Les Œuvres de François Rabelais (Éditions Marty-Laveaux)/Gargantua/Chroniques
⸿ Comment au temps du bon roy Artus il estoit vng tresexpert Nigromancien que on appelloit Merlin.
ovs
bons cheualliers et gentilz
hommes vous debuez scauoir que
au temps du bon roy Artus, il
estoit vng grant philosophe nomme
Merlin, Lequel estoit expert en
lart de nigromance plus que nul
homme du monde. Lequel iamais
ne cessa de secourir lestat de noblesse,
dont il merita par ces faictz estre appelle prince
des nigromanciens. Ledict Merlin fist de grandes merueilles,
lesquelles sont fortes a croire a ceulx qui ne les
ont veues. Merlin estoit du grant conseil du roy Artus,
et toutes les demandes quil faisoit en la court dudit
Roy, luy estoyent octroyees, fust pour luy ou pour
aultres. Il guarentit le Roy et plusieurs de ses barons
et gentilz hommes de grans perilz et dangiers. Il fist
plusieurs grans merueilles. Entre lesquelles il fist vne
nauire de cinq cens tonneaulx qui alloit vagant sur
terre ainsi que vous en voyez sur mer. Et plusieurs
aultres merueilles qui sont trop prolixes a racompter
comme vous verrez plus a plain.
⸿ Comment Merlin dist au roy Artus que il auroit beaucoup daffaires contre ses ennemys.
pres plusieurs merueilles faictes par Merlin,
a la louenge & au prouffit du roy Artus,
Merlin dict. Treschier et magnanime prince
vueillez scauoir que vous aurez beaucoup
daffaires contre voz ennemys. Parquoy sil
vous plaist ie y veulx remedier, puis que suis a vostre
seruice, car tousiours ny pourray estre, car ie seray
trompe & detenu par femmes, mais soyez certain que
tant que seray en mon liberal arbitre ie vous garderay
de la main de voz ennemys. Atant parla le roy a
Merlin et luy dict. Dea Merlin nest il possible de euiter
ce peril pour tout mon royaulme, non pas dict. Merlin
pour tout le monde. Adonc dict le Roy que il fist ce
que il luy plairoit, et quil nespargne riens de son
Royaulme. Alors Merlin mercia le roy de loffre quil luy
faisoit. Luy qui scauoit toutes choses, C’est a scauoir
le temps passe par ses ars, et le temps a venir par le
vouloir de dieu. Ledit Merlin print congie du bon Roy,
& se fist porter a la plus haulte montaigne de orient,
et porta vne ampolle du sang de Lancelot quil auoit
recueillie de ses playes apres que il auoit tournoyé ou
combatu contre aulcun cheuallier. Oultre plus porta la
rongneure des ongles des doibs de la belle genieure
espouse du roy Artus, qui pesoyent l’estimation de.x.
liures. Merlin estant à la montaigne sur le hault
dicelle fist vne enclume dacier grosse comme vne tour,
et les marteaulx conuenables iusques au nombre de
troys, Lesquelz par ses ars il fist que ilz frappoyent
si impetueusement sur lenclume que il sembloit
que se fust fouldre qui descendift du ciel, et tout par
compas.
⸿ Comment Merlin fist apporter les ossemens de deux balleines pour faire le pere et la mere de Gargantua.
ncontinent que Merlin eut entendu les
marteaulx, il fist apporter les ossemens de
vne balleine masculine, & les arrousa du
sang de ladiste ampolle, & les mist sur
lenclume, et en brief furent consommez
lesdictz ossemens et mis en pouldre, & adonc par la
challeur du soleil de lenclume & des marteaulx fut
engendre le pere de Gargantua, moyennant ladicte
pouldre. Apres Merlin fist apporter les os de vne balleine
fumelle, et mesla les susdictz ongles de la royne,
puis mist le tout sur lenclume comme ia auoit faict.
Et de icelle pouldre fut faicte la mere dudict gargantua.
⸿ Comment Merlin fist vne merueilleuse imment pour porter le pere & la mere de Gargantua.
pres que Merlin eut acheue ceste merueilleuse besongne. Il neust pas si tost pouse la
derniere pouldre pour faire la femme que il
veist lhomme qui estoit de la grosseur dune
baleine, & de longueur a lequipollent comme
doibt estre vng droict homme : ce voyant Merlin getta
son sort sur luy, et le fist dormir iusques a neuf iours
ausquelz neuf iours debuoit estre faicte la femme. Le
prince Merlin voyant le geant endormy proposa luy
faire vne beste pour le porter. Et pource regarda ca
& la, et veit les relicques de vne iument que il print,
& mist sus lenclume & en fist vne si grant iument &
si puissante quelle pouoit bien porter les deux aussi facillement que faict vng cheual de dix escus vng
simple homme, & apres ce lenuoya paistre aual la
montaigne.
⸿ Comment Merlin rompit les enchantemens[1].
vant Merlin eut faicte ceste grande &
merueilleuse iument il rompit les enchantemens
et apperceut que sa femme estoit ia
faicte de la grandeur de lhomme, & adonc
ledict homme va regarder la femme disant,
que faictz tu la Galemelle, dict la femme, ie attens
grant Gosier mon amy. Adonc Merlin se print a rire,
& leurs dict que les parolles estoyent belles, et que il
vouloit que ilz eussent ainsi nom. Adonc aduiserent
ledict Merlin, & luy firent honneur comme a leur
souuerain seigneur, puis Merlin leur fist grant chere,
& leur dict. Allez aual ceste montaigne & me admenez
vne iument que y trouuerez.
⸿ Comment grant Gosier et Galemelle allerent querir la iument, & engendrerent Garganuta.
donc
par le commandement de Merlin
grant Gosier & Galemelle descendirent au
bas de la montaigne pour aller querir la
grant iument, grant Gosier qui fut le premier
au bas de la montaigne regardoit venir
Galemelle, & prenoit plaisir à regarder lentredeux de ses chauses (car ilz estoyent tous nudz). Adonc que
Galemelle fut descendue, il luy demanda quelle chausse
elle auoit la. Adonc luy respond en eslargissant ses
cuysses quelle auoit celle playe de nature, grant Gosier
regardant la playe large et rouge comme le feu
sainct Anthoine, le membre luy dressa, lequel il auoit
gros comme le ventre dune cacque de haren, & long a
laduenant, il dist à Galemelle que il estoit barbier, &
que de son membre feroit esprouuette pour sauoir se
la playe estoit parfonde, a laquelle playe il ne trouua
nul fons toutesfoys si bien leur agrea le ieu que il engendrerent
Gargantua, puis menerent la grant iument
a Merlin, & Merlin leur dist. Vous auez engendre vng
filz qui fera grans faictz darmes, et donnera secours au
roy Artus a lencontre de ses ennemys, & pourtant
vous le debuez bien traicter & nourrir, & le vous
commande, et que faciez prouision de viures pour
quant il sera ne sur terre. En oultre ie vous ditz que
ie ne feray plus auecques vous, et vous commande sur
peine de me desobeir que quant vostre filz sera en
leage de sept ans, que vous deux ladmenez a la court
du roy Artus en la grant bretaigne, & que apportez
aulcunes choses de par deca pour manifester & monstrer
vostre puissance. Adonc dist grant Gosier Treschier
seigneur comme trouuerons nous le chemin,
quant iamais nous ny fusmes. Dist Merlin vous trounerez
la teste de voustre iument vers occident, et la
laissez aller, & elle vous conduyra bien sans faillir.
Et adonc Merlin print congie deulx, dont il demenerent
si grant dueil que on les eust bien entenduz de
dix lieues, et plouroyent si tresfort que deux moulins
enflent peu mouldre de leaue qui leurs sortoit
des yeulx.
rant Gosier et Galemelle sen vont à
la chasse pour oblier lennuy quilz auoyent
de Merlin, ou ilz trouuerent vne grande
trouppe de cerfz, grant Gosier sen alla
apres, et en print vne douzaine des plus
grans. Adonc regarda derriere luy, et ne voit point
Galemelle, car elle nauoit point de coustume de
demourer derriere. Adonc chargea les douze bestes a
son col pour veoir ou elle estoit demouree. Quant il
fut pres délie il aduisa que elle estoit acouchee,
& apperceaut que cestoit dung filz masle. Adonc le
nomma Gargantua (lequel est vng verbe grec) qui vault
autant a dire : comme tu as vng beau filz. Adonc la
mere dist que elle vouloit que il eust ainsi nom : et le
pere fut dacord. Lors prindrent lenfant Gargantua
chascun par vne main, & le menerent a la montaigne
ou ilz faisoyent leurs demourances. Aulcuns acteurs
veullent dire que Gargantua fut totallement nourry
de chairs en son enfance. Ie dis que non (ainsi que dit
Morgain & plusieurs aultres) car sa mere pouoit bien
porter a chascune de ses mammelles cinquante
pippes de laict. Le pere et la mere prenoyent plaisir a
le nourrir, car il leur faisoit tout plain de petis passe
temps : aulcunesfoys il se esbatoit a getter des pierres
du hault en bas de la montaigne comme font petis
enfans : lesquelles nestoyent point moindres de la
pesanteur de troys tonneaulx de vin : et par foys sen
alloit esbatre en la forest comme font petis iouuenceaulx :
et quant il veoit aulcun oyseau pour
son plaisir il leur gettoit quelque pierres : lesquelles
pierres luy sembloyent bien petites. Elles
nestoyent pas moins grosses que deux meulles de moulin.
Et si luy pesoyent moins en la main, que ne
feroit vne demye noix en la main dung homme de
maintenant.
⸿ Comment grant Gosier et Galemelle penserent de leurs affaires pour aller chercher Merlin a la court du Roy Artus.
rant Gosier aduise que leur filz est grant & bien nourry & que les sept ans
saprochent et que il fault quilz le menent
a la court du Roy Artus ainsi que leur a
dit Merlin a son departement. Lors sen va
grant Gosier dung coste & sa femme de lautre pourchasser
des viures. Tant firent que en peu de temps
quilz eurent assez pour faire leur voyage. Et les chargerent
lesditz viures sur la grant iument : qui estoit
bien a lestimation de cinq cens charges de pain
& chairs fresche & salee. De vin ne faisoyent point de
prouision. Puis tournerent la grant iument la teste
vers les parties doccident : & donnerent a Gargantua
vne verge pour la toucher : laquelle estoit comme vng
grant mas de nauire. Au regard de grant Gosier
& Galemelle ilz prindrent chascun vng grant rochier
sur leur teste pour monstrer leur puissance au roy
artus quant ilz seroyent en son royaulme (ainsi que
leur auoit conseille Merlin a son departement) desquelz
rochiers vous orrez parler plus a plain en lhystoire.
⸿ Comment ilz se misdrent a chemin Et des sorestz de champaigne.
ant
a faict grant Gosier et sa compaignie
quilz sont arriuez a Romme, & de la sont
venuz en allemaigne, en souyce : Et au
pays de Lorraine : et de la grant champaigne :
ou il y auoit pour ce temps la de
grans boys : & de celluy temps sabbatoyent les grans
sorestz Car il failloit passer par dedans. Quant la grant iument fut dedans les forestz de champaigne les mouches
se prindrent a la picquer au cul ladicte iument
qui auoit la queue de deux cens brasses. Et grosse a
laduenant : se print a esmoucher : & alors vous eussiez
veu tomber ses gros chesnes menu comme gresle :
& tant continua ladicte beste que il ny demoura arbre
debout que tout ne fust rue par terre : et autant en
fist en la beaulce : car a present ny a nul boys :
et sont contrainctz les gens du pays de eulx chauffer
de feurre ou de chaulme. Et Gargantua qui suyuoit
ladicte iument : & ne la pouoit arrester se mist vng
ecot de boys ou petit orteil qui pesoit plus de deux
cens liures. Gargantua se trouua blece et se print a
clocher en disant a son pere & mere que il se vouloit
reposer. Alors sen allerent au riuaige de la mer ou a
present est le mont sainct michel. Quant grant gosier
& galemelle & Gargantua furent au riuaige de la mer
ilz furent bien esbahys de veoir tant deaue. Alors
grant Gosier demanda le chemin pour aller en la
grant bretaigne ou se tenoit le Roy artus : et on luy
dict que il leur conuenoit passer la mer silz y vouloyent
aller. Ce pendant Gargantua pensoit son petit
orteil & y mettoit vne tante que nestoit pas moins
longue de troys toises & estoit ladicte tante le bout
dung clochier dune petite parroisse qui estoit la aupres :
duquel clochier il en auoit oste la croisee ou estoit le
coq : car elle luy eust faict mal a sa playe a cause des
croisons : & ne mist guieres la playe a estre guerie. Et
notez que il failloit quatre cens aulnes de toille pour
taire la bande dudit petit orteil sauf demy quartier
iustement Car il lauoit vng peu enfle a cause du mal
quil y auoit eu parauant.
lors que sceurent les gens du pays que ilz estoyent au riuaige vous eussiez tant veu venir de gens de
toutes pars pour les veoir que cestoit vne chose inestimable,
dont entre toutes nations qui y vindrent, les
bretons leur firent beaucoup de mal. Et deuez scauoir que ce quilz portoyent sur leur testes ilz le mirent bas
& les viures que portoit la grant iument sur soy : puis
lenuoyerent paistre parmy les landes : & comme bons
mesnagiers ferrerent bien leur bagaige. Mais ne sceurent
si bien faire ne garder leur vitaille que en peu
dheure vous neussiez veu ces Bretons a lentour de ces
rochiers caches de peur que on ne les veist : & auecques
grans cousteaulx lung couppoit vne grant piece
de venaison, lautre vne grosse piece de beuf : tant y
vindrent de foys que grant gosier les apperceut. Lors
iura que se ilz namendoyent ce que il luy auoyent
desrobe que ilz mangeroyent toutes les vaches de leur
pays. Ce voyant les bretons ilz leur baillerent deux
mille vaches pour recompense, sans les veaulx qui ne
furent pas du conte. Adonc grant gosier & Galemelle
dirent que ilz garderoyent bien que plus ne feussent
desrobes par le moyen des deux rochiers, Et alors
ledit grant gosier et Galemelle prindrent chascun le
sien sur la teste ainsi que les auoyent apportez
dorient. Et puis se mirent en la mer disant que
quant ilz en auroyent affaire qui les pourroyent aussi
bien aller querir comme il les auoyent portez. Et
quant grant gosier fut assez auant il mist le lien sur la
riue de la mer lequel rochier a present est appelle le
mont sainct Michel. Et mist ledit grant gosier la
poincte contre mont : et le puis prouuer par plusieurs
micheletz. Et est ledit rochier tresbien garde de
present au noble roy de France comme vrayes relicques
precieuses. Galemelle vouloit mettre le sien
contre mais grant Gosier dict quelle nen feroit riens
& que il le failloit porter plus auant, pensant a luy
mesmes que tel pourroit prendre lung qui ne prendroit
pas lautre. Galemelle fist le commandement, & le
porta plus loing. Et est ledit rochier de present appelle
tombelaine. Apres sen sont retournes les deux personnaiges
ou il ont trouue Gargantua qui se gardoit que
les bretons ne besongnissent a sa perte comme aultresfoys
auoyent faict.
⸿ Comment le pere et la mere de Gargantua moururent dune fiebure et comment Gargantua emporta les cloches de nostre dame de paris.
pres que grant gosier & Galemelle furent venuz de porter les deux rochiers : il leur
print vun fieure continue laquelle si tresfort
les tourmenta que en brief ilz moururent
par faulte dune purgation. Parquoy
gargantua se cuyda desesperer car il se arracha les
cheueux & se gratoit la teste. Il frappoit du pie contre
terre, il se detordoit les bras : cestoit merueille du
dueil quil demenoit. Puis son dueil passa & luy souuint
quil auoit ouy dire que Paris estoit la plus grant ville
du monde il luy print enuie de y aller car il appetoit a
veoir choses nouuelles comme font ieunes gens. Lors
il monta sur sa grant iument & se mist a chemin,
quant il fut pres il se mist a pied & enuoya paistre la
iument, puis va entrer en la ville et se alla asseoir sur
vne des tours de nostre dame, mais les iambes luy
pendoyent iusques en la riuiere de seine et regardoit
les cloches de lune & puis de lautre & se print a
bransler les deux qui sont en la grosse tour lesquelles
sont tenues les plus grosses de France. Adonc vous eussiez
veu venir les parisiens tous a la foule qui le regardoyent
& se mocquoyent de ce que il estoit si grant.
Lors pensa que il emporteroit ces deux cloches & que
il les pendroit au col de sa iument ainsi que il auoit
veu des sonnettes au col des mules. Adonc sen part
& les emporte, qui furent marris ce furent les parisiens
car de force ne falloit point vser contre luy. Lors
se mirent en conseil, et fut dit que lon yroit le supplier
que il les apportast et mist en leurs places ou il les
auoit prinses et que il sen allast sans plus reuenir, et luy
donnerent troys cens beufz & deux cens moutons pour son disner ce que accorda Gargantua puis sen
alla ledit Gargantua sur le riuaige de la mer dont il
estoit venu & lors recommensa son dueil : quant il ne
veit point son pere et sa mere la ou il les auoit laissez
mors, car Merlin qui scauoit tout estoit venu pour le
reconforter lequel les auoit faict enterrer. Ledit Melin
vint a Gargantua & luy dict ne te deconforte plus pour
la mort de ton pere & mere, car ie les ay faict enterrer
en ce lieu la. Lors dict Gargantua qui estes vous qui
ainsi parles, dist Merlin ie suis celluy qui commanda a
ton pere que il vint par deca pour te presenter au Roy
artus. Dea dict Gargantua esse vous qui auez nom
Merlin ouy dict il & pourtant dispose toy pour ten
venir auec moy en la grant bretaigne seruir le Roy.
Alors dict Gargantua, sire Merlin ie suis a vous, ayes
pitié du pouure orphelin, puis dict Merlin va querir
ta iument et passerons la mer car il est heure de partir.
Gargantua fist son commandement & amena ladicte
iument pres du riuaige de la mer laquelle eut peur de
ondes en forte que on leust ouye ronfler de dix lieux
puis se print a saulter ruer et courir. Merlin voyant
que Gargantua vouloit aller apres luy dict que il la
laissast aller & quelle alloit en flandres et que ladicte
iument estoit chaulde et pourroit estre couuerte de
beaulx poulains dont les flamans auroyent de la rasse
& que vne aultrefoys la pourroit recouurer. Mais tant
y fut ladicte iument quelle fist poulains & poulaines,
pourtant saichez que de ycelle est venu le nom des
grans iumens de Flandres.
⸿ Comment Merlin mena Gargantua en la grant bretaigne.
pres la perte de la grant iument Merlin fist venir vne nue qui porta luy & Gargantua
sur le bort de la mer pres Londres. Lors dist
Merlin a Gargantua, tu matendras icy &
ie iray vers le bon Roy artus lequel te
fera grant chere, & te deliurera vng don qui moult
te plaira. Et pourtant ne le refuse de rien que il te
commande, non feray ie dist Gargantua, ie feray tout
vostre vouloir. Alors sen va Merlin qui salua le Roy
puis dist, Trespuissant prince iamaine vng personnaige
en voustre pays lequel est assez puissant pour deffaire
& mettre affin tous voz ennemys filz estoyent assemblez
en vng ost : & plus de cent mille hommes darmes
dauantaige. Dea dist le Roy comment est il possible,
moy qui ay tant de vaillans gens de guerre iay
perdu deux batailles ceste sepmaine passee. Sire dist
Merlin a ceste foys leur monstrerez que il ne vous
doibuent pas venir veoir de si pres. Adonc le Roy &
les seigneurs & barons auec Merlin montent a cheual.
Et tantost ont trouue Gargantua qui se promenoit
dont le Roy et les barons furent fort esmerueilles de
sa grosseur & haulteur. Lors le roy le salua & Gargantua
luy rendit son salut comme a tel prince appartenoit :
et le Roy luy demanda son nom. Sire de son
nom ne vous soucies car il est pour se deffendre en
guerre contre son homme. Et gargantua leur respondist
que sil y en auoit trente mil hommes que il ne
luy feroyent riens : adonc luy dist le Roy que sil vouloit
aller combatre contre les Gos & Magos lesquelz
luy faisoyent guerre que il labilleroit de liuree & luy
bailleroit gaiges & bouche a court. Lors le mercia
Gargantua & dist que lon luy fist vne masse de fer de
soixante piedz de long : & que par le bout elle feust grosse comme le ventre de vne tine. Lors commanda
le Roy que len cherchasse des fourgerons pour ce faire
Au surplus le Roy luy dist que ces Gos et Magos
estoyent fors & puissans & que ilz estoyent armez de
pierre de taille & que il en auoit vng qui estoit son
prisonnier lequel luy faisoyt peur quant il le regardoit.
Lors dist Gargantua. Sire vous plaist il que ie le
voye : et le Roy dist que ouy : & enuoya querir ledit
prisonnier comme dist est. Et quant Gargantua le veit
dist. Sire voulez vous que se prisonnier ne vous face
plus peur. Lors dist le Roy faictes ce que vous vouldres.
Et souldain Gargantua print ledit prisonnier par
le collet et le getta deuant tous les Barons si treshault
que lon ne le pouuoit veoir puis tomba tout mort
aussi froisse que si vne tour fust tombee sur luy. Puis
dist Gargantua. Sire ne craignes rien plus cestuy icy
car il ne vous fera plus de peur.
a massue fust tantost faicte par la science de Merlin tel que il luy failloit et en brief
fust amenee dedans vne grant charrette
comme on faict vne piece dartillerie : et
presentee a Gargantua lequel la print bien
legierement & iura deuant tous les assistens que
iamais ne beuroit ne mengeroit que les Gos et Magos
neussent tous sentiz que pesoit la masse que il tenoit
en sa main. Adonc vint vng poste par le commandement
du Roy artus qui le mena au camp des Gos et
Magos & les monstra audit Gargantua : disant voyla
les traistres Gos et Magos qui nuyt et iour nous veulent
destruire. Et tout soudain Gargantua se fourre en
la bataille comme vng loup, en vng troupeau de brebiz
frapant de sa massue sa et la criant viue le bon
Roy artus : car ie vous monstreray loffence que luy
aues faicte. Les Gos et Magos voyant que il estoit pire
que vng grant dyable pour eulx ne luy scauoyent que
faire fors tendre le dos : et demandoyent mercy Mais il nauoit pitie de nulz quelz quilz feussent.
Lors vint larmee du roy artus qui fist le pillaige. Et
Gargantua retourna a Londres par deuers le roy, et
Merlin leur conta le cas : dont le roy fut fort ioyeulx
de ses vertus. Lors commanda le Roy dresser les tables
pour Gargantua : et commanda faire les feuz de ioye
en la cite pour la victoire quil auoit contre ses ennemys
les Gos et Magos. Lors se assist Gargantua a
table : & a este assis presentement. Et pour entree de
table luy fut seruy les iambons de quatre cens pourceaulx
sallez : sans les andouilles et boudins : et dedans
son potaige la chair de deux cens lieures : & quatre
cens pains : dont vng chascun pesoit cinquante liures :
& la chair de deux cens beufz gras : dont il auoit
menge les trippes de lentree de table. Et ne doubtez
pas que le tranchouer la ou on luy tranchoit sa chair
ne feust merueilleusement bien grant : car il pouoit
bien tenir dessus ledit tranchouer la chair de troys ou
de quatre beufz : & y auoit six hommes qui ne cessoyent
de trancher la chair dessus ledict tranchouer
et mettre par quartiers : et chascun quartier de beuf
ne luy montoit que vng morceau : Et quatre puissans
hommes qui sans cesser a chascun morceau quil mangeoit
luy iectoyent chascun vne grande paleree de
moustarde en la gorge : & pour la desserte luy seruent
quatre tonnettes de pommes cuyttes : et beut dix tonneaulx
de cidre a cause quil ne beuuoit point de vin[2].
⸿ Comment Gargantua fut habille de la liuree du Roy artus.
pres que les tables furent leuees & que Gargantua eust prins sa refection legierement
non pas comme font vng tas de gallans,
mais en escoutant les belles parolles
et honnestes ieulx & deuises du Roy et des
princes qui la assistoyent, e quoy il prenoit plus de
plaisir cent mille foys quil ne faisoit a boyre ne a
menger. Le roy voyant que graces estoyent rendues
& acheuees de dire, il manda querir son grant maistre
dhostel, et luy commanda que il fist faire les habillemens
de liuree de Gargantua, & quil fust fourny de
chemise & de tous aultres vestemens. Lors dist le
maistre dhostel que ainsi seroit il faict, puis que il
luy plaisoit le commander. Puis fut leue par le commandement
dudict grant maistre dhostel, huyt cens
aulnes de toille pour faire vne chemise audict Gargantua,
et cent pour faire les coussons en sorte de carreaulx,
lesquelz sont mis soubz les esselles.
⸿ Pour faire son pourpoint fut leue sept cens aulnes de satin, moytie cramoysi et moytie iaulne, et trente deux aulnes & demy quartier de velours vert pour faire la bordeure dudict pourpoint.
⸿ Pour faire des chausses audict Gargantua fut achapte deux cens aulnes descarlate, et troys quartiers & demy, cheux le drappier.
⸿ Pour faire le saye de liuree fut leue neuf cens aulnes & demy quartier, moytie rouge & iaulne.
⸿ Pour faire la bordure fut achapte. Ixx. aulnes de velours cramoysi : moytie rouge & moytie iaulne, ainsi comme est dict par deuant.
⸿ Pour faire le manteau fut leue quinze cens aulnes vng Cartier & demy de drap iustement.
⸿ Pour faire ses souliers fut achapte chez les conroyeurs cinquante peaulx de vache & demye.
⸿ Pour faire les courroyes a les fermer fut achapte deux douzaines de peaulx de veau iustement.
⸿ Pour carreler lesdicts soulliers fut achapte cheux les taneux le cuyr de trente six beufz.
⸿ Pour faire son bonnet a la coquarde fut baille au bonnetier deux cens quintaux de laine deux liures et demye et vng quart iustement.
⸿ Son plumart pesoit bien cent troys liures vng quarteron & dauantaige.
⸿ Gargantua auoit vng signet dor en vng de ses doys. Auquel auoit troys cens marcs dor, dix onces & deux deniers & demy & y auoit vng rubiz enchasse dedans ledict signet qui estoit merueilleusement bien estime : & pesoit cent trente liures & demye.
⸿ Au regard de monteure quoy quon en dye, il reffusa de en prendre a cause que il alloit bien a pied : car en trente pas il faisoit autant de chemin que vng poste eust sceu faire a quatre cheuauchees auecques vng bon cheual.
⸿ Comment Gargantua remercya Merlin a secret.
pres que les habillemens furent paracheuez & que Gargantua se veit en ce
point atourne & vestu de ses sumpteulx
habillemens il ressembloit au paon qui
faict la roue, car il mist ses deux mains sur
ces deux coustez en la presence du bon Roy artus
et de tous les gentilz hommes & nobles barons & assistans
de sa court qui la estoyent presens. Adonc ledict
gargantua estant esleue sur ces deux piedz il se
regarda dung fier couraige en faisant deux ou troys
tours de la teste, puis dist : bon faict croire le conseil dung prudent & saige homme tel comme celluy de
monseigneur Merlin : car bien me dist ce que ie voy
maintenant quant il dist que ne reffusasse en rien le
bon Roy artus, car pour vng simple seruice que luy
ay faict dauoir destruytz & vaincuz les gos & magos :
il ma tant ayme quil ma donne ces sumptueux
habitz : dont ie fuis fort tenu a luy. Lors dist : le Roy
artus a Merlin. Cher amy nous regardons gargantua
qui est bien aise destre ne : & dit du bien de vous
& de la court. Parquoy il me semble que il feroit bon
que vous alliez vous monstrer deuant luy veoir sil fera
ce que il dict : Puis dist merlin. Sire il fera plus fort
mille foys. Adonc Merlin sen va deuant Gargantua.
Et quant Gargantua apperceut Merlin il vint vers luy
& le salua. Puis Merlin demanda quelle chere & comme
il se portoit. Et gargantua qui estoit gay, respond que
tresbien se portoit, et sur ce il se print a rire si tresfort
& de si grant affection : pour la gentillesse de sa
personne & de lamour que il auoit a Merlin & au roy
Artus que on lentendoit rire de sept lieues & demye.
Apres dist Gargantua. Seigneur Merlin, iamais homme
neut autant de bien au monde comme ien ay par
vostre moyen, parquoy ie vous remercye.
⸿ Comment le Roy Artus enuoya ambassade aux holendoys et Irlandoys.
ovs debuez scauoir quant vng grant mal ou mauluaise fortune aduient a aulcun
prince grant seigneur ou aultre pour vne il
en aduient dix. Ainsi fut il au Roy Artus
quant il eut guerre contre les Gos & Magos,
car les Holendoys & Irlendoys qui luy estoyent tributaires
se reuolterent, et quant le roy Artus leur mandoit
querir ses deniers ou ayde & confort de gensdarmes,
ilz faisoyent du contraire. Parquoy luy voyant
son bon conseil & la puissance de Gargantua, conclud leur enuoyer ambassade & signifier quilz luy eussent a
rendre le tribut de cinq annees, et mettre leurs villes
& chasteaulx entre ses mains, & que leur roy le vint
rendre prisonnier a sa court pour en faire iustice telle
que de raison : Les Irlandoys & Holendoys ouirent
lambassade, de laquelle ne se firent que mocquer,
& dirent que ilz estoyent deux nations, & que ilz se
tiendroyent si fors que le roy de la grant bretaigne ne
leur feroit riens, et deffendirent aux ambassadeurs de
non plus parler du roy Artus sur peine de tenir prison.
⸿ Comment les ambassadeurs firent leur rapport, & de la preparation de guerre.
es ambassadeurs du roy Artus voyant la folle responce des Irlandoys & Holendoys
se lont mis sur mer pour tirer vers Londres
ou estoit le roy Artus. Ilz ont eu
bon vent, et ont fort bien exploite, tant
quilz y arriuerent par vng lundy matin, & le Roy en
sceut les nouuelles, lequel les manda incontinant venir
par deuers luy en ia chambre. Quant ilz furent entrez
ilz le saluerent comme ilz scauoyent bien faire. Le
Roy leur rendit leur salut, en leur demandant quelles
nouuelles ilz apportoyent. Lors respondirent les ambassadeurs
que les Irlandoys & Holendoys totallement
estoyent ses ennemys, et que ilz ne prisoyent riens sa
puissance. Le roy leur demanda, leur auez vous parle
de la puissance de Gargantua, & ilz respondirent que
non, combien que il leur en souuenoit assez, mais a
cause de leur oultrecuydance ne les auons vouluz
aduertir de leur prouffit. Le roy leur dist que c’estoit
bien faict, & ces parolles finees le roy fist assembler
son conseil pour deliberer de la guerre, auquel fut
appelle Merlin, et plusieurs aultres : et fut conclud que
Gargantua prendroit gensdarmes ce que il luy plairoit soubz son enseigne : et que Merlin les conduyroit
& bailleroit conseil a Gargantua ainsi que il auoit de
coustume.
⸿ Comment Merlin compta a Gargantua que il luy falloit faire la guerre contre les Irlandoys et Holendoys.
oyant Merlin la conclusion du conseil du
bon roy Artus comme celluy qui veult le
proffit de son maistre, il sen est venu a
Gargantua, et luy a dit. Gargantua leuez
la main & faictes serment au Roy de le
seruir en certaine guerre mouuee entre luy & les
Irlandoys & holendoys. Lors gargantua qui estoit du
coste deuers le soleil qui estoit chault et penetrant, va
leuer la main tout au large en sorte quelle faisoit
demye lieue & demy quart dombre tout a la ronde
iustement : & estoit le soleil sur le point de midy,
& quant Gargantua eut faict le serment, il pria Merlin
que il luy donnast conseil : & que de force auoit assez :
& que en brief il luy monstreroit louuraige que il
scauoit faire de sa massue : puis luy dist Merlin :
gargantua il te fault mener auecques toy deux
mille hommes seullement : qui feront le pillaige
quant tu auras gaigne la bataille : et saiches que tu
prendras leur roy prisonnier, lequel tu admeneras au
Roy artus, & les plus apparens de sa court, et les
detiens prisonniers iusques a ce quon en ait faict present
au bon roy artus. Lors dist gargantua, comment
passerons nous la mer. Puis dist merlin. Ie vous passeray
en vng tel nauire au nous passasmes a venir
de la petite bretaigne en la grande. Et brief fut assemblee
larmee et enuoyee sur le port de la mer. Puis
Merlin fist venir vne grosse nuee noire, & en vng
mouuement furent tous passez la haulte mer : & se
trouuerent tous ceulx de larmee, sauf Merlin qui sen
retourna a la court du Roy artus. Adonc quant gargantua
veit ses gens pres de luy il ne fut point esbahy : mais leur dist, mes enfans attendez moy icy
en ce lieu : car ie veulx aller veoir si les portes de ceste
ville sont bien fermees : & scauoir comme elle sappelle :
car nous sommes en pays de conqueste. Adonc
Gargantua print sa massue sur son espaulle. Et sen va
vers la ville ou il rencontra vng homme arme, lequel
vouloit monter a cheual, et luy dist, A qui es tu, et qui
est ton maistre. Adonc lhomme arme fist le signe de la
croix en disant, Ennemy ie te coniure. Lors gargantua
le print & le mist en vng coing de sa gibessiere : et sen
alla vers les portes dicelle ville ou il trouua beaucoup
de menu peuple, dont il ne tint conte, & les laissa
courir en la ville & fermerent les portes & sonnerent
les cloches pour assembler toute la commune : laquelle
fut incontinent sur les murailles pour getter
des pierres contre Gargantua : mais riens ne les doubtoit :
& deuant tous se alla asseoir sur lung des boulleuers
de la ville : & leur demanda comme auoit nom
la ville, & a qui elle estoit. Lors luy dirent que elle
estoit au Roy dirlande, et quelle sappelloit Reboursin.
Adonc demanda gargantua si leur roy estoit en la
ville : et ilz dirent que ouy : et adonc Gargantua leur
dist que ilz luy allassent dire que il lattendoit luy
& toute sa puissance pour le combatte & mener prisonnier
au Roy Artus.
⸿ Comment le Roy Dirlande & Holende sortit[3] cinq cens hommes darmes pour combatre Gargantua.
insi que Gargantua parloit aux citoyens :
le roy dirlande sortit par vne faulce porte
secrette auecques cinq cens hommes bien
armez, et vindrent pour assaillir gargantua
qui estoit assis sur le bouleuart : & quant
gargantua les veit venir a lencontre de luy il passa oultre la barriere dedans le bouleuart : & se print
a ouurir la gueulle, en se mocquant de si peu de gens
que ilz estoyent. Adonc chascun le regardoit & disoyent
que cestoit vng diable car il auoit la gueulle
fendue de quatre braces. Puis chascun se print a tirer
arballestes & arcs contre gargantua : & se voyant
Gargantua sort legierement du bouleuert : et sans
frapper aulcun coup de sa massue les print a belles
mains & en emplist tout le fons de ces chausses. Et
vne partie mist en la fante de ces manches, puis sen
retourna vers ces gens qui lattendoyent au bort de la
mer et leur bailla les prisonniers a garder dont ilz
furent moult ioyeulx de la belle prinse que auoit faict
leur capitaine gargantua.
⸿ Comment gargantua demanda aux prisonniers si le Roy estoit en leur compagnie.
vant Gargantua fust venu de bailler lescarmouche
a la ville de reboursin qui
estoit la ville capitalle du royaulme & que
il eut prins plusieurs prisonniers il les
apporta en la fante de ces manches & au
fons de ces chausses & les fist compter par ces gensdarmes
& sen trouua au nombre de troys cens[4]
& neuf & vng qui estoit mort du vent dunt pet que
auoit faict Gargantua en ces chausses & auoit le
pouure prisonnier la teste toute fendue & la ceruelle
espandue de ce coup de broudier car il petoit si rudement
que du vent qui sortoit de son corps il en faisoit
verser troys charretees de foing & dune vesse en faisoit
mouldre quatre molins a vent. Or laissons se pet
& lhomme mort & reuenons au troys cens & neuf
qui furent contes & interrogues en ceste maniere par gargantua. Or sa mes prisonniers si vous voulez sauluer
vostre vie distes moy en general si vostre Roy est
en vostre compagnie. Adonc dirent tous en general
que il ny estoit point : et quil estoit eschappe par vne
petite rue estroiste & cestoit musse en vne petite
maison basse en tirant vers la grant riuiere.
⸿ Comment Gargantua se disposa de aller bailler lalarme en la ville de reboursin : & des tresues qui furent faictes.
endemain au point du iour se disposa
Gargantua de bailler lassault a la ville de
Reboursin plus fort que par deuant pour
scauoir si le Roy sortiroit comme il auoit
ia faict la premiere foys, il commanda a
ses gens que ilz gardissent bien les prisonniers, & print
sa massue a son col & sen alla acouder sur les murailles
de la ville de reboursin. Quant les assistans le
veirent venir ilz lallerent dire au roy : lequel luy
enuoya vng messaige pour luy dire quil luy pleust de
luy bailler tresues quinze iours : & quil luy feroit
deliurer de la ville deux nauires chargees de haranc
frays : & deux cens cacques de macquereaulx sallez
& la moustarde pour les manger : a quoy se accorda
Gargantua, par ainsi que le roy prepareroit son armee
dedans les quinze iours et que luy mesmes assisteroit
au combat auec toute sa puissance lequel appointement
sut ainsi conclud & presente audict gargantua
les deux nauires chargees de harenc frays et les deux
cens cacques de macquereaulx sallez et .XX. barilles
plaines de moustarde. Se voyant Gargantua que il estoit
bien appoissonne il enuoya a ses gensdarmes vne des
nauires de haranc frays seullement auecques deux
cacques de moustarde[5] & cecy luy fut seruy a sa table deuant la porte de la ville a vng desieuner par vng
lundy matin entre sept & huyt heures. Apres que gargantua
eut desieune il eut enuye de dormir & sen alla
a vng quart de lieue de la ville en vne vallee[6] ou il se
coucha et se endormit. Aulcuns de la ville lauoyent veu
endormy lesquelz en firent le raport : dont il fut dit
par le conseil que ilz le yroyent assaillir la nuyt et
quilz le tueroyent endormy. Et quant ilz furent au
lieu ilz cuidoyent deualler la vallee & ilz tumboyent
dedans la gueulle de Gargantua qui dormoit la gueulle
ouuerte : & y tumberent deux cens & cinq iustement.
Et quant Gargantua fut esueille il eut grant soif a
cause de ces macquereaulx sallez quil auoit menge :
il alla a la riuiere pour boire & beut tellement quil
mist ladicte riuiere a sec. Lors les citoyens qui estoyent
tombez en sa gueulle furent tous noyes.
⸿ Comment le Roy dirlande & hollende se prepara & assembla son ost pour resister contre gargantua.
oyant le Roy Dirlande & Hollende que
il nauoit gueres de tresues il fist diligence
de mander par tout son pays de holende
et de Irlande que tout ban et arriere ban
fust prest de venir a sa bonne ville de
Reboursin le troyziesme iour de May prochainement
venant : et que chascun fust le mieulx en point pour se
dessendre quil seroit possible. Tant fist le Roy que en
peu de temps il eut a la court deux cens mille hommes
bien equippez de ce qui leur estoit necessaire pour le
faict de la guerre. Et quant le Roy se veit si bien
acompaigne et de si bons genldarmes & bien en point
excepte de artillerie : car en celluy temps il nen estoit
temps il nen estoit point, il manda par vng herault a
Gargantua qui estoit auecques ces gens sur le bort de la
mer a faire grant chere que il vint a la champaigne &
que le Roy lattendoit auec belle compagnie, et que sil
ne venoit bien tost que il le viendroit veoir. Lors Gargantua
fut bien aise, et dist au herault que il ne print
pas la peine et que il le verroit plus tost que ne luy seroit
besoing, a tant se part le herault : puis dist Gargantua
a ces gens que quant il hucheroit que ilz viensissent
pour faire le pillaige. Lors sen va Gargantua a larmee
sa grosse massue sur son col : et quant il fut pres il
regarda que tout le pays estoit plain et auoyent faict
des angins pour le faire tomber. Ce voyant il se
approcha pres : & ilz luy tireroyent des fleches tant
quil ne se veoit pas conduyre. Adonc print sa massue
a deux mains & se esmouche deca et dela aussi fermement
que faict vng lyon quant il prent sa proye, et
en peu de temps il en tua cent mille deux cens et dix
iustement : & vingt qui faisoyent les mors soubz les
aultres : et au millieu de larmee estoit le Roy & cinquante
gransseigneurs de sa court qui crioyent misericorde. Lors demanda Gargantua : Qui estes vous,
& ilz respondirent que cestoit le Roy & les barons du
pays. A donc leur commanda Gargantua que ilz ne
bougeassent & quil les liureroit prisonniers au Roy
artus auecques les aultres pour en faire a sa voulente.
Lors Gargantua se print a siffler en paulme a ses gens
lesquelz estoyent au riuaige de la mer a troys petites
lieues de la. Lors incontinent quilz ouyrent leur capitaine
Gargantua qui siffloit en paulme ilz sauancerent
de aller vers luy : car ilz scauoyent bien que il les
appelleroit pour faire le pillaige des gens qui estoyent
mors : & quant ilz furent la & que ilz eurent bien
tout pille, Gargantua print les cinquante prisonniers,
& les mist en vne dent creuse quil auoit. En ladicte
dent creuse auoit vng ieu de paulme pour esbatre lesditz
prisonniers & mist le Roy dedans sa gibessiere :
puis sont venuz au riuaige de la mer la ou ilz ont
trouue le seigneur Merlin qui les attendoit a venir.
Lors Merlin fist ses enchantemens comme il auoit de
coustume : et incontinant quilz furent faitz ilz furent
tous transmis a la court du Roy artus, la ou Gargantua
fist present au noble Roy artus des dessusdictz prisonniers
Et estoyent presens tous les barons de la court
dudict Roy Artus qui furent moult ioyeulx, & luy
faisoyent grant honneur & grant reuerence, & prisoyent
beaucoup la force & puissance de Gargantua.
⸿ Comment Gargantua mist vng geant en sa gibessiere.
ors quant Gargantua & Merlin & toute
larmee furent arriuez a la court du Roy
Artus & liurez les prisonniers : le bruyt fut
par toute la ville que il y auoit vng geant
qui auoit douze[7] coudees de hault qui estoit
pour soustenir la partie des Gos & Magos. Lequel ou il passoit il destruysoit tout le pays, & demandoit nouuelles
de Gargantua disant quil vouloit combatre contre
luy & venger le meurtre quil auoit faict ausditz gos &
magos : & en fut le bruyt si grant quil vint iusques
aux oreilles de Gargantua : lequel fut bien ayse de
ouyr parler de sa puissance : & dist que si ledit geant
vouloit seruir le Roy artus que il luy bailleroit la
moytie de ses gaiges que il auoit du Roy Artus. Lors
Gargantua print sa massue & ien va veoir ou estoit le
geant qui nestoit que a cinq petites lieues de Londres
ou il auoit assiege vng chasteau & auoit ia tout destruyt
le villaige. Adonc quant Gargantua le veit il
le salua, & ledict geant le regarda & luy dist : cest
toy que ie cherche, iamais tu ne retourneras dont tu
viens : mais maintenant seront venges les gos &
magos. Adonc le geant qui auoit la veue basse print
vne grosse massue de boys & cuydoit frapper Gargantua :
& il frappa vng gros chesne. Alors gargantua le
va prendre & luy plia les rains en la forme & maniere
que lon plieroit vne douzaine desguillettes & le mist
en sa gibessiere & porta tout mort a la court du
Roy artus.
⸿ Et ainsi vesquit Gargantua au seruice du Roy Artus lespace de deux cens ans troys moys & .iiii. iours iustement. Puis fut porte en faierie par gain la phee, & Melusine, auecques plusieurs aultres lesquelz y sont de present[8].
Et cronicque de Gargantua.
⸿ Comment Merlin fut appelle prince des nigromanciens a cause des grans merueilles quil faisoit.
⸿ Comment Merlin demanda congie daller en orient pour faire grant Gosier & Galemelle qui estoyent le pere & la mere de Gargantua.
⸿ Comment Merlin fist la grant iument pour porter le pere & la mere de Gargantua.
⸿ Comment grant Gosier & Galemelle engendrerent Gargantua : & de l’enfance dudict Gargantua.
⸿ Comment grant gosier & galemelle & gargantua furent chercher Merlin : & comment la grant
iument abatit les forestz de champaigne & de la beaulce en soy esmouchant de sa queue.
⸿ Comment gargantua & son pere & sa mere arriuerent au port de la mer pres le mont Sainct michel & le meschief que leur firent les bretons.
⸿ Comment les bretons baillerent a gargantua a son pere & a sa mere graut nombre de vaches & veaulx pour le larcin quilz leur auoyent faict.
⸿ Comment le pere & la mere de gargantua
porterent le mont sainct Michel & tombelaine ou ilz sont de present.
⸿ Comment le pere & la mere de gargantua moururent : & du dueil que fist le pauure gargantua.
⸿ Comment gargantua sen alla a Paris pour passer son dueil.
⸿ Comment il print les deux cloches de nostre
dame de Paris pour les pendre au col de sa grant iument.
⸿ Comment les Parisiens le prierent quil les remist en leurs places ou ellez sont de present ce que fist ledict gargantua moyennant le desieuner quilz luy firent.
⸿ Comment gargantua sen retourna au mont sainct Michel & comment Merlin sapparut a luy
& l’emmena a la court du Roy Artus pour seruir ledict Roy.
⸿ Comment gargantua deffist les gos & Magos de sa massue. Et comment ledit gargantua fist son premier repas a la court du roy Artus, & fut seruy de plusieurs metz, & de ses abillemens de liuree.
⸿ Comment gargantua fist guerre aux Hollendoys et Irlandoys, & comment ilz luy baillerent deux nauires plaines de haranc frays & troys barricques de macquereaulx sallez pour son desieuner pour auoir tresues. Et comment il sendormit la bouche ouuerte : & tomba troys cens des citoyens en sa gueulle.
⸿ Comment il gaigna la bataille & mist le Roy en sa gibessiere, & vn grant nombre de grans seigneurs quil mist en prison en sa dent creuse.
⸿ Comment gargantua retourna à la court du roy artus & luy fist present des prisonniers & du Roy de Hollende & de Irlande.
⸿ Comment gargantua alla combatre contre vng geant. Et comment ledist gargantua luy pleia les rains & le mist en sa gibessiere.
sant geant Gargantua, contenant sa genealo-
gie, La grandeur & force de son corps. Aus-
si les merueilleux faictz darmes quil
fist pour le noble Roy artus, Tant
contre les Gos & Magos, que
a lencontre du Roy Dirlan-
de & zelande Auecques
les merueilles de Mer-
lin. Nouuellement
Imprimees A
Lyon.
- ↑ Ici commence une lacune qui s’étend jusqu’aux mots en print vne douzaine (page 30, ligne 5) inclusivement. Cette lacune est produite par l’absence du feuillet Aiii. Il est probable que ce feuillet a été volontairement enlevé à cause du récit fort libre qu’il contient. Nous avons complété le texte à l’aide de l’édition sans date.
- ↑ I. Édition de 1533 :
Et ne doubtez pas que le tranchouer la ou on luy tranchoit sa chair ne fust merueilleusement grant, car il pouoit bien tenir dessus la chair de troys ou quatre beufz, & y auoit vingt hommes qui ne cessoyent de decouper la chair & la mettre par quarties seullement, Car dung beuf il nen faisoit que quatre petits morceaulx, et ne osoit pas les faire plus gros pour cause quil se vouloit monstrer honneste a table. Et maschoit les os comme on faict communement les os des alouettes. Oultre plus il y auoit quatre puissans hommes qui auoyent chascun vne pelle, et chascun morceau quil prenoit ilz luy iettoyent vne palleree de moustarde en la gorge, et pour la desserte luy fut presente quarente tounettes de pommes cuyttes, & beut cent tonneaux de godale, & trente & demy de citre a cause quil ne auoit point de vin. - ↑ Sortit auec cinq cens hommes, dans l’édition sans date & dans celle de 1533.
- ↑ Mille, au lieu de cens, ici & huit lignes plus bas, dans l’édition de 1533.
- ↑ Il y a ici une lacune évidente, que M. Paul Lacroix a signalée, et qui est commune aux trois éditions connues des Cronicques ; il est probable qu’il manque une ligne entière & que le passage complet était ainsi conçu : auecques deux cacques de macquereaulx sallez, & (ici un nombre que nous ne pouvons déterminer) barilles de moustarde.
- ↑ L’édition de 1533 présente, à partir de cet endroit, la variante suivante :
En vne vallee, ou il sendormit. Aulcuns de la ville en firent le raport, dont il fut dit par le conseil que le Roy accompaigne de ceulx de la ville le yroyent tuer tout endormy. Et quant ilz furent au lieu ou gargantua dormoit, ilz cuidoyent deualler la vallee et ilz tomhoient dedans sa gueulle, car il dormoit la gueulle ouuerte, et leur sembloit de ses dentz que c’estoyent les gros rochiers qui estoyent au long de la riuiere. En sorte quil tomba dedans sa gorge deux mille neuf cens quarante et troys hommes tous armez, la picque au poing. Et quant Gargantua fut esueille il eut grand soif a cause de ces macquereaulx sallez quil auoit mangé, & s’en alla a la riuiere pour boire, et beut tellement qu’il mist ladicte riuiere a sec. Alors mes poures citoyens qui estoyent tombez en sa gueulle furent tous noyez, en cepte troys qui tomberent dedans sa dent creuse, lesquelz en tombant se recommanderent à dieu, en ayant foy et creance quil les pouoit sauluer, et non aultre. - ↑ Vingt et deux, dans l’édition de 1533.
- ↑ Ce dernier paragraphe est remplacé, dans l’édition de 1553, par la conclusion suivante :
Quant le roy Artus sceut la venue, il vint au deuant de luy acompaigne de ces barons & cheualiers & luy firent grant chere. Et le roy Artus luy dist que sil vouloit demourer auecques luy quil le feroit homme de bien. Lors Gargantua luy dist quil le remercioit du bien quil luy presentoit. Mais quil sen vouloit retourner en son pays dont il estoit ne & que son pere & sa mere estoyent mors. Lors le roy Artus fut bien dolant quant il veit quil failloit quil sen allast. Nonobstant il luy donna enuiron cinq cens mille nobles Dangleterre. Et luy dist quil print tout ce quil vouldroit. Mais gargantua ne voulut point de ses gens car il auoit peur de leur queue. Et sen vint tout seul droit en Normandie & sen alla droit en Auge, pour cause quil auoit ouy parler des citres dudit pays & vint à saincte Barbe en Auge ou il beut la valeur de mille cinq cens ponsons de citre car il les trouua bien doulx. Mais il sen repentit bien apres Car le citre le commença a brouiller & bouillir par le ventre en sorte & maniere quil ne scauoit quil debuoit faire sinon se pourmener en se frotant le ventre. Et quant il fut à Bayeulx il fut force quil se destachast ses chausses a la martingale. Et declicqua en sorte & maniere quil couurit toute la ville de citre quil avoit beu en telle maniere que les rues ne sont pas encores biennettes. Et pour ceste cause on les appelle les foyreux de Bayeulx. Quant Gargantua eut faict ceste purge sen alla droit a Rouen ouquel lieu il beut bien cent cinquante cacques de biere, Et pour cause que la biere estoit en grand quantite dedans son ventre elle commenca a faire vne operation ny plus ny moins que auoit faict le cistre. Parquoy son poure petit ventre, estoit bien malade. Et fut contraint gargantua de destacher la martingalle, de ses chausses. Et declicqua son poure broudier en telle maniere & si merueilleuse impetuosite quil fist vne petite riuiere laquelle on appelle encores de present robec. Et y voit on encores de merdya culis. Toutesfois Gargantua leur fist vng grant seruice. Car a cause quil auoit tant bu de cistre & de biere, la riuiere estoit bonne pour faire de biere. Et y a lon faict bonne biere espesse & moussante & a cause de la source de leau de ce broudier, quant Gargantua se sentit ainsi mallade il ne scauoit que debuoit faire. Daultrepart ceulx de Rouen auoyent grant peur quil ne les noyast tous en ceste maniere. Et y en eut vng qui saduisa de luy dire en ceste maniere. Monsieur vous estes en dangier de mort & vous & nous si vous ny mettez remede de bonne heure. Et comment dist Gargantua. Seigneur dist lautre pour cause que nauez pas accoustume de boire de vin vous estes ainsi tourmente. Il vous fault aller a la Rochelle ou vous fault prendre du pain chault & le mettre tremper dedans du vin. Et puis le manger & boire plus de vin que vous pourrez & vous prometz que vous en trouuerez bien. Et comment dist gargantua nauez vous point de vin. Certes non pas pour le present. Et puis messieurs de ceste ville le guardent pour leur faire de rousties de matin ilz sont en dangier dauoir vne maladie en ceste ville, a cause de la puanteur de vostre mecine. Adonc le pours malade gargantua sen alla droit a la Rochelle, Et sen vint droict a la ville. Quant ceulx de la ville le veirent ilz eurent grant peur & luy vindrent au deuant & luy demanderent quil vouloit. Lors il leur dist. Ie vous demande que me faciez apporter cinq cens pains tous chaulx pesans chascun vingt & six liures & quil soyent bien blancz, & roc les apportez icy en la place ou est le vin, Ou aultremcnt ie vous rompray a tous la teste & rompray vostre hable & voz murailles. Adonc ceulx de la ville luy respondirent. Monsieur vostre commandement sera faict incontinent. Adonc se mirent tous ceulx de la ville apres les vngs a beluter les aultres a chauffer le four les autres a paistrir. En sorte & maniere qu’ilz firent bien deux mille & cinq cens pains car ilz auoyent peur que apres que Gargantua auoit mange ces cinq cens pains quil ne fut pas contant. Par ainsi ilz vindrent vers luy, & luy presentorent ce quil auoit demande. Adonc Gargantua deffonsa autant de tonneaulx plains de vin. Et en chascun tonneau mist vn pain tout chault. Puis commença a vng bout & en print vng & vuyda & pain, & vin, dedans sa gorge Puis aux aultres ensuyuant. Et en telle sorte quil en beut cinq cens tonneaulx & aualla cinq cens pains ny plus ny moins que si vous auiez vne miche dvng denier dedans vne tace plaine de vin. Apres quil eut mange cette petite souppe il sendormit aupres des aultres tonneaulx. Quant il fut endormy ilz le vindrent veoir a grande procession ne sembloit pas à le veoir que ce fust vng homme, mais sembloit vng Rochier, il auoit la gueulle ouuerte & sortoit vne fumee de sa gorge en sorte quil sembloit dung gouffre. Et dormit ainsi quarante & quatre iours. Tandis quil estoit ainsi il arriua plusieurs nauires, qui venoient pour auoir du vin du bled Entre lesquelles y en auoit vne de Bretons & lautre de Gascons, & sen vindrent la pour veoir ce merueilleux homme. Et en virant & tournant au tour de luy ilz veirent sa gibassiere & vont fouiller autour. Et mes gascons & mes bretons firent tant quil louurirent & entrerent dedans, ilz fouillerent tant quilz trouuerent en vng bourseron bien cinq cens mille nobles Dangleterre, lesquelz le roy Artus luy auoit donnez a son departement & mes Bretons & mes Gascons saccorderent ensemble en sorte que en vne nuit ilz luy vuiderent se bourseron. Il y eut vng Gascon le plus habille de tous qui trouua vng bourseron, ou il y auoit vne sonnette dor laquelle pesoit cent & troys vingtz liures a la mode de Bretaigne laquelle Merlin luy auoit donnee Et consulterent ensemble comment ilz lauroyent ensorte quilz deliberent de lauoir le lendemain au matin Et se trouuerent ensemble mes gascons & mes bretons, mais ilz furent bien trompez. Car Gargantua auoit ia dormy quarante & quatre iours & deux heures parquoy il sesueilla & les trouua en sa gibessiere. Adonc luy tout endormy les print & les loya tous ensemble dedans sa brayette pour scauoir pourquoy ilz estoyent la venuz. Et nettoient pas moins de cinq cens Bretons, & troys cens Gascons, Quant ilz se sentirent ainsi enserres ilz dirent lung a laultre que ilz estoyent tous mors car ilz sentoyent lair de la biere & du cistre. Et en eut vng entre les aultres qui estoit de Thoulouse qui dist. Meffieurs recommandons nous dieu lequel a souffert mort & passion pour tout lhumain lignaige. Et nous nous en trouuerons bien. Adoncques saccorderent a luy & firent leur priere a dieu quil les voulsist sauluer de ceste puantise, & leur donner grace de sortir de ceste brayete. Lors gargantua reguarda dedans son bourseron & trouua quil ny auoit que le nie, & que on auoit desrobe ses nobles Dangleterre, dont il fut bien dolant. Adonc il les tira hors de sa brayette, & en trouua deux qui estoyent estoufez aupres du vesnier & estoyent deca mors quant les aultres se recommanderent a dieu. Lors gargantua leur dist. Si vous ne menseignez mon tresor que vous mauez desrobe ie vous defferay tous. Lors dist ce Tholouzan Monsieur il est vray que nous sommes icy arriuez deux nauires vne de bretons & vne de gascons. Et cuydions que fussiez mort. Parquoy nous nous sommes songnez a la reste pardonnez nous comme vous voulez a dieu vous pardonne & nous vous rendrons tout. Et voulons estre a vostre seruice & aller partout ou vous vouldrez fust ce en enfer. Adonc Gargantua saduisa quilz luy seroyent bons pour porter a son pays. Et quilz chercheroyent les biens de son pere, lors il leur dist. Allez moy querir mes nobles & viste. Adonc senallerent a grant ioye querir leur butin. Et le apporterent a Gargantua. Lors il dist quil sen vouloit aller en son pays & quil se trouuoit de sa medecine, & dist a messieurs de la ville quilz apportassent mille pains pour sa prouision lesquelz luy furent incontinent donnez & print mille ponsons de vin & mist tout en sa gibassiere & les cinq cens bretons il les mist en vng bourseron de sa gibasssiere, & les troys cens gascons dedans vng aultre. Et ainsi sen alla dela la Rochelle Et chemina tant par mer quil arriua cinq lieues par dela toutes les grandes mers & apperceut vne montaigne la plus grande qui fut ne sera iamais veue. Lors se pensa que cestoit ou son pere auoit este faict, & ou il auoit este ne. Adonc il print terre & veit le pays beau & fructueux. Adonc il laissa aller ses prisonniers pour chercher au tour des rochiers, & firent tant quilz trouuerent vne grosse cite laquelle estoit en vne valee entre deux montaignes lors ilz sen retournerent a Gargantua lequel se reposoit pour cause qui estoit las dauoir tant chemine, & dauoir ainsi charge sa gibessiere Adonc ilz luy dirent les nouuelles dequoy il fut bien ioyeulx & leur dist, Messieurs ie vous feray tous riches faisons grant chere de ce que nous auuons. Adonc ilz se commencerent a refaire de ses bons vins auecques force iambons, que ces gascons auoyent apportez & beurent & mangerent si bien quil ne leur resta guieres de leur pain ne de leur vin. Puis gargantua leur dist. Messieurs ie men voys a la ville pour veoir quelz gens se sont. Tenez vous vng peu a lescart auecques voz arbalestes & sil eschappe quelque vng ne luy faillez pas, nous le ferons tenez vous en seur. Adonc gargantua sen alla droit a la ville & va veoir de loing vne grant conmpaignie de geans haulx de vingt & cinq couldees, de grosseur a laduenant. Et estoyent la venuz de tout le pays pour faire hommaige a la fille de leur roy lequel auoit este tue & mange par les tartarins & canibales lesquelz auoyent tout gaste le pays. Lors gargantua vint vers eulx ayant vng arbre sur son col qui auoit bien cinq cens pas de long, & leur va dire dieu vous guart mes beaulx enfans. Aqui estes vous certes dist lung nomme molandin nous sommes a Badebec fille du roy mioland. Lequel a este tue en bataille par les canibales, & tartarins, lesquelz viennent icy plus de troys cens mille ensemble & viennent deux foys lan. Gros paillardz dist gargantua auez vous laisse aller ceulx qui ont tue vostre maistre. Foy que ie doibs a mon dieu ie vous en feray repentir. Adonc il leua sa massue & en donna si grant coup a lung deux quil le mist tout en pieces. Adonc le capitaine nomme Boute fort, sescria si hault que lon lentendit de toute la ville. Lors ceulx de la ville se mirent tous en armes & les geans vindrent les premiers lesquelz estoyent cinq mille troys cens vingt & vng. Adonc gargantua fut saige & bien entendu & se retira vng peu arriere pour les faire courir apres luy, lors vint Boutefort leur capitaine cuydant que il se deust venger de gargantua mais il fut bien trompe. Car Gargantua se retourna tout court, & de sa grosse masse donna si grant coup a Boutefort quil le fist aussi froisse que si vne meulle de moulin tumboit sur vng petit oyseau. Puis vint sur les aultres, & fist telle tuerie quil nen resta que cent qui prindrent la fuitte au loing dvne roche, & cheminerent par dessus mes gascons & ne leur seruit riens leurs arbalestes. Quant ceulx de la ville veirent ceste grosse desconfiture ilz eurent grant peur. Et dirent quil valoit mieulx se rendre a luy que de se faire ainsi tuer. Lors ilz vindrent vers luy luy presentant les clefz de la ville. Mais il n’en voulut point. Et dist quil vouloit veoir badebec fille du roy Mioland. Adonc ilz le menerent au chasteau ou elle estoit. Quant Badebec se veit elle eut grant peur, & sen voulut fuyr mais gargantua luy dist qu’elle neust nulle peur. Et quil luy vouloit faire tout seruice. Non obstant que cestoit icy le pays, dont ie suis ne ie veulx que vous demeurez royne. Et si est de vostre plaisir vous serez ma femme. Et ie deliureray ce pays des caniballes & des tartarins. Adoncques Badebec & tous ceulx de la ville furent bien ioyeulx Dauoir vng tel champion pour les deffendre. Adoncques fut faict feste par la ville en si grant ioye que oncques nen fut veue de pareille. Et faisoit moult beau veoir gargantua & Badebec ensemble Car elle auoit bien vingt & neuf couldees de huaulteur. Elle nauoit la gorge ouuerte que dvne brasse & lu faisoit moult beau veoir rire. Gargantua vesquit cinq cens & vng an, & eut de grosses guerres, desquelles ie me tays pour le present. Et eut vng filz de Badebec son espouse lequel a faict autant de vaillances que Gargantua. Et le pourrez veoir par la vraye Chronicque laquelle est vne petite partie imprimee. Et quelque iour que messieurs de sainc Victor vouldront on prendra la coppie de la reste des faictz de Gargantua, & de son filz Pantagruel.