« si com cil qui vos viut de tout sen cuer hair,
« et mult nos quide bien par sa force honnir.
« ainc home de batalle ne vi si arainir ;[1]
« par losenge me vot de vus faire partir,
« et dist qu’il me feroit tout rendre, à mon plaisir,
« quanque Daire me tolt et que jou suel tenir ;
« et me vot de son règne i. quartier departir,
« por tant qu’à son service me vosise obéir ;
« mais jou n’ai mie cuer de mon signor traïr,
« si li sot bien respondre, à bon mos, sans mentir,
« que jou signor avoie plus vallant à servir,
F. 7bqu’il ne fust, ne rois Daire qui me vot malbaillir.
« et sacies, de l’ treu ne se viut astenir
« que il ne l’ vus demant, que qu’en doie avenir. »
quant l’entent Alixandres, si commence à fremir ;
d’ire et de mautalent prist sa faces à noircir,
et jure celui Deu qui solel fait luisir
que l’un d’aus ii. convient en batalle morir.
à ces mos en alèrent as batalles[2] jesir,
et au main,[3] quant il virent le solel esclarcir,
fait li rois le harnas et les tentes quellir.
jamais ne s’i volra arester ne tenir
de si que de Cesare pora les tors veir.
Dolans fu et pensis Nicolas des respons
que li mande Alixandres, li cuvers,[4] li felons,
que ne l’ pora garir fermetés ne dognons.
de partout son roiaume a mandé les felons,[5]
que lor convient laisier esperviers et faucons,
et facent ratorner[6] de novel les blasons,
et bones armes aient et les cevaus Gascons ;
quar bien lor est mestiers, isi com nous quidons,
et viegnent à Cesare, à coite d’esporons,
aparillié de guerre ; partans en est besons.
tous esmuet les pais k’il ot larges et lons ;
si en jure les Dex à cui il fait ses dons
que se il i remaint chevaliers ne peons
Page:Lambert li Tors - Li romans d’Alixandre, 1846.djvu/50
Cette page n’a pas encore été corrigée
22
ENFANCE D’ALIXANDRE.
