Les oeuvres poétiques de Clovis Hesteau de Nuysement 1578/Las Madame faut-il
XXXVIII.
Las Madame faut-il que ma chetive vie,
Soit la butte ou les Dieux animez de fureur,
Descochent à l'envy les traits de leur rigueur,
Et que le bien public soit ma peine infinie.
Ne verray-je jamais la fortune assouvie,
Faut il qu'elle me force à chercher ma langueur,
Et faut-il que les Dieux soient jaloux de mon heur :
O que grans est le bien que le Ciel mesme envie.
Mais puis que je me voy assailly du destin,
Et puis que la douleur dont je suis le butin,
Ne reçoit nul effort des racines de Mede :
L'objet qui membrasa d'un si louable feu,
Finira mes mal-heurs me seichant peu à peu :
Car trop grief est le mal qui n'a point de remede.