Les oeuvres poétiques de Clovis Hesteau de Nuysement 1578/Amour pour foudroyer
XIII.
Amour pour foudroyer les hommes & les Dieux,
Non du feu dont Vulcan en sa caverne basse,
Le tonnerre sifflant sur son enclume amasse :
Ainsi d'un autre incogneu au monde spacieux.
Ardantement jaloux de voir que des hauts Cieux,
De son bras rougissant Jupiter seul terrace,
Le sommet des rochers qui le contremenace :
Rabaissant leur orgueil d'un esclat furieux.
Dans mon chaut estomac il feit une fournaise,
Il prist vostre froideur, & ma cuisante braise,
Les rayons de voz yeux, mes souspirs, & mes pleurs :
Et du tout mis ensemble il forgea son tonnerre,
Ses esclairs, ses nuaux, pleins d'eaux, vents et chaleurs,
Dont ore hommes & dieux foudroyant il atterre.