Lis Isclo d’Or/À la Fiho de Reattu
VI
A LA FIHO DE REATU
O tu que subre-bello, emai d’un sang ilustre,
En fàci dóu barbare as counserva toujour,
Sènso cregne que res ni que rèn t’escalustre,
Lou vièsti, lou parla, lou gàubi dóu Miejour,
O tu que li baroun, e li gardian palustre,
Venien vèire sourti, fièro, de la Majour,
E qu’as douna ta vido à metre dins soun lustre
Lou pintre majourau que te dounè lou jour,
Autant coume autre-tèms nosto rèino Ermengardo,
As persounifica toun Arle grand e mut,
Toun Arle, aquelo véuso Artemiso, que gardo
La glòri de si rèire enclaus dins l’atahut,
Que porto lis Areno en courouno, e regardo
Sus lou Rose eilalin s’enana li lahut.
10 d’abriéu, 1868.