Les Œuvres de François Rabelais (Éditions Marty-Laveaux)/Pantagruel/16
Des meurs & conditions de Panurge.
Chapitre XVI.
anurge estoit de stature moyenne, ny trop grand ny trop petit, et avoit le nez ung peu aquillin faict à manche de rasouer. Et pour lors estoit de l’eage de trente & cinq ans ou environ, fin à dorer comme une dague de plomb, bien galand homme de sa personne, sinon qu’il estoit quelque peu paillard, & subiect de nature à une maladie qu’on appeloit en ce temps là, faulte d’argent, c’est douleur non pareille : toutesfois il avoit soixante & troys manieres d’en trouver tousiours à son besoing, dont la plus honnorable & la plus commune estoit par façon de larrecin furtivement faict, malfaisant, bateur de pavez, ribleur s’il y en avoit en Paris : & tousiours machinoit quelque chose contre les sergeans & contre le guet.
À l’une foys il assembloit troys ou quatre de bons rustres & les faisoit boire comme Templiers sur le soir, & apres les menoit au dessoubz de saincte Geneviefve, ou aupres du colliege de Navarre, & à l’heure que le guet montoit par là, ce que il congnoissait en mettant son espée sur le pavé & l’oreille aupres, & lors qu’il ouyoit son espée bransler, c’estoit signe infaillible que le guet estoit pres : à l’heure doncques luy & ses compaignons prenoient ung tombereau, et luy bailloient le bransle le ruant de grand force contre la vallée, & ainsi mettoit tout le pouvre guet par terre comme porcs, & puys s’en fuyoient de l’aultre cousté : car en moins de deux iours, il sceut toutes les rues, ruelles & traverses de Paris comme son Deus det. À l’aultre fois il faisoit en quelque belle place par ou ledict guet debvoit passer une trainée de pouldre de canon, & à l’heure que le guet passoit, il mettoit le feu dedans, et puis prenoit son passetemps à veoir la bonne grace qu’ilz avoient en s’en fuyant, pensans le feu sainct Antoine les tint aux iambes. Et au regard des pouvres maistres es ars & theologiens, il les persecutoit sur tous aultres, quand il rencontroit quelqu’ung d’entre eulx par la rue, iamais ne failloit de leur faire quelque mal, maintenant leurs mettant ung estronc dedans leur chaperons à bourlet, maintenant leur atachant petites quehues de regnard, ou des oreilles de lievres par derriere, ou quelque aultre mal. Et ung iour que l’on avoit assigné à tous les theologiens de se trouver en Sorbone pour examiner les articles de la foy, il fist une tartre bourbonnoyse composée de force de hailz, de galbanum, de assa fetida, de castoreum, d’estroncs tous chaux, et la destrampit de sanie de bosses chancreuses, & de fort bon matin engressa & oignit tout le pavé en sorte que le diable n’y eust pas duré. Et tous ces bonnes gens rendoyent là leurs gorges devant tout le monde, comme s’ilz eussent escorché le regnard, et en mourut dix ou douze de peste, quatorze en feurent ladres, dix & huyct en furent pouacres, & plus de vingt & sept en eurent la verolle, mais il ne s’en soucioit pas. Et portoit ordinairement un fouet soubz sa robbe, duquel il fouettoyt sans remissions les paiges qu’il trouvoit portans du vin à leurs maistres, pour les avancer d’aller. En son saye y avoit plus de vingt & six petites bougettes & fasques tousiours pleines, l’une d’ung petit d’eau, de plomb, & d’ung petit cousteau affilé comme une aiguille de peletier, dont il couppoit les bourses, l’aultre de aigrest, qu’il gettoit aux yeulx de ceulx qu’il trouvoit, l’aultre de glaterons empennés de petites plumes de oysons ou de chappons, qu’il gettoit sur les robbes & bonnetz des bonnes gens, & aulcunesfois leur en faisoit de belles cornes qu’ilz portoient par toute la ville, aulscunesfois toute leur vie.
Aux femmes aussi par dessus leurs chapperons au derriere aulcunesfois en mettoit faictz en forme d’ung membre d’homme. En l’aultre ung tas de cornetz tous plains de pusses & de poux, qu’il empruntoit des guenaulx de sainct Innocent & les gettoit à tout belles petites cannes ou plumes dont on escript, sur les colletz des plus sucrées damoiselles qu’il trouvoit, & mesmement en l’esglise : car iamais ne se mettoit au cueur au hault, mais tousiours demouroit en la nef entre les femmes, tant à la messe, à vespres, comme au sermon. En l’aultre, force provision de haims & claveaux, dont il acouploit souvent les hommes et les femmes en compaigniez où ilz estoient serrez : & mesmement celles qui portoient robbe de taffetas armoisy, & à l’heure qu’elles se vouloient departir elles rompoient toutes leurs robbes.
En l’aultre un fouzil garny d’esmorche, d’allumettes, de pierre à feu, & tout aultre appareil à ce requis. En l’aultre deux ou troys mirouers ardens, dont il faisoit enrager aulcunesfois les hommes et les femmes, & leur faisoit perdre contenance à l’esglise, car il disoit qu’il n’y avoit q’un antistrophe entre femme folle à la messe, & femme molle à la fesse.
En l’aultre avoir provision de fil, & d’aiguilles dont il faisoit mille petites diableries. Une fois à l’issue du Palays à la grant salle que un cordelier disoit la messe de messieurs il luy ayda à soy habiller et revestir, mais en l’acoustrant il luy cousit l’aulbe avecques sa robbe & chemise, et puis se retira quant messieurs de la court se vindrent asseoir pour ouyr messe. Mais quant ce fust à l’ite missa est, que le pouvre frater se voulut devestir son aulbe, il emporta ensemble & habit & chemise qui estoient bien cousuz ensemble, et se rebrassit iusques aux espaules monstrant son callibistris à tout le monde, qui n’estoit pas petit : sans doubte. Et le frater tousiours tiroit, mais tant plus ce descouvroit il, iusques à qu’un de messieurs de la court dist. Et quoy, ce beau pere nous veult il icy faire l’offrande et bayser son cul ? le feu sainct Antoine le bayse. Et des lors feut ordonné que les pouvres beaulx peres ne se despouilleroyent plus devant le monde, mais en leur sacristie, mesmement en presence des femmes, car ce leur seroit occasion de pecher du peché d’envie. Et le monde demandoit, Pourquoy est ce que ces fraters avoient la couille si longue ? Ledict Panurge soulut tresbien le probleme, disant ce que faict les oreilles des asnes si grandes, ce n’est sinon par ce que leurs meres ne leur mettoyent point de beguin en la teste, comme dit de Alliaco en ses suppositions. À pareille raison, ce que faict la couille des pouvres beatz, c’est qu’ilz ne portent point de chausses foncées, & leur pauvre membre s’estend en liberté à bride avallée, & leur va ainsi triballant sur les genoulx comme font les patenostres aux femmes. Mais la cause pourquoy ilz l’avoient gros à l’equipollent, c’estoit que en ce triballement les humeurs du corps descendent audit membre, car selon les Legistes agitation et motion continuelle est cause de attraction.
Item il avoit un aultre poche toute pleine de alun de plume dont il gettoit dedans le doz des femmes, qu’il voyoit les plus acrestées, & les faisoit despouiller devant tout le monde, les aultres dancer comme iau sur breze ou bille sur tambour, les aultres courir les rues, & luy apres couroit, & à celles qui se despouilloyent, il mettoit sa cappe sur le doz, comme homme courtoys & gracieux. Item en ung aultre il avoit une petite guedoufle plaine de vieille huyle, et quand il trouvoit ou homme ou femme qui luy semblissent bien glorieux, et qui eussent quelque belle robbe, il leur engraissoit & guastoit tous les plus beaulx endroictz de leurs habillemens soubz le semblant de les toucher & dire. Voicy de bon drap, voicy bon satin, bon tafetas, ma dame dieu vous doint ce que vostre noble cueur desire, vous avez robbe neufve, nouvel amy, dieu vous y maintienne. Ce disant, leur mettoit la main sur le collet, & ensemble la male tache y demouroit perpetuellement, que le diable n’eust pas ostée, puis à la fin leur disoit. Ma dame donnez vous guarde de tumber : car il y a icy un grand & sale trou devant vous. En un aultre avoit tout plain de Euphorbe pulverisé bien subtilement, & là dedans mettoit un mouschenez beau & bien ouvré qu’il avoit desrobé à la belle lingiere des Galleries de la saincte chappelle, en luy ostant un poul dessus son sain, lequel toutesfoys il y avoit mis. Et quand il se trouvoit en compaignie de quelques bonnes dames, il leur mettoit sus propos de lingerie, & leur mettoit la main au sain, demandant, & cet ouvraige est il de Flandres ou de Haynault : & puis tiroit son mouschenez disant, tenez, tenez, voy en cy de l’ouvrage, elle est de Fonterabie, et le secouoit bien fort à leurs nez, & les faisoit esternuer quatre heures sans repos.
Et ce pendant il petoit comme un roussin, & les femmes se ryoient luy disant, comment : vous petez Panurge ? Non fois, disoit il, madame : mais ie accorde au contrepoint de la musicque que sonnez du nez.
En l’aultre un daviet, un pellican, un crochet, & quelques aultres ferremens dont il n’y avoit porte ny coffre qu’il ne crochetast. En l’aultre tout plain de petitz goubeletz, dont il iouoit fort artificiellement : car il avoit les doigs faictz à la main comme Minerve ou Arachné. Et avoit aultrefois crié le theriacle. Et quand il changeoit un teston, ou quelque aultre piece, le changeur n’eust esté plus fin que maistre mousche, si Panurge n’eust faict evanouyr à chascune fois cinq ou six grands blancs visiblement, appertement, manifestement, sans faire lesion ne blesseure aulcune, dont le changeur n’en eust senty que le vent.