Les Œuvres de François Rabelais (Éditions Marty-Laveaux)/LeQuartLivre/1
Comment Pantagruel monta sus mer, pour visiter
l’Oracle de la diue Bacbuc.
Chapitre I.
n moys de Iuin, au iour des festes Vestales[1] : celluy propre on quel Brutus conquesta Hespaigne, & subiugua les Hespaignolz, on quel aussi Crassus l’auaricieux feut vaincu & deffaict par les Parthes, Pantagruel prenent congé du bon Gargantua son pere, icelluy bien priant (comme en l’Eglise primitiue estoit louable coustume entre les saincts Christians) pour le prospere nauiguaige de son filz, & toute sa compaignie, monta sus mer au port de Thalasse, accompaigné de Panurge, frere Ian des entomeures, Epistemon, Gymnaste, Eusthenes, Rhizotome, Carpalim, & aultres siens seruiteurs & domesticques anciens : ensemble de Xenomanes le grand voyageur & trauerseur des voyes perilleuses, lequel certains iours par auant estoit arriué au mandement de Panurge. Icelluy pour certaines & bonnes causes auoit à Gargantua laissé & signé en sa grande & vniuerselle Hydrographie la routte qu’ilz tiendroient visitans l’oracle de la diue Bouteille Bacbuc.
Le nombre des nauires feut tel que vous ay exposé on tiers liure, en conserue de Triremes, Ramberges, Gallions, & Liburnicques nombre pareil : bien equippees, bien calfatees, bien munies, auecques abondance de Pantagruelion. L’assemblee de tous officiers, truchemens, pilotz, capitaines, nauchiers, fadrins, hespailliers, & matelotz feut en la Thalamege. Ainsi estoit nommee la grande & maistresse nauf de Pantagruel : ayant en pouppe pour enseigne à moytié d’argent bien liz & polly : l’aultre moytié estoit d’or esmaillé de couleur incarnat. En quoy facile estoit iuger, que blanc & clairet estoient les couleurs des nobles voyagiers : & qu’ilz alloient pour auoir le mot de la Bouteille.
Sus la pouppe de la seconde estoit hault enleuee vne lanterne antiquaire faicte industrieusement de pierre sphengitide & speculaire : denotant qu’ilz passeroient par Lanternoys. La tierce pour diuise auoit vn beau & profond hanat de Porcelaine. La quarte vn potet d’or à deux anses, comme si feust vne vrne antique. La quinte vn brocq insigne de sperme d’Emeraulde. La sizieme vn Bourrabaquin monachal faict des quatre metaulx ensemble. La septieme vn entonnoir de Ebene tout requamé d’or à ouuraige de Tauchie. La huictieme vn guoubelet de Lierre bien precieux battu d’or à la Damasquine. La neufieme vne brinde de fin or obrizé. La dizieme vne breusse de odorant Agalloche (vous l’appellez boys d’Aloes) porfilee d’or de Cypre à ouuraige d’Azemine. L’vnzieme vne portouoire d’or faicte à la Mosaicque. La douzieme vn barrault d’or terny couuert d’vne vignette de grosses perles Indicques en ouuraige Topiaire. De mode que personne n’estoit tant triste, fasché, rechigné, ou melancholicque feust, voyre y feust Heraclitus le pleurart, qui n’entrast en ioye nouuelle, & de bonne ratte ne soubrist, voyant ce noble conuoy de nauires en leurs deuises : ne dist que les voyagiers estoient tous beuueurs gens de bien : & ne iugeast en prognostic asceuré, que le voyage tant de l’aller que du retour seroit en alaigresse & santé perfaict.
En la Thalamege doncques feut l’assemblee de tous. Là Pantagruel leurs feist vne briefue & saincte exhortation toute auctorisee des propous extraictz de la saincte escripture, sus l’argument de nauiguation. Laquelle finie feut hault & clair faicte priere à Dieu, oyans & entendens tous les bourgeoys & citadins de Thalasse, qui estoient sus le mole accourruz pour veoir l’embarquement.
Apres l’oraison feut melodieusement chanté le psaulme du sainct roy Dauid, lequel commence. Quand Israel hors d’Ægypte sortit[2]. Le pseaulme paracheué feurent sus le tillac les tables dressees, & viandes promptement apportees. Les Thalassiens qui pareillement auoient le pseaulme susdict chanté, feirent de leurs maisons force viures & vinage apporter. Tous beurent à eulx. Ils beurent à tous. Ce feut la cause pourquoy personne de l’assemblee oncques par la marine ne rendit sa guorge, & n’eut perturbation d’estomach ne de teste. Au quelz inconuenient ne eussent tant commodement obuié, beuuans par quelques iours parauant de l’eaue marine, ou pure, ou mistionnee auecques le vin, ou vsans de chair de Coings, de escorce de Citron, de ius de Grenades aigresdoulces : ou tenens longue diete : ou se couurans l’estomach de papier : ou autrement faisans ce que les folz medicins ordonnent à ceulx qui montent sus mer.
Leurs beuuettes souuent reiterees, chascun se retira en sa nauf : & en bonne heure feirent voile au vent Grec leuant selon lequel le pilot principal nommé Iamet Brayer, auoit designé la routte, & dressé la Calamite de toutes les Boussoles. Car l’aduis sien, & de Xenomanes aussi feut, veu que l’oracle de la diue Bacbuc estoit pres le Catay en Indie superieure, ne prendre la routte ordinaire des Portugualoys : Les quelz passans la Ceincture ardente, & le cap de Bonasperanza sus la poincte Meridionale d’Africque, oultre l’Æquinoctial, & perdens la veue & guyde de l’aisseuil Septentrional, font nauigation enorme. Ains suyure au plus pres le parallele de ladicte Indie : & gyrer au tour d’icelluy pole par Occident : de maniere que tournoyans soubs Septentrion l’eussent en pareille eleuation comme il est au port de Olone, sans plus en approcher, de paour d’entrer & estre retenuz en la mer Glaciale. Et suyuans ce canonique destour par mesme parallele, l’eussent à dextrer vers le Leuant, qui au departement leurs estoit à senestre.
Ce que leurs vint à profict incroyable. Car sans naufrage, sans dangier, sans perte de leurs gens, en grande serenité (exceptez vn iour pres l’isle des Macreons) feirent le voyage de Indie superieure en moins de quatre moys : lequel à poine feroient les Portugualoys en troys ans, auecques mille fascheries, & dangiers innumerables. Et suys en ceste opinion, sauf meilleur iugement, que telle routte de Fortune feut suyuie par les Indians, qui nauigerent en Germanie, & feurent honorablement traictez par le Roy des Suedes[3], on temps que Q. Metellus Celer estoit proconsul en Gaulle : comme descriuent Cor. Nepos, Pomp. Mela, & Pline apres eulx.
- ↑ Le 9 juin.
- ↑ Ps. 113, traduit en vers par Cl. Marot.
- ↑ Il y a : Suèves (Suevorum) dans les auteurs que cite Rabelais.
- ↑ Briefue declaration d’aucunes dictions plus obscures contenues on quatriesme liure des faicts & dicts Heroicques de Pantagruel.Bacbuc. Bouteille en Hebrieu. ainsi dicte du son qu’elle faict quand on la vuide (p. 269).Vestales. festes en l’honneur de la deesse Vesta en Rome, c’est le septiesme iour de Iuing (p. 269).Thalasse. mer (p. 269).Hydrographie. charte marine (p. 270).Pierre sphengitide. transparente, comme verre (p. 270).Ceincture ardente. zone torride (p. 272).L’aisseuil Septentrional. pole Arctique (p. 272).Parallele. line droicte imaginee on ciel egualement distante de ses voisines (p. 272).