Nous Gautiers de Joinuille sires de Vauquelour . Et nous Ysabiaus de Cereix . dame de Vauquelour sa feme . fasons sauoir a toulz presens et auenir . Que par lacort . de nostre signour . et pere mon signour Joffroy de Join / -uille premier signour de Vauquelour . Et par la requeste de toute nostre gent de Vauquelour . Et pour le profit . et lutilitei . et la croissance de la Uille . et dou chastel de Vauquelour . Avons quttez et quttons . franchi et afranchissons nostre / gent de Vauquelour . Et lor hoirs . Et toulz celz qui uanront demorer en la uille de Vauquelour . De toutes milles . de toutes prises . et de toutes seruitures . fors nous noz homes de cors defors la uille de Vauquelour C Ne nous / ne nostre hoir . ne poons retenir en la uille de Vauquelour . ne Juix ne prestours a montes . C Et pour ceste franchise . sont tenu les gens de Vauquelour . a rendre chaucun an a nous . et a noz hoirs . chaucuns daux . pour chaucune livre / uaillant de lour heritaiges deus tornois petiz . et chaucuns conduiz chaucun ay deus soulz de tornois petiz . Cest a savoir . doze deniers le jour de la saint Remey . en chief doctembre . Et doze deniers landemain de pasques ansigant / de la monoie desus dite . C Et li prodome de la uille de Vauquelour . esliront quatre prodomes . a la saint Remey pour estre escheuins jurez . et un clerc Jurey . Et paieront le clerc Jurey . Et le remueront chauquan ansi qme [comme] luy des / escheuins jurez Li quel quatre prodome et li clers deuant dit jureront quil garderont n're droiture et la droiture de la uille de Vauquelour en bone foy . ne al qui seront esleu ne porront contredire quil ne fussent ou mestier Et / se il ne lez auoient esleuz dedans la quinzeine de saint Remey toulz ou partie . nous ou n're hoir . ou n're qmendemens [sc. commandemens] . i porriens mettre celz qui defauroient . Et se nous ou n're qmendemens . et li prodome de la uille de Vau / -quelour ueissiens que li quatre escheuin iurey . ou li clers . ou aucun daux . fussent profitable a demorer ou mestier . il les i remeteroient . et renoueleroient lour sairemens . Et cil quatre ou li dui daux au moins . se tuit ni po / -oient estre . seront auec n're qmendement a tenir plaiz . Et se tuit ou partie estoient en doute daucun iugement . il le querroient au gentis homes . et au prodomes de la uille de Vauquelour . Et sil ne le poioient la trouer il / lenuieroient querre a Joinuille . Et sil ne le pooient la trouer . il lenuieroie't e'querre a Uitrey C Et le cour de la saint martin . nous ou n're qmendemens . cest a sauoir uns pour nous . et nostre preuos . et li clers Jurez . et li quatre escheuin iuri deuant dit . demanderont a chaucun de celz de la franchise de la uille de Vauquelour la ualour de lour heritaiges . et cil seront tenu a uenir deuant aux a lour requeste . et dire uoir . Et sil es / -toient en doute dou pris de leritaige . il seroit tauciez par les sept desus diz . et renderont de chaucune liure de leritaige si qme desus est dit . et seront tenu a paier dedans la quinzeine apres ce que li pris serat faiz . Et sil ne paioient dedans la quinzeine . nostre qmendemens . et li escheuin Jurey uenderoient tant des biens muebles et nommuebles a chans et a uille . a deniers contans . que nous en seriens paie dedans les / huyt jours apres . Et sil auenoit chose que lan uendist heritaige . cil acui li heritaiges aueroit estei . ne siu hoir qui en pays seroient . ni porroient reuenir sil ne le rachetoient dedans les huyt jours apres ce quil / seroit uenduz . Et al qui seroient fors dou pais i porroient reuenir dedans les quarante jors apres ce quil seroient [?reuenu] . et sil ne lauoient rachetez dedans les quinzeine jours . il ne porroient puis reuenir . Et nous / seriens tenu a garantir a celui qui laueroit acheter en la maniere desus dite . Et sil nel pooient trouer acui uendre . li heritaiges seroit n'res par le pris des echeuins jurez deuant diz. C Et cil qui seront en n're / leu . et n're preuoz et li clers jurez . seront tenu a faire sairement . de sauuer n're droiture . et la droiture de la uille chaucun an . en bone foy. C Et li home de Vauquelour et cil de la franchise . et cil de la t're . puent / acheter li uns aux autres si qme deuant sauues noz coustumes et noz droitures . C Et se nous uoliens amander nostre uille . ou nostre forteresse . ou faire aucune aisance . en la uille ou en finaige . et il eust aucu' / heritaige nous laveriens par achat ou par eschange . au dit des sept desus diz . Et est a sauoir que se li sept desus dit se desardoient . Cest a sauoir . nous . ou n're comendemens . et li preuos . et li clers jurez . et li quatre esche / -uin jurey de la uille . en cest pris . ou en autre pris nul[.] de la franchise . ou dautre chose . la plus grans partie an seroit creue . C Et est a sauoir que il nous doient nostre raignable aide . pour marier noz filles . et pour aler / outre mer . en tel meniere quil paieront a laide chaucuns conduiz quatre soulz de la monoie desus dite . Et pour chaucune liure uaillant deleritaige quatre deniers de la monoie deuant dite. C Ne nuns de celz de la / franchise que nous ou n're qmendemens . uoississiens faire preuost . ou doien . ou celerier . ou fouretier si come nous fasiens auant . ne puet refuser quil ne le soit . a la requeste de nous . ou de nostre comendeme't . Ansi q' / li preuos . li doiens et li celeriers seront quite de ce quil doient pour la franchise tant qme il seront en nostre mestier C Les gens de la franchise doient user en nos usines . et se nous en fasiens ou aquestiens nul / -les en Vauquelour ou en finaige . il i useroient ansi. C Et se nous auiens mestier de charroi de la uille . nous laueriens par raignable pris . et cil pris seroit faiz par les desus diz en la meniere desus dite . et seroient li / denier paie des leueures de la premiere franchise ansigant . C Et chaucuns hom qui auerat vint liure de mueble auerat une arbelestre . et cinquante quarriaux et aueront armes . et seront armes sufisament tuit / al de la franchise si qme il est desus dit dedans la saint martin . et monstreront lour armes a nous et a nre qmendement . quant il an seront requis de la saint martin en auant . et cil qui naueront armes si qme desus est dit / seront tenu en cinc soulz de petiz tornois damende . Et couerroit quil eussent lour armes dedans quarante jours apres . et tants foiz come il en defauroient . seroient tenu en lamende si come desus est dit . et cil qui paura ar / -meure en gaige . paierat doze deniers et perdera sa dete . C Et se nous ou n're hoir uoliens faire ourer au murs de la uile de Vauquelour pour la fermetei . il nous soigneroient une charrete a dous chevaux . et le charreton a tout / lour coulz tant qme il nous plaira a leure auant dite . ne nous ne les porriens inettre en autre eure . C Et saucuns hom de la franchise estoit pris ou arrestez ou les seues choses pour nous . nous le delivreriens au nostre . et les seues choses . Et se nous en defaliens . li prodome de la uille le deliureroient des deniers de la franchise ansigant . Et se il estoit pris pour le meffait de lun de celz de la franchise . nous leu aideriens a deliurer en bone foy come / sires a lour coulz . Et cil pour cui meffait il seroit pris li seroit tenuz a rendre ses despens . a lesgait dou preuost et des eschuins jurez C Et poons mener ou faire mener celz de Vauquelour . en host ou en cheuauchie . quatre jours au lour et / se nous les uoliens plus tenir . nous lour donriens seix tornois petiz le jour . a chaucun de celz qui aueront haubert . et cheual . et a chaucun des armez a pie deus tornois petiz le jour . et seroient a tant tenu a seruir a nous . et a nos hoirs . tant qme il nous plairoit . Et nous lour prometons en bone foy . q' nous ne les marons ne ferons mener en host ne en cheuauchie par fauce enshoison . Et se nous estiens hors dou pais . n're comendemes les porroit mener en la meniere de / -sus dite . pour deffender noz t'res et noz fiez . et les t'res et les fiez mon signour de Joinuille . Et cil qui aueroient essoine leaul . q'nt li os . et la cheuauchie seroient semonues ou li criz faiz . en seroient quite . ne ne pairoient point da / -mende . C Saucuns de la franchise at deus cuissins et deus dras tant seulement pour son lit . on ne les puet paure pour dete ne pour plegerie ne ce quil uest a chaucun jour. C Et se nous ueniens en la uille li doiens porroit paure des cuissins p' / nous et pour nos hostes . et rendre si tost qme n're hoste en seroient a lei. C Li menu pescheour de Vauquelour pescheront a la menuse a pie chaucus par lui a la triuile . et au jouchies . Ansi come il ont fait auant . C Et est acordei par nous et p[ar] / noz gentis homes . et par celz de la fra'chise que on refera les uignes darriers le chastel . que autre foiz ont estei auignies . ansi qme li pourpris des uignes le donne dedans trois ans a uenir. Et se elles nestoient auignies dedans le t[er]me . le defaut / nous ou n're qmendemens sil nous plaisoit meteriens en n're demoine . Et saucune beste i estoit prise a meffait . ou tans que li bans i est . elle deueroit doze tornois petiz damende . C Et saucuns de la franchise estoit tenuz a nous ou ai au / -trui pour dete on ne porroit mett'e la main a lui . tant qme on trouueroit tant uaillant de la seue chose en mueble et en heritaige qme la some monteroit . C Et est a sauoir que tuit cil de la franchise tiene't et faront tout lour heritiage . quil / ont et aueront . en noz t[er]res . et en t'res a noz hoirs signours de Vauquelour qui ne muet dantrui chaucuns conduiz une geline chaucun an . C Et est a sauoir que ous auerons . un sael . et contre sael dottroy . pour celz qui uenderont heritai / -ge . et pour celz qui lachereront . et paurons doze deniers de lachetour . et doze deniers dou uendour . et de celui qui obligera . heritaige on engaigera en quelque meniere que ce soit doze deniers . et de celui qui le paura doze deniers . et ces / saelz [.]ardero't n're qme'deme's luy . et li escheuin ou li uns daux quil estiront laut C Et se nous ou n're qme'demens [sc. commendemens] auons mestier daler a jour . ou a parlement . nous porro's mener celz qui nous plairont de la franchise . a n're raig / -nable despens iusques a quatre . et ne le porront refuser . C Et se nous uolons anuoier messaige a cheual ou a pie . nous i porrons a'uoier messaige souffisant . en bone foy quel quil nous plairoit de la fra'chise de la uille a n're raignable des / -pens par lesgart des escheui's jurez . C Se li preuos ou nre comendeme's les Wet mener tous ou p'tie pour faire aucune panure . il seront a lour couz se il reuienent le soir a lour ostery . et se il ne reuienent le soir a lour ostery . il seront / des anqui en auant a n're coust tant qme nous les caurons hors . C Et est acordei par nous et par n're gent . et par noz gentis homes . que on ne donra point de pain a nul menourier . et que nuns ne pa'ra an un jour plus de uint faucillours fors que nous . et qui trespassera dou pain il paiera . une soulz damenda de la monoie desus dite . et the chaucu' faucillour quil paura plus de uint doze deniers damende . C Et saucu's hom de la franchise . et de la t're de Vauquelour / estoit ploiges ou rauderres pour aut' de la dite uille de Vauquelour . ou de la t're . et il en p[er]doit gaiges . cil por cui li gaige seroient perdu . ne seroient tenu a rendre qu le double . C Ne cil de la fra'chise de la uille de Vauquelour . naueront reclai' / ne resort tant qme il seront desous nous . Fors qua nous . et a n're comendeme't . se ce nestoit par defaut de droit ou par faus jugement . C Et caurons le chastel et la uille de Vauquelour . a tel droit et a tel us . come on at usei . sauue la franchi / se desus dite . C Et al de la franchise de Vauquelour tienent et tanront . lour muebles . et lour heritaiges . quelque part quil soient demorant parmi dous deniers paians a nous de la liure de leritaige si come auant est dit . et des h'itai / -ges quil ta'ront desous nous . ou desous noz hoirs en quelque leu que ce soit . lou nous auons et auerons ban et justice . il ne puent auoir resort . ne reclam maisque a nous . ou a noz hoirs . fors que au signours de Joinuille . aux queiy / il iroient et porroient aler come a souueraine pour defaut de droit ou par mauuais jugement . C Et est a sauoir que touz iours se tient et tanret ceste chartre an sa uertu no' contrestant usaige qtraire . que nous ou nostre / hoir peussiens dire ne monstrer contre celz de la franchise de Vauquelour . ne que il ou lour hoir peussent dire ne monstrer contre nous et noz hoirs C Toutes ces couuenances desus dites . A nous nous jutees atenir . et agarder en bo / -ne foy sauues noz rentes . et noz autres droitures que ci ne sont no'mees . auec celles que ci sont no'mees . Et Ysabiaus de Cereix n're compaigne auant dite . et n're hoir qui tanront la chastelerie de Vauquelour sont tenu a faire / le sairement . Et uolons que quiconques taigne Vauquelour par bail ou par douarre . ou en autre meniere . soient tenu a faire le sauement et a garder . a la requeste des bouriois de la franchise . C Et volons et octrions . que / se nous ou n're hoir defaloient a tenir et a garder ces couuenantes desus dites . fust en tout fust en partie . que mes sires de Joinuille que qui onques an soit sires . il et siu hoir les feissent tenir et garder a nous et a noz hoirs . / Et lour octrions queil puissent par tout paure de la n're chose . se nous ou n're hoir anfraigniens ses auant dites couenances . jusques a tant q' ce que anseroit anfraint fust amendei . C Et pour ce que ce soit ferme chose et / estable a touz jours . Nous Gautiers de Joinuille sires de Vauquelour . Et Ysabiaus de Cerere dame de Vauquelour sa feme desus dit . Avons mis noz saelz en ceste presente chartre . Et a plus gut' seurtei pour ces quena' / ces desus dites miex tenir . Je Jehans sires de Joinuille et senechaux de champagne . par lacort de mon chier frere Joffroy de Joinuille premier signour de Vauquelour . Et par la proiere et par la requeste de mon amai neuuou Gautier / de Joinuille signour de Vauquelour . et de Ysabiaul de cereix sa feme . et par la requeste . et la uolontei de la co'munautei de la uille de Vauquelour . li quel mont proie et requis . que je ces choses face tenir fermement . se nuns daux en / aloit encontre . Ai mis mon sael en ceste presente chartre . sauue toutes mes droitures come sires souuerains dou fief . Et ai promis a faire tenir en bone foy . ces couenances desus dites . Et Weil quequionques soit sires de Joinuille soit / tenus a faire tenir ces couenances ansi qme elles sont desus escriptes. C Ceste chartre fut faite et don'ee . lan de grace que li miliaires de Lincarnation n're signour courroit par mil Dous Cens . Quatre Uinz . Deix . / et Huyt Ans . En mois De Septembre .
