Page:Castets - La Chanson des quatre fils Aymon, 1909.djvu/435

407

les quatre fils aymon

4715Valet de primes barbe ; l’autrier fu adobés.
Saines et la lor gent a tos desbaretés
Et li rois Escorfaus est en prison jetés.
Jamais n’en istra fors, s’il n’est^[1] crestianés
Et trestous ses barnages en fons regenerés.
4720Il a à non Rollant, ensi est apelés.
Charles fait .i. cors faire, li jors est devisés ;
M 125A feste saint Jehan est li cors creantés.
Li bernage de France i sera asamblés.
Dex ! tans rices destriers i aura amenés !
4725Li rois i met tresor, ja si grant ne verres :
.cccc. mars d’or fin et .c. pailes roés
Et sa riche corone dont il fu coronés.
Cil qui le cors vaintra, l’avoirs li est livrés ;
Ja n’en perdra por home^[2] .ii. deniers moneés. »
4730Quant Renaus l’entendi, si en a ris asses.
Maugis en apela : « Biaus cousins, ça venes.
Tous seus irai au cors, se vos le me loes. »
« Sire, ce dist Maugis, se vos plaist, non feres ;
Ains menrois owec vos .c. chevaliers armés.
4735Se reconnus i estes, miels vos en aideres. »
« Volentiers, dist li dus, quant vos le me loes. »
A icele foie est si li plais remés :
La nuis est revenue et li jors trespasés.
Cele nuit s’est Renaus richement conreés ;
4740Par tans se vait couchier, au matin est levés ;
Tres k’à .c. chevaliers a Amaugis mandés,
Et quant il sunt venu, ses a araisonés :
« Baron, prenes les armes et si vos adobes.
En cel autre païs avec nos en vendres. »
4745Et cil li respondirent : « Si com vos comendes. »
Maugis a comendé que Bondins fu sonés,
Et il si fu molt tost et sor la tor portés.
Li baron s’apresterent, es les vos tos montés.
Renaus vint à la dame de cui il fu amés :
4750Doucement l’embraça par en .ii. les costés ;

1. 4718 Ms. a bien s’il n’est.
2. 4729 A par homme.