Si Feragu s’estormi et esclaire,
Forbi ses oilz e dist : « Alas ! pecaire,
« Quant ca dormi, l’en m’en devroit detraire
« E ci davant me voi mon aversaire
« Que n’a voloir fors qe de moi desfaire !
« S’il bien en fust aveü de l’afaire,
« Bien m’aüst mort cist François de put aire. »
Ensi comence le Paiens a retraire ;
Mais quant il vit le grant peron de quaire
O il avoit repoisé son viaire,
Lors se remembre, come bon rementaire,
Que ce avoit feit le neveu l’emperaire.
Lors fist senblance et douce et de bon aire,
Pués en jura Machomet e sa maire :
« Plus vault cestui d’onor et de bien faire
« Que tot les homes deci Julis Cesaire ;
« Si je le pués a mes quatre Diex traire,
« N’avroit ou munde nus hom qe me contraire. »
Feragu laçe son vert hiaume d’achier,
Vers le niés Carles se mist por droit sentier.
Qui dunc veïst nostre duc redreçer,
Brandir l’espee et l’eschu enbracier.
Dist l’Arabi : « Areste, chevaler ;
« Asez porons l’uns l’autre laideier.
« Je voul un poué ensanble o toi parler,
« Plus ne te pués mon coraje celer.
« Quant de ton estre me vient bien a penser,
« Soz ciel n’a home, tant sache deviser,
- ↑ — 3582 Bradist — 3584 porõt — 3585 ensanble doi.
— 3561 Si feit f. — 3562 sez ollz — 3563 leu men deuoit — 3565 voilir — 3571 Hors — 3573 & douez & — 3574 iurai machon e la m. — 3577 Sue le — 3578 Nauoit
