No sap chantar qi so non di

La bibliothèque libre.
Sauter à la navigation Sauter à la recherche
Der Troubadour Jaufre Rudel, sein Leben und seine Werke
A. Hettler (p. 66-68).

No sap chantar, qui so no di,
ni vers trobar, qui motz no fa,
ni conois de rima cos va,
si razo non enten en si ;
mas lo mieus chans comens aisi,
con plus l’auziretz, mais valra a a,

Nulhs hom nos meravilh de mi,
s’ieu am so que no veirai ja,
qu’el cor joi d’autr’ amor non a
mas d’aissella, que anc non vi ;
anc nom dis ver ni nom menti,
ni no sai, si ja so fara a a.

Colp de joi me fer, quem ausi,
e ponha d’amor, quem sostra
la carn, don lo cors magrira ;
et anc mais tan greu nom feri,
ni per nulh colp tan non langui ;
quar no cove ni no s’esca a a.


Anc tan suau nom adarmi,
mos esperitz tost no fos la,
ni tan d’ira non ac de sa,
mos cors ades no fos aqui ;
mais, quan mi reissit lo mati,
totz mos bos sabers mi desva a a.
 
Ben sai c’anc de leis nom jauzi,
ni ja de mi nos jauzira
ni per son amic nom tenra
ni coven nom fara de si ;
ni per nulh joi aitan no ri,
e no sai quals bes m’en venra a a.
 
Un’ amor lonhdana m’auci,
el dous dezirs propdas m’esta,
e quan m’albir, qu’ieu m’en an la
en forma d’un bon pellegri,
mei voler son siei anc issi
de ma mort qu’estiers non sera a a.
 
Peironet, passa riu d’Ili,
que mos cors a lieis passara,
e si li platz, alberguar m’a,
per quel parlamens sera fi ;
mal me faderon mei pairi,
s’amors m’auci per lieis que m’a a a.

8. Bos es lo vers, can noi falhi,
e tot so quei es, ben esta ;
e sei que de mi l’apenra
gart se, noi falha nil pessi ;


car si l’auzon en Caerci
en Bertrans el coms en Tolza a a.

Bos es lo vers, e faran hi
calque re, don hom chantara a a.