Les oeuvres poétiques de Clovis Hesteau de Nuysement 1578/Sonet
SONET.
Muses si vous aviez vous mesmes fait un livre
Qui de si rare don voudriez vous honorer,
Sinon une qui peult en soy faire adorer
Ce qui malgré les ans de l'oubli vous délivre?
On vous pourrait dresser cent colonnes de cuivre,
On vous pourroit de marbre un temple decorer,
Mais tout ce que l'acier sçauroit ellabourer,
Ne peut vainqueur du temps plus d'un Siecle revivre.
La majesté, l'honneur, le sçavoir, les beautez,
Et tout ce dont le Ciel orne les Deitez
Me font voir en un corps quatre grandes Deesses.
En tel temple mes voeus seront donc recogneus,
Si en sacrifiant au Soleil des princesses
Je sers Junon, Diane, & Palas, & Venus.