudriere,
Mès il n’est mie aséurez,
Sovent regarde de toz lez.
Moult se contient or fierement,
Mès il ne set c’à l’oil li pent ;
Il se doutast d’aucune chose,
Mès la cort ert si bien enclose,
Riens ne douta, si fist que fox
L’un oil overs et l’autre clox,
L’un pié cranpi et l’autre droit,
S’est apoiez delez un toit.
Là où li Cos est apoiez
Come cil qui ert anoiez
Et de chanter et de veillier,
Si conmença à sonmeillier.
Où sonmeillier que il fesoit,
Et el dormir qui li plesoit,
Conmença li Cos à songier,
(Ne m’en tenez à mençongier,
Que il songa, ce est la voire,
Trover le poez en l’estoire)
Que il véoit ne sai quel chose
Qui iert dedenz la cort enclose,
Qui li venoit enmi le vis,
Einssi con li estoit avis ;
Si en avoit moult grant friçon,
Et avoit un ros peliçon
Dont li ourlet estoient d’os,
Si li vestoit à force el dos.
Moult fu Chantecler en grant paine
Del songe qui si le demaine
Endementiers que il someille,
Et du peliçon se merveille
Dont la chevesce ert en travers,
Et si li vestoit à envers.
Estroite en estoit la chevesce
Si qu’il en ert en grant destresce,
Et de péor s’est esveilliez ;
Mès de ce est plus merveilliez
Que blans estoit desoz le ventre,
Et que par la chevesce i entre
Si que la teste iert en la faille,
Et la qeue en la cheveçaille.
Por le songe s’est tressailliz,
Que bien cuide estre maubailliz.
Por la vision qu’à véue
Dont il a grant péor éue,
Esveilliez s’est et esperiz,
Et dist li Cos, Sainz Esperiz,
Garis hui mon cors de prison
Et met à sauve garison.
Lors s’en torne grant aléure
Con cil qui pas ne s’aséure,
Et vint corant vers les gelines
Qui estoient soz les espines ;
Jusqu’à eles ne se recroit.
Pintain apele où moult se croit,
A une part l’a apelée :
Pintain, n’i a mestier celée,
Moult sui dolenz et esmarriz,
Grant péor ai d’estre traïz
D’oisel ou de beste sauvage
Qui trop me puet fere domage.
Avoi ! dist Pintain, biax doz sire,
Ce ne devriez-vos pas dire ;
Mal fetes qui vos esmaiez ;
Si vos diré, çà vos traiez.
Par trestoz les Sainz que l’en prie,
Vos resemblez le chien qui crie
Ainz que la pierre soit chéue.
Dont avez tel péor éue ?
Or me dites que vos avez.
Qoi ! fait li Cos, vos ne savez,
Orains songé un songe estrange.
Delez le trou de çele grange
Vi une vision moult male
Par qoi vos me véez si pale ;
Tout le songe vos conteré,
Jà riens ne vos en celeré.
Sauriez m’en vos conseillier ?
Avis me fu el sommeillier
Que ne sé quel beste venoit
Qui un rous peliçon portoit
Bien fet sanz cisel et sanz force,
Sel’ me fesoit vestir à force :
D’os estait fete l’orléure
Toute blanche, mès moult ert dure.
Le poil avoit defors torné
Le peliçon si atorné ;
Par la cheveçaille i entroie,
Mès moult petit i arestoie.
Le peliçon vesti einsi
Et puis après le desvesti
Por la qeue qui ert deseure.
Lors m’esveillai à icele heure,
Ça sui venuz desconseilliez.
Pinte, ne vos en merveilliez
Se li cors me fremist et tremble,
Mès dites moi que vos en semble.
Moult sui par le songe grevez,
Par cele foi que me devez
Savez-vos que il senefie ?
Pinte respont où moult se fie.
Dit m’avez, fet-ele, le songe,
Mès, se Dieu plet, ce ert mençonge ;
Neporqant jel’ vos voil espondre,
Que bien vos en sauré respondre.
Cele chose que vos véistes
El someillier que vos féistes,
Qui le rous peliçon portoit
Qui einsi vos desconfisoit,
C’ert li Gorpiex, jel’ sai de voir,
Bien le poez aparcevoir
Au peliçon qui rous estoit
Et que par force vos vestoit.
Les goles d’os erent[1] les denz
A qoi il vos metra dedenz ;
La chevesce qui n’estoit droite,
Qui si vos ert male et estroite,
Ce est la goule de la beste
Dont il vos estraindra la teste :
Par ileuques i enterroiz,
Sanz faille que vos le verroiz,
Lors sera la qeue deseure,
Einssi ert, se Diex me seceure.
C’iert li Gorpil qui vos prendra
Parmi le col qant il vendra,
Ne vos garra argent ne ors,
Et le poil ert tornez defors :
C’est voir que tot jors porte enverse
Sa pel qant il plus pluet et verse.
Or avez oï sanz faillance
Du songe la senefiance ;
Tot séurement le vos di
Que ainz que soit passé midi
Vos avendra, ce est la voire ;
Mès se vos me voliez croire,
Nos retornerions ariere,
Car il est muciez çà deriere
En cel buisson, jel’ sai de voir,
Por vos traïr et decevoir.
Qant il ot oï le respons
Del songe que cele ot espons,
Pinte, fait-il, moult par es fole,
Moult as dite fole parole :
Cuidiez que je soie sorpris
Et que la beste est el porpris
Qui par force me conquerra ?
Dahez ait cil qui le croira !
Ne m’as dit riens où ge gaaingne,
Je ne croi mie mal m’en viengne,
Jà n’auré mal por itel songe.
Sire, fet-ele, Diex le donge !
Mès s’ainsi n’est con je vos dit,
Je vos otroi sans contredit
Que ne soie mès vostre amie.
Bele, fet-il, ce n’i a mie,
A fable ert le songe tornez.
A cest mot s’en est retornez
En la poudriere au souleil,
Et conmença à cliner l’oil,
Ne doute que Gorpil s’i mete.
Mès Renart qui le siecle abete,
Sitost con il oï la noise,
Besse la teste, si s’acoise ;
D’une pierre a fait orillier,
Si conmença à someillier.
Chantecler s’est aséurez.
Moult fu Renart amesurez
Et veziez à grant merveille,
Et qant il voit que cil someille,
De lui s’aprime sanz demeure
Renart qui tot le mont aqeure
Et qui moult sot de mavès tors :
Pas avant autre, sanz escors,
S’en va Renart le col bessant.
Se Chantecler par atent tant
Que il le puisse as denz tenir,
Il li fera son gieu partir.[2]
Qant Renart choisi Chantecler,
Il le vodra, s’il puet, haper ;
Renart sailli qui est legiers,
Et Chantecler saut en travers,
Renart choisi, bien le conut,
Desor un fumier s’arestut.
Qant Renart vit qu’il ot failli,
Forment se tint à mal-bailli ;
Lors se conmence à porpenser
Conment il porra Chantecler
Engingnier, qar s’il se remue
Dont a-il sa proie perdue.
Dant Chantecler, ce dist Renart,
Ne fuïez pas, n’aiez regart,
Moult par sui liez qant tu es sains,
Que tu ies mes cosins germains.
Chantecler lors s’aséura,
De la joie un sonet chanta.
Ce dist Renart à son cosin
Membre-vos mès de Chanteclin
Le bon pere qui t’engendra ?
Onques nus Cos si ne chanta ;
Tele voiz ot et si cler ton
Que d’une liue l’ooit-on,
Et moult chantoit à longue alaine
Les deus eulz clos et la voiz saine ;
D’une grant lieue l’en l’ooit
Qant il chantoit et refrenoit.
Dist Chantecler, Renart cosin,
Volez me prendre par engin.
Certes, ce dist Renart, non voil,
Mès or chantez, si clingniez l’oil ;
D’une char somes et d’un sanc,
Miex vodroie estre d’un pié manc
Que vos mesface tant ne qant,
Que tu es trop près mon parent.
Dist Chantecler, pas ne te croi,
Un poi detrai en sus de moi,
Et je diré une chançon ;
N’aurai voisin ci environ
Qui bien n’entende mon fauset.
Lors s’en est souriz Renardet,
Et dist Renart, chante, cousins,
Je sauré bien se Chanteclins
Mes oncles s’il vos fu noient.
Lors enconmence hautement,
Lors chanta Chantecler un vers,
L’un oil ot clos et l’autre overs,
Car moult forment cremoit Renart,
Sovent regarde cele part.
Ce dist Renart, ce n’est noient,
Chanteclin chantoit autrement
A un lonc tret à eulz cligniez,
C’on l’ooit d’outre les plessiez.
Chantecler cuide que voir die,
Lors conmence sa melodie
Les eulz cligniez par grant aïr.
Lors ne volt plus Renart soffrir,
Par de desus un rouge chol
Le prent Renart parmi le col,
Fuiant s’en va et fet grant joie
De ce qu’il a encontré proïe.
Pinte voit que Renart l’enporte,
Dolente est, moult se desconforte,
Moult se conmence à dementer
Por Chantecler qu’en voit porter,
Et dist, sire, bien le vos dis,
Et vos me gabiez tout dis,
Et si me teniez por fole ;
Mès ore est voire la parole
Dont je vos avoie garni :
Vostre orgoil si vos a traï.
Fole fui qant je vos apris,
Que fox ne crient tant qu’il soit pris.
Renart vos tient qui vos enporte,
Lasse dolente ! con sui morte !
Qant je ainssi pert mon seignor,
Trestoute ai perdue m’amor.
La bone dame del mesnil
A overt l’uis de son cortil,
Que vespres ert, et si voloit
Ses gelines metre en son toit.
Pinte apela, Bisse et Rousete,
L’une ne l’autre ne recepte.
Qant voit que venues ne sont,
Moult se merveille qu’eles font :
Son Coc rehuche à longe alaine,
Renart voit qui si mal le maine ;
Avant passe por lui rescorre,
Et Renart conmença à corre.
Qant el voit qu’el ne rescorra,
Porpense soi qu’ele fera.
Harou ! s’escrie à plaine goule,
Et vilains qui sont en la coule,
Qant il oent que cele bret,
Tantost se sont cele part tret,
Si li demandent que ele a.
En soupirant lor aconta,
Lasse ! trop m’est mesavenu.
Conment, font-il, c’avez perdu ?
Mon Coc que cil Gorpil enporte.
Ce dist Costant, pute vielle orde,
C’avez-vos fet que nel’ préistes ?
Sire, que est-ce que vos dites ?
Par les Sains Dieu je nel’ poi prendre,
Ne il ne me volt pas atendre.
Sel’ ferissiez ? je n’oi de qoi.
De cel baston : et je ne poi,
Car il s’en va le grant troton,
Nel’ prendroient deus chien breton.
Par où s’en va ? Par ci tout droit.
Li vilain corent à esploit,
Et tuit crient, or ça, or ça !
Renart l’oï qui devant va :
Qant Renart l’ot, si sailli sus,
Si qu’à terre ne fiert li cus.
Le saut c’a fait ont cil oï,
Tuit s’escrient, oci, oci.
Costant lor dist, or tost après,
Les vilains corent à eslès.
Costant apele son mastin
Que l’en apeloit Mal-voisin.
Au corre c’ont fait l’ont véu,
Et Renart ont aparcéu.
Tuit s’escrient, vez le Gorpil.
Or est Renart en grant peril
Et le Coc se il ne set d’art.
Conment, fet-il, sire Renart ?
N’oez-vos quel honte il vos dient
Cil vilain qui si fort vos huient ?
Costant vos siut plus que le pas,
Car li lanciez un de vos gas
A l’issue de cele porte,
Qant il dira Renart l’enporte
Maugré vostre, ce poez dire,
Jà nel’ porrez miex desconfire.
N’est si sage qui ne foloit.
Renart qui tot le mont deçoit,
Fu decéuz à ceste foiz,
Car il cria à haute voiz,
Maugré vostre, ce dist Renart,
Enpor-ge de cestui ma part,
Maugré vostre en ert-il portez.
Li Cos qui ert touz amortez,
Qant il senti laschier la bouche,
Bati ses êles, si s’en touche,
Et vint volant sor un pomier,
Et Renart fu seur le terrier,
Grains et marriz et trespensez
Du Coc qui li est eschapez.
Chantecler a gité un ris,
Renart, fet-il, que vos est vis ?
De cest siecle que vos en semble ?
Li lechierres fremist et tremble,
Si li a dit par felonie,
La bouche, fet-il, soit honie
Qui s’entremet de noise fere
A l’eure qu’el se devroit tere.
Fait Chantecler, et je le voil,
La male goute li criet l’oil
Qui s’entremet de someillier
A l’eure que il doit veillier !
Cosin Renart, dist Chantecler,
Nus ne se doit en vos fier :
Dahez ait vostre cosinage !
Il me dut torner à domage ;
Renart traïtre, alez vos ent,
Se vos estes ci longement,
Vos i lerez cele gonele.
Renart n’a soing de la favele,
Ne volt plus dire, ainz s’en retorne,
Que ileques plus ne séjorne.
Besoingneus est, s’a le cuer vain,
Par une broce lez un plain
Renart s’en va toute une sente,
Moult est dolent, moult se clemente
Du Coc qui li est eschapez,
Que il ne s’en est saoulez.