Lis Isclo d’Or/La Coupo

La bibliothèque libre.
Sauter à la navigation Sauter à la recherche

◄   Lis Enfant d’Ourfiéu La Coupo
Avoust 1867
Li bon Prouvençau   ►
Prouvençau, veici la coupo
Que nous vèn di Catalan :
À-de-rèng beguen en troupo
Lou vin pur de noste plant !

       Coupo santo
       E versanto,
      Vuejo à plen bord,
       Vuejo abord
      Lis estrambord
   E l’enavans di fort !

D’un vièi pople fièr e libre
Sian bessai la finicioun ;
E, se toumbon li Felibre,
Toumbara nosto nacioun.

       Coupo santo, etc.

D’uno raço que regreio
Sian bessai li proumié gréu ;
Sian bessai de la patrìo
Li cepoun emai li priéu.

       Coupo santo, etc.

Vuejo-nous lis esperanço
E li raive dóu jouvènt,
Dóu passat la remembranço
E la fe dins l’an que vèn.

       Coupo santo, etc.

Vuejo-nous la couneissènço
Dóu Verai emai dóu Bèu,
E lis àuti jouïssènço
Que se trufon dóu toumbèu.

       Coupo santo, etc.

Vuejo-nous la Pouësio
Pèr canta tout ço que viéu,
Car es elo l’ambrousìo
Que tremudo l’ome en diéu.

       Coupo santo, etc.

Pèr la glòri dóu terraire
Vautre enfin que sias counsènt,
Catalan, de liuen, o fraire,
Coumunien tóutis ensèn !

       Coupo santo
       E versanto,
      Vuejo à plen bord,
       Vuejo abord
      Lis estrambord
   E l’enavans di fort !