Examination faite le jour de samedi en la feste as sains Apostres Symon et Jude l'an de grace mil CCC et sept pour partie et le diemanche prouchain ensivant ensement pour partie des freres de la maison deu Temple de la baillie de Caen sur les articles de leur erreurs scelees deu contrescel nostre seignor le Roi, les quiex articles sont cex c'est assavoir : cil qui sont premierement receu requierent le pain et l'eaue de l'ordre et puis le Commandeour ou le Maistre qui le receoit le meine secreement derriere l'autel où en revestiare ou aillois en secret et li monstre la Crois et la figure de nostre seignor Ihesu Crist et li fait renier le prophete C'est assavoir nostre seignor Ihesu Crist de qui cele figure est par trois fois et par trois fois crachier sur la croix Puis le fait despoillier de sa robe et cil qui le receoit le baise en bout de l'eschine, souz le braeul puis en nombril et puis en la bouche et li dit que si aucun frere veult gesir charnelment a lui, qu'il le souffre quer il le doit et est tenu a souffrir selonc le status de l'ordre, et que pluseurs dols pour cen par maniere de sodomie que font l'un oveques l'autre charnelment. Puis ceint-l'on chascun quant il est receuz d'une cordele sur leur chemise et la doit le freres touz jours porter sur soi tant comme il vivra et entent que ces cordeles ont esté couchiés et mises autour d'un ydole qui est en forme d'une teste d'omme d'une grant-barbe, laquele teste il baisent et aourent en leur chapitres provincialx. Mes ce ne sont pas tint li frere fors li grant-maistre et li ancien. Item les prestres de l'ordre ne sacrent pas sur l'autel le corps nostre seignor Ihesu Crist. Laquele examination fut faite par nous, Freres Robert, sous-prior, Michel Chouquet, lectour, Roger d'Argences, et Johan de Margny deu couvent des Freres Prechœurs de Caen, selonc la forme de la commission sur ceu faire de religieus homme frere Guillaume de Paris, chapelain nostre pere le pappe, Confesseur nostre sire le Roi de France et Inquisiteur deputé d'iceli nostre pere le pape en Roiaume de France de la mauvaisetie de heresies et par nous Hugues de Chastel et Enguerran de Villers chevalier nostre Sire le Roi deputez d'icelui seignor. Quant a ceu sicomme, il apparessoit par ses lettres pressenz a ceste examination, les tesmoingz des quiex, les nons s'ensuivent. C'est assavoir Robert de Breteville, chevalier, Maistre Robert de Caudebeq, clerq nostre Sire le Roi, Monseigneur Johan, chapelain deu dit, Monseigneur Hugues, Johan deu Chastel, clerq, Raoul Gloi, Thomas du Theil, clerq de la visconté de Caen, Henri Campion, Richar Le Tambeour, sergent nostre Sire le Roi et plusieurs autres. Et pour ceu que nous ne povions traire verité des diz Templiers sur les erreurs contenus es diz articles, ja soit ceu qu'il avoient juré par deux fois et este examinez le plus diligemment que nous povions, nous, sous-priour et lettour, Roger et Johan desus diz en la presence de nous les diz Hugues et Enguerran pour ceu que ceus Templiers avoient tout mis en nie, leur monstrasmes singulierement et a chascun par soi plusieurs raisons et plusieurs voies par quoi eus povoient avoir sauvement deu corps et de l'âme si eux vouloient verité recognoistre et soi repentir des erreurs et retorner a la foi et l'unité de Sainte Eglise et comme Sainte Eglise recevoit ceus qui avoient erré et vouloient retorner a la foi et leur promeismez a les recevoir a la misericorde de sante Eglise se einsi le vouloient faire. Et nous, Hugues et Enguerran dessus diz ensement leur promeismez a quitier toute peine temporel dont nostre Sire le Roi les porroit punir de telx erreurs. Et meismement, pour plus mouvoir ses quant a croire verité d'els leur deismez et monstrasmez comme il estoit chose notoire et manifeste que la graignor partie des Templiers deu Roiaume de France avoient cogneu et confessé les erreurs et que les oviations et les deffenses proposees de leur partie en contraire n'estoit chose qui leur peust valoir et que se eus se pariuroient terche fois bien si gardassent que il leur convendroit souffrir tel peine comme le cas requiert. Et ceu fait nous alasmez avant a l'examination sur les articles desus diz et oismez les diz Templiers singulierement, l'un apres l'autre et deposerent sur les diz articles en la maniere qu'il appert par depositions en dedenz escriptes. Et furent les diz Templiers examinez en la sale du petit chastel de Caen le samedi et le diemanche desus diz en la presence des diz Tesmoingz. Et a confirmation de verité, nous, sous-priour, lectour, Freres Roger et Johan devant nommez avons mis nos seaux a cest proces ovecques les seaux des diz Hugues et Enguerran presens as choses en dedenz escriptes.
§ Frere Gautier de Bullens, chevalier né de l'evesché d'Amiens, compaignon de la maison deu Temple de Voymer receu et vestu a Paris par Frere Hugues de Peraut, chevalier, lequel Frere Gautier a esté en l'ordre l'espace de xiii anz ou environ si comme il disoit que avoit juré par deux fois et esté examiné diligemment sur les articles dessus diz les quiex il avoit touz mis en nie. Requis, demandé et examiné derrechief sur les diz articles cognut et confessa touz les erreurs excepté l'ydole fait afforme d'une teste d'omme, lequel il disoit qu'il n'avoit oncques veu ne aouré ne riens n'en savoit. Et du sacrement de l'autel disoit qu'il creoit que les Chapelains deu Temple sacroient le corps nostre seignor sur l'autel comme bons crestiens ne ne savoit pas le contraire et est bien veut que il avoit autre fois confessé que il avoit esté chaint quant il fut vestu d'une cordele sur sa chemise en signe de chastté. Et disoit q'il ne savoit nule mauvestié ne que elle eust esté touché a l'ydole. Et des erreurs qu'il confessoit se repentoit sicomme il disoit et retornoit a la foi et a l'unité de Sainte Eglise et requerroit a nous, sous-prior, Lettour, Roger et Johan desus diz la misericorde de l'Iglise, et a nous les diz Hugues et Enguerran remission de peine temporel. Les quiex choses li furent de nous otriees.
§ Frere Matieu Renaut, commandeour de la maison deu Temple de Breteville-la-Rabel recheu et vestu par Frere Philippe lors commandeour de Reneville a present commandeour de Sainte-Evaubourg. Et a esté en l'ordre l'espace de x ans ou environ sicomme il disoit.
§ Frere Etienne du Noef-Castel, commandeour de la maison deu Temple de Court-Val, receu et vestu a Saint-Estienne-de-Reneville par Frere Girart de Villers lors Mestre de France. Et a esté en l'ordre dis anz sicomme il disoit.
§ Frere Gieffroi Hervieu, compaignon de la maison de Breteville, receu et vestu a Breteville par le dit Frere Philippe et a esté en l'ordre iii anz environs a la mi-Caresme prochaine sicomme il disoit.
§ Frere Johan Challet, compaignon de la maison de Breteville, receu et vestu a Barbonne par Frere Robert, commandeour de Barbonne. Et a esté en l'ordre xviii anz sicomme il disoit.
§ Frere Guillaume le Raure, compaignon de Baugie, receu et vestu a Fontenoi jouste Sablies par Frere Guillaume de Trees, commandeur de Fontenoi. Et a esté en l'ordre xxiii anz ou xxv ou environ sicomme il disoit.
§ Frere Richard Bellenguel, compaignon de la maison de Court-Val, vestu et receu par Frere Aimere, lors commandeour de Reneville. Et a esté en l'ordre xvi anz sicomme il disoit.
§ Frere Guillain Tane, compaignon de Court-Val, vestu et receu par le dit Frere Philippe a Breteville. Et a esté en l'ordre iii anz sicomme il disoit.
§ Frere Henri de Rothours, compaignon de Voymer, receu et vestu a Reneville par le dit Frere Philippe. Et a esté en l'ordre ix anz ou environ sicomme il disoit.
§ Frere Aubin Lenglois, commandeour de Baugie, receu et vestu par le dit Frere Aimere et a esté en l'ordre xxiiii anz ou environ sicomme il disoit.
§ Frere Christofle de Loviers, compaignon de Voymer, receu et vestu a Reneville par le dit Frere Aimere et a esté en l'ordre xxv anz ou environ sicomme il disoit.
§ Frere Raoul de Perrousel, compaignon a Baugie, receu et vestu a Dole par Frere Richard de Bontencourt, lors commandeour de Bourgoigne. Et a esté en l'ordre xxii anz sicomme il disoit.
Les quiex choses leur furent otrees.
§ Frere Guy Pesnee, demorant a la maison du Temple de Louvigny tout soul receu et vestu par Frere Richard de Villers lors commandeour de France. Et a esté en l'ordre environ vi anz sicomme il disoit. Lequel avoit esté juré par deux fois et esté examiné diligemment sur les articles desus diz (les quiex articles), il avoit nié, mis en gehine le samedi desus dit, en laquelle gehine il ne veut riens confesser. En lendemain requis, demandé et examiné sur les diz articles, confessa les erreurs en la maniere qu'il avoient esté confessé des autres dessus diz. Quant a sentence et a vrai entendement, requerant a nous, Sous-priour, Lectour, Rogier et Johan, desus dit, misericorde, et a nous les diz Hugues et Enguerran, remission de peine temporel, laquelle chose lui fut otree.
(Les quiex avoient juré par deux fois et esté examinez diligemment sur les articles desus diz singulierement les quiex articles eus avoit me a plein requis, demandez et examinez chascun par soi derrechef sur les diz articles, cognurent et defosserent les erreurs contenus es diz articles en la forme et en la maniere que le dit Frere Gautier quant a vrai entendement et a sentence et des erreurs qu'il confessoient se repentoient sicomme il disoient et retornoient a la foi et a l'unitté de Sainte Eglise, requeranz a nous, Souspriour Lettour Rogier et Johan desus diz la misericorde de Sainte Eglise et a nous les diz Hugues et Enguerran de peine temporel.)
[Transcription complète annotée sur https://manuscrit-esperluette.jimdofree.com/templier/]
