« Voil en tel guise la cité tastoner
« Che honor n’avront cil chi Deus veut amer,
« E Saracin daumaçer e daner. »
Le ban oïrent li petit e li grant ;
C’est grant miracle che tuit furent joiant
De la cité combatre amantenant.
Iluech ni fu escüer ni serjant,
Valet da pé ni ribaut ensemant
Che de l’armer ni alisent travailant :
L’un quier a l’autre son or e son arjant,
Car dou bien randre funt les grant argument ;
A vint, a trente se vunt entredisant
Le uns a l’autre, jurant e prometant
Che lor gaaing partirunt loialment.
Les jentil homes si funt ensemant :
Lor escüer blandoient duremant
E ça e la les vunt a main menant
E a lor disent douçemant en riant :
« Or serés riche avant dos jor pasant,
« Mai non sevrés de moi ni tant ni quant,
« Si ch’a un besoin teneç mon auferant :
« Or bien parra se m’estes bienvoilant.
« Tiel ait esté enç l’estable servant
« Ch’iert cevaler sor cist asemblemant. »
Franch repausent la nuit trosche au maitin
Che mese hoï Çarles le fiuç Pepin ;
