voie mes veneurs, mes braquonniers, mes chiens, mes oiseaulx et mes gentilz hommes et serviteurs quy honnourablement vivoient entour moy. Je souloie naguaires avoir mes palais, mes sales et mes chambres tendues et mes pourvisions et garnisons pour mon estat noblement soustenir et joieuse vie demener. Je souloie avoir mes chevalliers, escuiers, vassaulz, officiers et gens de guerre quy estoient tous appareilliés de garder mon corps et mon honneur. Je souloie avoir mes coffres garnis d’or et d’argent et mes riches joiaulx en bonnes gardes. L’en me souloit aporter mes rentes et mes revenues, mes tailles et mes gabelles de toutes pars de jour en jour, et avecques tout ce je souloie avoir l’amour de mes nobles hommes et de mon pœuple quy a present ne m’aime guaires, et non sans cause, (vo) car ilz sont par mon oultrage et mauvais conseil apovris, occis et emprisonnez par la guerre que j’ay maintenue tant et si longuement que je n’en puis plus. Ainchois me fault languir en douleur, vivre en povreté, user le remanant de mes jours en continuelle desplaisance, lamenter, regretter, plourer, gemir, doulouser, plaindre souspirer, et en maniere de desconfort batre mes paulmes, detordre mes poings, esrachier ma barbe et mes cheveulx et dire : « Helas ! chetif, helas ! dolant, helas, trés malheureux crestien, que deviendras tu ? »
[§ 517] Comme entendre pouez se passa celle nuyt et le lendemain au plus matin se leva le saint preudhomme quy bien avoit entendu les plaintifz que le noble duc Gerard avoit fais. Et quant il eust dit ses devotions par loisir, il adresça sa parole au duc Gerard, et luy demanda se a luy il vouloit parler ; et il luy dist que ouy moult voulentier, quant bon luy sembleroit. Adont le preudhomme mena le duc Gerard en ung requoy a part ou il n’y eust fors eulx deux tant seulement, et la fut Gerard par le saint homme admonnesté par paroles moult gracieusement, et tellement que a luy se confessa des pechiés, oultrages et torffais qu’il avoit commis et faits commettre durant la guerre du roy Charles Martel et de luy ; mais qu’il eust onques eu tort de avoir livré guerre au roy Charles Martel ne voulu il onques faire conscience ne en requerir pardon. Et quant le saint hermite l’eust trés bien escouté, il luy demanda la cause pourquoy il ne vouloit nullement faire conscience de ce que tant hayoit Char-
