Les Missives/Cantique

Catherine Des Roches

Les Missives de Mesdames Des Roches de Poitiers Mère et Fille

Paris, Abel L’Angelier, 1586 (p. 19--).

CANTIQUE.

LE feu, l’air, la terre, les eaux,
Et tous les celestes flambeaux,
Adorent le non glorieux
De trois en un, un en trois Dieux.

Qui recelant sa deité,
Prit en Marie humanité :
Ainsi sa grandeur a voulu
Prendre corps d’un corps bien impollu.

Celuy qui tient le monde enclos
En petit lieu gist en depos,
Dedans un vase bien poli
De toutes graces embelli.

Le Soleil est obeissant
Et la Lune à ce Tout-puissant,
Que la belle vierge comprit
Par la grace du saint esprit.

Heureuse mere qui as fait
Naistre ce chef d’œuvre parfait,
Qui tient en sa divine main
Des cieux le septre souverain.

Bienheureux ventre qui serroit
Celuy qui chacun desiroit :
Et qui est venu entre nous,
Luy seul pour le salut de tous.

Gloire soit à vous ô Seigneur,
Qui pristes un corps en bonheur :
Gloire au pere & au saint esprit,
Que la belle vierge comprit.