Méliador/Tome II
Méliador
e Melyador laisserons f. 69 b
A parler, car bien nous savons
Qu’i[l] ne se poet ores armer.
Entrues poons nous bien parler
D’autres aventures nouvelles
Qui avinrent d’armes moult belles
Ou paÿs de Norchombrelande.
Et toutes fois une moult grande
Aventure y avint ce terme
Que Melyador ens ou ferme
De Montgriès illuec reposoit,
Et me semble que ce fu droit
A .iiii. liewes dou chatiel
Dessus dit, et fu de nouviel
Quatre jours après ce, pour voir,
Que Melyador son devoir
Eut fait, ensi c’on puet escrire,
De ce dit Camel desconfire.
Vous savés que tout chevalier,
Qui se voloient avanchier,
Les armes partout demandoient
Et l’un l’autre point n’atendoient,
Mais estoient moult desirant
De travillier. Et en errant
Toutdis, au renom de proece,
Doy frere plain de gentillece,
Vaillant homme, preu et honneste,
Se furent bouté en le queste
Et avoient a leur partir
De l’ostel pour yaus mieus couvrir
Eü colation ensamble
Que nulz de ces .ii., ce me samble,
Ne se devoit faire cognoistre f. 69 c
Pour son pris amenrir ne croistre,
Et de blasons si differroient,
Et nouviaus varlès prenderoient
C’onques il n’aroient veü,
Ne pour l’un l’autre cogneü.
Il eurent moult bien ce couvent
Qu’il jurerent, ch’ai je en couvent,
Et que vous en sachiés les noms
Tantost nous vous les nommerons.
Li uns fu Savare nommés
Et Feughins estoit li mainsnés.
Messire Savare et Feughins
Prisent ou partir .ii. chemins,
Et ne savoient .i. ne el,
Quant il partirent de l’ostel,
L’un de l’autre dont il s’armoient,
Ne quels parures il portoient.
Savare s’armoit tout premiers,
Qui fu moult vaillans chevaliers,
De blanch et de vert mi parti ;
Et sus son blason, tout en mi,
Avoit une harpe vermeille.
Et Feughins, dont point n’ay merveille,
De blanch et de bleu cilz s’armoit,
Mais dessus sa targe il portoit
.I. capelet de rouges roses.
Or dirai pour quoi de telz coses
Commencié en ay a parler.
Cil doy frere peurent aler
Tant que sus les camps se trouverent.
Et d’aventure s’encontrerent
Ou pays de Norchombrelande,
Au departement d’une lande
Et d’un bois moult grant et plenier. f. 69 d
Ensi comme bon chevalier
Et qui acquitter se voloient,
De si tres lonch comme il se voient,
Cescuns demande ou prent sa lance.
Si se mettent en ordenance
Pour jouster, et puis esporonnent
Les chevaus qui grans saus lor donnent,
Car il estoient viste et fort.
Cil doi frere, plain de confort,
Et de grande chevalerie
Et de bonne bachelerie,
Des lances as bons fers agus
Se fierent dessus les escus
Telement et si roidement
Que il samble, tout proprement,
Qu’il doivent en l’un l’autre entrer.
De ce cop se vont arrester
Et jetterent leurs lances jus.
Point ne se sont retrait en sus,
Mais tirent errant les espées
Qui d’achier sont envolepées,
Et vienent l’un l’autre requerre
Pour faire mortel fait de guerre.
n cel estat se combatirent
Longhement, ne onques ne dirent
A l’un l’autre nulle parolle.
Messires Feughins, qui escole
Peuist tenir de bien jouster,
Va son escuier appeller
Et dist bas : « C’or me rent ma lance. »
Quant Savare en vit la samblance,
A son varlet dist : « Ça, le mienne. »
Cescuns d’yaus .ii. reprist le sienne
Et se joindent en leurs escus. f. 70 a
Or se doublera leur argu,
Car il sont forment escauffé.
Li cheval, ensi que mauffé,
S’en viennent fort arandonnant.
La se vont si grans cops donnant
Li doi chevalier, ce me samble,
Car, quant les lances sont ensamble,
Proprement ce samble .i. tempeste.
Messires Feughins en la teste
Consieui Savare, son frere ;
La pointe de la lance clere
Li bouta parmi en cousant,
Et l’abati jus en passant
Par la force de bien bouter :
Peut la la glave tronçonner. [1]
Se li demora ou hÿaume.
Chilz chiet jus, qui pot une psaume
Recorder assés mervilleuse,
Car la plaie est moult perilleuse.
Ses escuiers est la venus,
Qui sault lors de son cheval jus
Et tire le tronçon, pour voir ;
Aultrement ne peuist ravoir
Le hÿaume hors de son chief.
Sachiés qu’il le trest a meschief ;
Tant fist toutes fois qu’il le reut.
Messires Feughins ne se veult
Astenir qu’il ne venist la.
Quant venus fu, il s’abaissa
Et li sambla a son avis,
Quant il regarda ens ou vis
Le chevalier qui la gisoit,
Que Savare ses freres soit :
Adont li est li sans cangiés. f. 70 b
Tantost est jus sallis en piés
Et vient erranment sus Savare,
Sans querre empeschement ne bare,
Et voit clerement que c’est il,
Et que navrés est en peril :
Lors cuide moult bien foursener.
Son hÿaume fait lors oster,
Et puis dist : « Savare, biau frere,
« Ceste cose m’est moult amere,
« Quant je vous voi en ce parti. »
Et quant Savare devant li
Voit son mainsnet frere Feughin,
Si parolle et li dist, a fin
Que il ne soit trop destourbés :
« Feughin, Feughin, ne vous doubtés,
« Je croi que garde n’ai de mort
« Et, se je moroie, a mon tort
« Est, voir, quant a vous jousté ay
« Et vostre nom ne demandai.
« Se je muir, je le vous pardonne. »
A ces parlers, Feughins ordonne
Comment il en sera portés,
Et s’est .i. peu reconfortés
De ce qu’il l’a oÿ parler.
Bien dist qu’il l’en convient aler
A .i. chastiel bien priès de la.
A ces cops illuecques passa
La litiere, parmi les bois,
Qui revenoit droit de Camois
Ou on avoit porté Camel,
Et s’en raloit a son hostel,
Le droit chemin, droit a Montgriès ;
Et quant Feughins les voit la priès,
Si les appella doucement f. 70 c
Et leur pria courtoisement,
Pour bien desservir et paiier,
Qu’il portaissent ce chevalier :
Jamais refusé ne l’euissent.
Adonques Savare la misent
En la litiere incontinent,
Et l’aporterent doucement
A Montgriès ; Feughins vint avoec.
Quant il furent venu illuech,
Forment en fu esmervillie
Florée, a la premiere fie ;
Mais, a ce que Feughins compta,
Elle dou tout se rapaisa,
Et furent, dedens le chastiel,
Receü moult bien et moult biel
Li chevalier, il n’est pas doubte,
Et le fuissent avoech leur route
Et euissent .iii. tant de gens,
Car li affaires biaus et gens
Estoit lors tels, et li usages,
Que les dames vaillans et sages
Faisoient a estragniiers
Honneur et a tous chevaliers,
Et plus en .i. paÿs qu’en aultre ;
Et principaulment ne voel d’aultre
Paÿs parler que d’Engleterre.
Car, qui en vorroit bien enquerre,
La sont les dames gracïeuses,
Lies, plaisans et amoureuses,
Et qui sevent gens honnourer
Trop mieulz c’ailleurs, au vrai parler ;
En ce point sont elles nouries,
Escolées et ensegnies.
lorée, la pucelle gente, f. 70 d
Mist adont grandement s’entente
A honourer tous chevaliers.
Savare, ossi ses freres chiers,
Demorerent ens ou chastiel
De Montgriès, la ou bien et biel
On leur fist ce qu’il demandoient
Et plus avant, car cil estoient
De laiens si tres bien nourri,
Si vaillant et si signouri
Qu’il faisoient sans demander.
Assés bien se prist a saner
Messire Savare, pour voir,
Car grant cure en pooit avoir
Feughins, qui avoit grant desir
Qu’en bon point le peuist veïr.
Lansonnès ossi, d’autre part,
Avoech Florée, que Diex gart,
A Melyador entendirent
Grandement, car forment desirent
Qu’il soit garis bien et a point,
Par quoi il ne sejourne point.
Tant fu poursongniés sagement
Et medecinés doucement,
Qu’il fu gari bien et a droit,
Et dist certes qu’il soufferoit
Bien ses parures a porter,
Et souffera bien le jouster,
Le combatre et le tournoiier.
Moult s’en poeent esleecier
De ces parolles, ou chastiel.
Quant Melyador bien et biel
Fu sanés, si va congiet prendre
Et dist qu’il ne voet plus attendre
Ne la demorer en prison, f. 71 a
Mais voelt emploiier sa saison
Et chevaucier dessus la lande.
Quant ceste de Norchombrelande
Voit que cilz de la partir volt,
.I. aniel que pourveü ot
Et fait faire ens ou nom de li,
A carnieres biel et joli,
C’on ouvroit moult soutieuement,
Mais elle ne dist pas comment
A Melyador on l’ouvroit.
Dedens l’aniel escript avoit :
« Ciz sui qui le soleil d’or porte,
« Par qui Oultrecuidance est morte » ;
Ensi y eut ne plus ne mains.
Elle le prist entre ses mains,
Et se s’en vint au chevalier,
Qui se pooit apparillier
Pour monter et aler sa voie.
Florée s’est mise en sa voie
Et dist : « Sire, parlés a moy. »
— « Volentiers, belle, par ma foy.
« Or me dittes que volés dire. »
— « Au partir je vous pri, chier sire,
« Que vous prendés cest anelet,
« Il n’i a mies jeuelet
« Si grant qu’il apartient a vous,
« Mais je vous pri, chiers sires doulz,
« Que vous le portés, pour m’amour
« Et en mon nom, jusques au jour
« Que bien le porés emploiier. »
Chilz le prist, ne s’en fist priier,
Car il li souvint d’Ermondine
A qui Florée estoit cousine,
Et dist : « Belle, tres grant mercis. f. 71 b
« Pour vostre amour le voel toutdis
« Porter, car moult bien le valés. »
Adont est li preus avalés
Les degrés dou chastiel d’amont :
La damoiselle et ses gens l’ont
Convoiiet tout jusques a la.
Ses chevaus fu près, il monta :
A Dieu, a Dieu les recommande
Au partir. Mies ne demande
Quel chemin tendra, ne quel voie.
La damoiselle le convoie
De ses yex, et sachiés, pour voir,
Si lonc qu’elle le peut veoir,
Et, quant veoir ne le peut plus,
Des degrés qui sont bas la jus,
Elle monte hault ou chastiel
Et si s’apoie a .i. crestiel.
Si le voit encor chevaucier
Et une valée approcier
Par quoi tantos le perdera,
Et adonques s’en retourna
Par dedens sa cambre Florée,
Qui s’est a par soy avisée
Que la mort monsigneur Camel,
Et de l’estat de son hostel,
Escrira devers sa cousine
D’Escoce, ma dame Hermondine.
Si escrisi ne plus ne mains,
Si con ci s’ensieut, de ses mains :
«
res chiere et amée cousine,
« Vraie amour, qui toutdis m’encline
« A vous amer et honnourer,
« Voet que je vous voelle moustrer
« De mon estat trestout le voir. f. 71 c
« Cousine, vous devés savoir
« Que fortune et bonne aventure,
« Par la proece et la grant cure
« Dou chevalier au soleil d’or,
« Que pas ne sçai nommer encor,
« Nous ont de Camel apaisié,
« Dont j’en senc mon coer mieus aisié,
« Plus liet et en plus grant reviel.
« Ossi font cil de mon chastiel,
« Et pour tant le vous segnefie,
« Ma chiere cousine et amie,
« Que j’ai espoir que ces nouvelles
« Vous seront voir plaisans et belles,
« Et ensi en est avenu
« Que pluiseurs fois en ay tenu
« Parlement a vous et a moy.
« Cousine, sachiés par ma foy,
« Cilz chevaliers qui conquis l’a,
« C’est cil qui a la Garde ala
« Et qui y conquist l’esprivier,
« Pour avoir corps de chevalier
« Si preu que onques n’i eut tel.
« Chiere cousine, en mon hostel,
« L’ai eü environ .i. mois,
« Car Camelz c’on dist de Camois
« Le navra moult grief par bataille,
« Mais onques je ne vi, sans faille,
« Nul chevalier de tel arroi.
« Certes, ma cousine, je croi
« Qu’il passera des aultres route,
« Car en li est proece toute,
« Sens, honneur, courtoisie et biens.
« En ses estas sur toute riens
« Je le recommende et honneure, f. 71 d
« Et croi, quant son estat saveure,
« Qu’il soit de bon ostel issus.
« Cousine, je n’en escripc plus ;
« Je m’en passe moult sobrement,
« Mais je vous verai temprement,
« S’il plaist Dieu, a tres grant loisir :
« Si vous en dirai mon desir
« Et tout ce, de voir, qu’il m’en samble.
« La Sainte Trinités ensemble
« Vous ait en garde et vous maintiegne
« En toute joie qui vous viegne.
« Escript ou castiel de Montgriès,
« Douse jours en may, ou la priès.
« Et pour ce, ma chiere cousine,
« Que vous estes de coer encline
« A lire joieuses cançons
« Et toutes coses de telz noms,
« Je vous tramec presentement,
« Fait de mon rude sentement,
« Une balade. A vous en soit
« Dou jugier dou tort et dou droit ;
« Vous me dirés, quant vous verai,
« S’il vous plest, comment ouvré ay.
Qui voet avoir joie se viegne a moy,
Car je n’ai doel, tristrece ne dolour,
Mais j’ai plaisance et solas sans anoi,
Joie et lïece en mon coer nuit et jour
Qui me tiennent compaignie,
Sans riens penser fors a joieuse vie,
Car mes amis aime l’onneur de mi,
Dont je le doi bien tenir pour ami.
Et si fai jou, et l’ainme en bonne foy,
De coer loyal, sans penser nul faus tour, f. 72 a
Et plus que tout le monde je le croi
Certainnement, et ains de boine amour.
Sans faire ja departie,
Se li serai ferme et loyal amie.
Faire le doy, car tout bien sont en li,
Dont je le doy bien tenir pour ami.
Ce me fait vivre en lïece et en foy,
Ce me fait vivre en joie et en baudour,
Ce me fait vivre en espoir sans anoi,
Dont je fais en plaisance mon demour,
Par doulz voloir qui me lie
De bien amer, voir, coi que nulz en die,
Mon doulz ami qui m’a toutdis servi,
Dont je le doi bien tenir pour ami. [2]
uant Florée la damoiselle
Eut escript ceste baladelle,
Elle le ploia en biaus plois
Et en la lettre, ce fu drois,
Le mist, et laiens l’encloÿ,
Et puis si le perça parmi,
Et frema tout a son devoir
Et seela, sans lui mouvoir
De sa cambre, bien et a point.
Quant la lettre fu en ce point,
Elle appella .i. escuier
Et dist : « Il te fault chevaucier
« En Escoce, vers ma cousine,
« Et li porteras cesti signe,
« Ceste lettre avoec .c. salus. »
Cilz respont : « Ma dame, au sourplus,
« Ferai vostre commandement. »
Adont se parti erranment
De Montgriès et s’est mis a voie
Viers Escoce. Diex le convoie ! f. 72 b
De li tant qu’en present lairons,
Et au chevalier revenrons
Que j’appelle Melyador.
Vous n’avés point de li encor
Oÿ nulle cancon nouvelle,
Depuis que de la damoiselle
De Montgriès ilz s’estoit partis.
Il chevauce plains et lairis
Ou pays de Norchombrelande.
Il a traversé une lande
Et s’adrece devers .i. bois.
Adont s’esmut a haute vois
De chanter .i. seul rondelet,
Et croi qu’il le fist tout a fet
Qu’il le canta, car il fu cours,
Mais uns grans sentemens d’amours
Estoit ou rondelet entés.
Ce sera bien li volentés
Dou chevalier de Cornuaille,
Que vous l’oiiés, vaille que vaille.
Toutes fois, il vault bien c’on l’oe
Et qu’en escoutant on le loe.
Mais que m’aiiés en vostre souvenance,
Certes, dame, trestous bien m’avenra ;
De ce sui je et serai sans doubtance,
Mais que m’aiiés, etc.
Car en vous est ma parfaite fiance,
Dont, je sai bien, riens ne me grevera,
Mais que m’aiiés, etc.
out ensi s’esbat au chanter
Melyador, qui hault et cler,
Avoit chanté son rondelet.
Et puis demande a son varlet : f. 72 c
« Lansonnet, di moy, que t’en samble ?
« Ces parolles que je rassamble,
« Qui ne sont mies de grant coust,
« Te vienent elles bien a goust ?
« C’est tout pour l’amour de ma dame. »
Et Lansonnès respont : « Par m’ame,
« Sire, oïl, haro, et quoi dont ?
« Toutes ytelz coses me font
« Resjoïr bien et grandement. »
Adonques li conte erranment
Melyador, de mot a mot,
Comment l’autrier jalousie ot
Dou chevalier qu’il desconfi,
Et dist : « Lansonnet, je t’afi,
« Je le conchieu, ne sai comment
« Par oïr parler seulement.
« Florée, qui tant le prisoit
« En li honnourant, bien disoit
« Que cilz chevaliers l’amoit tant
« De coer, d’esperit, de samblant,
« Qu’elle n’en savoit par raison
« Faire nulle comparison.
« Et me disoit bien que la feste
« Estoit emprise et ceste queste
« Par ce Camel et par ses fais.
« Quant ce oÿ, telz et si fais
« En fui, et si tres fort jalous,
« Et si tres merancolious,
« Si pensieus et si debatus :
« Se je me fuisse combatus
« Ce soir, je n’euisse riens fait
« Et tant seulement pour ce fait.
« Est dont jalousie tel cose ? »
Et Lansonnet, qui moult bien ose f. 72 d
Parler a son mestre a son gré,
S’arreste tous quois sus .i. pré
Ou il chevaucoient andoi
Et dist : « Sire, oïl, par ma foy.
« Jalousie est un mauvais visces,
« Et toutes fois c’est un offisces
« En vraie amours grans et entiers,
« Et qui enflame volentiers
« Les amans qui sur lui s’arrestent,
« Et qui tant li donnent et prestent
« Dou leur qu’il le loent et croient ;
« Siques bien ressongner le doient
« Tout amoureus vrai et entier,
« Car, puis qu’il voet acompagnier
« .I. coer, il gist en grant peril.
« Mais vous l’avés noble et gentil,
« Et chevauciés par les contrées,
« Siques j’espoir que telz pensées
« Ne vous poeent longes durer.
« Voelliés ent vostre coer oster,
« Et pensés toutdis tant a faire
« Que la belle et la debonnaire,
« La fille au roy Hermont d’Escoce,
« Bonnes nouvelles de vous oce. [3]
« Ou cas qu’a li volés entendre,
« Ne vous ne devés a el tendre
« Ne aultres pensées avoir. »
Dist Melyador : « Tu dis voir. »
nsi chevaucent tout parlant
Li doi, et chevaucierent tant
Qu’il sont venu a la Saverne, [4]
Une riviere qui gouverne
Tout le royaume de Norgalles.
Melyador, qui en ses gales f. 73 a
Estoit la grignour part dou jour,
S’en chevauce sanz nul sejour.
Tout encontremont la riviere,
Jusques a basse remontiere
Chevaucierent, je le vous di.
Il regardent devers midi :
Une nef voient, non pas grande ;
Tout quoi se tiennent sus la lande
Pour savoir se la nef vient la.
Elle venoit, ce leur sambla,
Aval vent, et fu la tantos.
C’estoit uns petis hokebos
Qui menoit une damoiselle
Gente de corps, plaisans et belle,
Qui de Galles estoit issue.
Tost sarés par quele avenue
Elle voloit terre et port prendre,
Ensi que je l’oÿ reprendre,
Et pour quoi estoit messagiere [5]
A une damoiselle chiere
Qui n’avoit mies ses solas
En Galles ; mes estoit es las
D’une forte guerre accueillie,
Et sa terre toute essillie.
elyador, qui dou cheval
Estoit et descendus aval,
Par les resnes errant le baille
A son varlet, et dist sans faille :
« En cel estat chi demorrai
« Jusques a tant que jou orrai
« Nouvelles. » Lors vient sus le rive.
Es venu la nef qui arrive
Coiteusement, ne plus ne tarde.
Melyador adont regarde : f. 73 b
Si voist ens une damoisselle.
Pensa lors que quelque nouvelle
Aroit lors, si tost que le voit.
Par dedens ceste nef avoit
Palefrois amblans et sommiers,
Et varlès assés coustumiers
De telz harnois mener par terre,
Soit en temps de pais ou de guerre,
Et tout ordonné comme sage
Pour bien esploitier .i. message.
Tant s’est la tenus sus le place
Melyador, qui se solace
A considerer l’ordenance,
Que la damoiselle s’avance.
Jusques a la rive est venue
Et sus la terre descendue.
Melyador contre li vint,
Qui mies trop mus ne se tint :
Si le salua en venant
Et ceste, par bon couvenant,
Ne fu mies trop esbahie
Dou salu rendre a ceste fie :
Viers Melyador s’enclina.
Adont aultre cose dit n’a,
Fors : « Tant pleuist a Dieu, biau sire,
« Que, de ce que mon coer desire,
« Vous me peuissiés apaisier. »
Melyador s’ala baissier
Et respondi a ce parler :
« Belle, vous poés commander
« Sur moy, si com sur vo servant.
« Je sui uns chevaliers errant
« Et ne demande c’aventures.
« Pour ce porte mes armeüres f. 73 c
« Et chevauce ensi que veés ;
« Si vous pri, ne vous effreés.
« Mais dittes moy, sans couroucier,
« Dont je vous poroie adrecier
« Et de cuer y entenderai,
« Et, si avant que je porai,
« Conseil y metterai, par m’ame. »
Lors dist elle : « J’ai une dame,
« Qui me nourist et me gouverne,
« Qui d’autre part ceste Saverne
« Tient grant terre et grant hyretage.
« Elle est auques de mon eage,
« Elle n’a ne pere ne mere,
« Ne nul confort tant fors .i. frere,
« Qui est encores moult petis,
« Quoiqu’il soit ables et fetis,
« Pour furnir une tel besongne
« C’a ma chiere dame besongne. »
Melyador, qui dou savoir
Fu engrans, n’en cuida avoir
Jamais le fin pour demander ;
Si dist : « Belle, voelliés oster
« Vostre coer de merancolie,
« Et me dittes, je vous en prie,
« La besongne qui vous empece
« Et qui si vostre coer courece. »
Et la damoiselle li conte,
Si com vous en orés le conte.
«
hevaliers, vous devés savoir
« Que ma tres chiere dame, voir,
« Grant terre a dela le riviere,
« Dont elle se tient hiretiere.
« Mais, de son chastel de Montrose,
« Nullement partir elle n’ose, f. 73 d
« Tant li est destrois li dangiers,
« Pour .iiii. freres chevaliers
« Qui l’ont accueilliet a la guerre
« Et tous les hommes de sa terre,
« Et claiment droit et avantage
« Sus lui et sus son hyretage,
« Et se n’i scevent raison dire,
« Fors tant par orgueil et par ire
« Li font il ce tort a plains bras.
« Elle n’a homme de ses draps [6]
« Qui s’ose contre chiaus bougier,
« Et pour ce qu’en si grant dangier
« Ma dame maintenant se voit,
« Ensi com celle qui devoit
« Deviers le roy Artus aler
« Pour ses besongnes remoustrer.
« Ja en fu toute appareillie.
« Mais de nouviel est conseillie
« Que presentement m’i envoie,
« Car on l’en a mis a le voie
« Que la sont li homme vaillant,
« Li preu et li bien travillant,
« Li quel, quant ma requeste oront,
« Je croy qu’il s’i enclineront
« Et qu’il venront sur ce parti ;
« Pour quoi, hersoir, je me parti
« De ma dame gentil et chiere.
« Ançois que je retourne arriere,
« Se je puis elle ara conseil ;
« Si ne plains mies mon traveil,
« Se je vois ores jusc’a la. »
Adont Melyador parla
Comme sages et avisés,
Et respondi : « Je croi assés, f. 74 a
« Ma damoiselle, par ma foy,
« Que toute adrece arés ou roy
« Et que vous le trouverés tel,
« Ossi tous chiaus de son hostel.
« A ce est encline sa cours ;
« Point n’en partirés sans secours,
« Car la sont tout notorement
« Li preu et vaillant durement.
« Mais je vous di : je suis uns homs
« Qui ne me tieng mies des bons,
« Des preus, ne des entreprendans,
« Fors que les armes aprendans
« Ensi que j’ay toutdis esté ;
« Qui suis de bonne volenté
« D’onnourer et servir vo dame
« Si avant que porai, par m’ame,
« Quoi que fortune m’en envoie,
« Mais que vous m’ensegniés la voie. »
Et quant la damoiselle entent
Melyador si faitement
Parler, s’en est toute esjoÿe.
Si respondi a chiere lie
Et dist : « Sire, simple seroie
« Et ma dame peu ameroie,
« Sen honneur et son avantage,
« Quant vous volés son hyretage
« Aidier de bon coer a deffendre,
« S’a ce je ne voloie entendre,
« Et par li je vous en merci,
« Chiers sires. Ceste nef droit ci,
« Sans entrer en aultre batiel,
« Nous menra desous le chastiel,
« Ou ma dame prent son sejour,
« Ains que demain voions le jour. » f. 74 b
l n’i ot plus dit ne plus fait,
Mais sont arresté sur ce fait
Et sont entré la de recief,
Dedens la nef, tout a nu chief,
Melyador et la pucelle,
Qui moult estoit courtoise et belle,
Et Lansonnès et leur harnois.
La n’estoit courous ne anois
En Melyador le vassal,
Mais estoit par especial
Reconfortés et plains de joie.
Ewireus se tient sus la voie
De la belle et bonne avenue,
Qui li est en le main venue ;
Ne ressongne peril ne painne.
Si com li maronniers les mainne
Et que son gouvrenal gouverne,
Singlent contremont la Saverne,
Une riviere grosse et bonne,
Qui depart, ensi c’une bonne
Est sus la marce d’une terre,
Depart Galles et Engleterre.
Ce soir furent en .i. isliel,
Vert, gracïeus, joli et biel,
Seant droit en mi la riviere.
La souperent a lie chiere
Et jusqu’adont s’i esbatirent
Que la mers revint. Lors partirent ;
Si rentrerent en leur vaissiel.
La estoient cil doulz oisiel,
En ces isliaus sus ce rivage,
Qui n’estoient pas trop ramage
De chanter moult joieusement,
Ensi que coustumierement f. 74 c
Il cantent sans avoir esmay
Ou doulz mois et joli de may,
Et ce resjoïssoit trop fort
Melyador en son confort
Et y prendoit tant de deduit.
Onques il n’eut en celle nuit
Nulle affection de dormir,
Mais maint biel et bon souvenir
A ses amours qu’il ne vit onques.
Melyador une heure adonques
Demanda a la damoiselle,
Et dist ensi : « Par ma foy, belle,
« Trop volentiers vous prieroie
« D’une cose, voir, se j’osoie. »
Et la damoiselle respont :
« De quoi ? » Meliador adont
Li dist : « D’avoir sus no chemin
« Une cançonnete, a le fin
« Que mains nous anuie la voie,
« Et je vous di : se j’en savoie
« Nulle, sans moi faire priier,
« Le diroie sans detriier. »
Adont la pucelle s’avise,
Qui prestement a la devise
De Melyador voet entendre,
D’une vois joliete et tendre
Au chanter illuech s’avança,
Et dist quant elle commença :
Toute ma vie sans partir
Vous amerai,
Ne pour aultre ne vous lairai,
Je vous le jure sans mentir.
Car mieus ne puis, a mon plaisir, f. 74 d
Mon coer avoir mis, sans faillir
Que ou je l’ay.
Dont je vous voel sans repentir
Toutdis amer, c’est mon desir
De voloir vrai.
Ne ja ne m’en quier departir.
Tant com vivrai,
Tous jours loyauté vous tenrai,
Viegne ce qu’il en poet venir,
Toute ma vie,
Et me vodrai toute esjoïr,
Mon doulz amis, ou souvenir
Que je vous ay,
En mon coer de vous bien tenir
Entiere foy, sans alentir,
Ja n’en faurai.
Et se ne me poés veïr,
N’aiiés esmay,
En compagnie vous metrai
Mon coer, sans jamais retollir,
Toute ma vie, etc.
aro ! com fort se resjoÿ
fi Melyador, quant il oÿ
Chanter d’une vois clere et douce,
Et issir de si belle bouce
Comme portoit la damoiselle,
Le virelay. Lors dist il : « Belle,
« Je ne vous adiroie pas
« Le grant bien et le grant solas,
« Que vostre cançon m’a ci fait.
« Li parler en sont tres parfait,
« Et dame, qui ensi s’avance
« A parler, par bonne ordenance,
« Reconforte moult son ami. f. 75 a
« Jamais je ne cuidaisse en mi
« Qu’en ce divers paÿs de Galles,
« On y euist solas ne galles,
« Ne sentemens de cançons faire. »
Et ceste qui fu deboinaire,
Li respondi tout en riant :
« Pourquoi, sire, saciés ent tant,
« Que nous avons assés paÿs
« Ou il y a des resjoÿs
« Et des resjoïes souvent,
« Par le tres doulz commandement
« Qui vient et qui descent d’Amours.
« Li chastiaus ma dame, et sa cours,
« Fust joieuse et nous tous joieus,
« Se ce ne fust cilz anoieus
« Fais, qui nous touce sus le cuer,
« Et dont ne poons a nul fuer
« Avoir fin ne apaisement,
« Se ce n’est par le hardement
« D’un chevalier tel que vous estes.
« Mais il y a voir .iiii. tiestes
« Et se sont tout bon chevalier
Qui font forment a ressongnier.
« Ne sçai comment on les poroit
« Mettre a fin, car qui les oroit
« Parler, il samble a leur la[n]gage
« Qu’il aient partout avantage,
« Car tant sont de fier couvenance
« Qu’il ne criement homme vivant ;
« Contre yaus ne s’ose mettre nulz. »
La damoiselle ne dist plus,
Mais Melyador, qui parolle,
Reprent erranment le parolle,
Et dist : « Belle, plus n’i pensés. f. 75 b
« Diex a encores plus assés
« De tous biens qu’il ne vous couviegne.
« Des bons chevaliers vous souviegne
« Qui issent de la court dou roy.
« Il y en a de telz, je croi,
« Qui s’oseroient bien aherdre
« A yaus, et deuissent tout perdre.
« Je ne sçai qu’il m’en avenra,
« Mais, voir, mon corps s’esprouvera
« A yaus, au fer et a la lance.
« Or issons de ceste ordenance,
« Damoiselle, je vous en pri,
« Et voelliés encores droit ci
« Canter aucune cançonnete.
« C’est la cose qui plus me hete
« Et qui le plus me resjoïst. »
Et la pucelle, qui pas n’ist
De faire au chevalier a gré,
Li dist : « Sire, j’ai en secré
« Lonch temps eü une balade.
« Or ay je le coer ferme et sade
« De recorder a vo plaisir,
« Mais que vous le voelliés oïr. »
— « Jou », ce respont Melyador,
« Jamais je n’en venrai a cor
« D’estre tanés par nulle voie.
« Or le dittes, que Diex vous voie ! »
Et la damoiselle erranment
Le commença moult doucement
A canter et par belle vois.
Et entrues s’en aloit envois
Li hokebos ou il estoient,
Ne mies pour ce il s’arrestoient,
Que la damoiselle en chantant f. 75 c
Les alast illuech esbatant.
Par souffissance sont riche mainte gent,
Car qui qui l’ait il a joieuse vie,
Et je l’ay avoecques moy, vraiement,
Et dou tout l’ay mis en ma compagnie
Pour les biens qu’en mon ami voi,
C’amer je voel bonnement et en foy,
Toute ma vie, sans ja faire retour,
Quant des tres bons il est tout le millour.
Bien le poet dire par tout, seürement,
Car en li est honneur et courtoisie
Et toute grasce si enterinement
Qu’il ne poroit penser a villonnie,
Et, pour ce, chier tenir le doy.
Car se je l’aim loyaument, et il moy,
Avoir n’i puis blasme ne deshonnour,
Quant des tres bons il est tout le millour.
Amours m’a bien enrichi poissamment,
Et souffissance et poissance la lie ;
Si les en mercie tres purement
Et voel estre a celi loyal amie,
Por cui sui hors de toute anoi :
Porter li voel tous jours tres bonne foy.
Avoir i puis bons los et toute honnour,
Quant des tres bons il est tout le millour.
r mettons chi .i. peu de pause.
Par ma foy, il y a bien cause
Se Melyador s’esjoïst.
Quant de bouche d’une dame ist
Parlers si doulz et si trettables,
Li cuers ne seroit pas estables,
Ne a bonne Amours bien entiers,
S’il ne les ooit volentiers. f. 75 d
Ensi en tel esbatement,
Et en tous joieus parlement,
Nagierent la riviere amont
Et tant esploitierent adont
Que, environ soleil levant,
Il vinrent droitement devant
Le chastiel ou estre il voloient.
Les gardes, qui lors entendoient
A leur forterece garder,
Prendent en bas a regarder,
Et voient leur nef revenue
Et au piet dou pont descendue.
Celle part viennent sans attente
Et mettent dou tout lor entente
A conjoïr et recueillier
La pucelle et le chevalier,
La quele demande entreset
Quel cose la dedens on fet
Et se le dame est descoucie.
On li respont, a ceste fie :
« Nenil, mais tost se levera. »
Entre ces parolles on a
Le vaissiel qui estoit a port
Atachiet as cordes au bort ;
Si en sont bellement issu
Chil qui la furent descendu.
La fu Melyador moult biel
Recheüs de chiaus dou chastiel,
Et menés jusques la dedens.
Lors revinrent nouvelles gens
Qui de rechief le conjoïrent.
De sa venue s’esjoïrent
Cil de Montrose a ceste fois.
Melyador qui fu courtois f. 76 a
S’acointa d’yaus, et biel et bien,
Tantost ; n’i couvint nul moiien.
Dedens une cambre parée,
Freschement joncie et arrée,
En est Melyador menés
Et illuecques s’est ordenés,
Ensi qu’il li vient a plaisance.
Entrues qu’il reprist ordenance,
La damoiselle s’en ala
Vers sa dame, et le salua
Humlement et de bon afaire.
Ensi que moult bien le sceut faire.
A ceste heure elle se levoit :
Si s’esmerveille quant ja voit
Sa damoiselle revenue,
Mais celle, qui ne fu pas mue,
Li recorda sans nulle ensongne
L’ordenance de la besongne ;
Comment elle avoit esploitié.
Pas n’en a conté la moitié
Quant sa dame fu toute preste :
« Alons », dit elle, « trop arreste,
« Quant ne vois vers le chevalier
« Qui tant se voet or travillier,
« Quant pour moy aidier et debatre
« Mon droit, se voet ceens embatre. »
i hyretiere de Montrose
Se part tantost, c’est vraie cose,
Et s’en vient vers Melyador
Qui estoit en sa cambre encor ;
Moult liement sur li s’en vint.
Or vous di que pas ne couvint
Aler ailleurs pour emprunter
Honneurs, pour la bien honnourer f. 76 b
Le chevalier de Cornuaille.
Cascune et cascuns la li baille,
De tous lieus et de tous costés,
Salus, honneur et amistés ;
Et ils, qui tout ce bien conçoit,
Lieinent les rent et reçoit,
Et tres sagement au voir dire.
La dame dou chastiel qui tire
A compter a Melyador
Sa besongne de cief en cor,
Et en quel parti gist et est,
Si tost qu’elle voit qu’il se test,
Elle li revient par devant,
Et puis se li remet avant
Ses complaintes presentement
De si gracïeus sentemens,
Que Melyador d’otel cuer
Les entent con ce fust sa suer,
Et dist : « Dame, ci sui venus,
« Et en vostre hostel descendus,
« Pour vous reconforter, sans doubte.
« De ce ferai ma painne toute ;
« Et, se faire ne le volsisse,
« Si avant parlé n’en euisse.
« Escus vous serai et amis
« Encontre vos .iiii. ennemis.
« C’est bon que on leur laist savoir
« A quel title il voelent avoir
« Calenge sus vo signourie
« Et le lieu ou estes nourie :
« Il ne sont pas bien avisé.
« Or leur soit ensi devisé
« Qu’il se traient tout .iiii. avant ;
« Il trouveront qui au devant f. 76 c
« Leur ira, quoi qu’il en aviegne
« Et soit que mourir l’en conviegne. »
t quant la dame dou chastiel
Ot ensi parler bien et biel
Melyador, si s’en contente,
Et met moult grandement s’entente
A li en tous cas d’onnourer.
On fist tantost, a brief parler,
.I. des varlès la traire avant,
Qui emprist par bon couvenant
A trop bien faire ce message,
Car il avoit assés usage
De soutieuement langagïer.
On li va moult bien encargier
Qu’il dira a ces chevaliers :
Il leur dira ensi premiers
Qu’il traient avant sans attendre
Et qu’il doient, pour voir entendre,
Sans faulte, il seront combatu.
Enfourmés dessus tel argu,
Se part li messagiers errant.
En Galles a esploitié tant
Qu’il est venus jusques a chiaus
C’on tient pour hardis jovenciaus. [7]
Entre yaus .iiii., tous frere estoient
Et chevaliers que moult doubtoient
Chil qui manoient la entour.
Il estoient en une tour
Grande, et forte et bien batillie,
Et vivoient de pillerie
Qu’il prendoient sus le paÿs,
Dont cascuns estoit tant haÿs
C’on volsist qu’il fuissent pendu.
Il demanderent : « Que dis tu ? », f. 76 d
Au varlet qui leur aportoit
Les nouvelles et qui venoit
Dou castiel c’on dist de Montrose.
« Signeur », dist il, « c’est vraie cose,
« Ma damoiselle est pourveüe
« D’un chevalier qui vous salue,
« Et dist c’a vous se voet combatre
« Et vos grans ponées abatre,
« Ou il demorra en le painne. »
— « Et es çou dont cose certainne ? »
Respondirent li chevalier.
— « Oïl, signeur, mentir n’en quier.
« Hui a ce matin est venus
« Et a Montrose descendus.
« De li je ne sçai plus avant,
« Fors tant qu’il est de couvenant
« Bel et bon, a ce c’on y voit. »
Cilz respondirent : « Or, telz soit.
« Il sera combatus demain.
« Di a ta dame, pour certain,
« Que nous nous trairons sus la place. »
Li varlès se parti a ce
Darrain parler qu’il respondirent.
Je ne sçai pas quel cose il dirent
Depuis, mes li varlès revint
A Montrose, et bien li souvint
Des parolles qu’il ot oÿes.
Si les a toutes publiies
A sa dame, sans plus d’arrest,
Et li dist bien qu’il sont tout prest
A combattre demain matin.
La dame, qui ot ce latin,
Se tient moult bien assegurée
Qu’il venront a le matinée, f. 77 a
Et tout ce dist elle, sans faille,
Au fil le duch de Cornuaille
Qui s’en conforte bellement.
Or vous nommerai voirement
Le nom des .iiii. chevaliers :
Madrigais eut nom li premiers,
Et l’autre appeloit on Balastre
Et le tierch monsigneur Cobastre ;
Griffamons eut a nom li quars,
Qui ne fu mies trop cowars,
Mais hardis et entreprendans.
Li plus ainnés n’a que .xx. ans.
Si sont il fort et de grant taille
Pour bien furnir une bataille :
A ce gist leur affection,
Pour avoir le perfection
D’armes et de bacelerie,
Et le nom de chevalerie.
epsto est uns chastiaus en Galles,
Ou moult y a cambres et salles ;
Julles Cesar le fist fonder
Et moult voet le lieu amender.
Il siet sus .i. brach de Saverne,
Qui de bons saumons le gouverne,
Et l’appella, c’est vraie cose,
Jules Cesar adont Montrose.
De puis li fu cilz noms mués :
Cepsto est cilz chastiaus nommés.
Laiens estoit Melyador,
Qui porte le biau soleil d’or,
Par differense en ses parures.
Or li faudra ses armeüres
Qu’elles soient teles trouvées,
Que tres bonnes et esprouvées ; f. 77 b
Dures seront, par ma semblance,
Se pointe d’espée ou de lance
Ne les poet rompre ou empirier.
De tant m’i ose jou fiier,
Que elles sont dures et rices,
Et Melyador preus et frices,
De bon affaire et de bon tour
Pour bien maintenir .i. estour.
La dame, qui est hiretiere
Dou chastel, li fait bonne chiere
Et ossi font cil de l’ostel.
On li porte laiens los tel
C’on doit porter a chevalier,
Ou quel il se couvient fiier.
Li .iiii. frere plus n’atendent,
Mais au bon matinet entendent
A yaus armer et mettre a point,
Et se sont parti sus ce point
Que pour venir devant Montrose.
La sont venu, c’est vraie cose ;
La s’arrestent devant le porte
Dou chastiel, qui est bonne et forte,
Et la demainnent grans posnés,
En disant : « Or tos sus levés,
« Dans chevaliers, et issiés hors,
« Qui vous vantés et faites fors
« De vous combatre contre nous !
« Issiés hors, nous disons a vous
« Et a vo damoiselle ossi
« Que, comme nous soions, droit ci,
« Venu tout .iiii. en mi la place,
« Ja au dieu d’armes il ne place
« C’a une heure nous nous mettons
« Contre vous, ne nous combatons. f. 77 c
« Nennil. Pas ne seroit proece,
« Ne nostre honneur, ne gentillece,
« Et pour tant en arés vous hui
« L’un de nous ; n’aiiés cure qui.
« Et se vous le poés conquerre,
« Par bataille et par fait de guerre,
« Demain rarés vous le secont ;
« Et se vostres proeces sont
« Teles que vous le conquerés,
« Au tierch jour le tierch vous arés,
« Et ensi l’autre au jour quatrime.
« Siques, chevaliers, on vous rime
« Et taille on a point vos journées ;
« Teles les avons aournées,
« A fin que n’en aions reproce
« Et que nouvelles en Escoce
« En voisent, ne dedens Bretagne.
« Or issiés hors, on vous ensengne
« Le lieu ou vous devés campir ;
« Vous ne nous poés escampir,
« Puis que vous estes la enclos. »
Adont retournent les galos
Et se traient moult lonc arriere
Dou chastiel et de la riviere
Sus .i. camp, et, droit ou moilon,
Ont fait la tendre .i. pavillon.
Si se sont li .iii. desarmé
Et le quart ont laissié armé :
Ce fu messires Griffamons,
Qui estoit grans, et fors et lons ;
Plus fier de lui on ne savoit.
A ses freres priiet avoit
Que devant se peuist combatre ;
Siques li troi, pour lui esbatre f. 77 d
Li avoient ce acordé.
Or ot on dit et recordé,
Au chevalier de Cornuaille,
Comment cil, par devant le baille,
Avoient moustré leur emprise.
Melyador, qui peu les prise,
S’armoit entrues. Lors c’armés fu,
A cheval et au col l’escu,
S’en est issus hors de le porte :
Lansonnès sa lance li porte,
Qui mies ne le siert envis.
Venu s’en sont, par droit devis,
La ou la bataille doit estre.
Ce dist Lansonnès a son mestre :
« Monsigneur, or vous souviegne hui
« De la belle et bonne pour qui
« Vous estes entrés en la queste ;
« Car voir, le hÿaume en la tieste,
« Il vous en doit bien souvenir
« S’a bon coron volés venir. »
Et Melyador li fait signe
Que sa lance, sans nul termine,
Li baille, car jouster vorra :
Or en soit ce qu’estre pora.
Et Lansonnès li baille errant ;
Cilz le prent par bon couvenant,
Qui le vodra au chevalier,
Ce pense il, tantost emploiier.
r sont li chevalier armé,
Au dehors d’un vert bois ramé
Qui leur fait grant aise et grant ombre.
Nulles riens n’est qui les encombre,
Ne les grieve, ne ensonnie.
La place estoit belle et onnie, f. 78 a
Ossi plainne c’un parchemin.
Espouronnant tout le chemin
S’en viennent li un dessus l’autre,
En portant leurs lances sus fautre.
Et quant encontrer il se deurent,
Ce sentement entre yaus bien eurent
De l’abaissier et tenir roides.
Les pointes agues et froides
Font prendre dedens les escus :
Pour ce ne fu mies vaincus
Griffamons. Se lors il cheÿ,
Je croi bien qu’il li mescheÿ ;
Mais toutes fois, au voir enquerre,
Il li couvint baisier le terre.
Melyador passa tout oultre
En faisant bellement son moustre ;
Onques ne s’en dagna bougier.
Les resnes va entrecangier
De son cheval et le retourne.
Pour faire quoi que soit s’atourne
Et voit le chevalier gisant ;
Sur li s’arreste et en disant :
« O, qui estes mon adversaire,
« Je vous voel courtoisie faire.
« Levés vous, montés a cheval ! »
Et cilz qui avoit encor mal
Ou chief, car tous fu estonnés,
S’est bien a la grasce adonnés
Que Melyador li faisoit,
Qui tous cois droit la se taisoit.
Cilz est remontés a grant painne,
Et quant il eut repris s’alainne,
Il trait l’espée dou fouriel
Et esporonne le moriel f. 78 b
Qui li respont de saus menus.
Arreement s’en est venus
Dessus Melyador en l’eure ;
Et cilz qui sagement s’aheure
Pour le peril qui poet venir,
Ne le lait mies couvenir
Mais fait .i. tour de Cornuaille,
Et se lance en tournant, sans faille,
Dessus le chevalier galois.
Son brach li lace a ceste fois
Ou hateriel, par tel maniere
Qu’il le fait, dessus le crupiere
De son cheval, coucier souvin.
En cel estat, moult lonch termin,
Le tint tant, et en touellant
Et si durement travillant,
Que priès il li rompoit l’eskine ;
Avoech tout ce, en le poitrine,
Le fiert dou pumiel de s’espée.
Ensi, par tres forte mellée
Et par luitier, l’a il conquis.
Messires Griffamons de puis
Ne se pot nullement aidier,
Ançois se laisse manoiier
Ensi que Melyador voet.
Quant plus deffendre ne se poet,
Il couvient que il die voir,
Voires, s’il voet souffrance avoir.
Au bleu chevalier a la dit :
« Sire, laissiés moy .i. petit
« Ravoir mon alainne et aler. »
Et Melyador a parler
Commença et dist : « Bien vous oy.
« Jusc’a tant que j’aroy vo foy f. 78 c
« Que vous serés mes prisonniers,
« N’isterés vous de mes dangiers. »
Et cilz qui sent c’on le defroisse,
A paour que ses maulz n’acroisse ;
Si dist : « Sire, a vous je me rens.
« Tenés m’espée. » — « Et je le prens »,
Ce respondi Melyador.
L’espée prist et, plus encor,
La foy de ce dit Griffamont.
Moult bien le voient cil d’amont
Dou chastiel, qui sont as crestiaus.
Si en parolent la, entre yaus,
Et dient : « Nostre chevalier
« Nous amenra .i. prisonnier,
« Car il le tient en sa merci.
« Ouvrés la porte, veleci ;
« Il revient a la descouverte. »
Adonques fu la porte ouverte,
Et contre Melyador issent
Chil et celles qui s’esjoïssent
Que il le voient revenant,
En si biel et bon couvenant.
r ont entre yaus moult bien matere
De couroucier tout li .iii. frere,
Quant Griffamont mener en voient,
Ou quel grant esperance avoient
Que celi deuist desconfire.
Il n’en scevent entre yaus que dire ;
A moult grant tiennent ce damage.
Entre les .iii. y eut .i. sage
Qui dist : « Signeur, c’est nos pourfis
« Que nos freres est desconfis ;
« Car cilz nous a apris le tour
« De la bataille et de l’estour. f. 78 d
« Il n’est pris, fors par barterie
« Et par soutieue luiterie,
« Car, si com nous poons compter,
« Pour ce le fist il remonter ;
« Car jamais ne l’euist eü
« A piet. Or nous a pourveü
« De son tour et de son malisce.
« Jewë nous a d’un vilain visce :
« Si nous en garderons demain
« Ou apriès, s’ensi chiet a main.
« La cose pour nous est moult belle ;
« Car, en combatant no querelle,
« S’il en y avoit pris de nous
« Jusques a .iii., si les poet tous
« Delivrer et remettre arriere
« Li uns de nous, par le maniere
« Et l’ordenance qui est faite
« Entre nous, jurée et pourtraite.
« Or regardons li quels demain
« Prendera la lance en la main
« Pour nostre frere délivrer. »
Adonques s’ala presenter
Cobastres, et dist qu’il iroit,
Ne nulz devant lui ne feroit
La bataille, et on li acorde.
Adonc ce jour on li recorde
Comment il se gouvernera,
Et comment le mieus il pora
Ce bleu chevalier desconfire,
Qui leur fait rechevoir grant ire
De leur frere qu’il a conquis,
Qui si bien estoit d’armes duis.
elyador est revenus,
Qui ne s’est mies quois tenus : f. 79 a
Ou chastiel grans nouvelles porte.
Contre lui ist hors de le porte
La damoiselle de Montrose,
Qui le rechut, c’est vraie cose,
Moult liement et a bon droit.
Melyador, qui se vodroit
Acquitter a lui et a toutes,
Dist : « Ma dame, ostés vous de doubtes,
« Je vous amaine .i. prisonnïer. »
— « Sire », dist elle au chevalier,
« De ce remerciier vous doi.
« Pleuist a Dieu que tous li troi
« Fuissent au point que cilz chi est. »
Et Melyador lors se test,
Mais, pour ce, ne pense il point mains.
Adonc delivra, ens es mains
De Florence, ce Griffamont.
On le fist lors monter amont
.I. degrés et puis un retour.
Enfremés fu en une tour ;
Ne sçai quant il en istera.
Jusc’a tant que l’en ostera
Ses freres, il n’en poet partir.
Tout ce jour furent sans mentir
Ou chastiel moult esleechié ;
De riens ne [se] sentent blechié.
A l’endemain, environ prime,
Melyador, qui bien exprime
La journée qu’il doit avoir,
Pour faire en tous cas son devoir,
S’est armés bien et fricement.
Pas ne volt issir nicement,
Ne mies n’apertient a li :
De terre ens ou cheval salli f. 79 b
— Onques n’en seut gré as estriers — ;
Si estoit ce .i. moult biaus destriers
C’on li avoit laiens bailliet.
Le hÿaume a son point tailliet
Li mist Lansonnès en la tieste.
De son mestre fait cilz grant feste
De ce qu’en bon estat le voit ;
De quanqu’il li fault le pourvoit.
Lors se departent dou chastiel.
La dame ala a .i. crestiel,
Pour mieus veoir la contenance,
La bataille avoec l’ordenance
Qui se fera des .ii. vassaus,
Si com acors va et consaulz.
ne espasse s’est la tenus,
Celi attendans qui venus
N’estoit pas sus le place encor,
Li chevaliers au soleil d’or ;
Mais il vint tout a galopant
Et vent a son cheval hapant,
Par quoi il l’ait mieus a son gré.
Quant il furent tout doi ou pré,
Cescuns si a son glave pris.
Les cuers de grant corage espris,
Li .i. dessus l’autre s’en vienent,
Et de ce cop si bien se tienent
Que onques estriers n’en perdirent.
Nompourquant cil et celles dirent,
Qui en joustant les aviserent
Et qui .i. peu en deviserent,
Que la jouste fu forte et rade,
Et se li cheval fuissent fade,
Malagrené et mal nouri,
Si com cil estalon pouri f. 79 c
Sur quoi uns alemans tournoie,
Il feussent cheü en la voie,
Tant furent li cop bien bouté.
Cil qui n’ont l’un l’autre douté
Nulle riens, pour yaus miex requerre.
Ont jetté leurs lances a terre
Et traient les espées nues.
Si les ont en hault estendues
Et s’en donnent grans hatiplas.
Melyador qui fu des bras
Grans et fors, et bien enfourciés,
S’est dessus Cobastre adreciés,
Qui jetté li avoit d’estoc
Par dessus son escu .i. cop ;
Siques, ains qu’il peuist ravoir
Sen espée, sachiés pour voir,
Melyador si s’avança
Qui son brac ou col li lança.
Regardés com grant apertise
Et comment hardemens l’atise !
La l’estraint et si fort le tire
Qu’il li fait souffrir grant martire,
Car desous son brach tient sa tieste,
Dont Cobastres n’a point de fieste,
Et l’estraint si fort par maniere
Que le hÿaume et le baiviere
Li embare si priès des joes
Qu’il fist la dedens bien .c. moes,
Ne ravoir ne poet son alainne.
« Est dont bataille si villainne »,
Ce poet il la dire a par soy ;
« S’autre remede je n’i voi,
« Il me faurra, voelle ou non, rendre. »
Melyador, qui voet entendre f. 79 d
A furnir ce qu’il a empris,
Le pumiel de s’espée a pris
A l’autre main. Si en ordonne
A celi si grans cops et donne,
Qu’il samble c’assommer le doie,
Et cilz qui la dedens ardoie,
Qui ne poet parler ne riens dire,
Se lait tout ensi desconfire,
Comme il fust mors ne plus ne mains,
Il tent encontremont ses mains
Et fait signe qu’il se voet rendre.
Lors li laissa .i. peu reprendre
Li bleus chevaliers sen alainne,
Qui sent bien comment il le mainne
Et en quel dangier il le tient ;
A tel ou nulz ne s’apertient.
Se poet on bien penser et croire.
Quant cilz peut .i. peu de l’air boire,
Si n’en fu mies si adis ;
Mais li samble qu’en Paradys
Fust rentrés et issus d’Infier.
Et cilz qui le corage ot fier
Et qui trop dur l’a atasté,
En parlant a lui l’a hasté,
Et dist ensi : « Que voes tu dire ?
« Rendre te fault, sans contredire,
« Ou tu seras mors en present. »
Cobastre, qui l’anguisse sent
Et avoit senti en devant,
Estent la droite main avant
Et dist : « Sire, je me renc pris. »
Melyador a la foy pris,
Et le hÿaume li deslace.
Moult tres grandement s’en solace f. 80 a
La damoiselle de Montrose ;
En soy imagine et suppose
Que ses chevaliers vaintera
Les aultres et les mettera
Tous desconfis en sa prison.
Moult sont de coer en grant friçon
Ly doy frere de ce Cobastre,
Madrigais et ossi Balastre.
D’iaus esjoïr n’ont nul talent,
Ançois sont en grant mautalent,
Quant leur frere mener en voient ;
Il samble que marvoiier doient,
Tant sont il en coer aïré.
Arriere se sont retiré
Vers leur logeïs et leur tente.
Courous si les enflamme et tempte
Que il ne s’en poeent ravoir,
Et dient : « Nulz ne poet savoir
« Les tours que cilz chevaliers scet.
« Par lui ont estet enchantet
« No doi frere ; il n’est mies doubte.
« Pas n’est sages qui ne redoubte
« Au voir dire ses divers tours,
« Quant conquis a par .ii. estours
« Nos .ii. freres, bons chevaliers. »
Dist Balastres : « Tous li premiers
« A qui il se combatera,
« Vraiement mes corps ce sera.
« Je me voel a lui esprouver,
« Se tel je le porai trouver
« Que je l’ai veü au combatre. »
Ensi se poeent la debatre
Li doi frere en yaus lamentant,
Et Melyador a fait tant f. 80 b
Qu’il est rentrés ens ou chastiel.
La damoiselle en grant reviel
L’a recheü, il n’est pas doubte ;
Ossi a sa mesnie toute.
r ont ou chastiel de Montrose
.II. prisonniers, c’est vraie cose ;
La damoiselle tous ensamble
Les fist mettre, si com me samble.
Melyador se desarma,
Qui dedens une cambre entra
Et puis se jetta sus son lit,
Car somillier volt .i. petit.
La s’endormi a son voloir,
Et fu proprement jusc’au soir
Dedens sa cambre sans partir.
Ens ou terme qu’il peut dormir
Et qu’il fu en la cambre enclos,
Avint une aultre cose ou clos,
Car il couvint la porte arriere
Ouvrir et ossi la barriere ;
Car sus la vesprée y sourvint
Uns chevaliers errans et vint,
Li quelz avoit moult travilliet
Et maint chevalier resvilliet
Et porté de la jouste a terre.
Tous propres estoit pour la guerre ;
Mais, puis .iiii. jours en devant
Et dedens Galles chevaucant,
Estoit fourvoiiés telement
Que il ne pooit nullement
Trouver ne voie ne adrece,
Jusc’a tant que la forterece
De Montrose vit devant li.
A la barriere descendi, f. 80 c
Par dalés lui son escuier,
Et prisent laiens a buschier,
Tant qu’il furent bien entendu ;
Il n’ont gaires la attendu.
Quant il furent mis en le porte,
La dame grant solas leur porte,
Car elle les vint conjoïr
Et, sans enquerre ne oïr
Dou chevalier nom ne sournom,
Entre lui et son compagnon,
En une cambre les amainne.
Messires Tangis, qui grant painne
Avoit puis .iiii. jours eü,
Si tos qu’il en la cambre fu,
Ils se desarma sans attendre.
La damoiselle fait entendre
A lui moult bien et de tous poins
Se li compte, quant il est poins,
De Melyador tout le fait,
Et quel cose il avoit ja fait
Et avoit entrepris a faire.
Quant compté en ot tout l’afaire,
Se li dist : « Sire, vous qui estes
« Li uns des chevaliers des questes,
« Savés vous comment on l’appelle ? »
Cilz respondi : « Ma damoiselle,
« Nennil voir, ne pas n’est raisons
« Que nullement nous cognissons,
« Fors seulement que par parures ;
« Onques ne vi ses armeüres,
« Se droit chi ne les me nommés. »
— « Sire, » dist la dame, « il est telz
« Qu’il s’arme de bleu, ce me samble ;
« Mais sa targe si se dessamble f. 80 d
« D’un soleil d’or, dont il se brise. »
Lors messires Tangis li prise
Le chevalier sur toute riens,
Et dist : « Dame, c’est uns grans biens,
« Quant il est ceens descendus.
« Encontre lui ne s’affiert nuls
« De proece et chevalerie.
« C’est cilz, ne vous en doubtés mie,
« Qui ot le pris devant la Garde,
« Le quel pris li rois Artus garde,
« A ce que j’ay oÿ compter ;
« Car onques ne l’en volt porter,
« Quant au tournoy en fist conqueste.
« Et sachiés qu’en toute no queste,
« Vous ne trouveriés le parel,
« Pour vous pourveïr de conseil
« A ce que vous avés a faire,
« Si com je voi en vostre afaire. »
t quant la damoiselle entent
Le chevalier qui telement
Li prise le bleu chevalier,
Se li dist pour resleecier :
« Sire, le volés vous veoir ? »
Et cilz li respont : « Nennil, voir,
« Car je senc tant de son secré [8]
« Qu’il ne vous en saroit ja gré.
« Si ne me voel jou partir point
« De vous, retenés yce point
« Jusc’a tant que veü l’arai
« Combatant, et que je sarai
« Comment il fera la besongne. »
Et la damoiselle, qui songne
A ses gens qu’il soit bien servis,
Se part de lui sus tel avis, f. 81 a
Et dist bien que il le vera,
Et qu’en tel lieu le mettera
Que ja riens ne sara de li.
Ensi sus cel estat parti
Et le lait o son escuier.
Or parlons dou bleu chevalier,
Qui estoit en sa chambre enclos
Et avoit tenu les esclos
De dormir une grant espasse
Tant c’a la vesprée bien basse,
Et adoncques se resvilla.
Son varlet tantost appella ;
Cilz respondi : « Que vous fault, sire ? »
— « Vien avant, je le te voel dire.
« Entrues que j’ay espasse et heure,
« Mon esperit otant labeure
« En dormant qu’il fait en villant. »
— « En quoi ? », ce respondi errant
Son varlet, qui voloit savoir
De cette parolle le voir,
Et Melyador prist a rire,
Qui li ala erranment dire :
« En pensant a mes amouretes,
« Je faisoie ore cançonnetes,
« Car j’en sui si fort abuvrés
« Que mes cuers en est aouvrés
« Toutdis ; c’est une cose fiere. »
Et Lansonnès, qui la maniere
De son maistre bien cognissoit,
Li dist : « Sire, et qui le vodroit
« Oïr, le sariés vous arriere
« Recorder en tele maniere
« Que vous l’avés fait en dormant ? »
Respont Melyador errant : f. 81 b
« Oïl, mais il faut que g’i pense
« .I. peu. Or te met en l’absense
« De moy, et t’apoie a cel huis.
« Tantost y viserai. » De puis
Que Lansonnès y fu alés,
Il n’i est gaires sejournés,
Quant Melyador dist : « Vieng ça ;
« Je te le dirai. » Adont la
Li commença Melyador
A recorder, de cief en cor.
C’estoit une balade belle
Qui leur sembla assés nouvelle,
Et otant bien fait elle moy.
En lisant, vous orés de quoi.
Il n’est nulle cose que j’oie,
Ne qui me face tant avoir
De tous biens, d’eür et de joie
Que ma douce dame a veoir.
Je le desire plus c’avoir
Nul ou monde, car par ce point
En moy n’aroit de dolour point.
Pour nulle riens ne m’osteroie
De faire vers li mon devoir,
Ançois a li dou tout m’otroie,
Et ce sace elle bien, de voir :
Je li doi bien, par droit devoir. [9]
Se desirs n’estoit qui me point,
En moy n’aroit de dolour point.
Tres bonne amour mon coer convoie
A lui servir sans decevoir,
Et pour ce voel jou bien c’on voie
Que je di, certes, de ce voir.
Si je pooie, de ce, voir f. 81 c
Que toutdis feïsse a son point,
En moy n’aroit de dolour point.
painnes peut avoir pardit
Melyador oultre son dit,
Quant evous escuiers qui vienent,
Qui grans tortis en leurs mains tienent,
Desquelz resplent lumiere et feus,
La dame dou chastiel o eulz.
A l’uis de la cambre elle fait
Touchier et tout devant se met.
Melyador voit la lumiere ;
Lors saut sus, et piert la maniere
Et le sieute de son pourpos.
Lansonnès li jette en son dos
.I. mantel et puis keurt avant ;
L’uis de la cambre oevre il errant.
La dame y entre avoech ses gens
Et, si tost que elle fut ens,
Elle dist a Melyador :
« Sire, s’il vous plaisoit, des or
« Il est heure d’aler souper. »
Et cilz qui li volt acorder
Li dist : « Dame, tout a vostre aise. »
Je croi c’est bon que je me taise
De ce souper, car il fu biaus.
D’escuiers et de damoisiaus
Estoit Melyador servis.
Apriès souper, il m’est avis,
On parla d’aler reposer.
Melyador s’en puet entrer
En sa cambre ; la s’enfrema
O son varlet qui moult l’ama,
Et se tinrent la celle nuit,
Sans avoir cose qui anuit. f. 81 d
u matin s’en vint a la porte
Uns hiraus qui nouvelles porte.
Il fu liement recheüs,
Et Melyador pourveüs
De respondre a ce qu’il demande.
Il fait la requeste et demande,
Et dist ensi, sus ceste voie :
« Messires Balastres m’envoie
« Pour parler au bleu chevalier,
« Et se li fait segnefiier
« Que .iii. lances vorra jouster
« — Ce dist pour li mieus ragouster —
« Et, tant que les lances durront,
« Li .i. contre l’autre courront,
« Sans combatre d’aultre armeüre. »
Melyador li assegure,
Qui onques ne fu anoiiés
Pour ravoiier les desvoiiés,
Et dist : « Compains, je sui tous près
« A ce qu’il voet par mos exprès,
« Ne ja je n’en irai arriere. »
Lors fu ouverte la barriere ;
Melyador errant s’en part.
La damoiselle que Diex gart,
Quant Melyador voit parti,
Est alée sans nul detri
Querir, fendant parmi la sale,
Monsignor Tangis de Sormale,
Et la en .i. tel lieu le mainne,
Ou moult bien veront et sans painne
La jouste des .ii. chevaliers.
Messires Tangis volentiers
Le vera, ce dist il, sur s’ame,
Et otant bien fera la dame, f. 82 a
Qui a toute sen esperance
En celi a la blewe lance.
essires Balastre, sans doubte,
D’el le bleu chevalier ne doubte,
Fors de la luite de ses bras
Qu’il n’a mies pesans ne cras,
Mais bien tailliés et bien fourmés.
Pour ce est il tous enfourmés
Que point ne s’en laisse approcier,
Fors que dou lonch dou fer d’acier
En .i. plançon de .xii. piés.
Pourveüs avoit .iii. espiés,
Fors et durs et trop bien tournés ;
Il les a pour lui atournés
Et bouté en cescun, sans faille,
.I. fier. N’en y a nul ne vaille
.C. florins pour courre une jouste.
Melyador ossi ajouste
Grant segurté en ses .iii. lances ;
Car, pour furnir ces ordenances,
La damoiselle de Montrose
Li avoit fait, c’est vraie cose,
Pluiseurs fiers de glave assaiier,
De quoi il se laissa paiier
De .iii. tres bons oultre l’ensengne,
Et encores on li ensengne
Li quelz vault mieulz, a ce qu’il dient,
Et Melyador en affient,
Qui s’est ja pour jouster offers.
Il estoit fricemens couvers
Ossi bleus qu’une violette.
Ensi s’en vient la voielette
Jusc’au lieu ou il doit courir.
Cilz qui pas ne le volt nourir, f. 82 b
Mais occire s’il puet, par force,
De lui bien fort armer s’efforce,
De quoi il soit mieus assegur.
Sus .i. cheval poissant et dur,
Et bien affrenet en le main,
Monta sans painne et sans mehain.
Ses parures, par mes samblances,
Estoient ce jour toutes blances,
Semées de bleues parselles.
Certes, ce sont coses moult belles
A veoir gens en tel affaire :
Cascuns savoit ce qu’il doit faire.
Ja vodront jouster assés tos,
Sans deviser plenté de mos.
uant .i. peu furent avisé,
Riens n’ont parlé ne devisé
Li doi chevalier, je vous di.
Cescuns se restraint et joindi
Dedens sa targe en lui couvrant ;
Puis vont des esporons brocant,
Et quant li cheval le fier sentent
Au courir radement s’assentent.
Il n’ont mies les entrelais,
Mais s’en viennent les plains eslais.
La se consieuirent des lances,
Par si vertueuses samblances
Et par si hardi couvenant,
Que de ce cop, en leur venant,
Les dittes targes pertuisierent ;
Mais d’autres riens ne se nuisierent,
Ne ne blecierent ne greverent.
Les lances en trons tronçonnèrent.
Li chevalier passerent oultre,
Frichement, en faisant leur moustre. f. 82 c
Leur doy varlet avant sallirent,
Qui doi plançon leur pourveïrent.
Lors se prendent a escauffer.
On ne se doit mies truffer
De chevaliers qui ensi keurent.
Sitretost que les lances eurent,
A fiers acerés et agus,
Si se redoubla leur vertus :
Pour yaus aconsieuir s’avisent.
Les damoiselles en devisent,
Qui s’apoient sus les crestiaus
Et dient : « C’est uns solas biaus
« De ces chevaliers regarder.
« Diex voelle le nostre garder,
« Car faiticement se maintient ! »
Messires Tangis si se tient
Assés priès de la damoiselle
De Montrose, jolie et belle,
Et prise moult le couvenant
De Melyador en venant,
Son affaire et tout son arroy ;
Et la sont sur la place andoy
Li chevalier qui pas ne tardent,
Qui bien pensent que les regardent
Chil du chastiel et cil des champs.
Pour ce dient il : « Il est tamps
« Que nous faisons bien la besongne. »
Adonques, sans plenté d’ensongne,
Cescuns le cheval esporonne,
Et s’en viennent a l’eure bonne
Et se fierent sus les escus.
Mais de ce cop ne cheï nulz,
Ançois passerent francement.
Leurs .ii. lances secondement f. 82 d
S’en volerent en .iii. tronçons
Et les fiers fisent il tous crons.
r fu Melyador irés ;
Il s’est arriere retirés.
De mautalent li cuers li flame,
Car il li samble c’on le blasme,
Pour .ii. lances qu’il a brisies
Qui tant li estoient prisies,
Et si n’a noient esploitié.
Son escuier a moult quoitié
Et dist : « Vieng avant, si me baille
« Ce tierch plançon. Il fault sans faille
« Qu’il s’acquitte mieulz que li autre. »
Et cilz, qui le portoit sus fautre,
Li a errant ens ou poing mis.
Or se garde ses anemis,
Car il vorra jouster acertes,
A qui que en soient les pertes. [10]
Il se restraint et met a point,
Et dedens sa targe se joint
Et s’estrice sus ses estriers ;
Ses coers li croist qui est moult fiers
Ou cas qu’il a la tieste armée.
Messires Balastres s’arrée
D’autre part pour jouster a li.
Or sont ensi que rafreschi,
En reprendant la tierce lance.
De bien jouster font grant samblance,
Et je croi que point n’en faurront
Les chevaus esporonnés ont,
Qui eurent recouvré alainne.
Cescuns feri a lance plainne
Son compagnon en mi l’escu,
Par tel force et par tel vertu, f. 83 a
Sans l’un l’autre point espargnier,
Mais en desir d’yaus mehagnier.
Il samble qu’il doivent entrer
Dedens l’un l’autre a l’encontrer. [11]
elyador, qui fu de corps
Bien joustans et de membres fors,
Ables, legiers et remuans,
Tout ensi com ce fust uns vans,
Fent la targe a son adversaire.
Li haubregons ne li peut faire
Nul garant qu’il ne le perçast,
Et qu’en char il ne l’atouchast
Telement, que, dedens .iii. mois,
Ne sera sains de ses anois,
Car la pointe acerée et froide,
Avoech la lance qui fu roide,
En l’espaule li met tout ens,
Et le boute par si grant sens
Et par ordenance si belle
Qu’il le fait partir de la selle.
Jus l’abat dessus la terrée :
La lance a la pointe acerée
N’est point brisie de ce cop.
Mes messires Balastres trop
Malement est illuech cheüs.
Au cheoir est moult esperdus,
Car li sans, qui ist de la plaie
Et qui aval partout li raie,
Sa cote et son haubert li soulle
Et jusques a ses piés le moulle.
Melyador prent son retour
Sus monsigneur Balastre, pour
Veoir comment il se maintient.
Si le regarde qu’il se tient f. 83 b
Tout quois et est de sanch couvers.
Il ne fu mies trop divers,
Mais appelle son escuier
Et dist : « Prent garde au chevalier
« Qui la gist, et le met a point. »
Lansonnès lors n’arresta point,
Mais vint droit la, sans nulle atarge ;
Se li a desbouclé sa targe
Et son hÿaume après osté,
Et .i. petit l’a esventé.
Adont Melyador vint la,
Qui moult courtoisement parla,
Et dist : « Comment vous va, biau sire ? »
Et cilz, qui a painnes peut dire
.I. seul mot, respondi en bas :
« Par Dieu, chevaliers, je suis mas
« Et desconfis par men outrage,
« Et conquis par vo vasselage.
« Je croi bien que vous m’avés mort. »
— « De ce me desplairoit trop fort, »
Ce dist Melyador, « par m’ame !
« Je vous menrai devant la dame,
« Que lonch temps avés heriiet
« Et sans ocquison guerriiet ;
« Elle vous sera humle et douce. »
Et cils, qui vot bien c’on le couce,
N’a cure u mais qu’il soit garis ;
Respont : « Je sui ses ennemis,
« A vous me renc et non a li. »
Dist Melyador : « Tout ensi
« Vous reçoi, c’est bien men entente. »
Adonques fu sans plus d’attente
Messires Balastres levés,
Car ses varlès a l’autre lés f. 83 c
Vint la, et doy aultre escuier,
Les quelz y pooit envoiier
Madrigais, il n’est mies doubte.
Par ces .iii. en fu, en le route
Dou dit bleu chevalier menés,
Jusc’au chastiel qui ordonnés
Estoit que pour lui recevoir.
Vous devés bien savoir de voir
Que la dame fu resjoÿe,
Quant elle vit, la tierce fie,
Son chevalier avoir vaincu
Celi que, dessus son escu,
On aportoit mat et navré.
Toutes ses gens keurent ou pré
Encontre le bleu chevalier,
Et le vont ensi recueillier
Con ce fust Diex de paradys.
Li chevaliers, qui moult adis
Estoit et pour se navreüre,
En une cambre clere et pure
En fu portés incontinent,
Et la y fait moult bellement
Li bleus chevaliers garde prendre.
De ce n’est il pas a aprendre
Com chevaliers courtois et sages,
En tous cas et en tous usages.
t quant Madrigais considere
L’aventure, comment si frere
Sont tout troi mené ou chastiel,
Se ne li vient mies a biel
Encor de monsigneur Balastre,
Auquel il fault .i. grant emplastre
Mettre sus l’espaule navrée.
Moult grandement de li s’effrée f. 83 d
Point ne scet comment il li va,
Se il morra ou garira.
Il n’en scet qu’il die ne face.
Quant on le regarde en le face,
Il samble bien plains de courous
Et dist ensi : « Je me courous
« Sur moi ; j’ai droit, car mon conseil
« Mis et donnai trop en frefel,
« Quant j’acordai, par ignorance,
« Devant hier ytele ordenance.
« Chils chevaliers, qui nous traveille
« Et qui a fait ja grant merveille,
« Desconfit yaus .iii. en .iii. jours. [12]
« Comment scet il de vaillans tours
« En armes, par bachelerie
« Et par sa grant chevalerie ?
« Nous deuissions avoir esté
« Contre lui tout .iiii. arresté ;
« Ja n’en fust issus hors d’acort.
« Plus sont yaus .iii. ou .iiii. fort,
« Et de reconfort pourveü,
« D’avis, de conseil et d’argu
« Pour leur ennemi desconfire,
« C’uns homs tous seulz ; ce puis je dire.
« Or me couvient demain combatre
« Contre li. M’y porai je embatre
« Quant je voy, et s’en sui tous fis,
« Qu’il a mes freres desconfis ?
« Il faut bien que conseil en aie,
« Se la irai ou le delaie.
« Vérités est, se je demeure
« Que grandement me deshonneure ;
« Et, se g’i voi oultre mon coer,
— « Cela ne ferai je a nul fuer — f. 84 a
« Trop plus deshonnourés seroie,
« Se mors ou prisons demoroie.
« Or faut il donc que je m’avise,
« Car ensement va li devise
« Que me combate ou que me rende. »
Adonc trop son conseil amende
Cilz Madrigais, a ceste fois ;
Il dist ensi, a basse vois :
« Se faire pooie une cause
« Devers la dame de Montrose
« Et devers le bleu chevalier,
« Que si bien peüsse trettier
« Que mi trois frere revenissent,
« Par mi tant que il le tenissent
« Et moy a pais, a tous jours mes,
« Ce seroit li plus cortois fes,
« Et assés li plus honnourables
« Pour nous, et li plus amiables
« Pour elle, c’on y puist taillier. »
Sus ce pourpos va abillier
.I. chevalier et .i. hiraut,
Et de tout ce que dire fault
Pour esploitier en tel besongne
Les carge, sans point de mençongne.
Il se partent de Madrigai,
Qui n’a mies le coer trop gai,
Et chevauchent vers le chastiel.
Tant ont esploitié c’a l’estiel
Des barrieres s’en sont venu
Et tout doi, illuec descendu,
As gardes disent, comme sage,
Que la venoient en message.
Sus cel estat furent mis ens
Et amené par bonnes gens f. 84 b
Jusc’a la dame de Montrose.
Adonques li chevaliers glose
Ses parolles moult sagement
Et la dame tout erranment,
Quant elle l’ot bien entendu,
Respondi — riens n’a attendu —
Que de ce ne fera ja riens,
Soit ses damages u ses biens,
Sans le sceü son chevalier.
Et cil qui sont la pour priier
Venu, ne mies pour combatre,
Ne li voellent mies debatre,
Mais respondent : « Diex y ait part ! »
Adont d’yaus Florence se part
Et viers Melyador s’en vient,
Qui dedens sa cambre se tient.
Se li recorde bellement
La besongne, tout telement,
Que par devers li on trettie.
Melyador, a ceste fie,
Li dist : « Ma dame, en bonne pais
« Ne gist, fors uns bien legiers fais.
« Pour moy n’en faites tant ne quant,
« Fors ce qui vous est mieus seant,
« Car je sui, Dieu merci et nostre,
« Tous près pour garder le droit vostre.
« Mais, quant a pais poés venir
« Et a vo plaisir avenir
« Ossi bien ores comme après,
« Tant vous en di par mos exprès :
« C’est bon c’a la pais entendés
« Et que ses freres li rendés,
« Parmi ce qu’il iront tous .iiii.
— « De ce ne poront riens abatre — f. 84 c
« En la court dou bon roi Artu,
« Et la, si com la cose fu
« Et chiaus qui oïr les poront,
« Service vous cognisteront,
« Hommage et foy a tous jours mès.
« Vous n’en ferés riens el huimès. »
Dist Florence : « Vous dittes voir. »
Lors s’en revint par estavoir
La dame vers les trettieurs,
Et dist tout, si com li teneurs
De Melyador contenoit.
Li chevaliers, qui demenoit
La parolle a ce Madrigay,
Respondit et dist : « Je ferai
« Relation de vo response. »
La dame pas ne li esconse
Et dist : « Bien me plaist. » A tant partent.
Si chevaucent, point ne se tardent ;
Si sont venu au logeïs
De Madrigai, ce m’est avis :
Si le trouverent moult pensieu.
Adont li compterent dou lieu
Ou il avoient chevauciet,
Comment il en ont esploitiet.
Sur ce s’avise et considere,
Car il faut que ilz et si frere.
S’il voelent issir de dangier,
S’en voisent sans point atargier
En la court dou bon roy Artu,
Et la moustrent par quel argu
Il ont guerriiet sans raison
La dame qui Florence a nom ;
De quoy, en nom d’amendement,
Il feront la presentement f. 84 d
Hommage, et jurront a tenir
A la dame et de lui servir
En tous estas, s’il li besongne,
Et dient que sus la besongne
Il n’ont poüt faire aultre cose.
Messires Madrigais qui n’ose
Combatre ne ne voet, ce dist,
De ce pourpos nullement n’ist,
Car il voet ses freres ravoir.
De rechief le fait a savoir,
Ou chastiel, par les dessus dis,
En remoustrant que bons amis
A la dame voet demorer
Et li en tous cas honnourer.
nsi fu la cose afinée.
Melyador l’a ordenée :
Tenir le fault, puis qu’il le voet.
Nulz des .iiii. ne le remuet,
Mais se sont mis en l’ordenance
De le dame courtoise et france,
Car Madrigais s’est trais avant.
Ilz et si frere, tout devant
Melyador, ont cogneü
Que sans arrest, tout pourveü,
Il iront en le court dou roy
Artus a Carlyon tout troi,
Et l’afaire li compteront,
Et de recief s’obligeront
A tenir estables et fermes
Toutes ces coses mis en termes.
Trop volentiers tout ce jurerent,
Car parmi tant il escaperent
Et issirent de grant dangier.
Sans plus riens muer ne cangier, f. 85 a
Ceste ordenance ensi ala.
Sus le soir se parti de la
Messires Tangis de Sormale,
Qui avoit oÿ en la sale
Ces paroles presentement
Et oÿ compter proprement
Au bleu chevalier dessus dit.
Sitretost que la fin en vit,
Il entra en une nacelle
C’on li apresta bonne et belle ;
Son harnois mist ens tel qu’il l’a.
Congiet prist a la dame la,
Qui bellement l’eut recueilliet ;
Il ont leur voiage acueilliet,
Ils et ses escuiers errant.
Maronnier ont a leur commant,
Qui les conduist en la Saverne
Et qui telement les gouverne,
Sans ce que noient les fourmainne ;
Droit par devers Bristo les mainne.
Une aultre nef la prenderont,
Par quoi mieus il esploiteront
Et plus segurement ossi
Pour estre ou il desirent si,
A ce biau tournoy de Tarbonne.
Bien arriva a l’eure bonne
Messires Tangis a Montrose,
Car par terre, c’est vraie cose,
Jamais ne fust venus a temps ;
Et, pour ce qu’il estoit sentans
Tout ce et n’i pooit venir,
Volt les dangiers de mer souffrir.
r parlons de Melyador,
Le chevalier au soleil d’or, f. 85 b
Qui estoit encore a Montrose,
Quant ordonnée fu la cose
Bien et biel, dou tout a son gré ;
Il traist son varlet en secré
Et dist : « Frere, je voel partir
« Car aler m’en fault, sans mentir,
« A ce tournoy qui se tenra
« Devant Tarbonne et y sera ;
« J’en defaurroie trop envis.
« Pour ce te di jou mon avis,
« Que tu t’ordonnes sus ceste oevre. »
Et Lansonnès lors li descueuvre
Et dist : « Sire, je loeroie
« Et si le vous consilleroie
« Qu’en .i. vaissiel vous mesissiés,
« Puis que vous vos ahatissiés
« D’aler la, par le roy celestre.
« Autrement vous n’i poés estre. »
Melyador bien s’i acorde.
Adonc cilz Lansonnès recorde
A la dame tout leur afaire ;
Et ceste, qui en voelt bien faire
En tous estas sa diligense,
Ne le met point en negligense,
Mais une nef leur pourveï,
Et si bien adont l’en cheï
Qu’il en y avoit une preste,
La quele de coer on li preste
Et met en son commandement.
Melyador tout erranment,
Qui ne voelt la plus sejourner,
Fait chevaus et harnas entrer
En la nef et s’i met premiers.
En ceste nef ot maronniers f. 85 c
Bons, et segurs et avisés,
Et qui scevent de mer assés
Pour aler jusques en Cartage.
Melyador, de bon corage,
Prist congiet a la jone dame,
Et li dist au partir : « Par m’ame !
« Dame, veci vo chevalier.
« Se besongne vous croist arrier,
« Soit d’empecement ou de guerre,
« Si m’envoiiés, ou que soit, querre.
« Je vous venrai tres liement
« Servir et aparlliement :
« De ce ne vous couvient doubter. »
Et Florence prist a plorer
Et dist : « Sire, .vc. mercis.
« Je pri au vrai corps Jhesucris,
« Qu’il vous gouverne et qu’il vous ait
« En garant. » A ces cops le lait
Et s’en retourne tout plorant,
Et Melyador part errant
Dou rivage sans atargier,
Et desancrent li maronnier ;
Si se mettent lors aval vent.
Ce premier jour, a leur talent,
Eurent le vent et la marée,
Dont la Saverne grande et lée
Passerent et en mer se misent.
Entrues que maronnier devisent
Entre yaus et c’a leur nef entendent,
Et que cordes tirent ou tendent,
Melyador ailleurs entent
A faire de bon sentement
Quelque cançon bonne et nouvelle,
— A ce faire nullui n’appelle. — f. 85 d
Ce fu uns rondelès jolis :
Tantost fu fais et tantost dis.
De si tres bonne volenté
Sers ma dame jolie,
Pour ce c’a lui me sui donné
De si tres bonne, etc.,
Que ja je n’en quier estre osté.
Dou tout a lui m’otrie
De si tres bonne, etc.
t quant Melyador eut dit
Son rondelet, par grant delit,
Il volt .i. aultre commencier,
Mais il l’en couvint atargier,
Car vens commença a lever
Et ces ondes a escumer,
Et maronnier a estre en doubte,
Car li vens telement les boute
Qu’il samble que tout rompre doie.
Adont se veurent sus le voie
Ancrer, pour plus a segur estre.
Mais uns vens revint a senestre,
Qui les prist moult a hustiner,
Et n’oserent adont ancrer
Pour le peril dou vent contraire.
Adont se vont aval vent traire,
Ne faire il n’en oserent el ;
Bien vosissent estre a l’ostel
Dont au matin parti estoient.
De ce vent noient n’arrestoient,
Mais s’en aloient fort ridant ;
Toute la nuit les bouta tant
Que droit au jour, quant il ancrerent,
Dedens Escoce se trouverent. f. 86 a
Adont disent li maronnier :
« Nous ne nos poons ravoiier,
« Se nous n’avons le vent pour nous. »
— « Et, monsigneur, qu’en dittes vous ? »
A Melyador on demande,
Et li chevaliers leur commande
Qu’il se traient errant a terre,
Car il ne voelt plus avoir guerre
A la mer qui l’a tempesté.
Et cil ont fait sa volenté ;
Terre ont pris, pas lonc n’en estoient.
Entrues c’a la terre arrestoient,
Lansonnès qui ne savoit u
Il estoient, dont irascu
Avoit le coer, monte a cheval.
Par tout keurt amont et aval,
Ensi c’aventure l’avoie,
Sans point trouver sentier ne voie,
Maisons, ne logeïs ne estres,
Fors que grans bruisis et genestres.
Quant il eut alé tout au tour
Et ja priès c’a lewet le jour,
Sans trouver ne femme ne homme,
Ne riens fors ce que je vous nomme,
Il retourna sus la bruiere
Et s’en est revenus arriere
Ens ou lieu dont il fu partis.
Si recorde par grant avis
Ce qu’il a trouvé et veü.
Li maronnier n’ont riens sceü
A consillier sus ceste entente,
Mais dient ensi sans attente :
« C’est bon que nous sejournons chi,
« Tant que cilz vens, qui nous falli f. 86 b
« Avanthier, nous reviegne arriere.
« Autrement, par nulle maniere
« Ne poons nous veoir esploit,
« Qui point pourfitable nous soit. »
ils isles, que vous le sachiés,
Ou Melyador courouciés
Estoit arrivés en ce jour,
On l’appelle la, ou contour,
L’isle del Men, qui vault otant
A dire et expondre en rommant
L’isle de l’Homme, et ce fu cilz,
Ensi que nous dist li escris,
Ou li rois des .C. Chevaliers
Se tint qui tant fu preus et fiers,
Mais encor de ceste ordenance
N’avoit on nulle cognissance.
Cela avint depuis, ou tamps
Que Lancelos li combatans,
Messire Yewains et Perchevaus,
Tristrans, Durmas et Gallehaus
Cerkoient partout aventures ;
De quoi ailleurs les escriptures
Parollent trop plus plainnement
Qu’en ce livre presentement,
Car il avint et fu escris
En devant de ces dessus dis.
Point n’estoit habités cilz isles
Et puis y eut maisons et villes ;
Mais cilz qui l’abita premiers,
Il fu rois des .C. Chevaliers.
La ancrerent et prirent terre
Li maronnier, au voir enquerre,
Qui estoient parti de Galles ;
Mais entre yaus n’i eut nulles galles, f. 86 c
Quant il ne sceürent bien a dire
En quel lieu il pooient gire.
r n’a ens ou bleu chevalier,
Tant en sachiés, que courecier,
Quant il voit que li jour en vont
Et nul esploit par yaus ne font.
La furent .iiii. jours entiers,
Ou fust envis ou volentiers,
Que onques li dit maronnier,
Pour cose c’on en puist priier,
Ne se porent en mer retraire,
Car il avoient vent contraire,
Mais il n’estoit mies trop fors.
Quant li quatrimes jours fu hors,
Et ce vint sus .i. venredi,
Une barge illuech descendi
De pescheours apriès herens.
Melyador, qui trop dolens
Estoit de ce que la estoient,
Et qu’ensi entre yaus arrestoient
Et ne cognissoient le lieu,
Tant parlerent, non en ebrieu,
Mais en breton biel et a point,
Que cil pescheour sour ce point
Vinrent la, avoeques lor barge.
Melyador adont leur carge
Qu’il li cognoissent verité
Et en quel lieu sont arresté.
Et cil erranment li recordent,
Qui de voir dire ne se tordent,
Et quant Melyador ot ce
Qu’il sont entre Irlande et Escoce,
Si est plus pensieus que devant.
Nonpourquant il s’est trais avant, f. 86 d
Et moult bellement leur demande,
Se ville y a petite u grande
Qui soit priès de la, on li die :
« Oïl, sire, a l’autre partie
« De la mer, y a ferme terre.
« Puis que tant en volés enquerre,
« La y sont villes et chastiaus,
« Pays grans et manoirs moult biaus ;
« Car on y labeure et ahane,
« Et si y trueve on Abredane,
« Qui siet en cest[e] aultre partie,
« Et de la sommes nous parti
« Et retourrons demain ou jour,
« Se Diex nous gard [de] deshonnour. »
— «
igneur », disent li maronnier,
« Vous alés et pour gaegnier
« Parmi la mer, si com creons.
« Avoecques nous est uns frans homs
« Qui vous paiera largement
« Assés, de milleur paiement
« Que tout li poisson ne vaurront,
« Qui de vous pris estre poront
« En .iiii. jours, bien le sachiés.
« Si vous prions que l’adreciés
« Ceste part que vous dites chi. »
Et adonques leur respondi
Li uns et dist : « C’est bien nos grés.
« En ceste barge o nous entrés,
« Chevaliers, puis que c’est pour vous. »
Melyador, qui estoit tous
Anoieus, entra en la barge.
Tout son harnois la on descarge
Et le remet on ou vaissiel.
Quant tout fu fait et bien et biel, f. 87 a
Li .i. a l’autre congiet prisent,
Puis se desancrent et si brisent
Les ondes de la mer parfonde.
Jusc’a la journée seconde
Ne partirent li maronnier
De Montrose pour traire arrier ;
Mais li pescheour lors partirent,
Qui devers Abredane tirent.
Toutdis vont costiant la terre.
Melyador leur va enquerre
Se il sont lonch de Cornuaille,
Et chil li respondent, sans faille,
Qu’il y a bien ou environ
Trois .c. liewes au naviron.
Ceste response ne plaist pas
A Melyador qui tout bas
En parolle a son escuier
Et dist : « Bien me doit anoiier,
« Quant Fortune m’est si contraire,
« Que je ne puis estre ne traire
« Pour aventure qui m’aviegne,
« Ne com bons que li temps me viegne
« A ce tournoy, devant Tarbonne.
« Pas ne parti a heure bonne
« De Montrose l’autre sepmainne. »
Lansonnès, qui point ne demaine
Ceste parolle longement,
Li respont assés doucement :
« Sire, il couvient tout en gré prendre
« Ce que temps voet saisir et rendre. »
ant ont singlet li maronnier
Aval vent, sans yaus fourvoiier,
Qu’il sont venu a Abredane,
Et dalés .i. grant pont de frasne f. 87 b
Ancrerent et se tinrent quoi.
Li pescheour, savés vous quoi,
Furent paiiet moult largement.
La prisent leur atargement
En la ville li maronnier,
Avoech leur maistre et chevalier
Qui ont congiet de li sans doubte,
La nef et leur mesnie toute.
Melyador s’est trais errant,
A .i. hostel assés manant,
Entre lui et son escuier.
Durement pooit anoiier
Au chevalier au soleil d’or ;
Il n’a mies passet encor
Son mautalent, saciés pour voir,
Quant nullement ne poet veoir
Qu’il puist au jour a Tarbonne estre,
Dont toute honneur li pooit nestre.
Souvent infortunés se claimme,
Mais ses escuiers qui moult l’aimme
Le reconforte sans attente,
De bon coer et de bonne entente.
ne heure Lansonnès li dist,
Qui d’un lés a conseil le mist :
« Sire, vous vos plaindés moult fort
« De Fortune ; vous avés tort
« A ce c’on me donne a entendre. »
Et ses mestres va lors reprendre
Ce parler et dist : « Comment dont ?
« Tu sces bien que nos voies sont
« Toutes ensus de mon desir,
« Ne tu ne poes, je croi, oïr
« Nouvelle qui me resjoïsse.
« Car, se ossi priès me veïsse f. 87 c
« De Tarbonne que j’en sui loing,
« Je seroie issus de grant soing ;
« Mais, nennil, il va au contraire. »
Lors se va Lansons avant traire
Et dist : « Sire, c’or vous taisiés ;
« C’est drois que vous vos apaisiés.
« Bonne fortune vous est née :
« A mains estes d’une journée
« Dou chastiel ou ceste demeure,
« Pour qui vous avés a toute heure
« Porté tant de maulz et de painnes.
« Ce ne sont mies coses plainnes
« De courous, quant ensi vous chiet.
« Se vous osiés mettre le piet
« Celle part, par la vertu digne,
« Ou se tient ma dame Hermondine,
« Tant que vous l’euissiés veü,
« Je tenroie a bien pourveü
« Vostre eür et vostre fortune.
« Si esçou cose moult commune
« Car bien y poriiés aler
« Et tout couvertement parler,
« Mais que vous euissiés avis. »
Melyador ot ces devis
Que Lansonnès illuec li baille ;
Si dist ensi : « Vaille que vaille
« Cilz parlers, tu m’as resjoÿ.
« Plus a de .x. jours que n’oÿ
« Parolle qui si bien m’agrée
« Et, ou cas que je m’i recrée,
« Si me di ci presentement,
« De tout ton meilleur sentement,
« Se tu dis voir u tu mençonges
« Pour moy oster de telz ensonges. » f. 87 d
— « Sire », dist Lansons, « je di voir.
« Mais que confort voelliés avoir,
« Vous verés dedens .iiii. jours
« Ceste pour qui li maulz d’amours
« Vous a duret, puis que partistes
« De Carlÿon, ou vous veïstes
« Figuré l’image en la targe. »
Adont Melyador se carge
De grant joie, et dist en riant :
« Compains, or ne va detriant.
« Pense comment ce se fera
« Que mes corps la belle vera.
« Se tu le poes ou le sces faire,
« Tu ne me poes en riens complaire
« De cose qui tant me conforte.
« Adonc sera ma dolour morte. »
— «
onseigneur », ce dist Lansonnès
« J’ai entendu par mos exprès
« Que ma damoiselle Hermondine
« Demeure et tient, et soupe et dine
« En .i. chastiel moult priès de chi.
« Montsegur a nom, je vous di.
« La tient la belle son hostel,
« Ses mesnies et son tinel ;
« Mais, tant que d’aler jusc’a la,
« A vous trop bien maniere y a
« Et grant sens ossi y couvient.
« Car je croi moult bien c’on le tient
« Et garde en ce chastiel de priès.
« La damoiselle de Montgriès,
« Qui est sa cousine germainne,
« Vous en dist auques le demainne,
« S’il vous en voloit souvenir.
« Mais, la aler et revenir, f. 88 a
« Bien y ara maniere et art,
« Car il y a trop grant regart.
« Pensés vous qu’e[lle] soit au large ?
« Nennil, voir ; mais, se je l’encarge,
« Vous y parlerés temprement.
« G’i cuide tel attemprement
« Mettre et si tres bonne ordenance,
« Que vous irés sans cognissance
« Ou manoir ou elle demeure,
« Et arés et loisir et heure
« De li veoir bien et en pais,
« Com pesans que vous soit li fais. »
Et quant Melyador l’entent,
Si demande : « Et, compains, comment
« Se pora ce par raison faire ? »
— « Bien », dist cilz, « il est necessaire
« C’on sace des tours a le fois.
« J’en sçai des bons et des courtois
« Qui vous venront moult bien a point. »
Dist Melyador : « Sus ce point
« Voel je tres volentiers entendre ;
« Or le me di lors sans attendre. »
Et Lansonnès la li devise
La maniere de la devise :
« Sire », dist il, « premierement,
« Il nous fault cangier voirement
« Nostre abit, il n’est mies doubte,
« Et prendre une ordenance toute
« Et l’estat de .ii. marcheans,
« Cotes a plois larges et grans. »
Et Melyador li demande,
Qui de ce a joie trop grande
Et qui en voelt savoir la gise :
« Lansonnet, de quel marchandise f. 88 b
« Nous vorrons nous dont entremettre ? »
Et cilz, qui bien entent la lettre,
Respont : « Ensi que jeuelier
« Qui se voelent ensonniier
« De porter ces biaus anelès,
« Ces affikès, ces fremillès,
« Par ces chastiaus et ces manoirs,
« Car vous savés, et c’est tous voirs, [13]
« Que ces dames et damoiselles,
« As queles vienent telz nouvelles,
« Sont par nature moult engrans
« De veoir tous telz marcheans,
« Et pour les jeuelès qu’il portent
« Apriès quoi elles se deportent.
« Vous en avés, et s’en querrons,
« Car or en une cité sons
« Ou gens y a de tel affaire,
« Qui au besoing les scevent faire.
« Et quant pourveü en arons,
« Devers Montsegur nous trairons ;
« Lors prenderons nouviel conseil. »
Melyador, qui en frefel
Soudainnement se resjoÿ,
Dist ensi : « Je t’ai voir oÿ
« Ossi tres volentiers parler
« C’on poroit dire ne penser,
« Et, pour l’amour de ton langage,
« Tant y ay jou bon avantage.
« Amours m’a mis et met en voie,
« Et chi le sentement m’envoie
« De faire .i. rondelet joli,
« Et tout pour l’amour de celi,
« Que tu me dis et si m’afferme
« Que je verai dedens brief terme. f. 88 c
« Le rondelet te canterai,
« De coer liet, amoureus et gay. »
Par pensée aucun bien reçoi
De la dure dolour que j’ai.
C’est tout le bien qui est en moi ;
Par pensée, etc.,
Ma dame, quant je ne vous voi,
Et pour ce a vous penserai.
Par pensée, etc.
nsi en Abredane sont
Li doy, qui une pensée ont
Qui leur tourne a tres grant plaisance.
Lansonnès erranment s’avance,
Qui d’orfevre en orfevre va,
Ou moult de jeuelès leva,
Et les acata bien et chier ;
De tous chiaus qu’il avoit plus chier
Moult en cueilla parmi la ville,
Et tant fist qu’il ot une pille
D’anelès bons et bien dorés.
A son signeur est retournés :
Se li moustre sa marchandise,
Des anelès que forment prise
Et des fremillès ne sai quans,
Et dist : « Vous serés marcheans
« Et je serai vostres varlès. »
Lors li baille les anelès
Et les met en une laiette
De blanch bois, qui bien estoit faite,
Et les fremillès a par yaus.
Or s’avise li damoisiaus
Sus l’aniel qui li fu donnés ;
Adont le regarda assés
Et li sembla encor plus riches, f. 88 d
Mieulz ouvrés, plus gais et plus frices
Que nul qu’il en euist encor,
Tant fust ouvrés d’asur ne d’or.
L’aniel a mis hors de son doy
Et dist a Lansonnet : « Je croy
« Que je vodrai donner celi
« Pour le milleur et plus joli,
« Le mieulz fait et le mieulz ouvré,
« Que nous aions encor trouvé.
« Premiers le donrai a l’estrine
« A ma souveraine Hermondine. »
Dist Lansonnès : « Vous ferés bien.
« Ce que vous avés c’est tout sien. »
Respont Melyador : « C’est voirs. »
Deux abis desgisés et noirs
Pourveï Lansonnès errant.
Quant il les eut, je vous creant
Qu’il est retournés a l’ostel.
A son signeur dist : « Il n’a el.
« Il vous fault assaiier cesti. »
Adont Melyador vesti
L’abit qui estoit pour son corps.
Lansonnès li a .i. peu tors
Sus l’espaule par desghisance
Et, quant il en voit l’ordenance,
Si dist : « Bien samblés marcheans.
« Vous escourcerés hault vos pans,
« Et vous chainderés par maniere
« Pour mieulz bociier par derriere.
« Mais vous avés trop blances mains,
« Point ne sont teles de villains ;
« Demain les vous faudra noircir
« Pour mieulz vostre cose esclarcir
« Et moustrer que villains soiiés, f. 89 a
« Et si vous faudra en vos piés
« Mettre ces sorlers a noiiaus. »
Adont respont li damoisiaus :
« Je ferai ce que tu vodras. »
Au matin ont laissiet leurs draps
Melyador et ses varlès.
Si ont pris chiaus que Lansonnès
Eut pourveü le jour devant ;
Vesti les ont par couvenant
Que trop bien se sont desgisé.
Tout ensi qu’il ont devisé
Ont fait ce jour, ne plus ne mains,
Et ont bien noircies leurs mains ;
De faire le villain se painnent.
.I. garçonnet o yaus en mainnent,
Qui trop bien y savoit le voie
Et qui dist, se Diex le convoie,
Que bien les menra au chastiel
De Montsegur. En grant reviel
Se sont mis tous troy au chemin,
Et se partirent bien matin
D’Abredane et de leur hostel,
Sans yaus descouvrir d’un ne d’el.
nsi en cel estat s’en vont
Li troi, et tant cheminé ont
Qu’il sont a Montsegur venu.
A .i. hostel, bien pourveü
De tout ce qu’il leur fait mestier,
S’en vont erranment hebergier ;
Ce fu assés priès dou chastiel.
Laiens s’aisierent bien et biel
De tout ce que il ont trouvé,
Et tout bellement ont rouvé
A leur hostesse qu’elle voie f. 89 b
Au matin la plus droite voie
Que elle pora au chastiel,
Et elle ara .i. bon jeuiel
Se elle poet tant esploitier
Qu’il puissent moustrer leur mestier
A la fille dou roy Hermont.
Et li hostesse leur respont
Qu’elle en fera la diligense.
Adont, sans nulle negligense,
L’endemain, a heure de prime,
Elle s’ordonne et si s’esprime
Pour aler au chastiel la sus.
On ne li fait point de refus :
Par tout poet venir et aler,
Sans noient priier ne parler,
Car tous les jours y fust venue
Si com celle qui cogneüe
Est laiens, il n’est mie doubte.
A .i. huis vient, .i. peu le boute ;
S’i trouva une camberiere,
Qui le rechut a lie chiere.
Ceste camberiere le mainne
Parler a tout la plus proçainne
Qui soit a ma dame Hermondine,
Qui encor fu en sa courdine.
Ceste mist la besongne avant
Et dist a sa dame, en levant,
Que la eut .i. marcheant tel,
Qui estoit venus a l’ostel
De dame Fromonde la Grise,
Le quel marcheant elle prise,
Car il a des biaus jeuelès,
Des fremaus et des anelès
Bien dorés et de bonne taille : f. 89 c
« Si veroit volentiers, sans faille,
« Ma dame, que les veïssiés
« Et que vous en acatissiés.
« Il vous en feront grant marchiet. »
Hermondine n’a point targiet
De respondre, mes dist errant :
« On le fera venir avant
« Assés tost, quant serai levée. »
Ceste damoiselle secrée
Respondi tout ce a Fromonde,
Et li dist que en tout le monde
Il n’amainne nulluy o soy :
« Fors vous, Fromonde, ou, par ma foy,
« Il n’enteroit point ou chastiel. »
Dist ceste : « Par saint Daniel,
« Je croi que ja li aie dit. »
— « Alés, n’atargiés c’un petit,
« Car lors se levera no dame. »
— « Je m’en vois. » — « Adieu, bonne fame !
« Quant arriere reteurnerés,
« Droitement chi me trouverés. »
r est Fromonde retournée,
Qui gagnera bien sa journée
A ce que je puis percevoir,
Car ja a bien fait son devoir
A parler pour le marcheant.
Melyador trouva seant
Et sen varlet d’encoste li :
« Mestres », dist elle, « je vous di,
« Vous laisserés chi vo varlet ;
« Je croi bien que vo jeuelet
« Seront vendut ains vo retour. »
Dist cilz : « Diex vous doinst hui bon jour,
« Belle hostesse, par saint François ! f. 89 d
« Tenés ; vous en arés, ançois
« Que je les vende, vostre part. »
Adonques largement l’en part
Et l’en voloit encores rendre,
Mais Fromonde n’en volt plus prendre.
Entre yaus .ii. se sont mis a voie ;
Homs ne femme ne les convoie,
Car moult bien y scet le chemin
Fromonde, qui tamaint matin
Et maint soir y avoit esté.
Il n’ont nulle part arresté ;
Venu s’en sont jusc’au chastiel.
Li portiers les a bien et biel
Recueilliés et mis en le porte :
Ce fu drois, puis c’on lor aporte.
Encores donna en entrant
Melyador, droit la errant,
Au portier .i. biel anelet.
Se dist cilz : « Veci vo varlet,
« Biaus maistres, et tres grans mercis. »
Melyador, qui fu noircis
D’abit ossi noir c’une aronde,
Va ensi que dame Fromonde
Le mainne laiens et pourmainne.
Dame Fromonde si le mainne
A l’uis de la cambre Argentine
Et la demanda s’Ermondine
Estoit encore appareillie,
Et ceste, com bien consillie,
Li dist : « Oïl, je vois vers li. »
Adonques de sa chambre issi,
Si s’est trette devers sa dame,
Et li dist tout ensi : « Par m’ame,
« Dame, veci le marcheant. f. 90 a
« Le ferai je venir avant ? »
— « Oïl, ce respont Hermondine,
« Je voel veoir, ançois c’on dine
« Quels jeuelès il nous aporte.
« Dites c’on le laist en le porte. »
Dist Argentine : « Il y est ja. »
Adont Argentine s’en va
Viers Fromonde et li dist : « Avant
« Faites venir le marcheant. »
Et Fromonde se traist arriere,
Car Melyador fu derriere,
Et dist : « Maistres, avant venés,
« Je vous pri. Point ne vous tenés,
« Mais vendés bien legierement. »
Dist Melyador : « Vraiement.
« Ossi ferai je, sans fallir. »
Adonques volt avant sallir,
Mais se hostesse le retint,
Qui tout quoi dalés li le tint.
La vinrent .iii. jones pucelles,
Moult gratïeuses et moult belles,
Qui li disent ensi : « Biau mestre,
« Moustrés nous, voires, s’il poet estre,
« Quel marchandise vous portés. »
Et cilz, qui est tous enhortés
De par son hostesse Fromonde,
Dist c’a homme ne femme ou monde
Il ne moustera riens qu’il ait,
Jusques adont que tout son hait
Et plainnement a son voloir,
En ara leur dame eü voir.
Ensi s’apaisent les pucelles.
Entrues qu’il devisoit a celles,
Evous la venue Argentine, f. 90 b
Qui l’acene et li fait .i. signe
Qu’il se traie avant, de par Dieu.
Tout troi s’en vont ou propre lieu
Ou Hermondine les attent.
Sitos que Melyador sent
Qu’il veoit devant li sa dame,
Li sans li trescange, par m’ame,
Si fort qu’il fu tous esbahis,
En regardant en mi le vis
Hermondine, la tres parfaite.
Adont a ouvert sa laiette
Et prent l’anelet tout dessus,
Ou nulle ne pensoit, ne nulz,
Ne ilz ossi, fors que grant bien,
Et riens ne savoit dou moiien,
Ne des mos qui sont ens escris.
Sitost qu’il eut l’anelet pris,
Qui fu fais par bonne ordenance,
Dessus le pavement s’avance :
« Tenés », dist il a Hermondine,
« Cesti vous donne a bonne estrine ;
« Li aultre le recateront.
« Tel usage en nostre terre ont
« Li jeuelier, certes, ma dame,
« C’a le premiere qui entame
« Les jeuiaus d’un marchant a vendre,
« Il l’en faut .i. donner et prendre.
« Si arés cesti a l’estrine. »
Adonques le prist Hermondine
Et dist : « Veci biel anelet. »
En son doy le met ; la le let.
Ciunc fois le regarda ou .vi.
Et dist : « Mestres, moult grant mercis.
« Ce vous sera li mieus vendus. » f. 90 c
Adont ne s’est pas trette ensus
Hermondine, saciés pour voir ;
Mais voelt la laiette veoir
Entre ses mains, et cilz li donne,
Qui moult douchement l’araisonne
En disant : « Souffres .i. petit.
« Cil fremillet sont moult jolit ;
« Prendés des quelz que vous volés.
« Il en y a a l’autre lés,
« Qui ne sont mies de ce tour ;
« Je ne les porte fors que pour
« Jones fillettes de .xii. ans ;
« Et s’en y a de plus pesans,
« Et qui sont de plus grant argent.
« Vous les manoiiés si tres gent,
« Et par si courtoise maniere,
« Que pucelle ne camberiere
« N’i saroit avenir vers vous.
« Tout ce ou il git miulz vos gous,
« Si le me tournés d’une part.
« Je crois assés, ains mon depart,
« Que nous en serons bien d’acort. »
Dist Hermondine : « A mon grant tort
« Seroit voir, se je n’acatoie ;
« Car pour quoi vous estes en voie
« De vendre et avés esté hui ? »
Respont Melyador : « Ce sui
« Certes, dame, et m’est grant mestier
« Que je vende, car en dangier
« Sui d’argent et vous en avés,
« Par quoi mes jeuelès arés.
« Or me dittes, par vo merci,
« S’il vous plaist cose qui soit ci. »
— « Oïl, mestres, sachiés de voir. f. 90 d
« Je voel ces fremillès avoir
« Et ces anelès d’une pille.
« Foy que vous devés a vo ville,
« Metés y fuer ou vo raisons
« Y soit gardée, et nous aions
« La denrée pour .i. denier. »
Et cilz qui se fesist priier,
Ançois dou laissier que dou prendre,
Donner les volsist et non vendre,
Respondi : « Dame, volentiers. »
Ce qui bien valoit .vi. deniers,
Et loyaument sans riens rabatre,
Il ne fist a fuer fait que .iiii.,
Tant que les damoiselles dient,
La entr’elles qui s’en derient :
« Mestres, mestres, avisés vous.
« Certes, vous feriés trop pour nous,
« Se les avions pour ce pris. »
Melyador les a repris
Et dist : « Dames, je suis si frans,
« Soit li conquès petis u grans,
« J’ay tantost fait et marchandé.
« Vostre dame m’a chi mandé,
« C’est raisons que son voloir face,
« Et que de riens ne li sourface,
« Mes jeuiaus fors encores mains.
« Espoir que tamainte et tamains
« Ne les vorroient acater. »
Elles prendent a regarder
Leur dame et dient : « Prendés tout.
« Il n’a mies chiere d’estout,
« Ne de villain ne de bregier.
« Espoir vodra il remploiier
« Ses deniers dou tout a sa guise f. 91 a
« En aucune autre marchandise,
« Ançois que de ce pays vuide. »
Hermondine, qui moult bien cuide
Qu’il soit ensi, ne plus ne mains,
Que ses pucelles a leurs mains
Taillent illuech a bonne entente,
Respondi tantost sans attente :
« Je retieng tout vaille que vaille. »
A Argente dist : « On li baille
« Tout presentement ses deniers. »
Parçonnieres et parçonniers
Eut la Hermondine en present,
Car cascune et cascuns le sent
Large, et courtoise et deboinaire.
Si dient : « Dame, il vous fault faire
« Vo grace a nous qui vous servons,
« Entrues qu’en ce point vous veons ;
« Car vous avés moult bien de quoi. »
Et elle respont : « Par ma foy,
« Vous en arés moult volentiers. »
Adont ses jolis cors entiers
Ses jeuelès illuec depart.
Melyador est trais a part,
Qui en regarde la maniere
Et Hermondine en mi la chiere,
Qu’elle ot si belle et si joieuse
C’onques cose si amoureuse
Ne fu, ce dist il, la, sur s’ame,
Que ceste est qu’il tient pour sa dame.
La le voit venir et aler,
Et a ses pucelles parler
Et a ses chevaliers ossi.
Sa contenance li plaist si
Qu’il ne vorroit aultre part estre, f. 91 b
Ce dist, n’en paradys terrestre,
Pour veoir nulle aultre figure.
Et dist bien, quant il le figure
Que sen sieuant point en la targe,
Assés priès de ceste se carge,
Et qu’elle fu loyaument faite,
Bien figurée et bien pourtrette.
Cil et celles qui la estoient
En la cambre, et qui s’esbatoient
A regarder leurs anelès,
Leurs fremaulz et leurs jeuelès
Que donné leur avoit leur dame,
Ne cuidassent jamais, par m’ame,
Que ce fust la Melyador
Le chevalier au soleil d’or,
Ne nul compaignon de la queste.
Il n’euissent point si grant feste
Demenet que il demenoient ;
Car tel commandement avoient,
De par le noble roy Hermont,
Que ne fust homs en tout le mont
C’on laiast entrer en la porte.
Mais cilz, qui le soleil d’or porte,
I entra par tele maniere
Que dit ay, et a lie chiere
Fu il la dedens recheüs ;
Car il y vint bien pourveüs
De coses que dames desirent
Et des queles entre elles rirent
Assés de son courtois vendage.
On li dist que point de damage
N’aroit apriès son paiement,
Et il respondi bellement
A cesti qui en fu cargie : f. 91 c
« Damoiselle, se Diex m’aÿe,
« Je n’i pense fors que tous biens
« Ne je ne m’en esmaie en riens. »
nsi Melyador se tient,
Qui si bellement se maintient,
Si sagement et si a point,
Que decheüs il n’i est point.
Tout cuident, privet et estragne,
Qu’il soit la venus de Bretagne
Pour montepliier son catel.
Dit li fu dou mestre d’ostel,
Que de la point ne partiroit,
Jusc’a tant que diné aroit.
Ces parlers oÿ volentiers,
Car ses cuers estoit si entiers
A Hermondine regarder,
Que il ne s’en pooit soeler
Et, quant il poet ce doulz samblant
Regarder ensi qu’en emblant,
Vis li est qu’en Paradys soit.
Et encores il ne s’osoit
Tant confiier au regarder
Pour celles qui l’ont a garder,
Qu’en aucun cas on ne perçoive
Son fait et c’on ne l’en deçoive.
Melyador illuech disna,
Qui mies en oubli mis n’a
De faire le courtois a table,
Quant il est en lieu si notable
Que il voit devant lui, as ieulz,
Celle pour qui en tant de lieus
Il a estet et travilliet,
Et maint chevalier resvilliet.
Assis fu avoech les pucelles, f. 91 d
Qui se tienent moult bien pour celles
Qui sont femmes a Hermondine,
La quele a une table disne
Et .ii. dames par desous li.
Cilz estas forment abelli
A Melyador, ce saciés.
La ne fu boutés ne saciés,
Mais servis bien et bellement
De tous mes assés largement,
Otant qu’il eut a la grant table,
Et de vin bon et delitable.
Quant on ot disné, on lava
Et puis tantost on se leva.
Lor fu Melyador paiiés,
Qui ne s’est noient esmaiiés
De prendre congiet bien et biel
A toutes celles dou chastel.
Au partir dist en soi meïsmes :
« Las ! pour quoi ci aval venismes ?
« Je cuidoie avoir tout conquis,
« Mais que je fuisse entrés en l’uis
« De ceens pour veoir ma dame,
« Mais bien sarai dire, par m’ame,
« A mon varlet que non arai.
« Haro ! comment me maintenrai
« D’or en avant, — je ne sçai voir —
« Quant je desirrai a avoir
« Le regard de la bonne et belle,
« Et point n’en verai, las ? Se elle
« Pooit savoir que je sui cilz
« Qui ai souffers tant de perilz
« Pour s’amour, et ferai encor
« Ançois que venir puisse au cor
« Des anées que je poursieu, f. 92 a
« J’en regracieroie Dieu ! »
out ensi se va lamentant
Melyador, qui a fait tant
C’a l’ostel est venus arriere.
Lansonnet trueve en la chariere,
Son escuier, qui l’attendoit.
Si tost que ses mestres le voit
Se li dist : « Compains, alons ent,
« Car j’ai acompli mon talent.
« J’ai vendu tous mes anelès,
« Mes fremaus et mes jeuelès,
« Et me fu dit que je reviegne ;
« C’est bien raisons qu’il m’en souviegne. »
Lansonnès regarde son mestre :
Si le voit trop fort pensieu estre,
Siques, pour lui servir a gré
Et pour savoir de son secré
Comment li va et comment gist,
A l’ostesse de laiens dist,
A dame Fromonde la Grise,
Qui riens sus leur estat ne vise :
« Venés, dame, prendés argent.
« Que devons nous ? » — « Non pas gramment, »
Dist Fromonde, « mon ami chier.
« Vous venistes or primes hier.
« Paiiés tout ce que vous volés. »
Lansonnès est avant alés,
Qui tire argent, et si le paie
Si largement qu’elle dist : « J’aie
« Souvent de telz hostes ceens !
« Se j’en avoie ja .ii. cens
« L’anée, je seroie riche. »
Et Lansonnès, qui fait le nice,
Prent congiet ; ossi fait son mestre. f. 92 b
Si tiennent le chemin sus destre
Pour revenir vers Abredane.
Li preus, qui mies ne se tane
De parler a sen escuier,
Par quoi mains li puist anuier,
Fait devant aler le garçon,
Qui portoit .i. biau grant plançon
C’a leur hostel avoient pris.
Lors renouvelle ses escris
Melyador, en cheminant ;
A son varlet en compte tant
Qu’il meïsmes y prent plaisance.
Toute li a dit l’ordenance,
Comment a estet receüs
Et de doulz regars pourveüs,
Qui li font savourer grant painne.
Dist Lansonnès, qui moult se painne
De son mestre reconforter :
« Or deveriés vous raporter,
« De ces regars qui sont si biel,
« Aucune cose de nouviel,
« Mieux c’onques mais, ce m’est avis. »
Et cilz, qui est si fors ravis
En pensées qu’il ne poet plus,
Dist : « Compains, li retraire en sus
« De ly me fait trop grant anoy,
« Et, par la foy que je te doy,
« J’estoie avanthier plus joieus,
« Mains pensieus et mains anoieus,
« Que je ne soie maintenant.
« Or me lay ens ou couvenant
« Ou je sui, je le te commande
« Et riens ne me di ne demande,
« Car grandement m’i plaist a estre. » f. 92 c
Et cilz qui voelt faire a son mestre
Tous ses bons, car c’est bien raisons,
Dist : « Or soit et alons, alons.
« Vous partirés de ces anuis,
« Se Dieu plaist, ançois qu’il soit nuis. »
Ensi en cel estat le laisse,
Bien saciés, une grande laisse,
Que Lansonnès riens ne li dist.
Et Melyador, qui pas n’ist
De son penser, pense et repense.
En pensant illuec il s’apense
Qu’il fera la une balade,
De coer tout pesant et malade,
Pour ce qu’il n’a mies espoir
De sa dame plus reveoir,
Se ce n’est fortune trop grande.
Adont quoi qu’il euist pesande
L’intention, il le commence
Et si bien persevere en ce
Que la balade il acompli ;
Et pas ne le mist en oubli,
Mais le recorda biel et bien
Par grant sens et par grant engien,
Quant revenus fu a l’ostel.
De la balade sont tout tel
Li parler que je vous dirai,
Ne ja ne vous en mentirai.
Je ne sçai voir li quelz eut plus d’anoi
En ce monde, ou Narcissus où moy ;
Car Narcissus si morut pour amer,
Dont li couvint sa dolour definer,
Et je languis pour ce que ne voi mie
Celle qui est et ma dame et m’amie. f. 92 d
Narcissus aussi veoit devant soi
L’ombre de li, dont il disoit, je croi :
« Que cesti ci me voelle conforter. »
Tel joie avoit adont en son penser,
Dont je n’ai point, car trop m’est eslongie
Celle qui est et ma dame et m’amie.
Or soufferai tout quanque je reçoi
Pour bien amer loyaument et en foy,
Car Amours poet trestout gerredonner
Dont ne vorrai jamais jour oublier,
Comment que soie ne tant que soit en vie,
Celle qui est et ma dame et m’amie.
e commencement jusqu’en fin,
Tout en alant sus le chemin,
Fist Melyador la ballade.
Quant il l’ot fait, si ot plus sade
Le cuer qu’il n’euist en devant.
A l’ostel sont venu a tant
En Abredane, dont il partirent ; [14]
En leur cambre erranment se tinrent
Tout doi, par tres bonne ordenance.
Melyador, qui en plaisance
Sa balade encores avoit
Et qui tout par cuer le savoit,
Tant l’avoit en soy recordé,
A son varlet, par le corps Dé,
L’a recordé incontinent.
Et Lansonnès, qui bien l’entent,
Li loe et dist qu’elle est bien faite,
Et puis li dist : « Se la parfaite
« Hermondine que tant amés,
« Pour qui dolereus vous clamés,
« Savoit or que ses jeueliers
« Fust uns si friches chevaliers f. 93 a
« Qui, pour s’amour, fesist cançons,
« Certes ce seroit bien raisons
« Que elle en euist grant merveille. »
Et Melyador, qui s’esveille
Sitost que son varlet oÿ,
De ce parler se resjoÿ ;
Atant laissierent le parler.
Melyador s’en volt raler,
Ce dist il, au bon matinet.
Largement paient le varlet,
Qui moustret leur avoit le voie
Au chastiel ; se Diex me doinst joie,
Par tout ont comptet et paiiet.
Au matin n’ont plus detriiet :
Congiet ont pris et on lor donne ;
Il se partent a l’eure bonne
Et se mettent lors sus les camps,
Tout ensi qu’il ont fait tous tamps.
Mais bien chevaucierent .v. jours
Et fisent moult de divers tours,
Ne onques dedens ce termine,
Si com li livres determine,
Ne trouverent nulle aventure,
Quele que fust, ou douce ou sure,
Qui point face a ramentevoir,
Dont trop fort en anoioit voir
A Melyador le vassal.
S’estoit il le plus a cheval
Pour les aventures trouver
Ou son corps volsist esprouver.
ous lairons de Melyador
A parler, voires, tant c’a or,
Car temprement en parlerons ;
Mais ossi pas n’oublierons f. 93 b
Le tournoy de devant Tarbonne.
I. joedi, a heure de nonne,
S’en revinrent, c’est vraie cose,
Li dit maronnier a Montrose
Qui devoient, si com savés
Et que compter oÿ avés,
Melyador en Cornuaille
Mener ; or ne peurent, sans faille,
Pour le vent mauvais et contraire.
A leur dame vont tout retraire
Leur voiage, et le grant peril
En quoi il furent et tout cil
Qu’il avoient en gouvrenance,
Et ossi par quele ordonnance,
Et quant il eurent tant waucré,
Il se trouverent tout ancré
En .i. isle dedens Escoce.
Et quant la damoiselle ot ce,
Si en fu forment couroucie
Et encores s’est radrecie
De demander as maronniers :
« Dittes moy, li dis chevaliers,
« Ou est il et ou demora ?
« Est il en liu ou il pora
« Estre au tournoy que tant desire ? »
— « Cela ne vous savons a dire,
« Dame, mais nous laiiet l’avons
« En Escoce, et si n’en savons
« Plus avant, fors tant qu’il moustroit
« Qu’il avoit le cuer moult destroit.
« Ne savons qu’il a fait de puis. »
Dist Florence : « Veoir ne puis,
« Puis qu’il a tel empecement,
« Qu’il soit au tournoy nullement, f. 93 c
« Ou tant desiroit a aler. »
Lors en laissierent le parler,
Ne plus la ne s’en demenerent
Et en aultre pourpos entrerent.
ous lairons ci, c’est vraie cose,
De l’iretiere de Montrose,
Et parlerons en bonne foy
De l’ordenance et de l’arroi
Dou tournoy, comment il se tint.
Quant li jours approça, on vint
De tous pays la ou contour.
Si se logierent tout au tour
De Tarbonne li chevalier.
Li rois Artus, pour consillier
Le duch Patris mieus a sen aise
Et faire cose qui li plaise,
Eut la envoiiés de ses gens,
Sages, songneus et diligens,
Pour ordonner d’un tel afaire
Qu’il apertenoit la a faire.
Moult y eut de chevalerie
Et de bonne bacelerie,
Tant par dedens comme dehors,
Car lonch eut courut li recors
Dou tournoy qui devoit la estre
Par tout, a destre et a senestre.
As camps chevalier se logoient,
A le mesure qu’il venoient,
Priès d’un bois, dalés une lande
Qui regarde devers Irlande
La estoient li chevalier
Qui s’appelloient estragnier,
Mais il ne s’amoustroient point
Dedens la ville ; de ce point f. 93 d
Estoient il tout consilliet.
Quant il furent appareilliet
Le jour que on deut tournoiier,
Et c’on leur ala envoiier
Dire et noncier tout clerement,
De par les dames ensement :
« O chevalier, traiiés as camps,
« Car il en est saisons et tamps
« Dou traire, et que cascuns s’acquitte,
« Tant as cops des mains c’a le luitte. »
Dont s’appareillent chevalier,
Qui ne voelent plus detriier.
Tout armé sus les chevaus montent,
A leurs vies noient n’acontent,
Mais qu’il puissent, par bien combatre,
Pris avoir et leurs corps esbatre.
n ot au dehors la cité
De Tarbonne, pour verité,
Fait carpenter sus estançons
Cambres, logeïs et maisons,
Et toutes couvertes d’aisselles.
La sont dames et damoiselles,
Des queles y a grant fuison ;
Et la devant et environ,
Sus la place qui est moult lée,
Ou il n’a tertre ne vallée,
Tournieront li chevalier.
Nulz n’a o soy son escuier :
Ensi qu’il voelt si se gouverne.
La en y [ot] de chiaus d’Iberne,
De Nor[t]hombrelande et de Galles,
Et dou royaume de Norgalles,
Ou moult a de bons chevaliers.
Quant on deubt assambler premiers, f. 94 a
Pour donner a tous cognissance
Qu’il se mettent en ordenance,
On sonna .i. grant cor d’ivore :
Tout cil qui en ont la memore,
Sevent bien que ce segnefie.
Lors veïssiés a une fie
Chevaliers partir des arrois,
Chi .vii., chi .viii., chi .v., chi .iii.,
Et s’en viennent l’un contre l’autre,
En portant espées sus fautre.
Et sitretost comme il s’approcent,
Avoech ce que de grant coer brocent,
Il se donnent grans horïons.
Ne sai pas comment porïons
Telz coses bien considerer,
Car la veïssiés reverser
Chevaliers et guerpir les selles.
La sont les ordenances belles
De veoir comment il se cachent,
Et ossi comment il s’atachent
L’un a l’autre par vasselage.
Agamanor, qui par usage,
Voet estre toutdis des premiers,
Tant est corageus chevaliers,
Va .i. chevalier encontrer.
.I. tel cop li ala fraper
De l’espée sus le hÿaume,
Que cilz, s’il deuist .i. royaume
Gaegnier, ne se fust tenus
Qu’il ne soit a terre cheüs ;
Ne say se puis se releva.
Ensi Agamanor s’en va,
Fendant les presses devant soy.
Dist Phenonée : « Voir, je voi f. 94 b
« Che chevalier biel tournoiier
« Et li gentement manoiier.
« Nulz ne dure devant ses cops. »
S’Agamanor oïst les mos
Que la belle de soi devise,
Et comment a son bienfait vise,
Il en fust encor plus vaillans
Et plus volentiers travillans.
oult fu cilz tournois biaus et gens
Et moult y eut de vaillans gens,
Car on y compta des premiers
Jusques a .cc. chevaliers :
La y ot fait devant les dames
Tamaint biel et grant esploit d’armes.
Agamanor trop bien tournoie ;
De l’espée que biel manoie
Hÿaumes et quaffes desront.
Toutes ses ententions sont
Que le pris ara pour le jour.
Il ne prent mies son sejour
En .i. lieu, mes toutdis chevauce.
Chevaliers abat et encauce,
Et les porte tous jus a terre.
Ses bras sont tel qu’il font bien guerre ;
Li plus le fuient et ressongnent.
Les dames entre elles tesmongnent
Que c’est voir li mieulz travillans,
Li plus preus et li plus vaillans,
Qui point soit veüs sus le place.
Il a encontré face a face
.I. chevalier d’oultre Saverne ;
Mais telement il le gouverne
Que puis ne tournoia ce jour.
Il n’ara pas tous seulz l’onnour, f. 94 c
Car Gratiiens est d’autre part,
Qui donne les coups et depart
Par tout, a diestre et a seniestre,
Ensi que cilz que vodroit estre
Li uns des bons de la journée.
La cose est moult bien ordonnée :
La sont cil de Norchombrelande
Contre les chevaliers d’Irlande.
Messires Tangis de Sormale
Par le tournoy chevauce et bale,
Et fait merveille de son corps,
Car il est chevaliers moult fors
Et moult bien seans a cheval.
Evous, descendant tout aval,
Dagoriset atout se route,
Qui ou fort dou tournoy se boute.
Il fiert et frape autour de li
Tamaint chevalier maubelli,
Car il estoit chevaliers grans,
Moult hardis et entreprendans
Et si a ordenance bonne.
La sont les dames de Tarbonne
Qui furent en .i. escaffaut,
Ou riens a ordonner ne fault ;
Joliement fu carpentés,
Et tout environ fenestrés
De fenestres bonnes et belles.
La sont dames et damoiselles,
Vesties de biaus draps a or.
La fu ma dame Alÿenor,
La ducoise de Cornuaille ;
Sa fille dalés lui, sans faille,
Qui bien estoit acompagnie
De belle et bonne compagnie. f. 94 d
Plus de .vixx. furent en compte
Celles qui bien scevent que monte
Honneur, car de droite lignie
En viennent ; se n’i fallent mie.
ous devés savoir qu’entre celles
Qui la sont, dames et pucelles,
Nature a mis trop plus de grasce
A celle qui toutes les passe,
Ma damoiselle Phenonée,
Qui la y estoit ordonnée
En si friche et si noble arroy,
Comme elle fust la fille au roy
D’Escoce ou encor .i. plus grant.
Et bien savoit, je vous creant,
Que belle estoit, et grande assés,
Et pas n’estoit ses temps passés
D’amer, mes commençoit or primes.
Encor fera faire des rimes
Et des cançons pour sen amour.
Ses peres qui amoit honnour,
Li vaillans dus de Cornuaille,
Estoit en l’escaffaut, sans faille,
Et non pas trop lonch de sa fille.
Entre yaus .ii. tiennent leur concile
Des preus chevaliers que la voient
Et li quel vaillamment tournoient,
Dont c’est grant plaisance au veoir.
Li dus fait moult bien son devoir
Dou regarder et dou jugier,
Et quant il voit .i. chevalier
Passer qui li plaist en regart,
Si dist ensi : « Se Diex me gart,
« Vela .i. chevalier adroit.
« Ne sai se ma fille vodroit f. 95 a
« Amer par amours .i. tel corps.
« C’est bien mes gous et mes acors,
« D’or en avant, qu’elle commence ;
« Car elle en vient de le semence
« Et par amours pris jou sa mere,
« Qui n’est ne dure ne amere,
« Et encor nous amons otant
« De l’un l’autre, savons bien tant,
« Que le premier jour que ce fu. »
Lors demande a Phenonée : « U
« Avés vous or, ma fille, assis
« Vostre coer ? J’en voi ci telz .vi.
« Qui sont bien tailliet c’on les aime. »
Et ceste, qui jone se claime,
S’escuse et dist que point n’i pense,
Et s’elle met sa diligense
A jetter ses yex hault et bas,
C’est tant seulement ses esbas
Pour savoir se jamais veroit
Son frere, ne cognisteroit.
Ensi Phenonée s’escuse,
Mais ses cuers d’aultre façon use ;
Elle en a plus chier .i. que cent,
Car elle au regarder entent
La ou gist ses cuers et ses gous.
Elle en a plus chier .i. que tous,
Ce dist elle en soi, tout en bas :
« C’est cilz qui a les rouges draps
« Et qui porte une blance dame. »
La se tient ses regars, par m’ame,
Et aroit plus chier qu’il euist
L’onneur, et plus ne le veïst,
Que nulz autres qui soit en place.
Ensi a par soy se solace, f. 95 b
Et li chevalier s’esbanoient
Qui se lassent et qui tournoient
As espées moult radement,
Espris de tres grant hardement.
nsi cilz tournois se poursieut ;
Mais, cui c’Aghamanor consieut,
A plain cop il le met a terre.
Monsigneur Tangis va requerre
De l’espée moult aigrement,
Et cils qui fu joliement
Armés et montés a cheval
L’attent a chiere de vassal,
Car il estoit et durs et fors,
Bien fait de membres et de corps ;
Sur son cheval est enfourciés,
Ce samble qu’il y soit forgiés.
Quant cil doi l’un a l’autre viennent,
Des bonnes espées qu’il tiennent
Se donnent moult grans horïons.
Agamanor fu drois et lons,
Et chevaliers de belle taille
Et si bien tournïans, sans faille,
Qu’il n’i avoit riens c’amender.
Bien scet qu’on le poet regarder
Des fenestres qui sont lassus,
Et qu’il n’est mies trop ensus
Des dames et des damoiselles.
Au travers prent par les asselles
Monsigneur Tangis et l’estraint
Telement que point ne remaint
A cheval, mes jus il le porte.
Au relever fu la moult forte
La bataille, de toutes pars.
Phenonée, qui ses espars f. 95 c
Avoit de tous sens ou tournoy,
A veü celi devant soy
Qui si faiticement tournie
Et qui les chevaliers manie,
Telement et si durement
Que nulz volentiers ne se prent
A lui, qui eschiever le puist.
Ses affaires pas ne le nuist,
Et dist qu’il est drois chevaliers,
Telz qu’il doit estre, fors et fiers,
Bien tournïans oultre l’ensengne.
Ne scet se de la Grant Bretagne
Est issus ou d’aultre pays,
Mais il li vient en son avis
Certainnement que c’est ses freres.
Moult recommende les materes
De li et tout ce que cilz fait,
Car il tournoie bien au het
De lui et des aultres pucelles,
Des dames et des damoiselles,
Et y fait d’apertises plus
Et des armes ne face nulz.
nsi Phenonée en son cuer,
Qui cuidoit bien estre la suer
De ce chevalier tournoiant,
S’en va tout merancoliant,
Mais voir ceste merancolie
Est amoureuse et moult jolie ;
Assés legierement s’en passe.
Agamanor n’a pas la grasce
De Phenonée seulement,
Mais l’a de tous chiaus proprement
Qui tournoient et qui le voient.
Li bon chevalier qui savoient f. 95 d
La les dames qui les regardent.
Saciés que pas ne se retardent
De ferir et frapper avant.
Or est revenus, au devant
D’Agamanor, Droomedès,
Li quel avoech Dagorisès,
Estoit partis pour la journée,
Et vous di que la ajournée
Est bataille de grant affaire.
Cascuns scet bien ce qu’il doit faire :
De l’espée biel manoiier.
Dames les voient tournoiier
Moult fricement, car ou regart
Droit d’elles sont, se Diex me gart ;
Si en prisent moult l’ordenance.
Aghamanor .i. peu s’avance,
Qui voelt c’on parolle de li,
Et fiert de l’espée celi
Qui fu Dreomedès nommés
.I. tel cop que tous estonnés
Cheï le chevalier a terre,
Et adonques, pour reconquerre
Son cheval et li remonter,
Veïssiés chevaliers bouter,
Presser, ferir, lever les bras.
La n’avoit mestier nul homs cras,
Ne qui bien ne portoit alainne,
Car la presse y est si villainne,
Que on ne voit el que fumiere.
Dagorisès en la lumiere
Dou hÿaume fu la ferus,
Mais dou cop ne cheï pas jus,
Ains se tint bien et fricement.
Moult se maintienent richement f. 96 a
Li chevalier, il n’est pas doubte.
Nulz les horïons ne redoubte,
Mais chevaucent toutdis avant,
En ferant et en tournoiant,
Et en faisant plusieurs merveilles
A qui nulles n’ont les pareilles.
essires Tangis de Sormale
Le cheval esperonne et a le
Entente qu’il voelt tournoiier.
Encontré a .i. chevalier
Grant et fort, et de belle taille.
De l’espée tel cop li baille
Qu’il le porte jus dou cheval.
La n’avoit ne terme ne val,
Mais fu la terre toute onnie.
Messires Tangis biel tournie
Devant les dames de Tarbonne,
Et le bon cheval esporonne
Qui dessous lui bien se remue.
Pas ne se tienent trop en mue
Li bon chevalier d’autre part ;
Li aucun sevent moult bien l’art
De tournoiier biel et a point.
Agamanor a ces cops point
Le cheval, et par ordenance
Dessus .i. chevalier s’avance,
Qui estoit nommé Agrapars.
Doubtés estoit de toutes pars
Pour les horïons qu’il donnoit,
Mais chilz qui moult bien s’ordonnoit,
Li quelz Agamanor s’appelle,
D’un cop li fit guerpir la selle
Et ceoir jus en mi la prée.
Ceste jouste forment agrée f. 96 b
A Phenonée, ce saciés.
La dist que cilz venra a chiés
Dou tournoy, qui si biaus cops baille :
A ce n’i ara point de faille.
i dus Patriz a sa fenestre,
Ensi c’uns grans sires doit estre,
Estoit et droit la s’apoioit.
Le tournoy devant lui veoit,
Qui estoit fors oultre l’ensengne ;
A ciés de fois moustre et ensengne
Les mieulz tournïans a sa fille.
Ossi en tiennent leur concille
Les dames et les damoiselles.
La fu pris dessous les aisselles
Uns chevaliers de Normendie
Dou preu Gratiien d’YtaIie,
Qui savoit moult bien tourniier :
Telement le va maniier
Que jus a la terre le porte.
En Gratiien n’est mies morte
Proece. A ce qu’il se demainne,
Bien moustre qu’il a bonne alainne
Et qu’il poet bien .i. fais porter ;
Car, sans li en riens deporter,
Tous jours en la presse se tient
Et moult gentement se maintient,
Tant qu’il en a et grasce et vois.
Daghorisès, a ceste fois,
L’a encontré tout en venant,
Et la eut par bon couvenant
Belle bataille de ces deus.
Moult estoit vaillans li mains preus :
Par force les fist on partir
Et as espées departir ; f. 96 c
Car si fort s’estoient ahert,
Ensi que cil qui sont couvert
De proece et de grant vaillance,
Que jamais de ceste ordenance
Ne fuissent parti nullement
Sans yaus grever trop malement,
Se ne fuissent et .i. et aultre,
Qui portent espées sus fautre,
Les departirent a plains cops.
Ce jour n’est donnés nulz estos ;
Mais tourment moult vaillamment,
En maniant moult gentement
Les espées, ensi c’on doit,
Pour ferir amont a leur droit
Dessus les hÿaumes d’acier :
Ensi s’esbatent chevalier,
Qui sont amoureus et joli.
Phenonée voit devant li
Agamanor qui fait merveilles,
Et dist : « Ces parures vermeilles
« Passeront au jour d’ui la route. » [15]
La est mise s’entente toute
Au regarder parfaitement,
Et le prise moult durement
Plus que nul chevalier qui soit
Sus le place et voit. On le doit
Bien recommender pour ce jour,
Car onques ne fist nul sejour
Qu’il ne fust toutdis tournïans
Entre les plus fors et plus grans.
out ensi se continua
Cilz tournois, qui pas n’anoia
As dames et as damoiselles.
Maint chevalier fist on les selles f. 96 d
Vuidier et cheoir entre piés.
La en y eut de mehagniés,
De batus et de fourmenés,
Des plus grans et des plus senés,
Et estains par faute d’alaine.
Ensi furent en celle painne
La grignour partie dou jour.
Quant ce vint, sus fin de l’estour,
Que li vespres fort approçoit,
En la loge ou li dus estoit
Et la ducoise avoech leur fille,
Phenonée la tres gentille,
On sonna le cor de retraitte.
Depuis n’i ot espée traitte,
Ferut, ne batut, ne lanciet ;
Mais se sont retrait piet à piet
Li chevalier des logeïs,
Et adont se sont entremis
Li varlet qui les vienent querre.
Si en truevent pluiseurs a terre
Mors, navrés et en petit point,
Mais la il ne les laissent point :
Les blechiés ont mis en litiere
Et puis les reportent arriere
Dedens la cité pour garir,
Et les mors vont ilz enfouïr.
Ensi se debatent pour lors.
Que fist li preus Agamanors,
Quant il vit que cescuns partoit ?
Encores sus le place estoit ;
Ilz se part tout secretement.
Au devant li vint prestement
Bertoulès, ses bons escuiers.
Ensi as aultres chevaliers f. 97 a
Tout leur escuiers revenoient
Et leurs mestres en remenoient
Ou lieu dont il furent parti.
Agamanor en ce parti
D’armes, si com vous ai conté,
A tant avalé et monté
Qu’il revint a son logeïs,
Qui fais estoit de foelleïs,
Car c’estoit ens au mois de jule.
Li dus Patris sus une mule
Est montés, et sa femme atent
Et sa fille ossi au corps gent,
Les dames et les damoiselles.
Palefrois et moult bonnes selles,
Si com la coustume estoit lors,
Ot on ordené pour leurs corps.
Si monterent sans detriier,
Et chevalier et escuier,
A plus de .cccc. chevaus.
Sans menestrelz et sans hiraus
Est li dus rentrés en Tarbonne ;
Adonques dou tout on ordonne
Pour souper dedens le chastiel.
Damoiselles et damoisiel
Se remettent tantost a point,
En draps que il n’avoient point
Vestit, quant au tournoy alerent.
Les dames entre elles parlerent,
Cui par avis pour le milleur
On tient qui en ara l’onneur
De ce pris et de ce tournoy.
Li plus s’acordent a l’otroy
Du chevalier armé vermeil,
Mais on y retient le conseil f. 97 b
Encores dou bon duch Patris.
Ou chastiel fu li souper pris,
Qui fu grans et bien estoffés.
Or vous dirai, se vous volés,
D’Agamanor quel cose il fist.
A Bertoulet son varlet dist :
« Compains, trop volentiers iroie
« Lassus ou chastiel, et veroie
« Les festes que on y tenra.
« Je te di : nulz ne m’y verra,
« Qui ja m’i doie recognoistre. »
Et cilz, qui li voloit accroistre
Son pourpos et non pas brisier,
Li va moult grandement prisier
Et dist : « Sire, vous ferés bien,
« Mais je vous pri, sur toute rien,
« C’as danses point ne vous prendés.
« Se le faisiés, or m’entendés,
« Vous y seriés recogneüs
« Et par cel estat deceüs.
« Tenés vous toutdis en la presse. »
Dist Agamanor : « Or te cesse,
« Et de moy n’aies plus de songne.
« Je ferai moult bien la besongne
« Espoir mieulz que je ne saroie
« Deviser, ne sens n’en aroie. »
gamanor atant se part
Et si s’en va de celle part,
Viers la cité, la droite voie.
Ses varlès .i. peu le convoie
Et puis si s’est retrais arriere,
Car il avoit laissiet derriere
Ses chevaus qu’il couvient garder.
Agamanor, sans retarder, f. 97 c
S’en est venu a la cité.
On ne lui a riens demandé
Ou il va, car tout trueuve ouvert.
On avoit ou chastiel couvert
Pour souper, quant il y entra.
Adont a l’un lés se bouta,
Tant que dames et damoiselles,
Par ces tables bonnes et belles,
Furent assises au souper.
La les pooit bien regarder :
Si fist il, saciés vraiement,
Tantost, sans nul delaiement.
Quant on ot soupé, on leva.
Agamanor adont s’en va
O les dames en une cambre
Qui estoit listellée d’ambre.
Toutdis se tenoit en le presse :
Sitost c’on le presse, il represse ;
Il en scet moult bien l’ordenance.
La entent toute l’attemprance
Dou pris donner ; comment on dist
Et sus lequel dou tout il gist.
C’est li consaus et li acors
Que, de tous chevaliers dehors
Et qui tournoiiet a le mieus,
Point n’est nommés, si m’aÿt Diex,
Fors que cilz as armes vermeilles ;
Car pour le jour a fait merveilles.
C’est cilz qui ne poet avoir blasme,
Qui brise d’une blance dame
Ses armes, ensi c’on le crie.
Adont n’a pas talent qu’il die :
« Vemeci, que demandés vous ? »
Nennil ! mais lait toutes et tous f. 97 d
Passer, et de la cambre issir
Et en la sale revenir.
Fenonée le faucon porte,
Et hiraut crient a vois forte :
« Le pris au rouge chevalier,
« On ne le puet miulz emploiier ;
« Tournoiiet a oultre mesure.
« C’est cilz qui, par bonne aventure,
« A hui fait d’armes plus que nulz.
« Il faut que li bons rois Artus
« En soit temprement enfourmés.
« Le pris ! Le pris ! Nommés ! Nommés !
« C’est voir le chevalier c’on prise,
« Qui ses rouges parures brise
« Seulement d’une dame blance.
« Il a hui passet ordenance
« De tournoy, par son hardi corps.
« C’est li assens et li acors
« Des dames et des damoiselles,
« Des chevaliers et des pucelles,
« Que li faucons li demorra ;
« Mais, pour ce c’on ne le pora
« Avoir, ne ossi on ne scet
« S’il se tient es bois ou en pret,
« Il sera portés temprement,
« Dit est par bon attemprement,
« En la court dou tres noble roy,
« Et la contera on l’arroi
« Dou chevalier au quel li pris
« Est de droit donnés et escris. »
uant on ot ensi demené
Le pris, et venu et alé,
En la salle et ens ou chastiel,
On remist a perce l’oisiel, f. 98 a
Et puis pipent li menestrel.
Si s’esjoïssent en l’ostel
Cil et celles qui ont deduit,
Et la ont le plus de la nuit
Dansé signeur et dames toutes,
Par compagnies et par routes,
Ensi qu’il leur venoit a point.
Et saciés qu’il n’ont cessé point
Toute la nuit de solas faire.
Agamanor prent en l’afaire
De Phenonée grant plaisance :
Il regarde sa contenance,
Son joli corps et sa façon.
Si dist ensi, sans quisençon :
« Par Dieu, dame, vous valés bien
« C’on vous aime sur toute rien ;
« Car plus belle de vous ne sçai.
« Avis m’est que pour vous assai
« D’amours .i. dart et tel assaut.
« Ne sçai si je pense trop haut,
« Mais pour vostre amour vodrai estre
« Bons chevaliers, pour mon corps mettre
« En aventure d’estre occis,
« Et si en rent .vc. mercis
« Au dieu d’Amours, quant il me fait
« Penser a vous, qui tres parfait
« Cors et maintien avés sur toutes. »
Adont se desrompent ces routes
Et commencent a caroler :
La veïssiés moult bien aler,
A ces caroles qui sont belles,
Signeurs avoecques damoiselles.
Agamanor, qui en la presse
Estoit, voit c’une dame presse f. 98 b
Au canter, de bon sentement,
.I. rondelet presentement,
Qui fist les aultres resjoïr.
Le rondelet porés oïr.
Ou que je soie, doulz amis,
N’aiés ja doubte de moi.
Mes coers n’iert ja de vous partis,
Ou que je soie, etc.
Je vous seray loyaus toutdis,
Et vous jure par ma foy,
Ou que je soie, etc.
antost reprist uns chevaliers
Au chanter, qui fu biaus parliers,
Frices, gracieus et courtois,
Et canta a jolie vois
Qui fu moult volontiers oÿe.
Et lors se taist la compagnie,
Quant cilz commença a canter,
Jusques a tant qu’il pot cesser.
Tous en est au coer resjoïs
Agamanor, quant a oÿs
Parlers si doulz, et dist sus s’ame,
En regardant dessus ma dame
Phenonée, qui tant est belle :
« Au coer me point une estincelle
« D’Amours, qui point ne me faudra.
« Las ! cilz maus souvent m’assaudra,
« Et si n’en sarai ou avoir
« Confort. Certes, je di tout voir,
« Car, par le monde travillant,
« Je m’irai moult esmervillant,
« En pensant a la belle et bonne,
« Que j’arai veü a Tarbonne, f. 98 c
« La fille au vaillant dus Patris.
« Mes cuers y sera tous espris
« Et point ne le porai veoir,
« Ne ensieuant faire a savoir
« Comment espris sui par s’amour.
« Ensi sui entrés en labour,
« Plus grande encor que je ne pense. »
Li chevaliers, qui en presence
Est et qui cante bien et biel
.I. jolit et plaisant rondiel,
D’Aghamanor ne se prent garde
Que ce soit cilz qui de la darde
D’Amours est ferus et atains,
Et qui a esté souverains
Des chevaliers de ce tournoy.
S’il le seuist en tel arroy
Et si priès de li, je me vant,
Il l’euist fait passer avant.
Mais Agamanor, sachiés bien,
Ne le volsist pour nulle rien,
Ançois se cuevre et si se boute
Toutdis ou plus fort de le route,
Et entent ce c’on dist et cante.
Bien a retenu, je m’en vante,
Le rondelet dou chevalier.
Il ne fait pas a oubliier,
Car il est jolis et courtois
Et chantés d’une belle vois.
Mon coer est lié plus c’onques mes.
De ce, dame, je vous merci.
Car c’est pour vous qu’il est en pais.
Mon coer est lié, etc.
Comment qu’il soit en dis, en fais, f. 98 d
Vostre demeure, et pour ce di :
Mon coer est lié, etc.
ors que li chevaliers ot dit,
On se cessa .i. bien petit
Et menestrel saillent avant,
Qui reprendent ce que devant
Avoient laissiet, ce m’est vis.
Adont sallent chevalier .vi.,
Qui les danses lors recommencent
Et les presses en alant fendent :
Ensi s’esbatent toute nuit.
Agamanor en ce deduit
S’est oubliiés jusques au jour,
Car tant se plaist en ce sejour
Que jamais n’en volsist partir.
Sus le jour il ala issir
De la presse, et se trest arriere ;
Si a rapassé la barriere
De la presce qui fu ouverte.
Ensi s’en vint a le couverte,
Ens ou bois, a son logeïs.
Bertoulès en fu resjoïs,
Lors que il le vit revenu.
La ont grant parlement tenu
De la feste et de l’esbanoi.
Ce dist Agamanor : « Par foy,
« Bertoulet, j’ai trop bien ouvré,
« Et si m’as bien servi a gré,
« Quant tu t’accordas a la voie
« Ou j’ai pris et solas et joie. »
Et adonques il li raconte,
De mot a mot, trestout le conte :
Comment dedens la cambre il fu
Avoecques les dames, et u f. 99 a
Li pris fu jugiés et donnés,
Et puis en la sale apportés
Des dames et des damoiselles,
A trompes, et a canemelles
Et a toutes menestraudies :
« Mais je voel que tu estudies
« Sur ce que te dirai encor,
« Car j’ai moult grant mestier desor
« Que je soie bien consilliés,
« Car tout pres et apparilliés
« M’est uns assaus qui me tenra
« Tant que ceste queste durra. »
— « Quelz est il ? » ce dist Bertoulès,
— « Certes, compains, il est si fès
« C’uns drois amans le doit entendre.
« J’ai veü la belle et la tendre,
« La fille au noble duch Patris.
« Mais ou coer m’est ses cors escris,
« Ses biaus maintiens, sa contenance,
« Et pris y ai si grant plaisance
« Que j’en sui partis tous navrés. »
Ce dist Bertoulz : « Sire, souffrés.
« Grant temps a que j’ai oÿ dire
« C’on ne poroit en .i. empire
« Point trouver plus belle de li.
« Et quant votre oel sont la salli,
« Vous en devés moult joieus estre ;
« Car par ce en ferés vous nestre
« Doubles proeces en vo corps.
« Or faites tant que li recors
« De bien faire et de vasselage
« Voist jusques a la belle et sage,
« Pour quoi estes enamourés.
« Si en serés plus honnourés ; f. 99 b
« Car riens ne vault en gentillece
« Chevaliers, s’il n’a grant noblece. »
Et Agamanor li respont
Que toutes ses pensées sont
A ce qu’il puist telz devenir
C’on le puist pour .i. preu tenir ;
Telz fera, c’est cose certaine
Ou il demorra en le painne.
nsi se tient, a celle fois,
Aghamanor dedens le bois,
Qui parolle a son escuier,
Pour lui .i. peu esbanoiier,
Dou grant travel qu’il a empris,
Qui si li est ou coer escrips
Qu’il ne s’en partira jamais.
Et li solaz telz et si fais
Que vous avés oÿ compter
Est ou chastiel, c’on doit loer,
Toute la nuit jusques au jour
N’i eurent arrest ne sejour.
D’esbatre et de grant joie faire.
Se de tout voloie retraire
Trop longement y metteroie.
Trois jours furent en celle joie,
En .iii. nuis plainnes et entieres,
Dames et damoiselles chieres,
Et ossi jone chevalier
Qui ne voelent que festoiier.
Bien est certain que Phenonée,
Qui fricement fu ordenée,
Une pensée si le point :
De ce ne l’osteroit on point
Et dist en son avision,
Par bonne imagination, f. 99 c
Que cilz qui le pris conquis a,
Et qui si tres bien se porta
Au tournoy et si vaillanment,
Est ses freres certainnement.
Trop bien li plest a sa samblance
Li devis de la dame blanche,
Et dist que, pour l’amour de li,
Elle en portera une ossi
Et fera .i. droit chevalier
Sans entremuer ne cangier,
Ce dist, la devise a son frere,
Fors tant que cilz, c’est cose clere,
Qui son chevalier se tenra,
Sa blanche dame portera
.I. blanch faucon pour la brisure,
Et otant bien pour la droiture
Dou pris que conquis a ses freres.
Mais il fault toutdis que ses peres
Li consente tout ce a faire.
Phenonée, sus cest affaire,
S’en est a son pere venue
Et moult doucement le salue,
Et li dus Patris, qui bien l’aime
Et qui belle fille le claime,
Voit tantost qu’elle voet priier.
Se li a dit, sans detriier :
« Que vous plaist il, ma belle fille ? »
— « Certes, monsigneur, je sui cille
« Qui vous prie, de tres bon coer,
« Que je puisse, ensi que la soer
« De Melyador mon chier frere,
« Poursieuir de tant sa matere
« Que de sa devise porter ;
« En ce me vodrai deporter. » f. 99 d
Adont respont li dus Patris,
Qui en joie a ce parler pris :
« Ma fille, et quele devise esce ?
« Encor ne le cognois point je ;
« Si le saroie volentiers. »
Dist Phenonée : « Sire chiers,
« Cilz chevaliers armés de rouge,
« Qui n’a mies fait le harouge
« Au tournoy, mais moult le vaillant,
« Le porte, selonch mon samblant.
« Nulz ne m’en diroit le contraire.
« Point ne l’ay veü ou viaire,
« Mais il est de la propre taille
« Melyador de Cornuaille,
« Dou grant, dou fait et de l’emprise.
« Certes, monsigneur, je le prise
« Ensi c’on doit prisier son frere,
« Et pour tel je le considere
« Et c’est ce qui le coer m’entame,
« Car il porte une blanche dame
« Pour l’amour ma dame Hermondine. »
Li dus, a ces mots, imagine
Les parlers de sa fille belle ;
Si prent en gré ceste nouvelle,
Et dist : « Fille, a vo gré en soit.
« Ne sai se tort avés u droit,
« Mais ja ne le vous quier debatre,
« Pour vo corps en tous biens esbatre. »
nsi se part a ceste fie
Phenoné[e], toute esjoÿe,
De son pere le duch Patris.
Or a ceste devise pris,
La quele Agamanor si porte.
Ses coers li semont et enhorte f. 100 a
Que c’est ses freres vraiement :
De ce ne voelt aucunement
Issir, ne de ce bon pourpos.
Elle fist ordener tantos
Une cambre apriès la devise :
En .i. camp vermeil, quant g’i vise,
A fait mettre une blance dame.
Encores a mis sus, par m’ame,
.I. chevalier jone et joli,
Moult corageus et moult hardi.
Par sen nom l’appella Lyone,
Pour ce qu’elle le vit ydone
En armes et en gentillece,
Et tailliet d’acquerre proece.
Elle li dist : « Vous en irés,
« Lyone, et de ci partirés,
« Cercant par tout les aventures
« Et porterés teles parures,
« De quoy j’ay la devise empris.
« Dittes par tout, pour avoir pris,
« Que vous estes, sans avoir blasme,
« Chevaliers a la blanche dame.
« Et se vous venés ja en place,
« Ou vous puissiés veoir en face
« Le chevalier a descouvert,
« Au quel ceste devise sert,
« Si l’examinés ci avant
« Que vous sachiés son couvenant,
« Se c’est Melyador mes freres,
« Et li recordés les materes
« De mon fait, et par quel argu
« Jou ay encargiet son escu. »
Et Lyones respont : « Ma dame,
« Tout ce que me cargiés, par m’ame, f. 100 b
« A mon pooir je le ferai
« Ou en la place demorrai. »
epuis ne demora granment
Que Phenonée vraiement,
Pour acomplir son desirier,
Fist armer le blanc chevalier,
Monter et partir de Tarbonne.
Ce puist ore estre a l’eure bonne
Que messires Lyones part !
Il s’en chevauce celle part
Ou li aultre chevalier vont
Devers Norchombrelande. Adont
Moult estoit gentement armés ;
Le premier jour qu’il est sevrés
De Tarbonne, saciés pour voir,
Jousta il au chevalier noir,
Et le porta moult dur a terre
Et le conquist de belle guerre,
Tant que bien en ot cognissance
De puis la jone dame blanche ;
Car li chevaliers se vint rendre
A lui pour ses armes reprendre,
Ne il ne se pooit armer
Se Phenonée, c’est tout cler
Ne l’en donnoit grasce et congiet.
Ensi a moult bien commenciet
Li chevaliers a Phenonée,
Quant en la seconde journée,
Que par dedens la queste entra,
Le noir chevalier encontra ;
Il le mata et desconfi,
Ce devons nous savoir de fi.
r recordons d’Agamanor,
Car mies n’avons dit encor f. 100 c
Comment il issi dou biau bois,
Le secont jour que li tournois
Eut esté par devant Tarbonne.
Il parti a heure de nonne
Entre lui et son escuier,
Et peurent en ce jour puier
Une montagne, moult tres roide
Et qui est en temps d’ivier froide,
Qui leur fist au monter grant painne.
Au piet avoit une fontainne,
Ou il vinrent ce soir jesir,
Ne il ne sceurent ou dormir
Fors entre bruissis et genestres ;
Ensi li varlès et li mestres
Passerent la nuit jusc’au jour.
Adont monterent sans sejour
Et prisent .i. aultre chemin.
Chevauciet ont tout ce matin
En une lande grande et lée.
Droitement sus une vallée
Ont il trouvé .i. chevalier
Que on appelloit Corbilier ;
Grandement faisoit le harouge.
De blanc a .i. quartier de rouge
S’armoit de targe et de parures ;
Moult bien fu en ses armeüres
Aprestés et de bonne taille.
Bertoulès a son mestre baille
Sa lance, sitost qu’il le voit ;
Messires Corbiliers avoit
Ja pris la sienne, ce me samble.
Tantos vodront jouster ensamble,
Car il esporonnent tout doy
Et s’en viennent par bon arroi f. 100 d
Moult fierement l’un contre l’autre,
En portant les lances sus fautre.
Ferus se sont sus les escus,
Sans metre detri ne refus,
Des lances a bons fers trencans.
Li chevaliers, qui estoit grans,
Biaus de fourme et de fier encontre,
Agamanor si roit encontre
Que sa lance brise en tronçons.
Onques n’en perdi les arçons
Agamanor, mes bien se tint ;
Dessus le chevalier s’en vint,
Et le feri par tel maniere
Qu’il le porta jus par derriere.
Si roit cheï dessus la lande,
Par dalés une pierre grande
Qu’il ne peut ravoir sen alainne.
Demorés fust en celle painne
.I. jour ; mes Bertoulès vint la,
Qui le chevalier appella
Et li dist, illuech en gisant :
« Chevaliers, .i. cop moult pesant
« Avés vous donné a mon mestre.
« Mais, dittes, comment vous poet estre ?
« Estes vous navrés ne bleciés ? »
Et cilz, qui estoit tous cangiés
Dou dur cop qu’il ot receü,
Repondi lors qu’il l’a veü,
Et dist : « Compains, il me va mal.
« Voelliés moi rendre mon cheval ;
« Si ferés courtoisie grande.
« Tout souef irai ceste lande
« Tant que trouverai .i. manoir,
« Et la vodrai jou remanoir f. 101 a
« Jusc’a tant que garis serai. »
Bertoulès dist : « Je le ferai
« Volentiers, par l’ame mon pere ! »
Lors se part sus ceste matere
Et chevauce apriès le cheval
De Corbilier qui en .i. val
Paissoit et estoit arrestés.
Bertoulès, com tous aprestés,
Prent le cheval et le ramainne
Et fait monter a moult grant painne
Le chevalier qui bleciés fu ;
Et puis se li rent son escu,
Et son hÿaume li deslace.
Agamanor, qui se solace
A regarder la contenance,
Vient droit la, par bonne ordenance,
Pour faire encor une escremie,
Mais ses escuiers li escrie
Et dist : « Vous n’avés chi que faire.
« Bien voi, c’est cose necessaire,
« Ce chevalier faut reposer
« Avant qu’il puist jamais jouster,
« Tout ce vous di jou pour certain. »
Agamanor depuis la main
N’i euist mis, pour nul avoir.
La ne vorrent plus remanoir,
Mais sont rentré en une voie,
Qui devers .i. bois les avoie ;
Et messires Corbiliers part
Qui s’en va ossi, aultre part,
Chiés soi ou en aultre maison
Pour penser de sa garison.
Et Agamanor, ce saciés,
Lors que de li fu eslongiés, f. 101 b
Desirs et sentemens li vinrent,
Qui en .i. tel pourpos le tinrent,
Dou quel onques ne se parti,
Si ot .i. virelai joli,
Fait et chanté par grant plaisance.
Je vous en dirai l’ordenance.
J’ai en mon coer si fort enté,
Dame, vostre tres grant biauté,
Qu’il m’en souvient, et jour et nuit,
Et a bon droit, car tout mon bien
Me vient de vous, sans faillir rien.
C’est ma plaisance et mon deduit,
C’est tout mon eur en verité.
Pour ce ne poet en moi venir
Anui, tristrece ne tourment,
Ne nulle riens de desplaisir,
Dont je voel vivre liement.
Si doit ce jour estre prisé,
Que premiers a vous me donné.
S’en lo Amours qui m’a conduit
Dou tout en tout au voloir mien.
De ce, pour voir, eureus me tien,
Car certes tout anui me fuit :
Ce me vient de vo grant bonté.
J’ai en mon coer, etc.
Or vous voel je toutdis servir
De parfaite foy, loyaument,
Et ferai voir vostre plaisir
De tres bon coer entierement,
Que je m’ai a ce ordonné
Que jamais jour ne le leré ;
Car bonne amour a ce me duit,
Qui me lie d’un tel liien f. 101 c
Que vostres sui sans nul moiien :
Si n’en sai fors que a vous gré.
J’ai en mon coer, etc.
nsi chevauce Agamanor
Sus .i. cheval, .i. petit sor,
— N’a point de hÿaume en la tieste —
En desir de sieuir sa queste.
De puis qu’il ot le chevalier
Abatu, ce jour tout entier
Et l’endemain il chevauca,
Que nulle cose il ne trouva
Qui point face a ramentevoir.
Au tierch jour, si com je l’espoir,
Chevaucoit au dehors d’un bois,
Et avoit laissiet les herbois,
Qui sus la lande les menoit.
Agamanor regarde et voit
Au dehors dou bois en .i. ombre,
En .i. lieu ou pas ne fait sombre,
.I. pavillon biel et joli.
Adonques noient n’attendi,
Mais la s’en vint et si s’arreste.
Par devant, sans mettre ens sa teste,
Regarde ens : si y voit des dames,
Chevaliers, escuiers et fames.
Dit li fu errant : « Descendés
« Et une soupe en vin prendés
« Chi dalés nous ; si ferés bien,
« Car nous devons sur toute rien
« Faire a vous boine compagnie,
« En l’onneur de chevalerie
« Et d’un chevalier gratïeus,
« Qui est vaillans, hardis et preus. »
Et quant Agamanor entent f. 101 d
C’on le prie, errant il descent
Et se met ens ou pavillon :
.I. lit voit illuech ou moilon
Et .i. homme gisant dessus.
Il ne s’est mies trais ensus,
Mais demande : « Qui est cilz la
« Qui gist ? » Et adonques parla
La damoiselle de Montrose
Et dist : « Sire, c’est vraie cose.
« Chi sont .iiii. chevalier frere,
« Que j’enmainne, c’est cose clere,
« Parler au noble roy Artu.
« Li chevaliers au bleu escu,
« Qui se brise dou soleil d’or,
« Les a mis en ce point. Encor
« Faut il que hommage me facent
« Ou trop grandement se mesfacent ;
« Mais pas ne sont entalenté
« De faire nulle lasqueté,
« Car il l’ont juré sus leur fois. »
Lors li recorde a ceste fois
Comment cils qui le soleil porte
Les desconfi devant sa porte,
Et mist l’un en peril de mort.
Agamanor de ce recort
A grant joie certainnement,
Et puis parolle doucement
Et dist : « Dame, il n’est mie doubte
« Que cilz voir passera le route
« De tous les chevaliers errans.
« J’ay bien veüs ses couvenans
« Au tournoy et a la bataille.
« Chevalier ne sçai qui le vaille.
epuis n’ont parlé c’un petit. f. 102 a
On estendi devant le lit
Dou chevalier une touelle,
Et cilz qui dou disner se melle
L’aporta ; si ont la mengié
Et beü ossi par congié
Selonch l’usage qu’il avoient.
Quant mengier ont, entre yaus bien voient
Que il les couvient departir.
Agamanor ala issir
Dou pavillon et congiet prent,
Et la damoiselle, qui tent
A tout honneur, errant li donne.
Ja estoit priès heure de nonne,
Quant il monta sus son cheval.
Errant sont entré en .i. val
Bel et ombru, vert et joli.
Agamanor avoit en li
Le sentement gay et plaisant.
Si dist ensi en chevaucant
A son escuier Bertoulet :
« Compains, bonne amour me tramet
« .I. souvenir qui voelt que face
« Aucun biau motet sus la place,
« Pour l’amour de la bien amée,
« Qui est Phenonée clamée.
« L’oserai jou dire ne faire ? »
Et Bertoulès, qui le viaire
Par deviers son signeur retourne,
Li respont que plus ne séjourne :
« Sire, oïl voir, se vous faisiés
« Le contraire, trop mal feriés,
« Puis que la plaisance y avés,
« Et que de certain vous savés
« Ou bien le poés emploiier. » f. 102 b
A ces mos se va avoiier
Agamanor, sans plus d’attente,
A faire une balade gente
Selonch l’avis qu’il l’en promuet
Et l’ardant desir qui le muet.
Elle fu de bon sentement ;
Vous l’orés tout presentement.
Je me voel toutdis conforter
Et prendre certes mon confort
En ce que je senc enforser [16]
L’amour de jour en jour plus fort
Viers vous, dame douce plaisant,
Car je y prenc si grant plaisance
Qu’il m’est avis, en droit samblant,
Que je voie vostre samblance.
Et ensi me voel deporter,
Car je n’ai voir aultre deport.
S’en porrai plus aise porter
L’anui que j’ai et que je port,
Et c’est drois, car en souvenant
J’ai vostre douce souvenance,
Qu’il m’est avis, en droit samblant,
Que je voie vostre samblance.
Il ne me fault plus enhorter.
La vostre bonté si m’amort
De vous servir et acorder
M’i voel, et j’en sui ja d’acort.
C’est mon bien, mon avancement,
Et, en ce pensant, si m’avance,
Qu’il m’est avis, en droit samblant,
Que je voie vostre samblance.
nsi de coer joieus et sade
Fist Agamanor la balade, f. 102 c
Et la canta et recorda
Plus d’une fois, car le coer a
Gai, amoureus et envoisié.
Moult grandement li a prisié
Ses escuiers sur toutes riens
Et dist : « Sire, c’est uns grans biens
« D’estre ensi jolis et joieus.
« Point ne prise ces anoieus,
« Qui ne font toutdis que muser.
« Amours voelent bien d’el user,
« Canter, jouster et tournoiier.
« Trop bien affiert a chevalier
« D’estre ou parti ou je vous voi,
« Et ossi dire le vous doi
« Puis que je sui de vo conseil ;
« Siques, sire, je vous conseil
« Que toutdis tenés cel argu,
« Par quoi devant le roy Artu
« Viennent de vous bonnes nouvelles. »
Agamanor tient a moult belles
Et moult bonnes ycés reponses.
Uns chevaliers, qui ot nom Conses,
Jousta ce soir encontre li ;
Mais Aghamanor l’abati,
Et puis si s’en passa atant
Et chevauca toutdis avant,
[En] approchans Norchombrelande,
Et la mainte aventure grande
Y trouva en celle saison,
Des queles ne puis par raison
Toutes parler si m’en tairai
Jusc’a tant que g’i revenrai.
ous lairons ci d’Agamanor
A parler et dirons des or f. 102 d
Dou chevalier de Cornuaille.
Ne sçai chevalier qui le vaille
De sens, d’onneur et de proece
Et de tres haute gentillece.
Il chevauce plains et lairis.
Souvent est voir en coer marris
De ce qu’il a perdu le jour
D’avoir esté au grant estour
Et au tournoi devant Tarbonne.
Pas n’en tient a belle et a bonne
La Fortune, mes trop perverse.
.I. grant temps chevauce et converse
Ou pays de Norchombrelande.
.I. jour estoit en une lande
Et avoit estet moult pensieus ;
Si jetta contremont ses yeus
Et voit une grant chevaucie
Venir vers yaus. A ceste fie,
Son escuier errant appelle
Et dist : « Lansonnet, vois tu celle
« Chevaucie vers nous venant.
« Je pense et croi par couvenant
« Que c’est li faucons dou tournoy
« Que on porte en la court dou roy
« Artus, ensi c’on a d’usage.
« Esconser te fault ton visage,
« Par quoi pas ravisés ne soies,
« Et t’en va entre .ii. ces voies
« Veoir de loing se je di voir. »
Et cilz, qui scet bien le devoir
De son mestre faire en tous cas,
S’en chevauce plus que le pas
En costiant la compagnie,
Qui bien estoit acompagnie. f. 103 a
Bien fu veüs de chiaus et celles,
Dames, chevaliers et pucelles,
Li quel font partir de leur route
.I. escuier qui se desroute
Pour venir parler a celi.
Quant Lansonnès le vit vers li
Approcier, si en fu joians ;
Tous quois se tient dessus les camps.
Cilz est venus vers li en l’eure.
Lansonnès se met au deseure
Et le salue belement,
Et li demande telement :
« Amis, dont partés vous, sans faille ? »
Et cilz respont : « De Cornuaille
« Et de Tarbonne la cité.
« Si en alons, pour verité,
« En la court dou bon roy Artus. »
— « Que ferés vous la ? Est il nulz,
« Amis, qui le peuist sçavoir ? »
Et cilz li respont : « Oïl, voir.
« Nous y portons .i. sor faucon. »
— « Et pour quele condition ? »
— « Pour ce c’uns chevaliers vaillans
« I fu l’autrier si travillans,
« Et si bien faisans la besongne
« Au tournoy que je vous tesmongne.
« Le pris en conquist et l’onnour,
« Mais il se parti de l’estour
« Si quoiement et si en pais,
« Quant il ot tout porté ce fais
« Et tournoiiet jusques au soir,
« Que on ne peut onques savoir
« Son nom, ne comment on l’appelle ;
« Mais, par bonne ordenance et belle, f. 103 b
« Le pris li donna on pour soy
« De la journée et dou tournoy.
« Et pour ce que point n’enporta
« Le faucon que vous veés la,
« En la court du roy on le porte,
« La ou toute honneur se deporte. »
Lors dist Lansonnès : « Grans mercis
« De ce que dit m’avés, amis.
« Mais dittes moy encor .i. peu
« De quoy cilz s’arme ? A Dieu le veu. »
Dist li escuiers : « Vous l’orés,
« Par quoy vous le raviserés,
« Quant faire li verés merveilles.
« D’unes armes toutes vermeilles
« S’arme il, mais de tant il se brise,
« En sa targe que moult je prise,
« D’une dame trestoute blance. »
Dist Lansonnès : « Par la samblance
« Que vous dittes, bien le cognois.
« C’est uns chevaliers moult courtois,
« Preu, hardi et bien travillant. »
Lansonnès prist congiet a tant ;
A son signeur revint arriere
Qui l’attendoit sus la bruiere,
Au quel il recorda sans doubte
L’aventure priès que trestoute
De l’escuier et dou faucon.
Melyador de l’esporon
Quoita, et se feri ou bois,
En chantant hault, a clere vois,
.I. rondelet bel et joli,
Qu’il ot fait ou non de celi
Qui sejourne dedens Escoce.
Ou rondiel n’a nulle reproce f. 103 c
Qu’il ne soit bien fait, ce me samble,
Chant et dit ordené ensamble.
Si com il fu je le dirai,
Ne ja ne vous en mentirai.
Je pri a Dieu c’a tres grant joie,
Je vous puisse briefment revoir,
Ma douce amie, ma chiere dame.
Car par ma foy, ou que je soie,
C’est mon desir et main et soir.
Je pri a Dieu, etc.
Ce doulz espoir me met en voie
D’avoir joie plus c’onques voir.
Se dirai de bon coer, par m’ame ;
Je pri a Dieu, etc.
elyador ensi s’esbat,
Qui cevauce sus cel estat,
Que volentiers enconteroit
Chevalier a qui il poroit
Faire d’armes aucune emprise.
De ce pourpos trop mieulx le prise
S’il se desire a avancier.
.I. jour trouva .i. chevalier,
Qui s’armoit de blanch et de noir,
Sans aultre differense avoir ;
Le hÿaume avoit en la tieste.
Il estoit chevaliers de queste
Des marces de Norchombrelande
Et, se son nom on me demande,
Il estoit appelés Gerpins.
A Florée estoit drois cousins,
La damoiselle de Montgriès.
Quant il s’avisierent de près
Entre li et Melyador, f. 103 d
Cescuns point le bon cheval sor
Et abaisse erranment son glave.
Melyador, qui ne s’emblave
De nulle riens fors de jouster,
Va le chevalier encontrer
Si fierement a plainne lance,
Que jus de son cheval le lance
Et moult le bleça au cheoir.
Lansonnès vint cesti veoir
Qui illuec gisoit entre piés ;
Se li dist : « Chevaliers, oiés.
« Estes vous ens el corps navrés ?
« Veci vostre cheval ; montés,
« Car mon mestre si vous attent. »
Et li chevaliers matement
Respondi et dist : « Biaus compains.
« Je sui par roit jouster attains
« A meschief et trop fort blechiés.
« Je vous pri que chi me laissiés
c Reposer et jesir a terre ;
« Car assés tos me venra querre
« Mes varlès, il n’est mies doubte.
« Il perdi hui matin le route
« De mon cheval pour aultres gens.
« Dittes vo signeur, qui est gens
« Et moult prisiés de renommée,
« Que je sui cousins a Florée,
« Ceste qui de Montgriès est dame,
« Et qu’il ne poet avoir nul blasme
« De moy laissier en ce parti.
« Et quant l’autre fois il parti
« Dou chastiel que laiens estoie,
« Et le vi, se Diex me doinst joie,
« Comment il desconfi Camel,
« En tous estas le cognois tel f. 104 a
« Que on doit chevalier cognoistre ;
« Mais je seul, pour mon pris accroistre,
« Ai hui encontre lui jousté
« Et, s’il me couste ou a cousté,
« Je ne m’en prise mies mains.
« Et quant de ce cop serai sains,
« Se je l’encontre une aultre fois,
« Trop envis me tenroie quois
« Que je ne m’esprouvasse a li. »
Et quant Lansonnès entendi
Le chevalier ensi parler,
Si s’en va errant retourner
Viers son signeur, et se li conte
Ce dont oÿ avés le conte.
r vint Melyador tantos
Au chevalier, tous les galos,
Qui la gisoit dessus l’erbier.
Lors descendi de son coursier
Et puis doucement l’araisonne :
« Sire », dist il, « se Dex me donne
« Ne envoie bonne aventure,
« Trop me desplaist la bleceüre
« Dont vous estes attains, ce dittes ;
« Et me seroit uns grans merites
« Se pardonner le me voliés.
« Ne sçai pour quoi vous vous metiés
« Sitost au devant de ma lance,
« Quant vous aviés la cognissance
« De moy qui riens el ne desire
« Fors que je puisse desconfire
« Chevaliers et par terre abatre.
« En tout ce me puis jou esbatre
« Et, pour telz aventures querre,
« Chevauce jou parmi la terre. » f. 104 b
— « Sire », ce li respont Gerpins,
« Je scai moult bien que li chemins,
« Li frontiere, et ossi li marce,
« En ceste terre droit ci marce,
« Et pour ce que je sui a faire
« Et que j’avoie oÿ retraire
« Que, par dedens Norchombrelande,
« Mainte aventure belle et grande
« Y sont puis .ii. ans avenues,
« Entre les grans et les menues,
« J’en voloie ma part avoir ;
« Or en avés fait vo devoir.
« Vous partirés. Je garirai
« Au plus trestos que je porai,
« Car jou irai chiés ma cousine,
« Qui sera grandement encline
« Au penser de moy et remettre
« En bon point, ce vous puis prommettre,
« Pour moy armer, il n’est point doute.
« Sire, vous sieurés une route
« D’un grant froais que vous verés,
« Et je croi que vous trouverés
« Temprement aventures grandes,
« Car la se tiennent sus les landes
« Li cousin monsigneur Camel,
« Qui ne desirent voir riens el
« Qu’il vous puissent prendre et occire.
« Tout ce leur ay jou oÿ dire,
« Promettre et jurer, pour certain,
« Et se vous volés a le main
« Senestre tourner vo chemin,
« Vous ne trouverés ja cousin
« Qui a ce Camel apertiegne. »
Dist Melyador : « Or aviegne f. 104 c
« Tout ce qui en poet avenir,
« Je n’en pense ja a issir
« De mon chemin pour leurs manaces.
« Trouvés me sui en pluiseurs places,
« Dont je sui partis, Dieu merci !
« Encor espoire jou ensi
« Que j’en partirai sans dangier ;
« Ja n’en vodrai chemin cangier,
« Viegne ce qu’il poet avenir !
« Mais il vous voelle souvenir
« De moy, quant vous verés Florée ;
« Comment, de coer et de pensée,
« Dou tout a li me recommans,
« Et se li dittes telz rommans
« Qu’encor volentiers le veroie
« Une fois, se Dix me doinst joie. »
— « Sire », respont le chevaliers,
« Tout ce li dirai volentiers. »
A ces mos Melyador prent
Congiet, et Gerpins se li tent
La droite main au departir.
Melyador, sans alentir,
Monta et se parti de la,
Et dedens le grant bois entra
Que on dist de Norchombrelande.
C’est bien raisons c’on me demande
De monsigneur Gerpin qu’il fist.
Assés tost au chemin se mist,
Car ses varlès le vint requerre,
Qui le trouva gisant a terre
Et blecié a ce qu’il moustroit.
De li ouvra si bien a droit
C’a painnes le fist remonter.
Dis liewes avoit a aler ; f. 104 d
Il y vinrent tout plain le pas.
Moult fu messires Gerpins mas,
Au soir, quant il vint a Montgriès.
Florée le tasta de priès,
Pour mieulz sentir sa bleceüre,
Et cilz li conta l’aventure
Dou chevalier au soleil d’or.
Riens n’en failli de chief en cor
Qu’il ne li ait dit et conté,
Et la belle l’a escouté
Moult volentiers, il n’est pas doubte.
De puis mist son entente toute
A medeciner son cousin,
C’on disoit monsigneur Gerpin.
Tant en pensa qu’il fu garis,
Et ossi fu Pheugins li Gris,
Qui gisoit laiens ou chastiel,
Que ses freres, par bon chembiel,
Ignoramment navré avoit,
Cilz qui Savare se nommoit,
Qui moult estoit bons chevaliers[17].
Florée, qui moult volentiers,
Aidoit tous chevaliers errans,
Fu dou bien penser si engrans,
Que dou tout revint en bon point,
Et quant cilz cui proece point
Se senti en estat d’armer,
Ses armes ala demander ;
On li bailla incontinent.
Adont s’arma moult frichement
Et monta dessus son cheval.
Au partir, par especial,
Prisent congiet par bon arroi
A la damoiselle tout doy f. 105 a
Messire Savare et Pheugins,
Et entrerent en .ii. chemins
Si com aultre fois fait avoient.
Je croi assés bien qu’il savoient
Comment il se doient deduire.
De ce ne les fault introduire,
Car il sont chevalier moult preu.
Des .ii. freres lairons un peu
Et parlerons d’aultre matere,
De Florée qui a son pere
A dit qu’elle s’en voelt aler
En Escoce, pour viseter
Et veoir sa belle cousine ;
Car il a ja trop lonch termine
Que elle n’en oÿ nouvelles.
Messires Los jamais rebelles
N’euist esté a ce pourpos,
Mais li acorda ossi tos
Que Florée en parla a li,
Dont elle ot le coer moult joli.
a damoiselle adont s’ordonne
Et ses livrées errant donne
A celles qui o li iront
Et qui de Montgriès partiront.
Quant prestes furent, si monterent
Et en bon arroi cheminerent
Deviers le royaume d’Escoce ;
Florée grandement l’approce.
Bien est voirs que, sus son chemin,
Elle trouva par .i. matin
La damoiselle de Montrose
Qui revenoit, c’est vraie cose,
De Carlÿon, et s’en raloit
Ou pays dont partie estoit. f. 105 b
Si se fisent en ces istances
Entre elles grans recognissances
Et furent .i. disner ensamble,
Et la parlerent, ce me samble,
Des proeces Melyador ;
Comment il se portoit encor
Et dou grant tournoy de Tarbonne.
Cascune d’elles l’onneur donne
De pris, d’armes et de proece,
De vaillance et de gentillece
Au dit chevalier bleu armé.
Durement l’ont la renommé
Entre elles les .ii. damoiselles.
Florée dist que ces nouvelles
Portera elle a Hermondine.
Jusques apriès l’eure c’on disne
Furent toutdis en ce pourpos ;
Puis prisent congiet a briés mos,
Et tint cascune son chemin.
Florence, dedens brief termin,
S’en retourna a son chastiel
Et Florée, en tres grant reviel,
S’en chevauca vers Montsegur.
De ce me fai je tout segur
Que moult bien y trouva le voie ;
Car elle a bien qui le convoie
Et qui y scevent le chemin,
Car esté y ont maint matin
— Ce sont varlet et messagier —
Qui ne sont mies en dangier
De toutes adreces trouver :
Ce puis legierement prouver.
ant esploita la damoiselle,
Avoech sa compagnie belle, f. 105 c
Que elle vint a Abredane
Et, dalés .i. grant pont de frasne,
Chiés .i. hoste se herbega.
Seulement la nuit y targa
Et puis monta au matinet.
Si escuier et si varlet,
Et ses pucelles au corps fin,
Se misent o soy au chemin
Et ont cevauciet sans sejour.
Ja estoit bien nonne de jour,
Quant il vinrent a Montsegur.
La garde estoit dessus le mur
Dou chastiel qui fait a prisier ;
Si ala erranment noncier
A l’ostel la venue d’elles.
Lors vinrent varlet et pucelles
A la porte, sans plus attendre,
Et, quant on peut de voir entendre
Que la dehors estoit Florée,
Tantost fu la porte avalée.
Si entrerent en grant revel
Florée et ses gens ou chastel.
Remoustré fu a Hermondine
Comment venue est sa cousine,
La damoiselle de Montgriès,
Et celle, qui le voelt de priès
Conjoïr, est vers li venue ;
Si le recueille et le salue
Moult doucement en encontrant,
Et sachiés qu’en la cambre entrant
Font des honneurs moult grant fuison.
Hermondine a mis a raison
Florée, et premiers li demande :
« Que fait on en Norchombrelande, f. 105 d
« Belle cousine, dittes moy ? »
Et Florée respont : « Par foy,
« Chiere cousine, moult tres bien.
« Si me loe sur toute rien
« Dou chevalier au soleil d’or.
« En avés vous oÿ encor
« Nulles nouvelles, ma cousine ? »
— « Mes, Dieu, non ! » respont Hermondine.
« Quelz nouvelles en doi je oïr ? »
— « Cousine, pour vous resjoïr ;
« Car messires Camelz est mors,
« Qui estoit si grans et si fors
« Qu’il ne doubtoit nul chevalier.
« Mais trouvé a, au darrenier,
« Qui l’a desconfi par bataille,
« Uns chevaliers de mendre taille
« Qu’il ne fust, mais il est si gens
« Et si amés de toutes gens,
« Que par tout est il renommés. »
— « Ma cousine, or le me nommés. »
— « Certes, cousine, ne le sçai
« Nommer, ne onques en l’assai
« Ne m’en mis. Si fu il .i. mois
« O moy en mon chastiel tous quois,
« Car Camelz le navra sans faille
« Ou propre jour de leur bataille.
« Mais chilz dont je parolle chi
« Moult vaillamment le desconfi.
« Mors est Camelz, il n’est pas doubte.
« Pour sa mort sui je voir trestoute
« Resjoïe et cil de ma terre,
« Car a tort nous fist jadis guerre
« Et porta virgongne et damage.
« N’estoit il plains de grant outrage, f. 106 a
« D’orguel et de presumption,
« Quant mis avoit s’entention
« A vous amer et vous voloit
« Avoir, fust a tort ou a droit,
« Si com par maniere de force ? »
Et quant la fille au roy d’Escoce
Hermondine, qui moult fu piue,
Ot ce, si fu .i. peu pensieue,
Tant que Florée s’en prent garde,
Et voit quant elle le regarde
C’un petit a mué coulour.
Si l’araisonne en nom d’amour,
Et dist : « Cousine, je vous voi
« Penser ; s’ai merveilles pour quoi.
« M’en vodriés vous la raison rendre ? »
Et Hermondine, sans attendre,
Li respont : « Oïl, volentiers.
« Il m’est vis que cilz chevaliers
« Qui mors est, c’est ou nom de moy.
« C’est une raison ou je doy
« Bien penser, qui sui une femme ;
« Car, en conscience et en ame,
« Je m’en tieng grandement cargie
« Et si plaing la chevalerie
« De ce Camel, qui fu si grande. »
Dist Florée : « Je vous demande,
« Cousine, dont se le plaindés,
« Quant vous savés qu’il estoit telz
« Qu’il vous voloit par force avoir,
« Et euist vostre oncle occis voir,
« Mon pere, et tolut ma contrée,
« Et plainnement deshiretée
« Par son orguel et son oultrage,
« Se je n’i euisse avantage f. 106 b
« Consideré sur son pourpos.
« Certes, cousine, il fu moult os,
« Oultrageus et fist grant folie,
« Quant onques en jour de sa vie
« Pensa a vous par nulle voie.
« Car, bien sçai et si le savoie,
« Que pas n’estoit cose pareille
« De vous a li, et m’esmerveille
« Comment tant vous en poés dire ;
« Mais conscience vous y tire.
« Ceste escusance avés pour vous,
« Car je pense que vos coers doulz
« A li amer ne pensa onques. »
Hermondine se taist adonques,
Et tout a par li s’esbanoie
A ce que l’anelet manoie,
Que Melyador li donna ;
En son doy .iii. tours le tourna,
Car au veoir prendoit plaisance.
Quant Florée en vit l’ordenance,
L’anelet recogneut tantos,
Car elle l’eut a ce pourpos
Fait forgier pour Melyador.
Li anelès estoit tous d’or
Et ouvrés de bonne maniere.
Pas n’en osta a la premiere
Fois, n’a la seconde, ses yeulz ;
Moult y pensa, si m’aÿt Diex,
Comment il pooit la venir.
Hermondine, sans li tenir
En pais, tournioit l’anelet,
Et voit que sa cousine met
Grant entente au regarder sus ;
Adont ne le manoie plus. f. 106 c
Et Florée pas ne le let,
Mais demande, de l’anelet,
Qui li donna et dont li vint.
« Pour quoi ? » dist celle qui le tint
Encores par dedens son doy.
« Uns merceniers, en bonne foy,
« Qui l’autre jour passoit par ci,
« Le me donna et me vendi
« Des jeuelès qui ceens sont. »
Et Florée le prent adont
Par le main, et dist : « Ma cousine,
« Cest anelet, se Diex m’estrine,
« Fis je faire, ouvrer et forgier,
« Et le donnai au chevalier,
« Quant il parti de mon hostel,
« Qui occist monsigneur Camel
« Par sa grande chevalerie.
« Et pour ce je merancolie
« Sus cel aniel, j’ai bien raison,
« Car il n’a pas longe saison
« Que cilz se parti de Montgriès. »
Lors le regarda de plus priès
Et dist : « C’est il, pas n’en fai doubte. »
Et Hermondine, qui est toute
Esmervillie dou parler,
De son doy lait l’aniel aler
Et a sa cousine le baille.
Quant Florée le tint sans faille,
Elle demanda a Hermondine :
« Or me dittes, chiere cousine,
« Veïstes vous onques dedens ? »
Et celle respont, par grant sens :
« Certes, nennil. Pour quoi ce dittes ? »
— « Pour ce qu’il y sont ens escriptes f. 106 d
« Lettres, les queles je fis faire
« Pour mieulz recommerider l’afaire
« Dou chevalier cui le donnai.
« Tous telz qu’il est, je l’ordonnai
« Et vous en verés la maniere. »
Lors le prent sus une carniere,
Qui estoit justement saudée ;
La verge est en .ii. pars alée.
Hermondine s’en esmerveille,
Qui voit en cascune pareilles
Lettres d’azur, faites petites.
Ce li dist : « Florée, or me dittes,
« Cousine, quel cose y a ci. »
Hermondine, qui s’esjoÿ
De l’aniel et pour la nouvelle
Façon qui li sambla moult belle,
Les .ii. pars de l’anelet prist ;
Tout clerement y voit escrit :
Cilz sui qui le soleil d’or porte,
Par qui oultrecuidance est morte.
Hermondine, pour li esbatre,
Le lisi des fois jusc’a .iiii.,
Et puis dist : « Or le recloés,
« Ma cousine, et le renoés
« Tout ensi qu’il estoit devant. »
Et Florée le prent errant,
Qui le remet a son devoir,
Et Hermondine, pour savoir
Dou dit aniel mieulz la maniere,
Tourne et retourne le ca[r]niere,
Et si fort sen entente y met
Que clore et ouvrir l’anelet
Scet ossi bien que fait Florée,
La quel cose moult li agrée. f. 107 a
este cose ensi demora.
Hermondine en grant gré pris a
La venue de sa cousine.
Elle mengüe, et soupe et disne
Tous les jours en sa compagnie.
Elle est moult bien acompagnie,
Car c’est sa cousine germaine
Et une damoiselle plainne
De toute honneur, au dire voir.
Et sachiés que bien son devoir
Fait Florée, sans retarder,
De nuit et jour recommender
Le chevalier au soleil d’or.
Bien dit qu’elle n’a point encor
Oÿ parler, comment qu’il aille,
Qui le ressemble ne le vaille
De proece et de grant renom ;
Ne scet comment il a a nom,
Mais c’est cilz qui, par bon arroy,
Eut le pris dou tres grant tournoy
Qui fut fait par devant la Garde ;
Et dist bien, quant elle regarde
A ce qu’elle en a oÿ dire,
Que sa pensée toute tire
Qu’il passera route des preus :
« Il est frices et amoureus
« Et sont en li, au voir entendre,
« Toutes les vertus c’on poet prendre
« Ne conter au chevalier jone.
« Cousine, je le voi ydone
« Droitement d’avenir a vous ;
« Et s’est ci a dire entre nous,
« Avoech les nobles meurs qu’il a,
« Je croi que haus homs l’engenra. f. 107 b
« Quant je vins ci, c’est vraie cose,
« Nostre cousine de Montrose
« Trouvai je dessus mon chemin ;
« Mais elle me tint a le fin
« Que pour parler dou chevalier,
« Et tout voir dou jour .i. quartier,
« Il li fist .i. trop grant service.
« Comment qu’elle soit noble et rice,
« Elle ne pooit recouvrer
« De chevalier pour resister
« Encontre .iiii. chevaliers,
« Tous freres, orgilleus et fiers,
« Qui deshireter le voloient,
« Et qui si de priès li aloient
« Qu’il li occioient ses gens.
« Mais cilz chevaliers frans et gens
« Le délivra de ceste guerre,
« Et mist tout en segur sa terre ;
« Car tous les conquist par bataille,
« Et se leur fist jurer, sans faille,
« C’a tous jours mes le serviroient
« Et qu’en la court dou roy iroient
« Recognoistre et donner service :
« Ensi fist une povre rice
« D’onneur, de pais et d’iretage,
« Par son grant et preu vasselage.
« Pluiseurs grant fais de haute emprise,
« Puis l’ordenance qui fu prise,
« A ilz fait tous seulz par son corps
« Et des queles li vrais recors
« Est mieus sceü, en bonne foy,
« A Carlÿon devers le roy,
« Qu’il ne soient en aultre part.
« Ma cousine, se Diex me gard, f. 107 c
« Il vault trop miex que je ne die
« De tres bonne chevalerie. »
ermondine entent la parolle
De sa cousine qui parolle,
En loant le bleu chevalier.
Se ne l’en a mies mains chier,
Car ses parlers trop bien saveure ; [18]
En parlant toute s’enamoure.
Unes fois dist, par grant solas :
« Cousine, je ne le voel pas
« Trop prisier ne blasmer ossi,
« Car onques jour je ne le vi :
« Bien me tieng a ce que vous dittes.
« Ce li seroit uns grans merites
« Se l’avoie ossi bien veü,
« Et tout a loisir pourveü,
« Que je vi monsigneur Camel
« A Montgriès, dedens vostre hostel.
« Il me sambla biaus chevaliers ;
« Voirement estoit il moult fiers,
« Et si sçai bien par nesun fuer
« Que onques ne vous fist en coer. [19]
« Poroit il aucunement estre
« Que nous sceuissiens faire nestre
« Aucune cose de nouviel,
« A tele fin qu’en ce chastiel
« Nous le veïssiens a loisir ;
« J’en ai assés bien le desir,
« Voires, se bien l’i consilliés.
« Mais point n’est si appareilliés
« Qu’il chevauce en celle contrée.
« Ossi, d’aultre part, je m’effrée
« Comment il vendroit jusq’a ci.
« Il vault miulz qu’il demeure ensi f. 107 d
« Que j’entreprende riens, par m’ame,
« Dont je puisse rechevoir blasme. »
Dist Florée : « Vous dittes bien ;
« Mais trouvé y ai un moiien,
« Par quoi au mains vous le verés
« Tournoiier et l’aprenderés [20]
« A cognoistre en ses armeüres.
« Toutdis keurt en bleues parures,
« Et se brise d’un soleil d’or. »
Et celle, qui en voet encor
Bien parler, respont par grant joie :
« Cousine, or m’en montrés la voie,
« Car vos sens nous sera mestiers. »
Et celle respont : « Volentiers. »
antost Florée s’avisa
A parler de tel avis c’a,
Et dist : « Se vous volés, cousine,
« Li bleus chevaliers, qui chemine
« Et travelle pour vostre amour,
« Sera chi devant en brief jour.
« Vous ferés noncier .i. tournoy :
« Le terme y meterés par quoy
« Tout chevalier qui en bien sentent
« Et qui celle marce frequentent,
« Y venront, il n’est mies doubte.
« Li bleus chevalier en le route
« Se mettera, comment qu’il aille ;
« Trop envis y feroit il faille.
« Adont le verés tournoiier :
« Vous vous porés esbanoiier
« A ce que vous li verés faire.
« Que dittes vous sus ceste affaire ?
« Ai je bien dit ? » — « Oïl, par m’ame, »
Ce respondi la jone dame, f. 108 a
La fille au roy Hermont d’Escoce ;
« Je n’i voi nulle doubte, fors ce
« Que monsigneur ne le descorde. »
Dist Florée qui le recorde
Comment elle dira au roy
Pour impetrer le dit tournoy :
« Cousine, vous dirés ensi,
« Quant vostres peres vendra chi :
« C’on vous tient trop en une mue,
« Et c’on ne s’esbat ne ne jue
« Devant vous, dont trop vous anoie.
« Adont le meterés en voie
« D’avoir grasce, quele que soit.
« Si le porés, et de vo droit,
« Priier que .i. tournoy aiiés ;
« Et en parlant l’i avoiiés,
« Afin que mieulz y prende garde,
« Comment la dame de la Garde
« En a eü moult bien sa part.
« Secondement, a l’aultre part,
« La fille du duch de Cornuaille,
« Se li remousterés sans faille,
« En a eü .i., puis brief terme.
« Ma cousine, je vous afferme
« Que se bien tenés ce pourpos,
« Il le vous accordera tos ;
« Puis arés l’avis dou sourplus. »
Dist Hermondine : « Certes, nuls
« Ne se saroit ensonniier
« De moy telement consillier,
« Ne par si tres bonne maniere
« Que vous faites, cousine chiere,
« Et je le ferai par tel guise
« Dont bailliet m’avés la devise. » f. 108 b
epuis ne demora granment
Que li rois Hermons vraiement
Vint veoir sa fille Hermondine
Et Florée ossi, sa cousine,
Qu’il conjoÿ moult volentiers.
La fu, par .iiii. jours entiers,
En deduit et en esbanoi,
On n’i parla onques d’anoi,
Fors que de joie et de reviel.
Hermondine au corps frice et biel,
Quant elle vit que heure fu,
Elle s’en vint vers son pere u
Il estoit en tres grant solas,
Li quelz rois ne fu mies las
De sa fille biel recueillier.
Elle se va agenillier
Devant li, car li rois seoit.
Li rois l’embrace, qui le voit,
Par le brach et li dist : « Ma fille. »
Et celle, qui fu tres gentille,
Sans lever se tint toute ferme
Et parolle par moult biau terme,
Disant : « Monsigneur, voelliés moy
« Acorder que j’aie .i. tournoy
« D’aucuns chevaliers qui venront
« Et qui ci se recueilleront,
« Qui se tiennent dessus la lande,
« Entre Escoce et Norchombrelande.
« Plus ne le ferai lonc savoir.
« Ossi bien en puis .i. avoir
« Que la fille de Cornuaille
« Et ma cosine ossi, sans faille,
« La damoiselle de la Garde.
« Tout ensi ychi on me garde f. 108 c
« C’on fait .i. oiselet en mue,
« Ne on ne s’esbat ne ne jue
« Devant moy ; ne point n’ay de joie !
« Ne pensés vous pas qu’il m’anoie
« Chi toute seule, entre mes gens ?
« Certes, oïl ! car je m’en sens
« Plus pesans et plus rude assés.
« Il y a ja .ii. ans passés
« Que je n’ai veü chevalier
« Jewer, jouster ne tournoiier,
« Qui tout travellent pour m’amour :
« En ce me portent grant honnour.
« Siques, monsigneur, je vous pri
« Que j’ou aie .i. tournoi droit ci,
« Ou ou que soit, dedens Escoce. »
Et quant li rois Hermons ot ce,
Si s’en resjoïst grandement
Et respondi tout erranment :
« Ma fille, je le vous acorde.
« Levés sus. » Adont la recorde
Li rois en sa fille levant,
Qui parloit en agenillant :
« On face avant hiraus venir.
« Je voel une feste tenir,
« Et .i. tournoi courtois et bon,
« En le marce de Signandon,
« Et sera d’ui en .v. sepmainnes. »
De ce parler furent moult plainnes
Les cambres de tres grant reviel,
Parmi Montsegur le chastiel.
Hiraut furent tantost tout prest ;
Au roy viennent, qui sans arrest
Leur dist : « Signeur, partés de ci,
« Et si annoncés, de par mi f. 108 d
« .I. tournoi devant Signandon,
« Et d’armes .i. tres grant pardon.
« Et s’on vous demande le pris,
« Dittes qu’il est fais et escris :
« Li mieus tournïans la journée
« Conquerra une blanche espée
« Que les dames deliveront,
« Qui avoech ma fille seront.
« Mais je vous enjoinc et commande
« Que point, oultre Norchombrelande,
« Ne recordés cestes nouvelles. »
Et cil, qui ont ja mis leurs selles,
Respondent : « Sire, volentiers
« Nous le dirons as chevaliers,
« Que d’aventure encontrerons :
« Vostre plaisir tres bien ferons. »
dont se sont sus ce parti
A Hiraut de Monsegur parti,
Et s’espendent par le pays
Pour anoncier, j’en suis tous fis,
Le tournoy la ou [il] doit estre.
Partout, a droite et a senestre,
Chevaucent et leur chemin tienent.
En ce terme les dames vienent
Avoech le roi a Signandon.
Li rois donne la .i. biau don
A sa fille et a sa cousine :
N’i a chambre ne offecine,
Que on n’ait remis en bon point.
Cilz tournois voir ne faudra point
Qu’il ne se tiegne et ne se face
Devant Signandon, en la place
Ou de ce temps on tournioit
Et les dames esbanioit. f. 109 a
ignandon si est un chastiaus
Dedens Escoce, fors et biaus.
S’adont le fu, il est encores : [21]
Estruvelin est nommés ores. [22]
La a marce pour tournoy faire
Belle et grande, et qui doit moult plaire
As chevaliers de la contrée,
Et je croi que bien leur agrée.
La se tenoit li rois Hermons
Le plus du temps ; car li maisons
Dou chastiel si estoit moult gente.
On met moult grandement s’entente
A ce chastiel bien joliier,
Et moult tres bien appareillier,
Pour les dames qui y venront
Dou pays, qui regarderont
Les tourniians sus la campagne.
La y ara belle compagne
De chevaliers, si com j’espoir.
Avoecques Hermondine est voir
Florée qui tres bien s’acquitte,
Comme de ce bien introduite,
A parler de Melyador,
Le chevalier au soleil d’or.
Elle en ot volentiers parler
Et ses proeces recorder,
Dou quel ossi je parlerai
Ens ou cas que le lieu en ay.
Melyador li damoisiaus,
Qui tant est friches et isniaus,
Chevaucoit en Norchombrelande
Et estoit dessus une lande
Belle, et verde et tres bien ombrue.
Amours, qui a le fois l’argüe, f. 109 b
Li fait canter .i. rondelet.
Je conseille moult bien [c’on] l’et
Et oe pour l’amour de li,
Car je le sench friche, et joli
Et fait par moult bonne ordenance,
De ce que j’ai de cognissance.
Ce me seroit la plus grant joie,
Certes, qui me peust avenir,
De vous veoir, ma douce amour.
Mal ne dolour je n’averoie
Et ne m’en poroit souvenir.
Ce me seroit, etc.
Liece et eür recouveroie, [23]
Et tout mon bien pour ce desir.
Dessus toutes riens, ce bon jour,
Ce me seroit, etc.
ous en fu en coer resjoÿs
Lansonnès, quant il a oÿs
Ces doulz mos chanter a son mestre.
.I. petit entendent sus destre,
Et oent .i. cor hault sonner
Et, en ce sonnant, raisonner
Que ce sont quelques aventures.
Melyador ses armeüres
Prent errant, et s’arme en grant haste.
Quant il est armés, il se taste,
Et se sent en point et de taille,
Ce dist, pour faire la bataille ;
Presentement n’a cure a cui.
A son varlet dist : « J’ai moult hui
« Desiret a trouver sus place
« .I. chevalier d’encontre. Or place
« A Dieu que si bien m’en aviegne f. 109 c
« Que combatre a lui me couviegne ;
« Car j’ay fait .i. trop lonch sejour,
« Ne saroie dire le jour,
« Qu’il me couvenist traire espée. »
Ensi cilz, qui point ne s’effrée,
Parolle a par lui et devise.
Or vous dirai de la devise
Dou chevalier qui vient vers li :
C’est chilz qui le corps a joli
Que sa sereur a mis en voie,
Et en ce nom elle l’envoie
Pour savoir s’on veroit son frere.
Cilz chevaliers, c’est cose clere,
Estoit tous blans, par ma sambla[n]ce ;
Mais dessus sa senestre mance
Une targe vermeille porte.
En la targe, qui n’est pas forte,
Mais d’argent ouvrée, par m’ame,
A escript une blanche dame :
Nous dirons le blanch chevalier.
Cilz chevaucoit sans escuier,
Car point n’est chevaliers de queste.
Laciet le hÿaume en la teste,
La targe au col, ou poing la lance,
S’en vient par tres bonne ordenance
Par dessus le chevalier bleu,
Qui ne l’a ressongniet c’un peu.
Des lances se sont encontré,
Et par dedens l’un l’autre entré,
Moult fierement et tres a point.
Messires Lyones a point
Melyador dedens sa targe,
Mais de nul peril ne le carge,
Car sa lance vole en tronçons. f. 109 d
Moult bien se tint sus les arçons
Melyador, point ne cheï.
Mais le blanch chevalier feri
Si fierement, au dire voir,
Que onques cilz, pour son pooir
Ne se peut tenir es estriers,
Mais cheï ; et lors li destriers
S’en ala fuiant en la lande.
Melyador adont commande
A Lansonnet qu’il voist après ;
Car li chevaliers n’est pas près
Dou ravoir, s’on ne l’i ramainne.
Lansonnès en ot moult grant painne,
Ançois qu’il le peuist ravoir,
Et quant il l’eut, il s’en vint voir
Au chevalier, qui la estoit
Et qui sus l’erbier s’arrestoit.
« Tenés », ce li dist Lansonnès,
« Et me dittes ou vos varlès
« Est demorés, se vous volés. »
Li chevaliers, bien emparlés,
Respont que de valet n’a point,
Et Lansonnès, qui lors se joint
Dalés lui pour tenir l’estrier,
Li ala bellement priier
Que, par amours, li voelle dire
Quel cose il pense et ou il tire
A aler, quant tout seulz chevauce.
Et li blans chevaliers, sauf ce
Qu’il dist : « Point ne me nommerai ;
« Volontiers je le vous dirai.
«
ompains, une dame moult frice,
« Fille de signeur grant et riche,
« M’a mis sus pour son chevalier, f. 110 a
« Car elle fist faire avant hier
« .I. tournoy par devant Tarbonne,
« Et la eut ordenance bonne
« Et moult de chevaliers armés.
« Toutes fois li pris fu donnés
« A .i. chevalier moult vaillant,
« Li quelz en tres bien travillant
« Le conquist en bonne maniere ;
« Mais onques ne fu en le chiere
« Li gentilz chevaliers veüs,
« Dont il puist estre cogneüs.
« Et, pour l’amour de son abit,
« Ma dame a et juret et dit
« Que, toute la queste durant,
« Elle portera abit blanc
« Et, dessus sa senestre mance,
« Une targete a le samblance
« Que ceste est que ores je porte,
« Et prie et voet c’on se deporte
« A lui nommer la blanche dame.
« Et tout ce a empris, par m’ame,
« Pour .i. sien frere chevalier,
« Le quel elle a grandement cier,
« Et cuide bien que cilz ce soit,
« Qui au jour dou tournoy s’armoit
« De rouge a une dame blance.
« Je vous en ay dit l’ordenance ;
« Or me dittes, se tant vous plest,
« Dou chevalier qui droit la est,
« Qui c’est et si point a veü
« Le chevalier au rouge escu,
« Une blance dame en mi lieu. »
Et Lansonnès respont : « Par Dieu,
« Oïl ; mais trop lonch temps y a. f. 110 b
« Ains que cilz tournois commença
« Dont vous me parlés maintenant, [24]
« Moi et mon mestre fisent tant [25]
« Qu’il se combatirent ensamble.
« Tres bons chevaliers cilz me samble,
« Dont vo dame est enamourée.
« Nommés le moy, s’il vous agrée,
« Ceste dame : s’en vaudrai mieulz. »
« Et cilz respont, si m’aÿt Diex,
« Phenonée a a nom, sans faille.
« Fille est au duch de Cornuaille
« Et s’a, ou elle doit avoir,
« .I. frere que tant aime voir,
« Que elle ne s’en poet partir.
« Au nom de celi, sans mentir,
« Fist elle la feste ordonner,
« Dont vous avés oÿ parler.
« Au partir de li je juray
« Que jamais ne retourneray
« Devers li, si l’arai veü
« Et, se je puis, si cogneü
« Que elle sara, au retour,
« Se bien a assis son amour
« Ou se c’est uns aultres de li. »
— Dist Lansonnès : « Je vous affi
« Que vous estes entrés en painne. »
Adont le chevalier enmainne,
Tout bellement, devers son mestre,
Qui esmervilliés devoit estre,
Quant il veoit son escuier
Ensi parler au chevalier.
uant Lansonnès eut amené
Le chevalier de blanch armé,
Qui portoit une blanche dame, f. 110 c
Adont premierement entame
La parole, et se li raconte
Si com oÿ avés ou conte.
Et quant Melyador l’entent,
Com cilz qui a tout honneur tent,
Se tourne vers le chevalier,
Et dist ensi : « Mon sire chier,
« Se Diex en toute honneur m’avance
« Pour l’amour de la dame blanche,
« De la quele vous renommés,
« Que Phenonée vous nommés,
« Je vous feroie volentiers
« Service, ensi c’uns chevaliers
« Errans doit a .i. aultre faire.
« Et grandement me poet desplaire
« Quant ensi vous ai abatu ;
« Et s’ensengnier vous savoie u
« Vous trouveriés le chevalier,
« Pour qui vous poés chevaucier,
« Volentiers je le vous diroie. »
— « Sire », dist cilz, « Dieux vous doinst joie !
« De ce parler moult bien vous croy.
« Je me trairai viers .i. tournoy,
« Qui doit estre proçainnement
« En Escoce certainnement ;
« Mais encores ne sçai jou mies
« Ou les marces seront baillies
« Dou dit tournoy. Mes tant y a
« Que on m’a dit qu’il se tenra. »
Et quant Melyador ot ce,
Qu’il doit avoir dedens Escoce
.I. tournoy, si lieve la tieste
Et sus la parolle s’arrieste
En disant : « Et es çou dont voir f. 110 d
« Qu’il doit la .i. tournoy avoir ? »
— « Oïl, voir, de ce ne doubtés. »
— « Et comment, sire, le savés ? »
Ce dist Melyador li frans.
Ce respont li chevaliers blans :
« Ce que j’en sai, c’est puis hersoir.
« On le me dist en .i. manoir,
« Ou d’aventure me logai.
« Mais mies bien retenu n’ai
« Le lieu ou li tournois doit estre. »
Ce dist Lansonnès a son mestre :
« Sire, prendés congiet a li.
« Vous en ores ailleurs que ci
« Parler ens ou cas que c’est voirs. »
— « C’est moult grandement mes espoirs, »
Ce li respont Melyador.
« Je me vodrai traire desor,
« Par devers la marce d’Escoce. »
Adont le chevalier approce
Et demande son bon congié,
Et de ce qu’il l’avoit blechié
L’en demande il tout le pardon.
Et cilz qui Lyones ot nom
Se part de li moult bellement,
Et dist : « Sire, ja nullement
« De ce pardon ne requerés ;
« Car, ou cas que je sui armés
« Et que je voel jouster a tous,
« Se par la jouste m’avés vous
« Abatu, ce n’est pas vo coupe ;
« Nul aultre, fors moy, n’en encoupe.
« Alés a Dieu qui vous convoie. »
Adont prist cescuns une voie
Et chevaucent devers .i. bois f. 111 a
Ou grant fuison avoit d’erbois.
r dist li contes que ce jour
Li blans chevaliers, sans sejour,
De puis Melyador parti,
Chevauca tous seulz a par li,
Armés desous la blanche gonne.
.I. chemin prent a l’eure bonne,
Qui se tournoit devers la lande.
Grandement je le recommande,
Car il savoit moult bien chanter,
Sans usage de li vanter.
Il estoit chevaliers moult friches
Et de toutes vertus moult riches,
Et pour ce esleü l’avoit
Phenonée, qui bien savoit
Qu’il estoit tres bien adreciés.
Messires Lyones, sachiés,
Chanta adont .i. rondelet :
C’est bien men entente c’on l’et
Et c’on l'oe, si comme en chant
Il le mist par bon couvenant.
Ma douce dame, quant je scé
Que vous avés joie et santé,
Nulle rien ne me poet grever,
Car adont est de moy osté
Tout mon anui et eslongé,
Ma douce dame, etc.
Mon bien, mon coer m’en est doublé
Et j’en sui si bien amendé,
C’on ne poroit mieus amender.
Ma douce dame, etc.
l’eure que li chevaliers
Chantoit ensi sus ces sentiers, f. 111 b
Chevaucoit li chevaliers rouges
Qui n’estoit mies trop harouges,
De qui nous parlerons des or :
C’est messires Agamanor.
Ensi qu’il estoit ens ou bois,
De lonch a entendu la vois
Dou chevalier qui chanté ot.
A Bertoulet a dit .i. mot,
Son escuier : « Or va avant,
« Et si regarde chi devant
« Quel cose c’est que j’ay oÿ. »
Et Bertoulès, sans nul detri,
Chevauce ensi c’on li ot dit.
Il n’a chevauciet c’un petit,
Quant il a celi perceü
Qui point ne l’a aperceü,
Car il avoit mis son hÿaume.
Biertoulès, qui vault .i. royaume
Pour bien servir .i. chevalier,
Esperonne le bon coursier
Et vient au chevalier errant.
Quant il en voit le couvenant,
Si en fu moult esmerveilliés,
Pour ce qu’il est appareillés
De la devise de son mestre.
Adont s’en retourne sus destre
Et a Agamanor revint,
Qui sus la lande quois se tint.
Quant il voit Bertoulet venir,
Com cilz qui a tres grant desir
De savoir quel cose a trouvé,
Errannent li a demandé
Comment se porte li afaires,
Et cilz ne se detria gaires f. 111 c
Dou compter bien et sagement :
« Sire, j’ay veü vraiement
« .I. chevalier qui par chi passe.
« Or ne sçai se li ferés grasce,
« Car il porte vostre devise,
« Voires, sire, par une guise
« Que, dessus sa senestre mance,
« La porte il une dame blanche
« Et une targette petite,
« De vermeil, assez bien escrite. »
Et quant cilz entent ces raisons,
Si dist ensi : « Alons, alons.
« Je voel savoir qu’il se demande,
« Ne qui a porter li commande
« La devise que j’ai empris. »
A ces mos, a sa lance pris
Et esporonne les galos
Par mi le bois, a tel pourpos
Que pour le chevalier combatre
Et la blanche dame debatre.
essires Lyones estoit
Arrestés, et si busioit
Sus .iii. chemins que trouvés ot,
Et si ne sonnoit nesun mot ;
Mais pensoit le quel pour ce jour
Il tenroit. Evous sans sejour
Messire Agamanor qui vient
Devant lui, et sa lance tient
En samblance que pour jouster.
Lyones se va arrester,
Qui encor n’avoit point de lance,
Car, bien en savés l’ordenance,
Qu’il l’ot .ii. jours avant brisie [26]
Contre celi dont la prisie f. 111 d
Est moult grande, c’est bien raisons,
De qui tous bleus est li blasons.
Si dist ensi a ce premiers :
« O, sire, rouges chevaliers,
« Maintenés vous par ordenance.
« Se j’euisse ossi une lance,
« Si com vous avés pour certain,
« A la jouste ne faudriés grain ;
« Mais point n’en ay, bien le veés,
« Et pour ce si priès me venés. »
Et quant Agamanor l’entent,
Si est tous honteus et si sent
Assés bien que cilz a raison.
Adont jette sur le sablon
Sa lance, si com par courous,
Et dist : « Sire, qui estes vous,
« Qui vous armés de ma devise ?
« Dittes le moy. Ma lance est mise
« A terre, vous n’en avés garde.
« Espée avés, je le regarde,
« Et jou une ; c’est pareçons.
« Assés tost les esprouverons ;
« Mais je voel savoir, en devant
« Que ce se face, qui avant
« Vous a mis en ceste ordenance
« De porter ceste dame blance. »
Messires Lyones s’avise,
Et pense adont sus la devise
Dou chevalier qui la estoit
Et qui devant lui s’arrestoit,
Et ossi a sa gentilz dame,
Qui li faisoit porter. « Par m’ame, »
Ce dist Lyones en son cuer,
« Veci celi de qui la suer f. 112 a
« M’a mis sus, ensi m’i adonne,
« Qui ot le pris devant Tarbonne
« Dou tournoy, il n’a pas .ii. mois.
« Elle me dist bien toutes fois,
« Au partir, se je le trouvoie,
« Fust en bois, en lande ou en voie,
« Que cognissable me fesisse
« A li et que je li desisse
« L’enclavure de son pourpos. »
Adont Lyones, a ces mos,
De son cheval descent a terre :
Che n’est mies signe de guerre.
Agamanor s’en esmerveille,
Qui tient a grant ceste merveille.
uant Lyones fu descendus,
Si dist : « Sire, ne me puis plus
« Combatre par nulle maniere.
« Ce me commanda ma tres chiere
« Dame, quant je parti de li,
« Jusques a tant, je le vous di,
« Que j’averai parlé a vous. »
Et Agamanor, qui est tous
Esmervilliés de cest afaire,
Li respont : « Et que doi je faire,
« Biaus sire ? Dittes moy errant. »
Et Lyones, tout en riant,
Qui avoit osté son hÿaume,
Li recorde ensi une psaume :
« Sire, descendés dalés moy,
« Et je vos dirai, par ma foy,
« Tout ce que je quier et demande,
« Et pour quoi en Norchombrelande
« Sui entrés puis .ii. mois en ça.
« Et se la cose aultrement va f. 112 b
« Que je n’espoir, je vous creant
« Que je remonterai errant
« Et m’esprouverai a l’espée
« Contre vous. De ce ne m’effrée. »
Dist Agamanor : « Je l’otri. »
Adont descent, sans nul detri,
De son cheval dessus l’erbier,
Et le baille a son escuier,
Et son hÿaume apriès deslace.
Empur la coiffe, a nue face,
Se met par dalés Lyonniel.
Bertoulet en a grant reviel,
Qui s’est a l’eure trais en sus.
Ce dist Agamanor : « Or sus,
« Chevaliers, dittes vostre entente.
« Saciés que grant desir me tempte :
« Que je sace par quel raison
« Vous me faites chi la saison
« Emploiier en teles huiseuses.
« Ce me sont coses mervilleuses. »
— «
ire », dist li blans chevaliers,
« Voirement me couvient premiers
« Parler, pour ouvrir la matere.
« Une dame, c’est cose clere,
« Fille du duch de Cornuaille,
« M’a mis sus ce chemin sans faille.
« Ceste est suer a Melyador,
« Dont elle n’a oÿ encor
« Nulles nouvelles vraiement.
« Se les desire elle forment
« A oïr, d’amont et d’aval.
« Pas ne me nomme on Perceval,
« Fors le chevalier a la dame,
« Cui bonne amour le cuer entame f. 112 c
« Apriès Melyador son frere,
« Sans dire a pere ne a mere
« Nulle cose de son pourpos,
« Fors a moy. Et se vous pourpos
« Que se vous estes cilz, sans faille,
« Qui a Tarbonne en Cornuaille
« Eüstes le pris dou tournoy,
« Elle vous tient en bonne foy
« Pour son frere et pour son ami.
« Car elle ens ou nom de celi
« Qui si vaillamment tournoia,
« Ceste devise encargié a
« Que je porte et que vous portés.
« Se vous pri, se vous estes telz
« Que Melyador, si le dittes ;
« Ce me seront joies escriptes
« Moult tres grandes a mon retour,
« Car Phenonée, en nom d’amour,
« Le me carga et enjoindi
« Au partir, et bien je le di :
« Que se le chevalier veoie,
« Pour le quel je sui mis a voie,
« J’en saroie la verité.
« Or vous ay je dit et conté
« Quel cose par les camps me mainne.
« Si m’osterés de ceste painne,
« Se vous volés et cilz soiiés,
« Et se bien me sui avoiiés,
« Mon chemin irai com devant.
« Mais quant je pense au couvenant
« Dou chevalier, qui a Tarbonne
« Fu, il avoit toute tel gonne
« Que vous portés ne plus ne mains.
« Je n’en vi viaire ne mains, f. 112 d
« Mais il estoit ensi armés.
« Estes vous cilz ? Parlés, parlés. »
Et messires Agamanors
Moult doucement parolle lors
Et dist : « Je sui cilz voirement
« Qui fui au tournoy telement
« Que vous avés recordé ci,
« Mais je ne sui pas, je vous di,
« Li freres a la vostre dame.
« Si vodroi jou estre, par m’ame,
« Si bons que li apertenisse
« Ou c’a son plaisir avenisse,
« Car en tous cas elle vault bien
« D’onneur, de francise et de bien,
« Et de recommendation,
« Que de tres bonne affection
« Elle soit amée et servie,
« Et quant par sa grant courtoisie,
« Elle a ma devise encargié,
« Je vous en donne bon congié
« Dou porter, et li sçai grant gré
« Quant elle m’a tant honnoré
« Qu’elle le porte, et vous ossi
« Qui estes chevaliers a li.
« Ce li dires, a vo retour :
« Que Diex vous otroist hui bon jour,
« Tres bon an et tres bonne estrine. »
Et quant Lyonniaus imagine
La parolle dou chevalier,
Qui si biel le poet recueillier
Et s’a falli a sa demande,
Car ce n’est pas cilz qu’il demande,
Si est plus pensieus que devant.
Agamanor le couvenant f. 113 a
Dou chevalier moult bien regarde,
Qui sa parolle li retarde.
ntrues qu’en cel estat estoient,
Et que tout doy la s’arrestoient
Sans dire parolle ne mot,
Evous la venu .i. Escot :
Hiraut estoit, il le me samble.
Les chevaliers trouva ensamble ;
Adont s’est sus yaus arrestés,
Et les a moult hault salués,
Et dist ensi : « Mi chier signeur,
« Qui devés entendre a honneur
« Et as fais d’armes plainnement,
Je vous anonce vraiement
« .I. tournoy et .i. grant pardon
« D’armes, qui devant Signandon
« Sera d’ui en .xiiii. jours.
« La sera la joieuse cours
« Dou roy Hermont, avoech sa fille,
« Hermondine la tres gentille,
« Qui ara a tres grant plenté
« De dames dalés son costé
« Et de damoiselles ossi.
« A celle fin je le vous di
« Que vous y soiiés, s’il vous plaist. »
Encores mies ne se taist
Li hiraut, mais parolle avant
Et dist : « Signeur, je vous creant
« Que cilz qui le pris conquerra,
« Avoecques l’onneur qu’il ara,
« Une espée ara pour le pris,
« Et puis que vous avés empris
« A poursieuir la ditte queste,
« Je vous pri, soiiés a la feste. » f. 113 b
Cil respondent tout d’un acort :
« Gentilz hiraus, a ton recort,
« Irons a la feste, sans faille.
« Car bien vault ceste qui le baille
« C’on y voist pour li honnorer. »
Et li hiraus, sus ce parler,
Prent congiet et d’iluec se part,
Et s’en chevauce d’aultre part ;
Les chevaliers lait la seant.
Plus ne voelt de leur couvenant
Savoir, ne aultrement enquerre ;
Ne s’il sont de pais ou de guerre.
ghamanor et Lyonniaus,
Dont li afaires est moult biaus
De ce qu’il eut illuech oy,
Sont moult grandement resjoÿ,
Et dient c’a ceste journée,
Il ne faudroient pour riensnée.
Adonques reprist la parolle
Li blans chevaliers, qui parolle
Et dist : « Sire, je partirai
« Et en cel estat vous lairai
« Que je vous verai au tournoy,
« Par devant Signandon, je croy.
« Trop bien ay retenu, par m’ame,
« Que vous n’estes point a ma dame
« Freres, ne parens, ne cousins ;
« Mais vous estes ses bons voisins,
« Et ses chevaliers volés estre. »
Agamanor, qui au senestre
Dou chevalier estoit assis,
Respondi par moult grant avis :
« Sire, je croi bien vraiement
« Que vous li dirés sagement f. 113 c
« Tout ce que vous avés trouvé ;
« Mais dittes li, de verité,
« Que, pour mettre tout jusc’a l’âme,
« Pour l’amour de la Blanche Dame,
« Je vodroi mon corps travillier
« Et, se tant pooie esploitier
« Que mes services li pleuist
« Et qu’en plaisance li venist,
« J’en seroie tres ewireus,
« Plus liés et plus chevalereus. »
Sus cel estat se sont adont
Parti, et .ii. chemins pris ont.
Agamanor errant remonte,
Et puis en chevaucant raconte
L’ordenance dou chevalier
A Bertoulet son escuier,
Li quelz moult volentiers l’entent,
Et a l’oïr plaisance y prent.
Ce soir vinrent sus .i. manoir,
Ou quel il peurent remanoir
Deus nuis et .i. jour tout entiers,
Et pour tant que li forestiers,
Li sires de celle maison,
Leur avoit compté tel raison
Que, depuis .ii. mois en esça,
Tous les jours passoient par la
Chevalier tous près pour combatre
Qui volsist leur chemin debatre ;
Mais onques dedens ce sejour
Ne cheï, de nuit ne de jour,
C’aventure leur avenist,
Ne que nulz chevaliers tenist
Par la son chemin ne sa voie.
De quoi Agamanor mains joie f. 113 d
Avoit, ce devés vous savoir,
Car tous les jours volsist avoir
Des armes aucune aventure.
Tout ce desiroit par nature,
Ne onques ne s’en refraindi
Tant c’au chevaucier entendi.
ous lairons ci d’Agamanor
Et au vaillant Melyador
Retourneront, car c’est bien drois,
Et conterons a ceste fois
Qu’il li avint de puissedi
Que dou chevalier se parti,
Monsigneur Gerpin qu’il bleça.
Melyador si s’adreça
Parmi .i. bois sus une lande.
.I. forestier voit ; si demande :
« Compains, or me di verité.
« Depuis que tu as ci esté,
« As tu veü nul chevalier
« Par ci passer ne chevaucier ? »
Et cilz li respondi en l’eure :
« Sire, oïl, par droit ci deseure
« S’en passe uns chevaliers errans,
« Qui, comme gratïeus et frans,
« Moult bellement m’araisonna,
« Et ossi il me demanda
« Se hui veü nullui avoie. »
Respont Melyador : « Quel voie
« Tient li chevaliers, par avis ? »
Dist li forestiers : « Il m’est vis,
« Sire, qu’il va toute la lande. »
Melyador plus n’en demande,
Mais se part et chevauce fort,
Com cilz qui est plains de confort. f. 114 a
Dou chevalier les froais trueve :
Moult grant desir a qu’il s’esprueve
A quel chevalier que ce soit.
Tant chevauce que il perçoit
Par devant lui le chevalier,
D’encoste li son escuier.
Adonques dist a son varlet :
« Tost mon hÿaume met ça, met. »
Et cilz apertement li baille.
Melyador se joint sans faille
En son escu et prent sa lance.
Ja y ara grant ordenance,
Et croi moult bien qu’il coustera
A celi a qui joustera.
i chevaliers qui chevaucoit
Messires Tangis se nommoit.
Moult estoit doulz et gratïeus
Et grandement chevalereus.
Norois estoit de nation
Et de moult haute estration.
Mies ne faisoit le harouge.
En une targe toute rouge
Portoit il une dame blanche. [27]
Melyador, par ma samblance,
Fist tant qu’il est venus a li,
Et puis se li dist tout ensi :
« Chevalier, il nous fault jouster.
« N’ai cure au quel il puist couster. »
— « C’est voirs, » respondi cilz en l’eure.
Sus cel estat plus ne demeure,
Mais prent sa lance incontinent
Et s’appareille frichement
Pour jouster, et lors esporonne.
Melyador ossi s’ordonne, f. 114 b
Qui bien en voit le couvenant
Et proprement vers lui venant
En soi meïsme moult le prise.
Son glave a a son devoir mise,
Et puis se joint dedens sa targe.
De nul autre soing ne se carge,
Fors dou chevalier aviser,
Sans plus dire ne deviser.
En espouronnant fort et roit,
L’un sus l’autre s’en viennent droit ;
Si se fierent, sus les escus,
Des lances as bons fers agus.
Par la force de leurs chevaus
Et l’emprise des bons vassaus,
Les lances volent en tronçons.
Moult fricement sus les arçons
Se tiennent li doy chevalier ;
Ce ne fu mies hui ne hier
Que on veïst jouste si belle.
Cescuns son escuier rappelle,
Et voelent par bonne ordenance
Encor recouvrer une lance ;
Ensi l’ont acordé entre yaus,
Qui que soit li jeu lait ou biaus.
u retour que cescuns a fait
Li escuiers s’en vint de fait
A celi qui le harpe porte
Et telz nouvelles li aporte :
« Sire, sire, sour toute rien,
« Vous di que vous vous gardés bien,
« Car vous joustés au chevalier
« Qui si belles les scet baillier,
« Qui desconfi, c’est vraie cose,
« Les .iii. chevaliers a Montrose f. 114 c
« Et qui porte le soleil d’or.
« Je le vous ramentoi encor,
« Afin que mieulz vous en souviegne
« Et que point ne vous en mesviegne. »
Messires Tangis bien entent
Son escuier, et assés sent
Qu’il li dist voie de raison ;
Mais, quoi que droit l’a l’i prison,
Tout est ens ou fier escaufés.
Que soit angles ou soit maufés,
Il dist c’a lui il joustera,
Ne scet combien li coustera,
Car trop aroit reproçe et honte,
Ce dist en soy, quant tout bien conte,
S’il refusoit sur ce parti.
Adont de ses rens se parti
Et le bon coursier esporonne.
Melyador ossi s’ordonne
De venir vers li, par maniere
Que jouste y ara moult pleniere.
Les chevaus des esporons fierent,
Et si droitement se requierent
A ce qu’il se sont encontré.
Il sont l’un dedens l’autre entré,
Telement que les lances roides,
A pointes agues et froides,
Font par dedens leurs targes prendre.
La plus entiere couvint fendre :
Onques pour cuir ne pour nervures,
Se sont ces coses assés dures,
Ne remest que li traus n’i fust ;
Le fier et bien .v. pos dou fust
Mist li vassaus de Cornuaille
En l’espaule cesti sans faille, f. 114 d
Qui messires Tangis s’appelle.
Ce fu une jouste moult belle ;
La glave vole en .ii. tronçons.
Moult bien se tint sus les arçons
Messires Tangis sans cheoir.
Melyador, qui son devoir
Fait en armes et aultre part,
De la jouste biel se depart,
Et, au retour qu’il fait arriere,
Il voit c’on ostoit la baiviere
De celui a cui jousté ot.
Droit la s’en vint sans dire mot
Et perçoit qu’il estoit navrés.
Ses varlès dist : « Souffrés, souffrés,
« Sire ; vous avés mort mon mestre.
« Tout ensi voir qu’il devoit estre
« En est avenu sans desdit.
« Je li avoie orains bien dit
« Que point ne se presist a vous. »
Melyador, qui fu a tous
Deboinaires, doulz et courtois,
Sus son cheval se tient tous cois,
Et celi a desarmer aide
Et .i. bon surgiien souhaide,
Qui bien le sace apparillier.
Bendeler le vont et loiier,
Ensi que bien le scevent faire.
Melyador, pour mieus complaire
Au chevalier que bleciet a,
Li offre et li presente la
Son escuier .ii. jours ou .iii.,
Et li prie qu’il ne soit frois
Dou prendre, se c’est sa besongne.
Et cilz dist qu’il ne li besongne f. 115 a
Nul aultre que le sien pour l’eure.
Li bleus chevaliers la demeure
Tant qu’il fu bien appareilliés,
Et apriès fu pris li congiés.
Messires Tangis vint ce soir
Logier ens ou propre manoir
Dont Melyador au matin
Se parti, dont sus son chemin
Il eut trouvé ceste aventure.
Ses escuiers grandement cure
Qu’il soit garis hastéement,
Pour estre a ce tournoiement
Qui sera devant Signandon,
Et Melyador d’abandon
Chevauca ce jour sans arrest,
Et entra en une forest.
La le couvint entre .ii. landes,
Sous un arbre qui porte glandes,
Reposer, et a l’endemain
Prist la voie a la droite main,
Et chevauca ceste journée
Sans veoir ne trouver riensnée
Qui point face a ramentevoir.
Le soir vinrent sus .i. manoir,
Ou il y avoit une dame,
Veve estoit et moult gentilz femme,
Qui mist grant paine a recueillier
Liement le dit chevalier,
Et ossi sa mesnie toute ;
De ce ne devés faire doubte.
e soir avint, apriès souper,
Que il alerent demander,
Entre li et son escuier,
A le dame, qui le mestier f. 115 b
Savoit d’onneur oultre l’ensengne,
Se de nulle nouvelle estragne
Elle avoit point oÿ parler.
Et celle qui ne voelt celer,
Ne ne doit selon leur requeste,
A nesun chevalier de queste,
Cose qu’elle sace de voir,
Qu’elle n’en face son devoir,
Respont lor assés doucement :
« Oïl, il n’a pas longement
« C’uns chevaliers si com vous estes,
« Je croi qu’il poursieuoit vos questes,
« Jones, amoureus et faitis,
« De blanc et de vert mi partis
« Fu ceens .i. soir a hostel.
« Se nous dist, sans demander el,
« Qu’il doit moult temprement avoir,
« Ensi le fait on a savoir,
« Tout parmi le Norchombrelande,
« .I. tournoy pardessus la lande
« D’Escoce, devant Signandon,
« Et sera ens, ou propre nom
« D’Ermondine, la fille au roy. »
Et quant ce oïrent li doy,
Li chevaliers et ses varlès,
Cescuns fu lors telz et si fes
Que durement et fort pensieu.
« Dame, » dist Lansonnès, « pour Dieu,
« Dittes nous dont a bonne entente
« Se longe sera li attente
« Qu’il faura ceste part aler. »
Et la dame prist a parler
Et dist : « Si com je suis sentans,
« Bien y venrés encor a temps, f. 115 c
« Mais que vous alés celle part. »
— « Dame, » dist Lansons, « Diex vous gard,
« Quant ce nous avés anoncié. »
Ce soir sont ou manoir coucié,
Et l’endemain, au matinet,
Lansonnès lors les selles met.
Quant Melyador fu levés,
Il s’est apartement armés ;
Congiet prent et d’illuech se part.
Bien a demandé de quel part
Li chemins est vers Signandon,
Et cil qui sont de le maison,
Ou hostel avoit signouri,
Et de le marce ensi nouri
Li ensengnent tres volentiers.
Or chevauce tous les sentiers
Melyador devers Escoce ;
La terre grandement approce,
Et sachiés qu’il est vraiement
En cuer resjoïs grandement
Des nouvelles qu’il a oÿes.
Melyador fist a deus fies,
Sus le chemin qu’il chevaùcoit,
Une balade qui bien doit
Par droit estre ramenteüe ;
Car vis m’est, quant je l’ay veüe,
Qu’elle soit belle et gratïeuse,
Et moult grandement amoureuse.
Telle comme elle est, vous l’orés
Et puis vostre entente en dirés.
S’a men voloir ne puis veoir,
Ma tres douce dame d’onnour,
S’ay je toutdis, et main et soir, f. 115 d
En mon coer sa tres grant valour,
Sa bonté, sa fine douçour
Et son tres doulz contentement :
Pour ce voel vivre liement.
Je me puis bien apercevoir
Qu’en joie ferai mon demour,
Dont ne puis certes mieus avoir,
Quant celle ou sont tout mi retour
Est dessus toutes la millour
Qui soit ou monde vraiement :
Pour ce voel vivre liement.
Ma joie doubleroit pour voir,
Se je veoie par nul tour
Celle que j’aim sans decevoir
Et qui est ma tres douce amour.
Se n’ay pensée nuit ne jour
Qu’a reveoir son doulz corps gent :
Pour ce voel vivre liement.
nsi en faisant la balade
De coer liet, amoureus et sade,
Chevauca li dis chevaliers,
Ce m’est avis, .ii. jours entiers,
Sans trouver nesune aventure.
Au tierch jour, en une pasture
Voient .i. chevalier venant
En tres biel et bon couvenant,
Armé moult bien a sa devise.
Li chevaliers, quant je m’avise,
Estoit Sansorins appellés.
De blanc et de bleu fu parés,
Tous semés de roses vermeilles.
Dist Melyador : « Me conseilles
« Tu, Lansonnet, que je m’avance
« Pour jouster droit ci une lance f. 116 a
« A ce chevalier que je voi ?
« Se il me bleçoit ou je soi,
« Perdu arions l’aventure
« D’estre au tournoy dont je fai cure,
« Ou je faudroie trop envis. »
Respont Lansonnès : « Il m’est vis
« Qu’il s’ordonne tous pour jouster.
« Volés vous que voise parler
« A lui et son entente sace ? »
Melyador respont a ce
Et dist : « Oÿl, va celle part. »
Atant Lansonnès se depart
Et galope tout le chemin ;
Venus s’en est a Sansorin
Qui ot le hÿaume en la teste,
Car il fu chevaliers de queste.
« Sire », ce li dist Lansonnès,
« Vis m’est que vous soiiés tous près
« Pour jouster se mes mestres voelt ;
« Mais il dist que bien on se poet
« Par honneur targier de ce faire,
« Et est grandement necessaire
« Que vous et ilz soiiés en point ;
« C’au tournoy vous ne fallés point,
« Qui sera dedens .iiii. jours
« Devant Signandon ou li cours
« Dou roy Hermon se tient pour lors. »
Et quant Sansorins, qui ot corps
Fourmé pour faire une bataille,
Ot les parolles c’on li baille,
Si s’arreste et puis si s’apoie
Sus sa lance, et dist : « Je vodroie
« Croire conseil tout par raison ;
« Mais j’ay moult en ceste saison f. 116 b
« Desiret que jou encontrasse
« Le chevalier ou le trouvasse,
« Qui se brise dou soleil d’or. »
— « Pour quoi ? » ce li demande lor
Lansonnès, qui estoit droit la.
— « Pour ce c’un mien cousin tua,
« Messire Camel de Camois. »
Et Lansonnès a celle fois
Respont et dist : « Trouvé l’avés.
« Or me dittes se vous savés
« De ses fais, ne sceuistes onques. »
Et Sansorins respont adonques :
« Certes, nennil, pour ce le voel
« Assaiier, non pas par orguel,
« Fors tant seulement par vaillance. »
Et Lansonnès a l’ordenance
Dou chevalier respondi lors :
« Chevaliers, je me fay bien fors
« Que vous l’assairés voirement,
« Puis que vous volés telement
« Parler, mes c’a lui je reviegne.
« Mais, s’il avient qu’il vous couviegne
« Sejourner a ce dit tournoy,
« Si ne le tenés a anoi. »
Dist Sansorins : « Si ne ferai. »
Adont retourne sans delai
Lansonnès devers son signour,
Et li recorde a son retour
Ce qu’il a trouvé et veü.
Evous erranment pourveü
Melyador que pour jouster,
Quel cose qu’il doie couster.
i chevalier estoient près
Pour jouster, et estoient très f. 116 c
Fort armé pour celle journée. [28]
Melyador, de randonnée,
Point le cheval vers Sansorin,
Qui vient ossi tout le chemin ;
Tost y ara jouste moult belle.
N’i a lance que la lemelle
D’acier n’ait bien d’un piet entier.
Bien savoient le plain mestier
De jouster si com il l’ensengnent.
Ne sçai comment ne se mehaignent,
Car trop dur se sont encontré
A ce que leur cop sont entré
L’un en l’autre, par grand aïr.
Melyador, qui grant desir
Avoit de bien son esploit faire,
Porte a Sansorin grant contraire ;
Car sa lance, qui fu moult roide,
Tout le fier a la pointe froide
Li passe parmi son escu ;
Ens ou costet li a fondu
Plaine paume et la le reverse.
Sansorins cheï teste enverse,
Si roit c’a paines fu il mors.
Ses varlès vint la sus le corps
Et mist errant piet jus a terre,
Et voit que sa targe li serre
Au costé et est pertuisie, [29]
Et que li sans a une fie
En sort a force et a randon.
Lors le desboucle en abandon
Et le jette dessus l’erbier,
Et puis le hÿaume d’acier,
Le quaffe, et tout au nu le met.
Ensi li varlès s’entremet f. 116 d
De donner a son mestre alainne.
Sansorins gist la en grant painne,
Car il est durement navrés.
Melyador li alosés
S’en est venus de celle part ;
Piet a terre met, et a part
S’est trais par devers Sansorin.
Se li demande en son latin :
« Chevaliers, dittes, comment va ? »
Et adont Sansorins parla,
Car pas n’estoit a mors ferus,
Et dist : « Je sui droit si cheüs
« Tout bleciés, si com vous veés.
« J’ai esté trop mal enfourmés,
« Quant onques je joustai a vous ;
« Mais ensi se portoit mes gous,
« Se le me couvient comparer.
« A ce tournoy poés aler
« Sans moy, ne point vous n’avés garde
« Que le pris qu’Ermondine garde,
« Je le vous doie calengier.
« J’en ay assés pour ce quartier
« De l’an, et tout au mieulz venir. »
Et quant ensi le peut oïr
Melyador, se li respont :
« Chevalier, ensi li fait vont
« Et les guerres, il n’est pas doubte.
« Or, metés vostre entente toute
« A vous garir, je vous en pri ;
« Car, pour verité je vous di,
« Je seroie moult courouciés
« Se de ce mehain vous moriés,
« Et me dittes a ceste fie
« Se vous volés avoir aÿe. f. 117 a
« S’ensi est, je vous presterai
« Mon varlet, saciés le pour vrai. »
Respont Sansorins : « Grans mercis !
« Nennil. Mes varlès, ce m’est vis,
« Fera assés bien la besongne.
« Veoir poés comment il songne
« De moy appareillier a point. »
Melyador lors, sus ce point,
S’est partis dou dit chevalier,
D’encoste li son escuier,
Lansonnet, qui bien le servi,
Ne onques jour ne le falli. [30]
nsi fu Sansorins navrés.
Il est erranment desarmés
Et croi qu’il ait moult grande plaie.
Nullement il ne s’en esmaie ;
Tantée l’ont et a point mise,
Vis m’est dou pan d’une chemise ;
Et, quant loiié fu bien [et] fort,
Sus la place noient ne dort
Sansorins, mais se met a voie.
Par devers .i. manoir s’avoie
Qui n’estoit mies lonch de la ;
Tant fist qu’ens ou manoir entra.
La dedens fu biel recueilliés
Et a son droit appareilliés.
De Sansorin lairons atant,
Et si parlerons maintenant
De Melyador le vassal,
Qui chemine tout a cheval,
Au lés, par devers Signandon.
Souvent pense au corps et au nom
D’Ermondine, bien le sachiés,
Com cilz qui est pris et laciés f. 117 b
Des las d’amours, et si estrains
Qu’il poet bien dire : « Certes, j’ains
« Ardanment la bonne et la belle,
« Pour qui mainte cose nouvelle
« Ay fait et si ferai encor. »
Or s’avise Melyador,
Tout en chevaucant, qu’il fera
Une cançon et chantera.
Adonques li preus le commence,
Et met fort son entente en ce
Que la cançons soit tres bien faite,
Car il dist : « C’est pour la parfaite
« Ma dame, que je tieng a dame.
« Se ne vodroie pas, par m’ame,
« Ou cas que pour l’amour de li
« Le fay, que g’i eusse falli. »
Et adonques, sans nul delay, [31]
Fist il .i. joli virelay,
Qui se commençoit par tel fourme
Que l’escripture nous enfourme.
Joie me croist, si pers dolour,
En pensant a vous nuit et jour,
Ma douce dame souverainne ;
Car c’est voir ma joie mondainne
Que j’en sui ostés de tristour.
Mais plus me seroit grant joie,
Cent mille fois, de vous veoir,
Car se souhaidier pooie,
Je ne vodroie mieus avoir.
Se saciés, ma tres douce amour,
Que se j’ai solas ou baudour,
De vous me vient, soiiés certainne.
Vous estes de tous biens si plainne f. 117 c
Que vostres vrais servans demour.
Joie me croist, etc.
Par ma foy, ou que je soie,
Envers vous ferai mon devoir,
Et cui qu’anuiier en doie
Servir vous voel sans decevoir
Tres loyaument en toute honnour,
Car je vous crieng, sers et aour
Dessus toute rien terriainne,
Dont tous jours, en vostre demainne,
Je me sui mis sans nul retour.
Joie me croist, etc.
nsi s’esbat en chevaucant
Melyador au corps plaisant,
Et tant fait qu’il est en Escoce
Entrés, et que moult priès approce
Le lieu ou li tournois sera.
De haute heure ou bois se loga
De foellies moult fricement.
Li chevalier certainnement,
Qui oÿ parler en avoient
Et qui la journée savoient,
Se tenoient de ceste part.
Cescuns d’yaus s’est logiés a part,
Par moult gratieuse ordenance.
La cose grandement s’avance
A maniere d’un escaffaut,
Ou nulle cose ne defaut
D’estre proprement carpentés.
Lons et larges comme uns hostés
Est li lieus ensi c’on destine,
Ou sera ma dame Hermondine,
A compagnies de pucelles
Friches, jones, gentes et belles, f. 117 d
Et si en y a grant fuison.
Il n’a ne haie ne buisson,
En le place ou li chevalier
Doient pour le jour tournoiier.
Les dames sont illuec venues,
Et de leurs chevaus descendues
Et montées dessus la loge ;
Li rois avoech elles se loge.
Quant heure fu de l’assambler,
On ala .i. grant cor sonner,
Et li sons moult lonch s’espandi.
Adonques cescuns entendi
A mettre le hÿaume en teste.
La sont li chevalier de queste
Plus de cent, qui se tiennent prest.
Tout se partent de le forest
Montés par dessus leurs chevaus.
Li bleus chevaliers, com vassaus,
Fu auques que des premerains ;
Car segurs se tient et certains
Que tout premiers assamblera.
Agamanor, d’autre part, ra
Pris les camps, par bonne ordenance.
Florée adonques si s’avance,
Qui estoit dalés Hermondine,
Et dist ensi : « Belle cousine,
« Veci .ii. vaillans chevaliers.
« Cilz qui chevauce tout premiers,
« C’est cilz qui desconfi Camel ;
« Et li secons sans vous dire el,
« Qui porte ceste rouge gonne,
« C’est cilz qui eut devant Tarbonne
« Le pris, si com j’ay oÿ dire.
« Il n’y en a nul qui ne tire f. 118 a
« A vostre amour, saciés, pour voir.
« Vous porés au jour d’ui veoir
« Faire mainte grant apertise. »
Et si com Florée devise
Ses parolles, evous venant,
En tres biel et bon couvenant,
Chevaliers qui hors dou bois sallent,
Et ensi qu’il viennent assallent
L’un l’autre, a bien trencans espées.
Lors se commencent les meslées,
De toutes pars, devant les dames.
Ce seroit et virgongne et blasmes
A Melyador le vassal,
Puis qu’il est armés a cheval,
Se la ne se faisoit cognoistre
Pour son pris encor plus accroistre.
.I. chevalier a encontré ;
De l’espée l’a si frapé
Qu’il le fait jus cheoir a terre.
Ensi se commence la guerre.
Tout se sont priès mis en .i. mont
Et la des bras merveilles font ;
Il fierent, frapent et martellent,
Tant que li oel leur estincellent.
Qui la est cheüs entre piés, [32]
A grant dur poet il estre aidiés,
Car nul n’i a qui ait varlet.
Melyador merveilles fet :
De l’espée si grans cops donne,
Avoecques ce qu’il s’abandonne
De fait et de tres grant corage,
Qu’il en porte a pluiseurs damage.
Il les abat, il les reverse,
Ceoir les fait la tieste enverse. f. 118 b
Hermondine moult bien le voit,
Qui as fenestres s’apoioit ;
Si en parole a sa cousine :
« Florée, » ce dist Hermondine,
« Vela le vostre chevalier ;
« Je le voi moult biel tournciier.
« Il n’i a nul qui le ressamble.
« Or me dites qu’il vous en samble ? »
— « Ma cousine, vous dittes voir.
« Telz chevaliers doit bien avoir
« Belle amie certainnement. »
En dementrues que telement
Les .ii. damoiselles parloient,
Elles regardent et si voient
Le bleu chevalier et le rouge,
Qui forment faisoit le harouge.
Qu’il se sont encontré de fait.
Je vous di que cescuns d’yaus fait
Grans apertises de son corps ;
Mais Melyador fu plus fors
Et mieulz savoit de la meslée.
Gentement manoie l’espée ;
Agamanor tel cop en donne
Sus le hÿaume qu’il l’estonne ;
Bien bas le fait plonkier aval,
Sus la grigne de son cheval.
Ja se fust entre yaus departie,
Par mautalent, li ahatie ;
Mais chevaliers de toutes pars
Les ont, tant que pour l’eure, espars.
Ensi s’entreprent li tournois,
Li behours et li esbanois.
Bien y a .cc. chevaliers
Tous tournoians, a ce premiers. f. 118 c
ien se maintient Melyador.
Ensengniés fu d’un soleil d’or ;
C’est ce dont ses parures brise.
La ot .i. chevalier de Frise,
Grant et fort, et moult bien monté.
Melyador l’a encontré,
Devant les dames, sus sa voie ;
De l’espée, qui pas ne ploie,
Le fiert sus son hÿaume amont.
Melyador senti adont
Moult bien le cop dou chevalier,
Mais tele li ala baillier
Que jus a terre l’abati.
Quant cilz a terre se senti,
Tantost fu relevés en piés,
Mais il ne fu mies trop liés
De ce qu’il fu ensi cheüs.
Ses chevaus li fu la rendus ;
Car varlet estoient sus place
Tout a piet, ce voel jou c’on sace,
Qui mainte courtoisie grande
Fisent ce jour, dessus la lande,
As chevaliers qui la cheoient.
Car quant avenir y pooient,
Il leur rendoient leurs chevaus.
La pooit on oïr hiraus
Criier et anoncier les preus,
Et disoient as amoureus :
« Signeur, Hermondine vous voit,
« Par la quele cilz pris ci doit
« Estre donnés, il n’est pas doute.
« Or metés vostre entente toute
« A estre vaillant et hardi ;
« Car s’on y voit acouardi ; f. 118 d
« Chevalier nul, comment qu’il aille,
« C’est bien drois c’a l’amour il faille
« De la belle qui vous regarde. »
Ensi nulz hiraus ne se tarde
De parler, et encores plus.
Cilz, dont tous bleus est li escus
Au soleil d’or, bien les entent ;
Adont le brac lieve et estent,
Et dedens la presse se boute.
Venus est en une grant route
De chevaliers qui se batoient,
Et qui moult dur se combatoient,
Et se donnoient grans colées,
De leurs nues trencans espées.
Mais quant Melyador vint la,
Je vous di que bien on parla
Des apertises qu’il y fist ;
Car tantost .iii. chevaliers mist
A le terre par bien ferir
Et par vassaument requerir.
Et tout ce veoit Hermondine,
Car grandement estoit encline
Au dit chevalier regarder,
Et par tout venir et aler.
Si l’en prise moult grandement
Et dist bien en son sentement
Que, se Florée bien le prise,
Droit a, car ossi a sa guise
Il le vault en toutes manieres,
Car n’i a desous les banieres,
Chevalier qui tant face d’armes ;
Ce dient bien les aultres dames.
elyador, bien le saciés,
Est ensi grandement prisiés f. 119 a
D’Ermondine. Bien le doit estre,
Car, et a senestre et a destre,
Par tout se combat bien et biel.
La y avoit .i. damoisiel,
Qui estoit Gratiiens nommés
Et en armes moult renommés.
C’est cilz qui issi d’Italie.
Melyador a ceste fie
L’encontre dessus son chemin ;
Si le feri a tele fin
Que tout bas il le fist bronchier.
Dist Gratïens au chevalier :
« Sire, sire, vo cop sont grant.
« Vous avés puis .i. an fait tant
« Pour moy, que je m’en doy souffrir.
« Ne vous endurroie a ferir,
« Se Diex m’aÿt, comment qu’il aille. »
Adont entre ou tournoy sans faille
Et lait Melyador droit la.
A ce que Gratiiens s’en va,
Il encontre .i. chevalier aultre,
Qui portoit l’espée sus fautre ;
Nommés fu messires Feughins.
Gratiiens qui fu bons et fins
Le feri dessus le hÿaume ;
Li aciers vali .i. royaume
Contre le cop bien estendu,
Autrement l’euist pourfendu.
Messires Gratiiens passe oultre
Frichement, en faisant son moustre.
Es Dagoriset et Savare,
— Entre yaus n’i avoit point de bare ; —
Des espées sont encontré,
Et li uns dedens l’autre entré f. 119 b
Et se donnent grans hatiplas,
En levant contremont les bras.
Ja se fuissent adamagié,
Car moult furent encoragié
L’un sus l’autre, par grant aïr
De cascun moustrer le desir
Qu’il avoient du dit tournoy,
Quant evous, en tres bon arroy,
Le chevalier de Cornuaille
Qui leur desrompi la bataille,
Parmi tant qu’il vint sus leur place
Ou tantost il entra en cace
Apriès .ii. aultres chevaliers.
Moult le veoient volentiers
Les damoiselles de la loge,
Car Melyador pas ne loge
En une place longement,
Mais se remoustre telement
Sus et jus, aval la besongne,
Qu’il n’i a nul qui ne ressongne
Les grans horïons qu’il depart,
Se ce n’est cilz qui a grant part
Dou tournoy et a sen honnour,
Agamanor, qui ens ou jour
Y fist moult d’apertises d’armes,
Devant les loges et les dames.
Pas ne sçai s’il avoit envie
Sus la bonne chevalerie
Dont Melyador estoit plains,
Mais moult desiroit c’a ses mains
Il li peuist porter damage.
Une heure sus son avantage
Le trouva, si com il m’est vis.
Adonques fu la li devis f. 119 c
Des damoiselles qui le voient,
En disant : « Cil doi estre doient
« Moult grandement recommendé.
« Or regardons, pour le corps Dé,
« Comment entre yaus se maintenront,
« Car hui .ii. fois trouvé se sont
« Et combatu moult fierement. »
Et cil qui ont grant hardement,
Et moult de vertu en leurs bras
Qu’il n’ont mies pesans ne cras,
Mais fors, et drois et aligniés,
Fierent et frapent, ce saciés,
Desus les hÿaumes amont.
Hardemens ensi les semont,
Ce poet on loyaument bien dire,
De l’un l’autre la desconfire.
hil doi chevalier dessus dit
Ne se combatent pas petit,
Mais longement et a leur aise,
Ce n’est pas drois que je m’en taise,
Car il font d’armes grans merveilles.
Et toutesvoies les vermeilles,
A une blanche dame en mi,
N’ont pas les blewes desconfi,
Car li place la li demeure,
Et me samble que pour ceste heure
Agamanor cheï a terre.
Et tantost le vinrent requerre
Li homme qui au tour estoient,
Qui au relever les aidoient,
Car autrement par verité
Point ne se fuissent relevé.
Tantost fu a cheval remis.
Or est il, ce dist, ennemis f. 119 d
Au chevalier au soleil d’or,
Quant bien batu l’a et encor
Fait jus aler de son cheval.
Agamanor parmi .i. val
S’en est venus, car on l’ensengne,
Sus .i. chevalier de Bretagne,
Qui nommés estoit Agoris.
Il l’a a l’avantage pris,
Car illuecques le fist cheoir.
Ceste empainte peut bien veoir
Li rois Hermons de sa fenestre,
Car, fust a senestre ou a destre,
Il veoit aval et amont.
A ce pourpos a dit adont :
« Cilz rouges chevaliers, voiiés,
« S’est moult grandement revengiés,
« Car il en a .i. abatu,
« Qui avoit trop bien combatu
« Tout le jour et sans cheoir point.
« Regardés encores : il point
« Devers le plus fort de l’estour ;
« Par armes poroit en ce jour
« Avoir le pris c’on li calenge.
« Mais cilz est de plus grant loenge,
« Ce m’est vis, qui le soleil porte,
« Car tres vaillamment se deporte
« A aler et venir par tout.
« Hui, ens ou jour, l’ai veü moult
« De tres grans apertises faire.
« S’en loe trop mieulz son afaire. »
ces parolles deviser,
Que si vous m’oés recenser,
Estoient a tres bonne estrine
Florée et ma dame Hermondine. f. 120 a
Si leur vienent a grant plaisance,
Quant cils, par sa bonne ordenance,
Sa gouvrenance et son arroi
Se fait recommender dou roy.
Adonques respondi Florée :
« Certes, monsigneur, sus la prée
« N’i a chevalier qui le vaille,
« Ne qui mieus se tiegne en bataille,
« Ne qui tant face d’apertises. »
Tout ensi font la leurs devises,
Et Melyador en la painne
Est, qui moult bien tient sen alainne.
Point ne va devers les plus foibles,
Ne les lassés, ne les endoibles,
Mais chevauce contre les fors.
Il est bien voirs c’Agamanors
Se combati tres vaillamment,
Et abati certainnement
Plus de .x. chevaliers ce jour.
Mais toutes fois, tant c’a l’onnour
Et a le loenge de tous,
Non pas acordée au rebous
Mais ensi qu’elle devoit estre,
Melyador fait de lui nestre
De proeces oultre mesure.
Tout ce jour en son armeüre
Se tint sans recouvrer alainne,
Qui estoit as aultres grant painne ;
Mais point n’en moustra dou contraire.
D’une coursée s’ala traire
Devers la fenestre Hermondine ;
La ramena a bonne estrine
Le tournoy, ferant, et frapant
Et as chevaliers abatant, f. 120 b
Tant que les dames en disoient
Ensi de li et devisoient :
« Cilz chevaliers nous vient esbatre.
« Veés, il met painne a abatre
« Chevaliers. Il fait de son corps
« D’armes grans fais et grans recors. »
Hiraut ne sont mies trop loing,
Qui ont grant entente et grant soing
Qu’il soit tres bien recommendés,
Et dient en hault : « Regardés
« Dou chevalier au soleil d’or,
« Comment il se maintient encor.
« Il est en armes ossi frès
« Et en ses coses ossi près,
« Comme il fust en l’eure venus.
« Il est tres franchement tenus
« A cheval, car hui ne cheï,
« Ne onques ne li mescheï
« Chi ne ailleurs, dont il vault mieux.
« La renommée a en tous li[e]us
« De grant proece et de vaillance. »
Tout ensi, par bonne ordenance,
Hiraut dient la et recordent,
Qui a l’un l’autre bien s’acordent,
Et puis crient a haute vois :
« Le pris, le pris, l’onneur, c’est drois,
« A celi qui le soleil porte,
« Qui ci et ailleurs se deporte
« A estre si bons chevaliers.
« C’on en parole volentiers. »
oult fu cilz tournois biaus et gens,
Et moult prisiés de toutes gens
Qui le regardent environ.
Ce jour maint pesant horïon f. 120 c
Y donna et rechut ossi
Li chevaliers c’on prise si,
Qui se brise dou soleil d’or.
Florée ne s’en poet encor
Ravoir de dire a sa cousine :
« Regardés, tres douce Hermondine,
« Comment nos chevaliers s’esprueve.
« Tout ce qu’il encontre et qu’il trueve
« Est abatu, voiant nos yeus.
« Tout ensi me voelle aidier Diex,
« Se onques vi tel chevalier.
« Comment poet il tant travillier,
« Ne durer, ne souffrir la painne,
« Ne demorer en sen alainne ?
« Car si cop noient n’afoiblissent.
« Je voi des chevaliers qui issent
« Et qui sont durement lassé,
« Batu, fourmené et pressé,
« Pour .i. peu rafreschir leurs corps ;
« Mais cilz ne se traist point la hors,
« Ançois se boute toutdis ens. »
Hermondine, qui a bon sens,
Le prise ossi en son corage ;
Dist qu’il passe de vasselage
Tous les aultres certainnement,
Et que selonc son jugement
Nulz ne li torra la l’espée,
Car moult bien sera acatée
Par proece et par haute emprise ;
Ensi Melyador on prise
Et il l’acquiert par son bien fait.
Li hiraut qui doient dou fait
Jugier, et qui sont la au tour,
Et qui poursieuent tout le jour f. 120 d
Le mieulz faisant a lor maniere,
Dient : « Ceste journée chiere
« A ce chevalier demorra,
« Qui ou bleu le soleil d’or a. »
Adont s’en viennent, ce me samble,
Vers li et puis dient ensamble :
« Or avant, sire chevaliers.
« Certes en vous est li mestiers
« D’armes tout plainnement entés.
« On trueve en vous les volentés
« Si grandes pour a honneur tendre,
« C’on ne vous ose as coups attendre. »
Melyador, qui les caroles
Ront des plus fors de ces paroles,
N’est point vraiement courouciés :
Car il scet bien que li grans chiés
Ou toute sa pensée gist
Est la, et ot ce c’on en dist.
Pour ce se met il a l’esprueve
Contre tous et son corps esprueve.
gamanor moult honteus fu
Dou chevalier au bleu escu,
Qui l’avoit ce jour fait cheoir,
Car au matin cuidoit pour voir
Que on ne le peuist abatre
Et qu’il deuist, par bien combatre,
Avoir le pris de ce tournoy.
Et quoi qu’il euist grant anoi
Et qu’il fust honteus pour les dames,
Si dist il : « Ce n’est mies blames
« De cheoir quant uns chevaus chiet.
« A milleur de moy bien meschiet ;
« Mais c’est blasmes se ne me venge,
« Et a l’espée ne calenge f. 121 a
« La journée au chevalier d’or. »
Dont qui veïst Agamanor
Poindre le cheval par irour
Et li ferir dedens l’estour,
Bien desist : « Vela chevalier
« Qui scet grandement tourniier
« Et qui se porte vaillanment. »
Bien est sieuis certainnement
Et de hiraus et de pietaille,
Qui environnent la bataille,
Et dist on : « Avant, chevaliers !
« Vous estes moult bien coustumiers
« De vous maintenir par arroi,
« Sus les camps, en .i. tel tournoy
« Comme cilz ou encor plus grant. »
Evous Agamanor entrant [33]
En une route grande et fiere
Ou nul n’en y a qui ne fiere
De l’espée a tout son pooir.
Agamanor, qui grant voloir
A qu’il se puist contrevengier,
Va encontrer .i. chevalier
De blanc a une noire bende.
Sus li son mautalent amende,
Car telement le porte a terre,
Que li hÿaumes tout jus serre
En terre et les piés contremont,
Ens ou regart dou roy Hermont
Qui le cop grandement prisa.
Agamanor son tour pris a
En [s’en] venant vers Hermondine,
Qui le remoustre a sa cousine
Et dist : « Veci le chevalier,
« Qui devant Tarbonne avanthier, f. 121 b
« Eut le pris, ensi que vous dittes.
« Ce sont coses toutes escriptes
« Qu’il est biaus chevaliers de corps,
« Bien tournïans, hardis et fors,
« Et croi qu’il le conquist de droit. »
Florée qui pas n’en vodroit,
Fors a point, parier, respondi :
« Bele cousine, je vous di
« Qu’il est chevaliers voirement
« Preus et hardis, mes nullement
« Il ne poroit durer en place
« A celui que je voi en face.
« Pas ne sçai comment on l’appelle,
« Mais il siet moult bien en sa selle
« Et se porte ce soleil d’or ;
« Vous ne l’avés veü encor
« Cheoir et cilz la est cheüs. »
Ensi est la ramenteüs
Li chevaliers, par son bien fait,
Et li dis tournois se parfait
Qui jusqu’a la vesprée dure.
Et la mainte belle aventure
Y eut faite pour celi jour
En painne, en traveil, en suour ;
Ne sçai comment il peürent tant
Tournoiier tout en .i. estant.
out ensi se continua
Cilz tournois, qui point n’anoia [34]
As dames qui le regardoient,
Mais li chevalier qui estoient
Sus les camps, en haire, et en painne
Et priès jusqu’a la grosse alainne,
Li pluiseur caciet et menet, [35]
Vosissent estre ramenet f. 121 c[36]
Ens el bois, a leur logeïs. [37]
Ensi dura cilz capleïs [38]
Jusques au soir sans nul sejour. [39]
Quant on vit decliner le jour,
On sonna, dedens le chastiel
De Signandon, .i. son moult biel :
Ce fu un cor a longe alainne.
Cilz sons les chevaliers remainne
Incontinent devers le bois ;
Lors qu’il en oïrent la vois,
Il cesserent de toutes pars.
Tantos fu li tournois espars,
Et s’en vont ens el bois rembatre, [40]
Chi .v., chi .vi., chi .iii., chi quatre,
Dont devant estoient parti.
La sont en moult tres dur parti
Li varlet qui n’ont point de mestre :
Les camps a senestre et a destre [41]
Cercent et font tant de tous lés,
Que leurs mestres ont retrouvés.
Chiaus qui sont mort pleurent et crient,
Et des aultres tout hors les trient ; [42]
Les mehagniés a point remettent. [43]
Ensi, sus les camps, s’entremettent
Li escuier de mettre a point
Tout ce qui leur touce et leur point ; [44]
Et cilz, qui sen signeur retrueve [45]
En santé, il li prie et rueve [46]
Qu’il s’en retourne vers le bois. [47]
Agamanor, a ceste fois,
O Bertoulet s’en est ralés, [48]
Et Melyador d’autre lés.
Cescuns va ou il est logiés,
Desarmés est et refroidiés, f. 121 d[49]
Et boivent cescuns .i. petit
Sus l’erbe ; il n’ont la aultre lit. [50]
r vous dirai dou roy Hermont
Et de sa fille, qui amont
S’en sont ralé ens ou chastiel. [51]
Damoiselles et damoisel [52]
Les convoient en grant arroy ;
La ont maint joli palefroy
Et tamaint cheval ensellé. [53]
En grant reviel s’en sont ralé [54]
De trestoutes menestraudies.
Li rois et les dames prisies
Sont rentré dedens le chastiel,
Et la s’ordonnent bien et biel
De reprendre nouviaus abis.
Ce sera uns tres grant delis
Que des dames veoir en face.
Melyador voelt bien c’on sace,
Voires li et ses escuiers,
Ailleurs ne baille ses cuidiers,
Qu’il ira veoir Hermondine.
A Lansonnet en détermine
Son pourpos pour avoir conseil,
Et cilz respont : « Je m’esmerveil
« Comment tout ce se pora faire. »
Et Melyador tout l’afaire
Li conte et dist : « Bien se fera,
« On ira par tout et venra ;
« J’a n’i ara porte fremée.
« Pas ne seroit de moy amer
« Parfaitement belle Hermondine,
« Se li et sa bonne cousine
« Ne veoie avant mon retour
« Et, se je puis venir a tour, f. 122 a
« A tout le mains je parlerai
« A Florée, et li conterai
« La grignour part de mon entente.
« Elle est bien si france et si gente
« Qu’en tous cas me fera adrece. »
Adont Melyador se drece,
Qui estoit vestis et parés,
Et dist : « Lansonnet, demorés.
« Je m’en vois, car il est droite heure. »
A ces mos, la plus ne demeure,
Mais se part et se met a voie.
Lansonnès rien ne le convoie,
Car point ne le voelt cilz souffrir.
Tout a piet et de grant desir,
Parmi uns prés ou moult fist biel,
S’en est venus jusc’au chastiel.
La porte trueve toute ouverte,
Il se boute ens, a le couverte.
De nullui ne fu cogneüs,
Car la de grans et de menus
Estoit la voie toute plainne.
Ensi c’aventure le mainne,
Il s’en est entrés en la sale
Ou on carole ja et baie,
Et s’ensonnient de piper
Li menestrel pour le souper.
n demetrues que la estoit
Melyador, qui s’arrestoit
En la sale avoech yaus .cc.,
Evous venues o leurs gens
Les dames et les damoiselles,
Par ordenances, grans et belles.
Tout premiers estoit Hermondine,
Et puis Florée sa cousine f. 122 b
Et des aultres moult grant fuison.
Toute estoit plainne la meson
De jeus, de solas et de joie,
Ne on ne veoit el sur voie.
On a lavé ; assises sont.
La fille au gentil roy Hermont
Est assise a la haute table,
En lieu moult biel et moult notable
Qui estoit ordonnés pour li.
Sa cousine s’assist ossi,
.I. moult petit par desous soy,
Et trois dames après, ce croy,
De Norchombrelande et d’Escoce.
Il n’est riens que laiens on ot ce, [55]
Fors menestrelz qui se demainent.
Adont li chevalier enmainnent
Seoir dames et damoiselles
As aultres tables moult tres belles.
Tout fu de tele compagnie
La sale a ce dont raemplie.
Li rois Hermons, dedens sa cambre
Qui estoit listelée d’ambre,
Avecques pluiseurs chevaliers
Les quelz il veoit volentiers,
S’assist en yaus moult honnourant
Et le roy Artu coulourant,
Car il venoient de sa court.
On ne le fist mies trop court
Ce souper, saciés le pour voir,
Mais fisent moult bien leur devoir
Li chevalier de bien servir ;
C’est plaisans cose dou veïr.
Melyador par tout se boute.
Quant il veoit une grande route f. 122 c
De gens par devant Hermondine,
Il fait d’yaus verriere et gourdine
Pour mieulz regarder a sen aise
Ceste qui bien vault qu’il li plaise,
Car il l’aime sur toutes riens.
Haro ! que ce li est grans biens,
Quant bien le poet imaginer
Et .i. regart en priesse embler,
Et, quant ensi qu’en emblant l’a
Regardé, il se traist de la
Pour les mestres d’ostel qui vienent,
Et qui cerges en leurs mains tienent
Dont il resclarcissent par tout.
Melyador a un debout
De la sale s’en est venus,
Et la ne se tient mies mus
Pour une cançonnete faire ;
Car vis li est que necessaire
Li soit c’a se s’ordonne et pense,
Quant il voit priès qu’en sa presense
Celle qui est dame de soy.
Adont commence en bonne foy
Une balade incontinent.
Lors qu’il y entra erranment
Le fist ains c’on euist soupé,
Et, pour ce que j’en ay hapé
La matere ensi qu’il le fist,
Vous l’orés, car cilz le me dist
Qui le trouva de puis escrite
En une cedule petite.
Aucun dient c’amant ont trop grant painne,
Pour bien amer et loyauté tenir ;
Pour ce, s’il ont .i. bien une sepmainne, f. 122 d
Encontre ce leur fault .c. maus souffrir.
Mais a ce point ne me voel acorder,
Car Amours poet tout ce bien amender.
Par .i. seul eur c’on en poet recevoir,
Couvient il dont tout l’anoi oublier
C’on ot onques ou puist jamais avoir.
Si doucement Amours ses servans mainne
C’on doit tous jours son voloir acomplir,
Mais pour ce voir dou tout en son demainne
Je me sui mis sans jamais repentir.
En ce pourpos voel fermes demorer,
Si ne m’en poet jamais nullui oster ;
Car, pour certain sçai, a son doulz voloir,
Couvient il dont, etc.
Or li pri dont que de ma souverainne
Puisse, en brief temps, par sen honneur joïr ;
Car c’est tout voir et bien cose certainne
Que tout mon bien me poet de ce venir.
Par ce puis jou ma joie recouvrer ;
Si l’en lairai de ce tout ordener,
Que je sçai bien par son tres grant pooir,
Couvient il dont, etc.
nsi, par soy esbanoiant,
A une fenestre apoiant,
Fist Melyador la balade
De coer haitiet, non pas malade,
Mais joieus et tres envoisiet.
Et quant il l’eut metrefiiet
Et recordé, si dist pour vrai :
« Jamais jour ne l’oublierai. »
Et ensi qu’il revint arriere,
Il y avoit moult grant lumiere
Par devant la table a sa dame ;
Car on estoit sus l’ain, par m’ame, f. 123 a
De lever et oster les tables.
Cilz en qui le coers est estables
De bien amer, il n’est pas doubte,
S’est tantost remis en le route
Des chevaliers qui la estoient,
Et qui en estant s’arrestoient
Par devant la table Hermondine.
Si le regarde et sa cousine,
Que veü avoit aultre fois ;
Moult li est ce regart courtois,
Doulz, gratïeus et tres plaisans.
On se leva, car il fu temps,
Dont commencierent a piper
Menestrel, et hault a tromper,
Et a ouvrer de leur mestier.
Signeur, dames et chevalier
Se prendent errant par le doy,
Et commencent par esbanoy
A caroler .i. seul petit ;
Et puis tantost, sans contredit,
Sont de ce rentré ens es danses,
Et la furent ces ordenances
Bien demi heure maintenues.
Evous la plusieurs vois venues,
En disant : « Dames, c’or partés
« Et dou pris ordonner venés,
« Car li rois lassus vous attent. »
Et quant Melyador entent
Ce parler, si dist qu’il ira
La ou le pris se jugera,
Car toutes gens de bien iront. [56]
Les dames se partent adont
Et li chevalier tout en l’eure ;
Nulz en la sale ne demeure f. 123 b
Qui soit tailliés de donner pris.
Le chemin d’une cambre ont pris
Ou li rois estoit proprement,
Qui ne voelt mies sobrement
La dou bleu chevalier parler,
Mais en tous cas recommender. [57]
Li pris valoit que tous jugiés,
Car si fort estoit entechiés
De proeces, de chief en cor, [58]
Li chevaliers au soleil d’or,
C’on li donne a plainne huée [59]
Le pris dou tournoy et l’espée.
Adonques ceste voie s’espant.
Chevaliers et dames errant
Devers la sale s’en retournent,
Et hiraut, qui point ne sejournent
De hault criier a clere vois, [60]
Dient en cheminant envois :
« Le pris, le pris au vaillant homme,
« Que le bleu chevalier on nomme, [61]
« Celi qui le soleil d’or porte,
« En qui proece se deporte ! [62]
« Conquis a l’espée et de droit
« Nulz n’est qui tollir li vodroit,
« Car il l’a tres bien acaté. [63]
« Hui ne le veismes maté, [64]
« Ne faire samblant de guerpir
« Le tournoy, mais toutdis ferir [65]
« Et chevaucier sus les plus fors. » [66]
Chil hiraut salent errant hors
Dou chastiel, et tout ensi crient [67]
En la place, et en criant dient : [68]
« Le pris, le pris au chevalier
« Qui a hui volut tournoiier, f. 123 c[69]
« Si vaillamment et si a point,
« Que nulz n’est trouvés ens ou point
« De lui, ne en sa grant vaillance ! [70]
« On ne le poet a la samblance [71]
« Des dames voir emploiier mieuls. [72]
« Conquis l’a, si nous aÿt Dieus,
« Si vaillanment et si a droit,
« Que, qui retollir li vodroit,
« On li feroit grandement tort.
« C’est cilz qui mies ne se tort [73]
« De proece dont on le prise [74]
« Et qui d’un soleil d’or se brise. »
nsi la vois s’espant par tout.
Melyador, a .i. debout
De la cambre ou dit on avoit
Le pris, a ce dont se tenoit
Et ne visoit a aultre cose [75]
Que Florée a qui moult bien ose [76]
Parler, ce li vient en samblance, [77]
Passe par la, en ordenance, [78]
Ensi que passer li couvient ;
Au dehors de l’uis il se tient.
Tortis passent a grant randon
Et chevalier en abandon, [79]
Qui par devant les dames vont.
Hermondine passa adont,
Et tantos apriès sa cousine.
Melyador .i. peu l’encline,
Par maniere de contenance, [80]
Et le trait a li par le mance [81]
Et puis tantost le lait aler.
Mais il adreça son parler [82]
Tout en bas, en disant ensi : [83]
« Damoiselle, je vous suppli f. 123 d
« Que dou chevalier vous souviegne, [84]
« S’il est ensi c’a tour aviegne, [85]
« Qui se combati l’autre fois
« Encontre Camel de Camois
« Et cui donnastes l’anelet. » [86]
Florée cuida d’un varlet
Estre aresnie vraiement ;
Si passa outre incontinent ;
Mais, tout en alant ses sentiers,
Elle dist : « Compains, volentiers.
« Veci voir le pris qu’on li porte. [87]
« Ou est il ? Est il a le porte ? »
Et cilz respont, tournant son sens : [88]
« Damoiselle, il est hors ou ens. »
Plus n’i eut dit a ceste fois. [89]
Melyador se tint tous quois.
Et Floré[e] vint en la sale.
Saciés que pas ne tint a gale
Li bleus chevaliers la response,
Ançois tous courouciés s’esconse
Et se met en un angelet.
Les danses et Florée let,
Et se repent qu’il est venus.
A par soy dist : « Bien sui tenus
« Quant on m’a respondu ensi.
« Et ceste que j’amoie si [90]
« S’est de moy si briefment passée ;
« Ensi c’une femme lassée,
« Qui n’a mies trop grant desir
« De nulles nouvelles oïr,
« M’a respondu et m’a fait signe.
« Las ! pour quoi vous ains, Hermondine ?
« Car vis m’est que je pers ma painne.
« Espoir telz mies ne se painne f. 124 a
« A la vostre amour que je fai
« Et jusques a ores fait ay,
« Si fort ne si destroitement,
« Ce sai je tout certainnement,
« Et si n’en ay fors que les haires,
« Car vous a moy ne pensés gaires
« Et ossi ne fait vo cousine,
« Si com j’en ay veü le signe.
« Tost sont femmes en brief muées ;
« Ensi que vens vont leurs pensées.
« Creü n’euisse point orains,
« Pour tout l’avoir qui est a Rains,
« Que Florée m’euist ce fait. »
Adont sus cel estat le lait
Melyador tout courouciés,
Et s’en est venus de reciés,
La ou il vit la grignour presse,
Et a veoir les danses presse,
Qui estoient ja commencies [91]
A tel son de menestraudies,
C’on ne pooit la oïr goute. [92]
Or est Florée entrée en doubte [93]
Qu’elle n’ait trop mal respondu.
Trop se repent quant attendu
N’a plus et parlé a cel homme. [94]
Si pensieue est en fin de somme, [95]
Que elle en piert la contenance, [96]
Et s’en met en tele ordenance [97]
Que sa cousine s’en perçoit. [98]
Vers li vint ou elle le voit [99]
Et li dist : « Que vous fault, cousine ? »
Et ceste, qui fu toute estrine, [100]
Li dist : « Pour quoi le dittes vous ? »
— « Pour ce qu’il samble tant qu’a vous f. 124 b[101]
« Que vous soiiés .i. peu malade. »
Dist ceste : « J’ay le coer tout fade [102]
« D’une pointure, Dieu merci, [103]
« Qui m’est sourvenue droit ci ;
« C’est une cose mervilleuse.
« Je ne sçai s’elle est perilleuse ;
« Mais volontiers .i. peu iroie
« En ma cambre, et la me tenroie
« Tant qu’en point fuisse revenue. »
Et ceste, qui pas ne l’argüe,
Li acorde legierement.
Adonques tout secretement
Se part Florée a quelque painne
Que ce soit, et o lui n’enmainne
Que une seule pucelete,
Espoir que de .xii. ans jonete. [104]
Et se departoit sus l’entente
Que ses sens tout ensi le tente,
Et li fait proprement a croire
Que se ceste matere est voire,
Que Melyador est en place
Entrues c’on deduit et solace.
A ce qu’elle a oÿ devant,
Il se traira tantost avant ;
A tout le mains en ora elle
Aucune certainne nouvelle.
elyador, si m’aÿt Diex,
Avoit veü devant ses yex
La contenance d’Ermondine
Et de Florée sa cousine,
Car il n’avoit ailleurs regart.
Et si tost qu’il voit qu’elle part,
Il tourne d’autre part sa teste ;
Si voit qu’elle vuide la feste. f. 124 c
A ce premiers le sieut de loing.
On n’avoit laiens aultre soing
Que d’esbatre et solatiier.
Pluiseurs dames et chevalier
Virent bien Florée partir ;
Mais tout et toutes, sans mentir,
Cuidierent bien a celle fois
Que leur dame a baissete vois
Li euist quelque cose dit
Qu’il li fausist sus son abit, [105]
Se l’alast secretement querre.
Pour ce n’en volt on plus enquerre.
Et Florée, qui bien el pense,
Voit revenir en sa presense
L’omme qui ot parlé a li.
Ce grandement li abelli
Et li dist : « Traiiés vous avant.
« N’estes vous cilz qui au devant
« Telz parlers ores me mesistes,
« Et qui si me ramentesistes
« Le chevalier au soleil d’or ? »
— « Oïl, voir, et le fay encor. »
Dist Florée : « Et qui estes vous ? »
Respont cilz : « C’est ci entre nous
« A dire. Et ne me cognissiés ? »
— « Non voir ; mais moult m’esjoïssiés
« Quant dou chevalier me parlés.
« Dittes quel cose vous volés
« Et je le ferai vraiement,
« A mon pooir tout prestement. »
— « Damoiselle, je sui cilz voir,
« Puis que tant vous en fault savoir,
« Qui fu anten en vo chastiel,
« A cui vous donnastes l’aniel. » f. 124 d
— « Et ou est il ? » — « Il est ou doy
« De celle pour qui je le doi
« Mieus amer, assés que pour mi :
« Pas n’a granment que je l’i vi. »
Adont Florée se reprent,
Qui par ses parolles aprent
Que c’est la li bleus chevaliers :
« A ! » dist elle, « doulz sires chiers.
« Aventure ci vous amainne,
« Et s’avés hui eü tel painne
« De tournoiier trestout le jour,
« Sans avoir noient de sejour.
« Comment le poés vous porter ? »
— « Dames », dist il, « au deporter,
« Avoech vous et vostre cousine,
« Porteroiie bien a l’estrine
« Plus grant painne que ne soit ceste. »
Florée adont baisse le teste
Et dist tout bas : « Alons, alons.
« Longement droit ci ne parlons.
« Nous arons bien ailleurs matere
« De parler en cambre plus clere
« Que ne soit ceste voie sombre ;
« Mais tout de gret ay pris cel ombre
« Pour parler a vous en requoi. »
Dist Melyador : « Bien le croi.
« Vous estes sage et bien couverte,
« Et au besoing assés ouverte
« Pour faire toutes riens a point.
« Sur tout ce, je ne pense point. »
n une cambre belle et gente,
Qui en la garde estoit d’Argente,
La plus secrée de leur dame,
En mena Florée, par m’ame, f. 125 a
Melyador son chevalier.
Quant ens fu l’uis cloÿ arrier,
Ce dist : « Argente, douce amie, [106]
« Veci cesti, n’en doubtés mie,
« Qui fu a Montsegur l’autrier,
« En estat que d’un mercenier.
« Di je voir ? Regardés le bien. »
Et ceste, qui sur toute rien,
Fu dou parler esmervillie,
.I. petit y merancolie
Et respont : « Certes, je ne sçai.
« Le marcheant bien avisai,
« Mais point ne ressamble cesti.
« Je le vi aultrement vesti
« En gise d’un droit païsant,
« Et cesti a le corps plaisant,
« Bien tailliet et de belle fourme.
« Espoir mies ne vous enfourme
« De verité a sa parole ;
« Vous poriés bien estre trop mole
« De lui trop legierement croire. »
Dist FIorée : « C’est cose voire.
« Pensés vous dont c’uns merceniers
« Fust cilz, qui ot de vos deniers ?
« Certes, nennil, pas ne le taille
« Que tel cose faire li faille.
« C’est li bleus chevaliers sans doubte,
« Qui a hui passée la route
« Dou tournoy et conquis le pris.
« Plus le regart, mieulz l’ay apris ;
« Car je l’euch ja en mon chastiel,
« Bien .i. mois, et me fist .i. biel
« Et tres grant service, par m’ame,
« Et ossi fist il a vo dame, f. 125 b
« Ma cousine, et tout en .i. mois :
« Monsigneur Camel de Camois
« Occist par sa chevalerie.
« Argente, ma suer, je vous prie,
« Que vous li faites bonne chiere ;
« Car, pour l’amour de ma tres chiere
« Cousine, est il droit ci venus,
« Et ne l’i scet nulle ne nulz,
« Fors vous et moy, dont je vaulz mi[e]ulz.
« Vous avés esté ens es lieus
« Pluiseurs, ou parlé en avons
« Et souhediet plus c’onques homs
« Ne fust desirés ; je le croy.
« N’en aiiés doubte ne effroy ;
« Car, se nul contraire y sceuisse,
« Ci point amené ne l’euisse. »
elyador estoit a part
Trais, et n’ot mies quel depart
De biens Florée la ordonne,
Et quoiement les seme et donne
Pour li, afin que mieulz en vaille
Et que la pucelle, sans faille,
Qui estoit de sa dame garde,
Amoureusement le regarde.
Bien en avoit oÿ parler
Sa dame, et si savoit tout cler
Que cilz tournois estoit empris
Pour veoir s’il avoit le pris
Et la grande chevalerie
Que Florée, sa bonne amie,
Recordoit de lui et disoit ;
Mais toutes fois elle visoit
Que sen honneur y fust gardée.
Pour ce s’est encor retardée f. 125 c
De Melyador festiier ;
Mais se va moult ensonniier
Au parler et dist : « Las ! Florée,
« Vous savés comment m’est donnée
« Et mise vo cousine en garde.
« C’est ci uns poins ou je regarde,
« Car je çrieng trop blasme et reproce.
« Que diroit ja li rois d’Escoce
« Nos sires, se ceens venoit
« Et .i. seul chevalier trouvoit,
« Soit de Gales ou de Bretagne,
« Parlant a moy par voie estragne
« Ou a sa fille nostre dame ?
« Je seroie morte, par m’ame,
« Ou virgondée a tous jours mes.
« Trop bien me faut garder ma pais
« Se je voel demorer ceens,
« Pour l’envie de toutes gens
« Qui sont dedens ceste maison.
« Encor y a aultre raison
« Qui m’est revenue au devant,
« Que je vous dirai maintenant.
« Ma dame et la vostre cousine
« Seroit ja certes moult estrine
« Et grandement esmervillie,
« Se ci entroit a chiere lie
« Et elle trouvast sans savoir
« Ce chevalier avoec moy, voir.
« Elle m’en saroit trop mal gré,
« Tant cognoi je de son secré. »
— «
t que ferons dont, douce amie ?
« Aultre conseil n’i perçoi mie,
« Il couvient que ceens demeure. »
Et Argente respont en l’eure : f. 125 d
« Je le vous dirai volentiers,
« Ou cas que c’est li chevaliers
« Dont vous recordés si grant bien ;
« Car je ne voel sur toute rien
« Faire chose ou reprise soie.
« Je le metterai hors de voie,
« En une cambre tout par li,
« En lieu gratïeus et joli,
« Ou il sera tout a sen aise.
« Mais, belle dame, qu’il vous plaise
« Et vous me dirés au sourplus
« Que je ferai, et sans refus
« Je le ferai, s’il se poet faire. »
Florée, qui perçoit l’afaire
D’Argentine, et trop bien le sent,
A ceste parolle s’assent,
Et fu en l’eure consillie
De respondre et appareillie
De donner conseil a son gré.
Adont li recorde en secré
Comment des danses se parti,
Pour ce que elle avoit oÿ
Ce chevalier ensi parler,
Quant en sale s’en peut aler.
« Je vous dirai que je ferai.
« Sus ce lit je me metterai,
« Et ferai moult fort le malade,
« Le pesant de corps et le fade ;
« Et lors que je serai couchie,
« Vous irés toute couroucie
« A ma cousine et li dirés,
« Coiement ou vous le verés,
« Ma maladie a bonne entente.
« Je le sench bien vers moy si gente, f. 126 a
« Si appareillie et si propre,
« Que ja n’ara le coer si sobre
« Que tantost ne viegne vers moy ;
« Et quant ci sera, par ma foy,
« Je le cuide si biel attraire
« Et par mes paroles tant faire
« Qu’en riens n’en serés demandée,
« Mais tout plainnement escusée.
« Que vous semble ? Ay ge bien visé ? »
Et celle n’a riens devisé,
Car la parolle bien li plaist.
Elle dist : « Oïl. » Lors se taist,
Et Florée s’en vient arriere
Tout en riant, a lie chiere,
Viers Melyador le courtois,
Qui se tenoit illuech tous quois.
Si s’escuse moult doucement,
Sans parler ja trop longement,
De ce c’on li fait tant de painne,
Qu’il ne poet a sa souverainne
Parler, sitos comme il vodroit ;
La moustre le tort et le droit
De la damoiselle, sa dame.
Melyador respont : « Par m’ame,
« Florée, je l’escuse bien,
« Car il li fault sour toute rien
« Garder sa pais ; c’est vraie cose.
« Elle ne poet faire ne ose,
« Fors tout ce qu’elle a d’ordenance. »
Adont Argentine s’avance
Et dist au chevalier : « Alons.
« Li chemins n’est mies trop Ions,
« Biaus sire, je vous voel mener ;
« Mais hui vous lairés gouvrener f. 126 b
« Par moy. » Et a ces cops desfrume
Une cambre et feu y alume.
La lait Melyador, et dist
Tout ensi quant de la cambre ist :
« Sire, ci vous couvient attendre
« L’eure c’on pora bonne prendre.
« Ne le poons aultrement faire. »
— « Bielle, » dist cilz, « sus vostre afaire
« Ne voel je noient deviser. »
La le va laiens enfremer
Argente, puis revient arriere,
Et trueve ja en sa maniere
Florée gisant sus .i. lit,
Qui incontinent li a dit :
« Douce Argentine, alés ent la,
« Car la nuit grandement en va,
« Qui nous sera courte ains le jour. »
Et Argentine, sans sejour,
S’en part et en la sale vient,
Et regarde, et voit c’on se tient
Tout en carolant par le doy,
Et que menestrel sont tout quoi,
Et cantoient cil baceler
Et ces damoiselles moult cler.
Si vint la si a point Argente
C’une pucelle jone et gente
Avoit, comme lie et doucete,
Commencié une cançonnete,
Que sa dame ooit volentiers ;
Car moult li plaisoit li mestiers
Dou canter, il n’est mies doubte.
Argente se taist et escoute
Que c’estoit uns rondelès gens,
Qui doit bien plaire a jones gens f. 126 c
Qui ont la pensée amoureuse.
Ensi disoit la gratïeuse
Que vous orés recorder ci,
Pour l’amour de son doulz ami.
Se plus parfaitement pooie
Amer mon douls loyal ami.
Par ma foy, je l’ameroie.
Et bien faire le deveroie
Pour la grant loyauté de li,
Se plus, etc.
De bon voloir je le feroie,
Dont je mach en garde de li
Mon coer, quel part que je soie,
Se plus, etc.
este cançon ditte et finie,
Argente fu appareillie
De traire la dame a .i. lés,
Et dist : « Dame, venés, venés.
« Vostre cousine est en grant painne
« D’une fievre qui le fourmainne,
« Et si ne demande fors vous.
« Prendés a toutes et a tous
« Congtet, et dittes qu’il s’esbatent
« Et ja pour ce il ne s’abatent ;
« Assés en avés pour meshui.
Et celle qui n’amoit autrui
A painnes, fors que sa cousine,
Prent errant congiet sus ce signe,
Dont elle se tient enfermée.
Pour ce n’en fu en riens tourblée
La reste, mais pria a toutes
Et a tous, pour oster les doubtes,
Qu’il perseverassent en joie. f. 126 d
Puis se part et se met en voie
Entre lui et sa camberiere.
Cilz qui portoient la lumiere
Par devant vinrent jusc’a l’uis.
Plus avant n’alerent de puis
Qu’il furent venu jusqu’a la, [107]
A la cambre ou on leur donna
Congiet. Adont s’en retournerent,
Et elles en la cambre entrerent ;
Si fu fremée bien et fort.
Hermondine, pour reconfort
Donner a sa cousine errant,
S’en vient doucement par devant
Le lit, et illecques s’apoie.
Florée ne se tient pas coie,
Mais se plaint, quant la sent venue
Sa cousine et vers li se rue
Et dist : « Cousine, je sui morte.
« J’ai voir une fievre si forte,
« Que j’en ay trop mal en la teste.
« Irés vous meshui a la feste ?
« Est li rois vos peres couciés ?
« Pour Dieu, que point ne m’eslongiés !
« Si me ferés trop grant solas. »
Et la belle respont en bas
Et dist : « Cousine, volentiers.
« Mais dittes moy dont cilz dangiers
« De la fievre vous est venus.
« C’est uns maulz pesans et agus,
« Et qui fait moult a ressongnier.
« Voelliés de vo santé songnier,
« Je vous en pri, chiere cousine. »
Et Florée .i. petit se cline,
Et dist : « Cousine, grant mercis. f. 127 a
« Mais cilz maulz seroit tost garis
« Se vous voliés ja, au certain. »
Lors mist Hermondine sa main
Sus son cief et dist : « Oïl, voir.
« Puis que santé poés avoir
« Par moy, je voel que vous l’aiiés.
« Vous est il par moy envoiiés ? »
— « Nennil. » — « Et de quoi vient il dont ? »
Et Florée adont li respont,
Qui .i. peu le voir li eskiewe :
« D’une paour assés hastiewe,
« Que j’ai eü apriès souper. »
— « Paour ? » — « Voire, et esçou tout cler
« C’on conçoit fievre par paour. »
— « Oïl, voir. » Et lors sans demour,
Hermondine, com esbahie
Et qui bien cuide estre trahie
Quant on a tourblé sa cousine,
Dist, et prie et li moustre signe
D’amours trop plus grant que devant,
En disant : « Cousine, or avant.
« Dittes qui vous a couroucie. »
— « Il ne m’a point esleecie,
« Mais irée, saciés de voir. »
— « Briefment il le me fault savoir.
« Si en serés mieus apaisie. »
Et Florée, qui est aisie
De dire tout ce qu’elle voelt,
Dist : « Cousine, estre ce ne poet
« Que vous le saciés. » — « Si ferai.
« Au mains conseil y metterai
« Ou ferai mettre par nos gens. »
Dist ceste : « Il n’est point voir ceens,
« De qui celle doubte me vient. » f. 127 b
— « Dont est il ? savoir le couvient.
« Trop y faites refus dou dire. »
— « Je ne vous en ose desdire, »
Dist Florée, « puis qu’ensi est.
« Ceste fievre a present me nest
« Pour cesti qui tout a vaincu,
« Le chevalier au bleu escu
« En qui proece se deporte ;
« Cesti qui le soleil d’or porte,
« Qui ocist Camel de Camois,
« Et par qui dou tout li tournois
« A hui esté autorisiés,
« Et qui a esté si prisiés,
« Qui de droit a le pris conquis.
« Orains il estoit toute nuis ;
« A moy envoia .i. varlet
« Et me dist qu’il voloit de fet
« Venir par dedens ce chastiel,
« A cui que fust ou lait ou biel,
« Pour vous veoir, c’est la substance,
« Et feroit ce en men istance.
« Il le me manda tout ensi
« Et, lors que le varlet oÿ,
« Je fui esbahie forment
« Car ne vodroie nullement
« Qu’il venist ceens sur nous deus.
« S’est il bien si chevalereus
« Qu’il n’i meteroit que le faire. »
Adonques dist la debonnaire
Hermondine, comme courtoise,
« Cousine, il me desplaist et poise
« Que pour ce estes couroucie,
« Car je le veroie une fie,
« Ossi volentiers a mon gré f. 127 c
« Désarmé, que je l’ay armé
« Hui veü tres bien tournoiier.
« S’il fust venus esbanoiiet
« Ceens, et vous le sceuissiés
« Et moy, quel mal en euissiés ?
« Ostés vostre merancolie,
« Car j’en seroie plus jolie,
« Certes, se veü je l’avoie. »
Et quant ceste entent qu’en la voie
Est sa cousine et amoureuse,
Si en fu grandement joieuse,
Et puis .i. bien petit souspire
Et dist : « Lasse ! je n’ose dire
« Tout ce qui sus le coer me gist. »
— « Pour quoi ? » Hermondine li dist.
« Ceens poés faite a vostre aise.
« Riens ne dirés qui me desplaise,
« Non plus qu’en la vostre maison »
Et quant Florée ot tel raison,
Si dist : « Cousine, grans mercis.
« Je vous di vraiement que cilz,
« Qui a hui vaincu le tournoy
« Et dont nous avons, vous et moy,
« Tant parlé puis .i. mois en ça,
« Est ceens. » Adont li compta
De mot en mot comment il vint,
Et comment aler le couvint
En une cambre pour Argente,
« Qui en fist trop fort la dolente,
« Quant jusc’a ceens l’amenay.
« Certes, cousine, veü n’ay
« Ne ne verai en mon vivant
« Chevalier de tel couvehant,
« Plus gratïeus ne plus joli, f. 127 d
« Ne a qui mieulz aviegne a li
« Uns grans biens, et il l’ara voir.
« Il a hardement et voloir,
« Corps, proece et grant renommée,
« Et si estes de li amée
« Sur toutes riens, je vous creante ;
« Car pour vostre amour recreante
« Tous chevaliers et lait aler,
« Sitost que il les ot parler
« De vous et de la queste ou sont
« Et que pour vostre amour il font,
« Et les envoie au roi Artu.
« Je ne vi onques tel argu
« Avoir a chevalier qu’il a.
« Se vous volés il vous vera
« Et, se vous le volés ossi,
« Il s’en rira, cousine, ensi
« Que ceens est venus, sans doute.
« Car voir si fort il vous redoute
« Qu’il n’oseroit nullement faire
« Cose qui vous deuist desplaire.
« Or, m’en respondés liement
« Vostre entente et legierement. »
e ne fu mies grant merveille
Se cremeurs, qui souvent resveille
Mainte dame frice et jolie,
Fu en la place appareillie
Pour esmervillier Hermondine.
Elle le fu et bien le signe
En moustra, vous orés comment,
Car elle dist : « Je me repent,
« Cousine, de ce que j’ai dit.
« Que feroiie, se Diex m’aÿt,
« Se cilz chevaliers chi venoit f. 128 a
« Et ja par le doy me tenoit ?
« Je seroie trop esbahie.
« Il vault trop mieulz, quoi que je die
« Ne aie dit a le bonne heure,
« Qu’il s’en voist que droit ci demeure.
« Car je ne sui pas coustumiere
« De parler, ne point la maniere
« Ne sçai comment je parleroie,
« Se devant moy je le veoie.
« J’en commence ja a fremir
« Et lui grandement a cremir.
« Laiiésle aler, Diex le conduise
« Et n’ait nulle riens qui li nuise.
« Je vodroie sur toute rien
« Que Diex lui envoiast grant bien,
« Tout ensi qu’il en est merites. »
Respont Florée : « Et vous que dittes ?
« Cousine, vous vous fourvoiiés.
« Pensés vous que assés n’aiiés
« De sens, d’avis et d’attemprance,
« De maniere et de cognissance
« Pour parler a .i. chevalier ?
« Vous le sarés mieulz recueillier,
« Et par parole plus meüre,
« De ce sui je toute segure
« Qu’il ne vous osera parler.
« Laissiés Argente avant aler.
« Il est heure c’on le voist querre.
« Chi n’affiert ne courous ne guerre,
« Fors que paroles gratïeuses
« Et ossi aucunes huiseuses.
« Il est bien si doulz et si frans,
« Si preus et si entreprendans,
« Et si garnis de grant prudense, f. 128 b
« Que ja n’arés de li, g’i pense,
« Fors que parlers doulz et courtois,
« Et si serons droit chi nous trois
« Et il sera tous seulz, cousine.
« Vous ne serés ja si estrine
« Qu’il sera estrins, je m’en vant,
« Car nous saudrons tantos avant
« Et parlerons bien au besoing
« Pour vous, de tout ce n’aiiés soing,
« Car aussi le cognois je assés,
« Et si sera tantost passés
« Vo parlement, sans detriance,
« Car mettre y vodrai attemprance.
« Je li dirai qu’il s’en retourne
« Et qu’il s’en voist, ains qu’il ajourne. »
A ces mos, se test Hermondine,
Et fait a Argentine .i. signe
Qu’elle voist le chevalier querre
En la cambre qui si bien serre.
Et Argentine avant salli
Sitos que sa dame entendi ;
La clef met en l’uis et si l’uevre.
En l’uis ouvrant perdi son oevre
Melyador qui la ouvroit,
Je vous dirai sur quel endroit.
uant Argente la camberiere
Ot laiiens mis a la priiere
De Florée Melyador,
Le chevalier au soleil d’or,
Il fu qu’en alant, qu’en venant,
Ensi que j’ay dit ci devant,
Moult longement, saciés pour voir.
Entrues li couvint il avoir
Aucune pensée jolie f. 128 c
Ou espoir grant merancolie,
Car mies ne savoit encor
Comment il venroit jusc’au cor
De ce pour quoi est la tenus.
Et se li estoit revenus
Li pourpos ou il eut esté
En devant une quantité,
Quant Florée parti de li,
Qui a ce dont le recuelli
Diversement, ce li sambla,
Comment que bien s’en escusa,
Quant il se fu fais cognissables.
Siques Melyador, comme ables
En ces imaginations,
Avoit dit ensi : « Il n’est homs,
« C’est une cose moult commune,
« N’ait tous les jours quelque fortune
« Ou mole, ou dure ou perilleuse.
« Veci cose moult mervilleuse ;
« On me tient ci ensi qu’en mue.
« Fortune grandement m’argüe,
« Et pour ce qu’elle est si perverse,
« Et avoech moy elle converse
« Et a ja conversé maint jour,
« Entrues que j’ai ci bon sejour
« Et loisir, selonc ma samblance,
« Je vodrai mettre en ordenance
« Une balade incontinent,
« Et le ferai de sentement,
« Car j’en ay grandement matere. »
En ces parlers, c’est cose clere,
Melyador fist la balade,
Moiiennement lié et malade.
f. 128 d
Se fortune la tres fausse et perverse
Est contre moy, je voel a ce penser.
A maint homme a esté dure et averse,
Et puis apriès on l’a veu retourner,
Et pour ce voir je me voel conforter
Sur cest espoir, que je sai tout de fi,
Que le temps n’est mies toutdis onni.
Car quant li plaist, je sçay bien qu’elle excerse
Cui qu’elle voelt, et fait en hault monter
Et puis apriès en brief temps jus le verse.
Si en haste fait sa roe tourner,
Siques en li nulz ne se poet fier.
Aussi, certes, point je ne m’i affi
Que le temps n’est mies toutdis onni.
Et comment dont c’avoecques li converse,
Je doi toutdis le milleur esperer,
Car s’elle estoit .m. fois plus diverse,
Si voel je bien son pooir endurer.
Car bon espoir me voet confort donner,
Et si me fait souvenir de checi
Que le temps n’est mies toutdis onni.
este balade moult bien siert
A Melyador, qui la iert
Par dedens la cambre enfremés.
Vis li est qu’il y a remés
Et sejourné .i. lonch termine.
A ces cops evous Argentine,
Qui deffrume l’uis en soudain ;
A son caperon met le main
Et le dit chevalier salue,
Et li dist, ou a la value :
« Sire, or avant, on vous demande. »
De ce parler ot joie grande
Melyador, bien le saciés, f. 129 a
Il est .i. petit avanciés,
Et se part et s’en va avant,
Et la damoiselle devant,
Qui l’alume et entre en sa cambre,
Qui estoit listelée d’ambre.
Florée et Hermondine estoient
Dalés le lit ; la s’arrestoient.
Or fu Melyador souspris
Et de langage mus et pris,
Quant il vit sa dame en la chiere.
Toutes fois pas n’est trais arriere,
Mais s’avance moult doucement,
Et salue benignement
Hermondine et sa compagnie.
Et celle, qui fu esbahie
Quant le chevalier vit venant,
S’est retrette et non mise avant.
Adonques Florée s’avance,
Qui bien en vit la contenance
Que pris estoit et elle prise ;
C’est une cose que moult prise.
Si respondi pour sa cousine,
Et tant sachiés c’a Hermondine
Fist la response trop gr